“Mmenyene Se N̄koyomde”

Isua 15 ko ke edem, Emilia ekedi asiakusụn̄ ofụri ini. Edi enye ikekemeke aba ndinam utom emi. Ke mme isua ndondo emi, enye esitie ekere aban̄a idatesịt oro enye ekesikopde ke ini enye akanamde utom emi, onyụn̄ ọdọn̄ enye ndifiak nnam ekese ke utom ukwọrọikọ.

Edi utom Emilia ama esinen̄ede ada ini, ndien emi ikayakke enye enen̄ede okop idatesịt. Usen kiet, enye ama eseme ke iso nsan̄autom esie ete: “Ubaha nte ẹkpesụhọrede ibat hour oro nsinamde utom!” Ikọ emi ama okodụk akwa owo mmọ utọn̄, ndien enye ama okot Emilia obụp m̀mê se imọ ikopde edi akpanikọ. Emilia ama enyịme ke edi akpanikọ. Edi ata akwa owo mmọ ikpọn̄ enyene odudu ndisụhọde hour utom esie, koro ke itieutom mmọ, ẹyom kpukpru owo ẹnen̄ede ẹsịn idem ẹnam utom. Eyenete nnyịn emi ama etịm idem ndika n̄kosobo ye ata akwa owo mmọ, ọbọn̄ akam ọnọ Abasi ete ọnọ imọ uko.

Ke ini Emilia okosobode ye ata akwa owo mmọ, enye ama ada mbufiọk ye uko eben̄e enye ete osụhọde hour utom imọ. Emilia ama ọdọhọ enye ke isida ini nduọkodudu imọ in̄wam mme owo. Enye ọkọdọhọ ete: “Ami ndi kiet ke otu Mme Ntiense Jehovah, ndien nsikpep mme owo n̄kpọ mban̄a Abasi. Mme owo inyeneke aba eti ido uwem. Oyom mmọ ẹdiọn̄ọ ibet Abasi, ndien se nsikpepde mmọ ke Bible enen̄ede enyene ufọn ọnọ mmọ. Nyomke se nsinamde ke utom ama akasuana akpan mi ndisịn ofụri ukeme mi ke utom emi, edi n̄kpama ndinyene ekese ini nda n̄n̄wam mme owo. Oro anam nyom ẹsụhọde ibat hour oro nsinamde utom.”

Ata akwa owo mmọ ama enen̄ede akpan̄ utọn̄ ọnọ enye onyụn̄ ọdọhọ enye ke enyene ini emi imọ ikoyomde ndisinam n̄kpọ nnọ mme owo. Ekem enye ama ọdọhọ ete: “Nyanam se eben̄ede ke ntak se etịn̄de. Edi ndi ọmọdiọn̄ọ ke emi ọwọrọ ke ẹyesio okụkọfiọn̄ fo?” Emilia ama ọdọhọ ke imọfiọk ke ẹyesio okụkọfiọn̄ imọ, ndien ke imọ imekeme ndidu mmemmem uwem edieke anade imọ inam oro. Enye ama adian do ete: “Ata akpan utịtmbuba mi edi ndin̄wam mme owo.” Ata akwa owo mmọ ama asian enye ete: “Mmesima mbon oro ẹsidade ini mmọ ẹn̄wam mme owo.”

Akanam owo inọhọ owo ke itieutom oro utọ ifet oro. Emilia esinam utom idahaemi usen inan̄ ke urua. Idem ama akpa enye ndikụt ke ẹma ẹsịn okụkọfiọn̄ esie, ntre enye osụk adia okụkọfiọn̄ oro enye ekesidiade. Enye ọdọhọ ete: “Mmenyene se n̄koyomde, ndien mmafiak nnam utom usiakusụn̄!”

Ndi emekere aban̄a ndikpụhọde idaha fo man ekeme ndidụk m̀mê ndifiak ndụk utom usiakusụn̄?

[Se ẹwetde ke ikpọ abisi ke page 32]

Akwa owo mmọ ọkọdọhọ enye ete: “Mmesima mbon oro ẹsidade ini mmọ ẹn̄wam mme owo”