Jehovah Obok Ubon Esie
Jehovah Obok Ubon Esie
‘N̄kpe mbufo ubọk nte ẹmụm edidianakiet eke spirit ẹkama.’—EPH. 4:1, 3.
DIDIE KE AFO ỌKPỌBỌRỌ?
Nso idi uduak ndutịm Abasi?
Didie ke nnyịn ikeme “ndimụm edidianakiet eke spirit n̄kama”?
Nso idinam nnyịn ‘ifọn ido ye kiet eken’?
1, 2. Nso ke Jehovah aduak aban̄a isọn̄ ye ubonowo?
UBON. Nso ke ikọ emi esiti fi? Ima? Inemesịt? Edidiana kiet nnam n̄kpọ man ẹnyene se ẹyomde? Edinem ebiet ndikọri, n̄kpep n̄kpọ, nnyụn̄ ntịn̄ se afo ekerede? Anaedi ikọ emi esiti fi mme n̄kpọ emi edieke ubon mbufo edide edinem ubon. Jehovah ke idem esiemmọ ọkọtọn̄ọ ubon. (Eph. 3:14, 15) Enye akaduak kpukpru edibotn̄kpọ esie ke heaven ye ke isọn̄ ẹnyene ifụre, ẹbuọt idem ye kiet eken, ẹnyụn̄ ẹnen̄ede ẹdiana kiet.
2 Ke mme owo ẹma ẹkenam idiọkn̄kpọ, mmọ ikodụhe aba ke ubon Abasi eke ofụri ekondo, edi oro ikabiatke uduak Jehovah. Enye oyokụt ete ke nditọ Adam ye Eve ẹdụn̄ ẹyọhọ Paradise isọn̄. (Gen. 1:28; Isa. 45:18) Enye amanam kpukpru ndutịm man okposu uduak emi. Ẹnam nnyịn ifiọk ediwak ke otu ndutịm emi ke n̄wed Ephesus, emi ibuotikọ esie edide edidianakiet. Ẹyak ineme ndusụk ufan̄ikọ ke n̄wed oro inyụn̄ ise nte ikemede ndibere ye uduak Jehovah ndinam mme edibotn̄kpọ esie ẹdiana kiet.
NDUTỊM ORO YE UTOM ESIE
3. Nso idi ndutịm Abasi oro ẹtịn̄de ẹban̄a ke Ephesus 1:10, ndien ini ewe ke akpa ikpehe ndutịm oro ọkọtọn̄ọ?
3 Mme edinam ye uduak Jehovah ẹsan̄a kiet. Ntem, “ke adan̄aemi edimek ini ekemde ọyọhọ ọyọhọ,” Abasi ama anam “ndutịm” man anam mbon oro ẹdude ke heaven ye mbon oro ẹdude ke isọn̄ ẹdiana kiet. (Kot Ephesus 1:8-10.) Ndutịm emi edinam uduak esie ke ikpehe iba. Akpa ikpehe etịm mbon oro ẹyetde aran ọnọ uwem ke heaven ke idak Jesus Christ nte Ibuot mmọ. Ikpehe enye emi ọkọtọn̄ọ ke Pentecost 33 E.N. ke ini Jehovah ọkọtọn̄ọde nditan̄ mbon oro ẹdikarade ye Christ ke heaven mbok. (Utom 2:1-4) Sia ẹbatde mbon oro ẹyetde aran nte ndinen owo oro ẹdotde ndinyene uwem ke ntak uwa ufak Christ, oro anam mmọ ẹsọsọp ẹnyịme ke ẹda mmimọ ẹnyene nte “nditọ Abasi.”—Rome 3:23, 24; 5:1; 8:15-17.
4, 5. Nso idi ọyọhọ ikpehe iba ke ndutịm Abasi?
4 Ọyọhọ ikpehe iba etịm mbon oro ẹdidude uwem ke Paradise isọn̄ ke idak Obio Ubọn̄ Messiah, emi esịnede Christ ye mbon oro ẹyetde aran. “Akwa otuowo” ẹdi akpa ke otu mbon oro ẹdidude ke isọn̄. (Edi. 7:9, 13-17; 21:1-5) Ke Tọsịn Isua Ukara Christ, ẹyenam ediwak biliọn owo ẹset ẹdidiana ye mmọ. (Edi. 20:12, 13) Kere nte ediset ke n̄kpa edinọde nnyịn ifet ndidọdiọn̄ ndiana kiet! Ke utịt tọsịn isua oro, ẹyedomo “mme n̄kpọ eke ẹdude ke isọn̄” akpatre udomo. Ẹyeda mbon oro ẹsọn̄ọde ẹda ẹnam akpanikọ ẹnyene nte “nditọ Abasi” eke isọn̄.—Rome 8:21; Edi. 20:7, 8.
5 Abasi ke anam ndutịm mfịn man mbon oro ẹyetde aran ẹkpeka heaven, mme erọn̄ en̄wen ẹkpenyụn̄ ẹdu ke Paradise isọn̄. Edi didie ke nnyịn ke idem nnyịn ibere ye ndutịm Abasi emi?
‘ẸMỤM EDIDIANAKIET EKE SPIRIT ẸKAMA’
6. Didie ke N̄wed Abasi owụt ke mme Christian ẹnyene ndisisop idem ọtọkiet?
6 N̄wed Abasi ọdọhọ ke ana mme Christian ẹsisop idem ọtọkiet. (1 Cor. 14:23; Heb. 10:24, 25) Oro idịghe ikpîkpu edidu ọtọkiet ke ebiet, nte mbon oro ẹkade urua m̀mê an̄wambre. Ata edidianakiet itiehe ntre. Nnyịn inyene utọ edidianakiet oro ke ini idade item Jehovah isịn ke edinam inyụn̄ iyakde edisana spirit Abasi anam nnyịn ikpụhọde.
7. Nso ke “ndimụm edidianakiet eke spirit n̄kama” ọwọrọ?
7 Ke ntak emi ibuọtde idem ke uwa ufak Christ, Jehovah abat mbon oro enye eyetde aran ke edinen nte nditọ esie onyụn̄ abat mme erọn̄ en̄wen ke edinen nte mme ufan esie, edi ndutan̄uyo edisụk idodu adan̄a nte idude uwem ke editịm n̄kpọ emi. (Rome 5:9; Jas. 2:23) Mîkpedịghe ntre, ufọn ikpodụhe Bible nditeme nnyịn ete ika iso ‘iyọ kiet eken.’ Edi nnyịn isan̄a didie idiana kiet ye nditọete nnyịn? Ana inyene “ọyọhọ nsụhọdeidem ye ifụre ifụre ido.” Akan oro, Paul esịn udọn̄ ọnọ nnyịn ete isịn ifịk in̄wana “ndimụm edidianakiet eke spirit n̄kama, [nnyụn̄ ndu] ke mbọbọ emem.” (Kot Ephesus 4:1-3.) Ndinam item emi esịne ndiyak edisana spirit ada nnyịn usụn̄ onyụn̄ anam nnyịn ision̄o mbun̄wụm esie. Mbun̄wụm oro esisịn emem ke ufọt mbon oro ẹketọhọde; itiehe nte mme utom obụkidem, emi ẹsidian̄arede mme owo.
8. Didie ke mme utom obụkidem ẹdian̄arede mme owo?
8 Se mi nte “mme utom obụkidem” mîyakke mme owo ẹdiana kiet. (Kot Galatia 5:19-21.) Use esidian̄ade mbon oro ẹkade iso ẹnam enye ọkpọn̄ Jehovah ye esop, ndien efịbe ekeme ndidian̄ade nditọ n̄kpọn̄ mme ete ye eka mmọ onyụn̄ adian̄ade mme nsan̄a oro mîduehe ọkpọn̄ nsan̄a mmọ. Mbubiam ido iyakke owo adiana ye Abasi ye mbon oro ẹmade enye. Owo emi odomode ndidian n̄kpọ iba ọtọkiet ọfiọk ke ana iso n̄kpọ mbiba oro ẹyomde ndidian asana mbemiso mmọ ẹkemede ndinen̄ede ndiana kiet. Ndinam emiom emiom ido (m̀mê, obukpo ido) enen̄ede owụt ke owo idaha ndinen ibet Abasi ke n̄kpọ ndomokiet. Kpukpru utom obụkidem eken ẹdadian̄ade mme owo ẹkpọn̄ kiet eken ẹnyụn̄ ẹdian̄ade owo ẹkpọn̄ Abasi. Jehovah asasua kpukpru edu emi.
9. Didie ke ikeme ndidụn̄ọde idem nnyịn nse m̀mê nnyịn ke ‘isịn ifịk in̄wana ndimụm edidianakiet eke spirit n̄kama’?
9 Ntem, oyom owo nnyịn kiet kiet obụp idemesie ete: ‘Ami nsịn ifịk n̄n̄wana adan̄a didie “ndimụm edidianakiet eke spirit n̄kama”? Nsinam n̄kpọ didie ke ini nnyenede mfịna ye owo? Ndi mmesisan̄a ntịn̄ nnọ mbon en̄wen man ẹda ye ami? Ndi nsiyom mbiowo ẹdụk ẹdi utu ke ndisịn ukeme man nnam emem? Edieke mfiọkde ke owo enyene ikọ ye ami, ndi nsifefep enye mbak nnyịn idineme mfịna oro?’ Ndi mme utọ edinam oro ẹwụt ke nnyịn ke inam n̄kpọ nte ekemde ye uduak Jehovah ndifiak ntan̄ kpukpru n̄kpọ ndọn̄ ọtọkiet ke Christ?
10, 11. (a) Nditie ke emem ye nditọete nnyịn edi akpan n̄kpọ adan̄a didie? (b) Nso idinam nnyịn inyene emem ye edidiọn̄ Jehovah?
10 Jesus ọkọdọhọ ete: “Ke ntre, edieke afo adade enọ fo edi itieuwa ndien afo eti do ete ke eyenete fo enyene ikọ ye afo, kpọn̄ enọ fo nịm do ke iso itieuwa, nyụn̄ nyọn̄; kebem iso nam emem ye eyenete fo, ndien ekem, ke ama akafiak edi, wa enọ fo. ‘Wara nam emem.’” (Matt. 5:23-25) James ekewet ete ke “ẹtọ mfri edinen ido ke emem ẹnọ mbon oro ẹnamde emem.” (Jas. 3:17, 18) Ntem, nnyịn ikemeke ndika iso nnam se inende ke ini emem mîdụhe.
11 Ke uwụtn̄kpọ, ẹdọhọ ke owo ikemeke nditọ n̄kpọ ke mbahade kiet ke itie ita ke isọn̄ mme idụt oro ẹn̄wanade ekọn̄ ke ntak mme bọm oro ẹbụkde ke isọn̄. Bọm ama obomo, mme ọtọin̄wan̄ ẹsifehe ẹkpọn̄ in̄wan̄ mmọ, mme obio ẹnana n̄kpọ udu uwem, ikpọ obio inyụn̄ inyeneke udia. Kpasụk ntre, nnyịn ikemeke ndikọri ke n̄kan̄ eke spirit edieke inyenede mme edu oro mîyakke nnyịn itie ke emem ye nditọete nnyịn. Edi edieke isisọpde ndidahado nnọ owo inyụn̄ inamde n̄kpọ iyom ufọn mbon en̄wen, kpukpru nnyịn iyenyene emem ye edidiọn̄ Jehovah.
12. Didie ke mbiowo ẹkeme ndin̄wam nnyịn idiana kiet?
12 N̄ko-n̄ko, “irenowo nte enọ,” m̀mê mbiowo, ẹkeme ndinen̄ede nnam edidianakiet odu. Ẹnọ mmọ man ẹn̄wam nnyịn “ikabade idi kiet ke mbuọtidem.” (Eph. 4:8, 13) Ke ini mbiowo ẹsan̄ade ye nnyịn ẹnam n̄kpọ Abasi ẹnyụn̄ ẹdade Ikọ Abasi ẹnọ nnyịn item, mmọ ẹn̄wam nnyịn ika iso imen obufa owo isịne. (Eph. 4:22-24) Ndi afo emesikụt ke item mmọ edi ukeme oro Jehovah esịnde man etịm fi idem eben̄e uwem ke obufa ererimbot ke idak ukara Eyen esie? Mbiowo, ndi ẹsinen̄ede nditọete ke ntak emi?—Gal. 6:1.
“ẸFỌN IDO YE KIET EKEN”
13. Nso ikpetịbe edieke nnyịn mînamke item oro odude ke Ephesus 4:25-32?
13 Ephesus 4:25-29 asiak mme ido oro anade ifep. Emi esịne edisu nsu, edikpon iyatesịt m̀mê edifu ifu, ye editịn̄ mbumbu ikọ utu ke nditịn̄ se ifọnde ndida mbọp owo. Edieke owo ekpetrede ndinam item emi, enye akpanam edisana spirit Abasi ofụhọ, sia edisana spirit esinam mme owo ẹdiana kiet. (Eph. 4:30) Ndida se Paul ewetde ke mme ufan̄ikọ oro ẹtienede nsịn ke edinam edi n̄ko akpan n̄kpọ oro anamde inyene emem ye edidianakiet, sia enye ekewet ete: “Ẹsion̄o kpukpru idiọk udu ye iyatesịt ye ifụtesịt ye mfiori ye ikọ isụn̄i ẹfep ke idem mbufo ọkọrọ ye kpukpru idiọkn̄kpọ. Edi ẹfọn ido ye kiet eken, ẹtua owo mbọm, ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.”—Eph. 4:31, 32.
14. (a) Nso ke ikọ oro “ẹfọn ido” owụt? (b) Nso idin̄wam nnyịn ifọn ido?
14 Ikọ oro “ẹfọn ido” owụt ke anaedi enyene nte nnyịn mîkọfọnke ido, ndien ke ntre ke oyom isifọn ido. Enen̄ede odot ikpep ndisikere mban̄a mbon en̄wen akan nte ikerede iban̄a idem nnyịn. (Phil. 2:4) Ekeme ndidi se iyomde nditịn̄ ayanam mme owo ẹsak m̀mê anam etie nte ke nnyịn imọfiọk n̄kpọ, edi ndi oro oyowụt ke imọfọn ido? Ndibem iso n̄kere se iditịn̄de ayan̄wam nnyịn ‘ifọn ido.’
NDIKPEP NDIMA IMA NNYỤN̄ N̄KPONO OWO KE UBON
15. Didie Ephesus 5:28 owụt mme ebe nte ẹkpekpebede Christ?
15 Bible emen ebuana Christ ye esop odomo ye eke ebe ye n̄wan. Emi anam isọsọp iti ke ebe ekpenyene ndinọ n̄wan esie ndausụn̄, mma enye, nnyụn̄ nse mban̄a enye, ye nte ke akpana n̄wan osụk ibuot ọnọ ebe esie. (Eph. 5:22-33) Paul ekewet ete: “Ntem ke mme ebe ẹkpema iban mmọ nte idem mmọ.” Nso ke “ntem” oro ọwọrọ? (Eph. 5:28) Se Paul ekebemde iso etịn̄ owụt nte ‘Christ akamade esop onyụn̄ ayakde idemesie ọnọ ke ibuot esie man ada ikọ Abasi nte mmọn̄ eyet enye.’ Mmọdo, ebe ekpenyene ndin̄wam kpukpru owo ke ubon esie ẹdian idem ye Abasi man ekekem ye uduak Jehovah ndifiak ntan̄ kpukpru n̄kpọ ndọn̄ ọtọkiet ke Christ.
16. Nso isitịbe ke ini ete ye eka ẹsede ẹban̄a nditọ mmọ nte N̄wed Abasi etemede?
16 Mme ete ye eka ẹkpenyene nditi ke Jehovah ọdọhọ mmọ ẹse ẹban̄a nditọ mmọ. Edi se idiọkde edi ke “ndammana ima” idụhe ke ererimbot mfịn. (2 Tim. 3:1, 3) Ata ediwak ete isehe iban̄a nditọ mmọ, ndien emi esifịna nditọ emi onyụn̄ anam mmọ ẹfụhọ. Edi Paul ọkọdọhọ mme Christian emi ẹdide ete, ete: “Ẹkûfiomo nditọ mbufo, edi ẹka iso ẹkama mmọ ke ntụnọ ye ke item Jehovah.” (Eph. 6:4) Ndi idịghe ke ubon ke nditọ ẹsibem iso ẹkpep ndinyene ima nnyụn̄ n̄kpono owo? Mme ete ye eka emi ẹkpepde nditọ mmọ mme n̄kpọ emi ẹnam n̄kpọ ekekem ye ndutịm Jehovah. Edieke ima odude ke ufọk nnyịn, iyatesịt ye ifụtesịt ye isụn̄i mînyụn̄ idụhe, nditọ nnyịn ẹyekpep ndinyene ima nnyụn̄ n̄kpono owo. Emi eyetịm mmọ idem ọnọ uwem ke obufa ererimbot Abasi.
17. Nso ke ẹyom man ikeme ndibiọn̄ọ Devil?
17 Ikpanaha ifre ke Devil, kpa owo emi ọkọtọn̄ọde nditịmede emem ekondo, eyenen̄ede esịn ukeme man ọbiọn̄ọ nnyịn ndinam uduak Abasi. Eyịghe idụhe nte ke ẹnam uduak Satan ke nte usiondọ awakde, ẹmade ndantie utu ke ndidọ ndọ, ẹnyụn̄ ẹdiande n̄wan ye n̄wan ye erenowo ye erenowo ndọ. Nnyịn ikpebeke ido ye edu ererimbot mfịn. Christ edi Uwụtn̄kpọ nnyịn. (Eph. 4:17-21) Mmọdo, ẹteme nnyịn ẹte ‘imen ofụri n̄kpọekọn̄ Abasi isịne’ man ikpọbiọn̄ọ Devil ye mme demon esie uforo uforo.—Kot Ephesus 6:10-13.
“ẸKA ISO ẸSAN̄A KE IMA”
18. Nso idi ata akpan n̄kpọ oro anamde nnyịn idiana kiet nte mme Christian?
18 Ima edi ata akpan n̄kpọ oro anamde idiana kiet nte mme Christian. Esịt nnyịn ọyọhọ ye ima oro imade “Ọbọn̄ kiet,” “Abasi kiet,” ye nditọete nnyịn, ndien emi anam ibiere “ndimụm edidianakiet eke spirit n̄kama, [nnyụn̄ ndu] ke mbọbọ emem.” (Eph. 4:3-6) Jesus ama ọbọn̄ akam eben̄e utọ ima oro, ete: “Mben̄eke mban̄a mmọ emi ikpọn̄, edi mben̄e n̄ko mban̄a mmọ emi ẹbuọtde idem ye ami ebe ke ikọ mmọ; man kpukpru mmọ ẹkpedi kiet, kpa nte afo Ete abuanade n̄kpọ ye ami, ami nnyụn̄ mbuanade n̄kpọ ye afo, man mmọ n̄ko ẹkpebuana n̄kpọ ye nnyịn . . . Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk, man ima oro afo akamade mi okpodu ye mmọ, ami n̄kponyụn̄ mbuana n̄kpọ ye mmọ.”—John 17:20, 21, 26.
19. Nso ke afo ebiere ndinam?
19 Edieke inyenede edu oro ọsọn̄de nnyịn ndikpụhọde, ima akpakam anam nnyịn ibọn̄ akam nte andiwet psalm ọkọbọn̄de ete: “Nam ofụri esịt mi abak enyịn̄ fo.” (Ps. 86:11) Ẹyak ibiere ndibiọn̄ọ ukeme oro Devil esịnde ndiwọn̄ọde nnyịn n̄kpọn̄ edima Ete nnyịn ye mbon oro enye amade. Ẹyak isịn ifịk man ‘idi mme andikpebe Abasi, nte ndima nditọ, inyụn̄ ika iso isan̄a ke ima’—ke ubon, ke utom ukwọrọikọ nnyịn, ye ke esop.—Eph. 5:1, 2.
[Mme Mbụme Ukpepn̄kpọ]
[Ndise ke page 29]
Ọkpọn̄ enọ esie ke itieuwa, ọnyọn̄ ekebem iso anam emem ye eyenete esie
[Ndise ke page 31]
Mme ete ye eka, ẹkpep nditọ mbufo ndikpono owo
