Mmọ Ẹma Ẹnọ Idemmọ Unyịme Unyịme​—Ke Ecuador

BRUNO, ekpri eyenete nnyịn ke Italy ama enyene akamba ubiere ndinam. Ikebịghike enye okokụre ufọkn̄wed sekọndri. Enye ekebe n̄wed akan ke ubet ukpepn̄kpọ mmọ ndien iman esie ye mme andikpep ẹma ẹkpak enye ẹte aka ufọkn̄wed ntaifiọk. Edi enye ama ayak idemesie ọnọ Jehovah isua ifan̄ mbemiso ini emi, onyụn̄ ọn̄wọn̄ọ ke ndinam uduak Abasi edidi akpa n̄kpọ ke uwem imọ. Nso ke enye ekemek? Enye ọdọhọ ete: “Mma mbọn̄ akam nnọ Jehovah nte ke nyanam se n̄kọn̄wọn̄ọde ke ini n̄kayakde idem nnọ enye; ke nyenịm enye akpa ke uwem mi. Edi mma ntịn̄ ke ofụri esịt nnọ enye nte ke nyom ndinam ediwak n̄kpọ oro ẹdinamde n̄kop inemesịt ke utom esie.”

 Ke isua ifan̄ ẹbede, Bruno ama aka Ecuador ke Edem Usụk America. Enye ọdọhọ ete: “Jehovah ama ọbọrọ akam mi ke usụn̄ oro mmen̄kodorike enyịn.” Ke ini enye ekesịmde Ecuador, idem ama akpa enye ndikụt n̄kparawa en̄wen emi ẹwọrọde ẹdidụn̄ ke Ecuador man ẹnen̄ede ẹsịn idem ẹnam n̄kpọ Jehovah.

N̄KPARAWA EMI ‘ẸDOMODE JEHOVAH ẸSE’

Bruno ye ata ediwak n̄kparawa en̄wen ke ofụri ererimbot ẹyere ikot emi Jehovah ọnọde ete: “Ẹdomo mi ẹse . . . m̀mê ami ndiberekede window heaven nnọ mbufo nnyụn̄ n̄n̄wan̄a edidiọn̄ nnọ mbufo tutu mbufo inanake baba n̄kpọ kiet.” (Malachi 3:10) Ima emi mmọ ẹmade Abasi ama anam mmọ ẹbiere ‘ndidomo Jehovah nse’ ke ndinyịme ndida ini, odudu, ye inyene mmọ nnam utom ke idụt oro ẹnen̄erede ẹyom mme anditan̄a Obio Ubọn̄.

Ikebịghike tọn̄ọ mme anamutom emi ẹnọde idemmọ unyịme unyịme mi ẹkesịm obufa efakutom mmọ, mmọ ẹma ẹkụt ke “idọk okpon, edi mme anamutom iwakke.” (Matt. 9:37) Ke uwụtn̄kpọ, Jaqueline emi otode Germany ewet ye ọyọhọ idatesịt ọnọ n̄kọk itieutom Ecuador ete: “Nnamke utom nsịm isua ita ke Ecuador, edi mmenyene nditọ ukpepn̄kpọ Bible 13, ndien owo 4 ke otu mmọ ẹsidụk mbono esop kpukpru ini. Esịt enem mi etieti.” Chantal emi otode Canada ọdọhọ ete: “Ke 2008, mma n̄wọrọ n̄ka obio Ecuador emi odude ke mbeninyan̄, ndien esop kiet kpọt  okodu do. Idahaemi esop ita ẹdu ndien mme asiakusụn̄ ẹbe 30 ke obio oro. Idụhe se inemde nte ndikụt ata ediwak mbufa owo ẹnamde n̄kọri!” Enye adian do ete: “Mma n̄wọrọ ke ndondo emi n̄ka akwa obio emi odude ke Obot Andes. Ebiet emi obio emi odude okon̄ ke n̄kpọ nte mita 2,743. Se ibede owo 75,000 ẹdụn̄ ke obio emi, edi esop kiet kpọt odu. Ediwak owo ke ẹbọ akpanikọ! Mmenen̄ede n̄kop inem ukwọrọikọ.”

MME MFỊNA ORO ẸKEMEDE NDISOBO

Edi akpanikọ ke ndinam utom ke esenidụt esisan̄a ye ediwak mfịna. Ndusụk uyen ẹsikam ẹsobo ubiọn̄ọ idem mbemiso mmọ ẹwọrọde ẹka esenidụt. Kayla emi otode United States ọdọhọ ete: “Se nditọete emi ẹmade mi ẹketịn̄de ke edem nnyịn ama anam idem oyom ndimem mi. Ikan̄wan̄ake mmọ se ikpanamde nyom ndika esenidụt n̄kanam utom usiakusụn̄. Oro ama anam mi n̄kere ndusụk ini nte, ‘Ndi eti ubiere ke nyom ndinam emi?’” Kpa ye oro, Kayla ama ebiere ndisụk n̄ka. Enye ọdọhọ ete: “Mma nsibọn̄ akam nnọ Jehovah ediwak ini nnyụn̄ nnyene nneme ye nditọete oro ẹkọride ẹsịm ọyọhọ idaha, ndien emi ama an̄wam mi mfiọk ke Jehovah esidiọn̄ owo emi ọnọde idemesie unyịme unyịme.”

Mfịna oro ediwak mbon en̄wen ẹnyenede edi ndikpep obufa usem. Siobhan emi otode Ireland eti se iketịbede ete: “Ama esifịna mi tutu sia mmen̄kekemeke ndisem usem n̄kan̄ oro ọfọn. N̄kenyene ndikpep ime, nsịn ifịk n̄kpep usem oro, nnyụn̄ nsak idemmi ke ini nnamde ndudue.” Anna emi otode Estonia adian do ete: “Ufiop eyo, ntọn̄, ye unana ufiop mmọn̄ esan̄ukwak ndiyere, ikemenke-men udomo ye ndikpep Spanish. Ndusụk ini ama esidọn̄ mi ndision̄o idem n̄kpọn̄. Akana n̄kpep ndise n̄kọri oro nnamde, idịghe mme ndudue oro nnamde.”

Mfịna en̄wen edi itọn̄ ufọk ndidọn̄ owo. Jonathan emi otode United States ọdọhọ ete: “Esisịt ini ke mma n̄kedi ndibehe, idem ama emem mi ke ntak emi n̄kọkpọn̄de mme ufan ye ubon mi. Edi mma n̄kan utọ ekikere oro sia n̄kowụkde ekikere ke ndikpep Bible ye ke utom ukwọrọikọ. Ikebịghike, ndinem ifiọkutom oro n̄kenyenede ke an̄wautom ye mbufa ufan oro n̄kanamde ke esop ama anam mi mfiak n̄kop idatesịt.”

 Ekeme ndisọn̄ ndidu uwem ke idụt en̄wen. Nte n̄kpọ ẹtiede do ẹkeme ndikpụhọde ye se idude ke edem mbufo. Beau emi otode Canada ọdọhọ ete: “Inyeneke se isidade ikan̄ ilektrik ye mmọn̄ esan̄ukwak inam ke idụt nnyịn. Edi owo isidiọn̄ọke ini emi ẹdinọde mmọn̄ ye ikan̄ mi.” Ke mme idụt emi ẹtọn̄ọde-tọn̄ọ ntatenyịn, nti n̄kpọisan̄ idụhe, mme owo ẹbebuene, inyụn̄ ifiọkke n̄wed. Se in̄wamde Ines emi otode Austria ọyọ mme utọ n̄kpọ emi edi ndiwụk ekikere ke nti edu mbio obio oro. Enye ọdọhọ ete: “Mmọ ẹtat ubọk, ẹtie ifụre ifụre, ẹma ndin̄wam owo, ẹnyụn̄ ẹsụhọde idem. Akan oro, ata ediwak mmọ ẹnen̄ede ẹma ndikpep n̄kpọ mban̄a Abasi.”

‘ẸYEDIỌN̄ MBUFO TUTU MBUFO INANAKE BABA N̄KPỌ KIET’

Okposụkedi emi n̄kparawa emi ẹkade Ecuador ẹyakde n̄kpọ atak mmọ, mmọ ẹkụt ke Jehovah esinọ se inanade mmimọ “etịm awak akan” nte mmimọ ikekerede. (Eph. 3:20) Ke nditịm ntịn̄, etie mmọ nte ke ‘ẹdiọn̄ mmimọ tutu mmimọ inanake baba n̄kpọ kiet.’ (Mal. 3:10) Kop mi se mmọ ẹtịn̄de ẹban̄a utom mmọ:

Bruno: “N̄kọtọn̄ọ utom ukwọrọikọ mi ke ediye ikpehe Amazon ke Ecuador. Ekem mma n̄ka n̄ketiene mbọp n̄kọk itieutom ke Ecuador. Idahaemi nnam utom ke Bethel. Ko ke Italy, mma mbiere ndinịm Jehovah akpa ke uwem mi, ndien enye ke an̄wam mi ndu uwem idatesịt, emi nnamde nsio nsio n̄kpọ ke utom esie.”

Beau: “Mmenen̄ede nsan̄a n̄kpere Jehovah, koro mi ke Ecuador, nda ofụri ini mi nnam n̄kpọ Abasi. Ke adianade do, enen̄ede enem mi ndisika ndiye ebiet—kpa n̄kpọ emi ekesinen̄erede ọdọn̄ mi.”

Anna: “N̄kekereke ke ami emi mmendọhọ ebe mmekeme ndidu uwem nte isụn̄utom. Edi idahaemi mmọdiọn̄ọ ke mmekeme. Mfọn Jehovah anam mi n̄kop inemesịt emi otode edinam mme mbet, editiene mbọp mme Ufọkmbono Obio Ubọn̄, ye edinyene mbufa ufan.”

Elke: “Ke ini n̄kodude ke edem nnyịn ke Austria, n̄kesikpekpe Jehovah ubọk nte anam nnyene ukpepn̄kpọ Bible kiet. Edi mmenyene ukpepn̄kpọ Bible 15 mi! Ndikụt nditọ ukpepn̄kpọ Bible emi ẹnamde n̄kọri esinam esịt enen̄ede enem mi.”

Joel: “Edi ata n̄kpọ inemesịt ndika n̄kanam n̄kpọ Jehovah ke ebiet emi mûdiọn̄ọke. Emi ayanam fi enen̄ede eberi edem ke Jehovah, ndien oyonyụn̄ enem fi ndikụt nte enye ọdiọn̄de fi. Ke akpa isua emi n̄kọkpọn̄de United States ndi mi, otu oro ndude, emi ekedide asuanetop 6 ama ọkọri ekesịm asuanetop 21. Ndien owo 110 ẹkedụk Editi.”

NSO KABAN̄A FI?

N̄kparawa owo, ndi idaha mbufo ayayak ẹka ẹkenam utom ke idụt emi ẹnen̄erede ẹyom mme asuanetop Obio Ubọn̄? Imọfiọk ke oyoyom enen̄ede ọkọk ibuot mbemiso anamde utọ ubiere oro. Se ikam idide akpan n̄kpọ ikan edi ke ana enyene ima ọnọ Jehovah ye mme owo. Edieke edide emenyene utọ ima emi onyụn̄ odot ndika, nen̄ede bọn̄ akam nọ Jehovah ban̄a ndika n̄kanam utom ke esenidụt. N̄ko-n̄ko, neme n̄kpọ emi ye ete ye eka fo edieke mmọ ẹdude ke esop, nyụn̄ neme ye mbiowo esop mbufo. Afo emekeme ndikụt ke imọ n̄ko imekeme nditiene nnam utom Abasi emi ọnọde inemesịt mi.

[Se ẹwetde ke ikpọ abisi ke page 3]

“Mma nsibọn̄ akam nnọ Jehovah ediwak ini nnyụn̄ nnyene nneme ye nditọete oro ẹkọride ẹsịm ọyọhọ idaha, ndien emi ama an̄wam mi mfiọk ke Jehovah esidiọn̄ owo emi ọnọde idemesie unyịme unyịme.”​—Kayla emi otode United States

[Ekebe/Ndise ke page 6]

Nte ekpetịmde idem ọnọ utom ke esenidụt

• Sikpep n̄kpọ ke idemfo kpukpru ini

• Dụn̄ọde Utom Obio Ubọn̄ Nnyịn eke November 2011, page 5-7

• Nyene nneme ye mbon emi ẹnamde utom ke esenidụt

• Nam ndụn̄ọde ban̄a ido obio ye mbụk idụt emi afo oyomde ndika

• Kpep usem obio emi oyomde ndika

[Ekebe/Ndise ke page 6]

Ndusụk mbon emi ẹnamde utom ke esenidụt ẹsise ẹban̄a idemmọ ke . . .

[Se ẹwetde ẹban̄a ndise ke page 6]

• ndisika idụt mmọ n̄kanam utom ọfiọn̄ ifan̄ ke isua

• ndikpọn̄ ufọk m̀mê mbubehe mmọ nnọ mbon en̄wen ke ukpe okụk

• ndinam utom ke Intanet

[Se ẹwetde ẹban̄a ndise ke page 4, 5]

1 Jaqueline emi otode Germany

2 Bruno emi otode Italy

3 Beau emi otode Canada

4 Siobhan emi otode Ireland

5 Joel emi otode United States

6 Jonathan emi otode United States

7 Anna emi otode Estonia

8 Elke emi otode Austria

9 Chantal emi otode Canada

10 Ines emi otode Austria