Ẹdu Uwem nte Nditọisọn̄ Obio Ubọn̄!
Ẹdu Uwem nte Nditọisọn̄ Obio Ubọn̄!
“Ẹdu uwem ke usụn̄ nte odotde ye eti mbụk.”—PHIL. 1:27.
DIDIE KE AFO ỌKPỌBỌRỌ?
Mmanie ẹkeme ndidi nditọisọn̄ Obio Ubọn̄?
Nso ke oyom nnyịn inam iban̄a usem, mbụk, ye ibet Obio Ubọn̄?
Didie ke nditọisọn̄ Obio Ubọn̄ ẹwụt ke mmimọ imama mme edumbet Abasi?
1, 2. Ntak emi item oro Paul ọkọnọde esop oro okodude ke Philippi ekenen̄erede enyene se ọwọrọde?
APOSTLE PAUL ekesịn udọn̄ ọnọ esop ke Philippi ete “ẹdu uwem ke usụn̄ nte odotde ye eti mbụk.” (Kot Philippi 1:27.) Ikọ Greek oro ẹkabarede “ẹdu uwem” ke ufan̄ikọ emi, ọwọrọ n̄ko “ẹdu uwem nte nditọisọn̄.” Ikọ oro ama enen̄ede enyene se ọwọrọde ọnọ esop oro okodude ke Philippi. Ntak-a? Koro etie nte Philippi ekedi kiet ke otu ibat ibat obio oro ẹkenamde mme andidụn̄ do nditọisọn̄ Rome. Nditọisọn̄ Rome ke Philippi ye ke ofụri Obio Ukara Rome ẹma ẹnen̄ede ẹdat esịt ndidi nditọisọn̄, ibet Rome onyụn̄ ọnọ mmọ san̄asan̄a ukpeme.
2 Mme owo ke esop ke Philippi ẹma ẹnyene ntak emi akande oro ndidat esịt. Paul ama eti mmọ ke sia mmọ ẹdide mme Christian oro ẹyetde aran, ke itie eyenisọn̄ mmọ odu “ke heaven.” (Phil. 3:20) Mmọ ikedịghe nditọisọn̄ ikpîkpu obio ukara owo, edi ẹkedi eke Obio Ubọn̄ Abasi. Mmọdo, ukpeme ye mme ufọn oro mmọ ẹkebọde ikenyeneke mbiet.—Eph. 2:19-22.
3. (a) Mmanie ẹnyene ifet ndidi nditọisọn̄ Obio Ubọn̄? (b) Nso ke idineme ke ibuotikọ emi?
3 Item oro Paul ọkọnọde ete “ẹdu uwem ke usụn̄ nte odotde ye eti mbụk” enyene mbon oro ẹdikarade ye Christ ke heaven. (Phil. 3:20) Edi enye etiene ebehe mbon oro ẹdidude ke idak Obio Ubọn̄ Abasi ke isọn̄. Ntak-a? Koro kpukpru mme Christian oro ẹma ẹkeyak idem ẹnọ ẹnam n̄kpọ ẹnọ Edidem kiet, Jehovah, ndien ana mmọ ẹda ukem edumbet ẹdu uwem. (Eph. 4:4-6) Mfịn, mme owo ẹsinen̄ede ẹsịn ukeme man ẹdot ndidi nditọisọn̄ idụt oro oforode. Adan̄a didie akan oro ke nnyịn ikpada ifet ndidi nditọisọn̄ Obio Ubọn̄ nte ata akpan n̄kpọ! Man ẹn̄wam nnyịn inen̄ede iwụt esịtekọm iban̄a ifet emi, ẹyak ineme nte ndusụk n̄kpọ oro ẹyomde man owo akabade edi eyenisọn̄ ke ukara owo ẹbietde se ẹyomde man owo akabade edi eyenisọn̄ Obio Ubọn̄ Abasi. Ndien ekem iyeneme n̄kpọ ita oro anade inam man ika iso idot ndidi nditọisọn̄ Obio Ubọn̄.
SE ẸYOMDE MAN OWO AKABADE EDI EYENISỌN̄
4. Nso idi edisana usem, ndien didie ke nnyịn isem enye?
4 Kpep usem idụt oro. Ndusụk ukara owo ẹsiyom mbon oro ẹyomde ndidi nditọisọn̄ ke idụt mmimọ ẹsem akpan usem idụt mmimọ. Idem ke ẹma ẹkenam mmọ nditọisọn̄, mme owo ẹkeme ndin̄wana ke ediwak isua ndifiọk obufa usem oro. Mmọ ẹkeme ndisọsọp n̄kpep mme mbet usem oro, edi ekeme ndida ini mbemiso mmọ ẹkemede ndikot ikọ nnennen nnennen. Kpasụk ntre, oyom mbon oro ẹyomde ndidi nditọisọn̄ Obio Ubọn̄ ẹkpep se Bible okotde “edisana usem.” (Kot Zephaniah 3:9.) Nso idi usem oro? Enye edi akpanikọ oro aban̄ade Abasi ye uduak esie nte ẹwetde ke Bible. Nnyịn isem edisana usem ke ini edu uwem nnyịn asan̄ade ekekem ye ibet ye mme edumbet Abasi. Nditọisọn̄ Obio Ubọn̄ Abasi ẹkeme ndisọsọp n̄kpep mme akpan ukpepn̄kpọ Bible ẹnyụn̄ ẹna baptism. Edi idem ke mmọ ẹma ẹkena baptism, ana mmọ ẹka iso ẹdomo ndisem edisana usem udọn udọn. Didie? Ana owo nnyịn kiet kiet ananam mme edumbet Bible oro enye ekpepde.
5. Ntak emi ikpekpepde ofụri se ikekeme iban̄a mbụk esop Jehovah?
5 Fiọk mbụk idụt oro. Ekeme ndiyom owo emi oyomde ndikabade ndi eyenisọn̄ ukara owo ekpep n̄kpọ aban̄a mbụk ukara oro. Kpasụk ntre, oyom mbon oro ẹyomde ndidi nditọisọn̄ Obio Ubọn̄ ẹkpep ofụri se mmọ ẹkekeme ẹban̄a Obio Ubọn̄ Abasi. Kere ban̄a uwụtn̄kpọ oro nditọ Korah, emi ẹkenamde utom ke Israel eset, ẹkenịmde. Mmọ ẹma ẹnen̄ede ẹdat esịt ẹban̄a Jerusalem ye itie utuakibuot esie ẹnyụn̄ ẹkop idatesịt ndibụk mbụk obio oro nnọ mbon en̄wen. Idịghe nte ẹkebọpde obio ye itie utuakibuot oro ke mmọ ẹkenen̄ede ẹma, edi ekedi se mmọ ẹkedade ẹban̄a. Jerusalem ekedi “obio Akwa Edidem,” kpa Jehovah, sia obio oro ekedi iwụk ebiet utuakibuot akpanikọ. Do ke ẹkesikpep Ibet Jehovah. Mbon oro Akwa Edidem akakarade ke Jehovah okowụt ima-mfọnido esie. (Kot Psalm 48:1, 2, 9, 12, 13.) Ukem nte nditọ Korah, ndi afo emenyene udọn̄ ndifiọk mbụk ikpehe esop Jehovah ke isọn̄ nnyụn̄ mbụk enye nnọ mbon en̄wen? Adan̄a nte afo ekpepde ọfiọk nte ẹnamde n̄kpọ ke esop Abasi ye nte Jehovah ọnọde ikọt esie ibetedem, ntre ke Obio Ubọn̄ Abasi edidọdiọn̄ idi ata idem n̄kpọ inọ fi. Afo ọyọdọdiọn̄ enyene udọn̄ ndikwọrọ eti mbụk Obio Ubọn̄.—Jer. 9:24; Luke 4:43.
6. Ntak emi odotde Jehovah ndiyom nnyịn ikpep inyụn̄ inịm ibet ye mme edumbet Obio Ubọn̄?
6 Fiọk ibet idụt oro. Mme ukara owo ẹsiyom nditọisọn̄ mmọ ẹkpep ẹnyụn̄ ẹnịm ibet idụt mmọ. Do, odot nte Jehovah oyomde nnyịn ikpep inyụn̄ inịm ibet ye mme edumbet oro ẹkarade kpukpru nditọisọn̄ Obio Ubọn̄. (Isa. 2:3; John 15:10; 1 John 5:3) Ibet owo ẹsiwak ndinyene ndudue nnyụn̄ mfefịk ndusụk owo. Edi “ibet Jehovah ọfọn ama.” (Ps. 19:7) Ndi imesidat esịt ke ibet Abasi inyụn̄ ikot Ikọ esie kpukpru usen? (Ps. 1:1, 2) N̄kukụre usụn̄ oro ikemede ndikpep ibet Abasi edi ndikpep enye ke idem nnyịn. Owo en̄wen ikemeke ndinam emi nnọ nnyịn.
NDITỌISỌN̄ OBIO UBỌN̄ ẸMA MME EDUMBET ABASI
7. Ewe n̄kokon̄ edumbet ke nditọisọn̄ Obio Ubọn̄ ẹda ẹdu uwem?
7 Man ika iso idi nditọisọn̄ Obio Ubọn̄, oyom ifiọk mme edumbet Abasi inyụn̄ ima mmọ. Ediwak nditọisọn̄ ukara owo ẹdọhọ ke mmimọ imenyịme mme ibet ye mme edumbet idụt oro mmimọ idụn̄de. Nte ededi, ke ini mmọ ẹkerede ke owo ikwe mmimọ, mmọ ẹsibiat ibet ekededi emi mmọ ẹdade nte ke ifọnke ye mmimọ. Mmọ ẹsiwak ndidi “mme anam n̄kpọ nnem owo esịt.” (Col. 3:22) Nditọisọn̄ Obio Ubọn̄ ẹda ata n̄kokon̄ edumbet ẹdu uwem. Nnyịn isinịm ibet Abasi ye idatesịt, idem ke ini owo ndomokiet mîkwe nnyịn. Ntak-a? Koro nnyịn imade Ọnọ-Ibet oro.—Isa. 33:22; kot Luke 10:27.
8, 9. Afo ekeme ndisan̄a didie mfiọk m̀mê imọ imenen̄ede ima ibet Abasi?
8 Afo ekeme ndisan̄a didie mfiọk m̀mê emenen̄ede ama ibet Abasi? Dụn̄ọde nte esinamde n̄kpọ ke ini ẹnọde fi item ẹban̄a n̄kpọ emi afo adade nte mbubehe idemfo—ke uwụtn̄kpọ, ke n̄kpọ emi aban̄ade ọfọn̄ ye ukamaidem. Mbemiso akakabarede edi eyenisọn̄ Obio Ubọn̄, ekeme ndidi afo ekesima ndisịne n̄kpọ mbumịn mbumịn m̀mê ke usụn̄ oro edemerede owo udọn̄ idan̄. Nte afo ekekpepde ndinen̄ede mma Abasi, afo ama ekpep ndisịne n̄kpọ ke usụn̄ oro ọnọde enye ubọn̄. (1 Tim. 2:9, 10; 1 Pet. 3:3, 4) Afo emekeme ndikere ke imọ isịne n̄kpọ idahaemi nte owụtde eti ibuot. Edi nso ke akpanam edieke ebiowo ọkpọdọhọde fi ke ediwak nditọete ke esop imaha nte afo esisịnede n̄kpọ? Ndi afo ekpetịn̄ ikọ unyan̄a-idem, ayat esịt, mîdịghe ọsọn̄ ibuot? Ata akpan ibet Abasi emi anade kpukpru nditọisọn̄ Obio Ubọn̄ ẹnịm edi ke ana mmọ ẹkpebe Christ. (1 Pet. 2:21) Apostle Paul ekewet ntem aban̄a uwụtn̄kpọ Jesus: “Yak owo nnyịn kiet kiet enem mbọhọidụn̄ esie esịt ke ndida se ifọnde mbọp enye nnam ọkọri. Koro Christ ikenemke idemesie esịt.” (Rome 15:2, 3) Man emem odu ke esop, Christian oro ọkọride esịm ọyọhọ idaha eyenyịme nditre ndinam n̄kpọ emi ekemede ndifịna ubieresịt mbon en̄wen.—Rome 14:19-21.
9 Kere n̄kpọ iba en̄wen oro anade inen̄ede ikere iban̄a: edu nnyịn kaban̄a idan̄ ye nte isede ndọ. Mbon oro mîdịghe kan̄a nditọisọn̄ Obio Ubọn̄ Abasi isidaha idan̄ eren ye eren m̀mê eke an̄wan ye an̄wan nte idiọkn̄kpọ, mmọ ẹsida n̄wed ye ndise idan̄ nte ikpîkpu mbubru, ẹnyụn̄ ẹkere ke efịbe ye usiondọ ẹdi ikpîkpu mbubehe idemowo. Nditọisọn̄ Obio Ubọn̄ ẹma ẹkpọn̄ utọ edu oro sia ẹdide ndikere mban̄a udọn̄ idemowo kpọt nnyụn̄ ntre ndikere mban̄a ini iso. Okposụkedi emi ediwak Christian ẹkesidude oburobụt uwem, idahaemi mmọ ẹdise idan̄ ye ndọ nte enọ Abasi. Mmọ ẹnen̄ede ẹma mme n̄kokon̄ edumbet Jehovah ẹnyụn̄ ẹnyịme ke ofụri esịt ke mbon oro ẹkade iso ẹsịn idem ke oburobụt edinam idan̄ idotke ndidi nditọisọn̄ Obio Ubọn̄. (1 Cor. 6:9-11) Nte ededi, mmọ ẹfiọk n̄ko ke esịt esibian̄a owo. (Jer. 17:9) Ntre mmọ ẹsidat esịt ndibọ mme akpan ntọt oro ẹn̄wamde mmọ ndika iso ndu ata edisana uwem.
NDITỌISỌN̄ OBIO UBỌN̄ ẸSIMA NTỌT ORO ẸNỌDE MMỌ
10, 11. Ewe ekemini ntọt ke Obio Ubọn̄ Abasi ọnọ, ndien afo ese didie mme utọ ntọt oro?
10 Mme ukara owo ẹkeme ndinọ ntọt mban̄a udia ye ibọk. Ana in̄wan̄-in̄wan̄ ke idịghe kpukpru udia ye ibọk ẹdiọk. Edi edieke enyenede akpan udia m̀mê ibọk emi mîfọnke, ukara ekeme ndinọ mme ntọt oro ẹwụtde eti ibuot man ekpeme nditọisọn̄ mmọ. Edieke ukara mînamke oro, ọkpọwọrọ ke mmọ inamke utom mmọ. Kpasụk ntre, Obio Ubọn̄ Abasi esinọ ekemini ntọt aban̄a mme akpan n̄kpọ oro ẹkemede ndibiat eti ido uwem nnyịn ye nsọn̄idem eke spirit nnyịn. Ke uwụtn̄kpọ, Intanet edi eti usụn̄ ndida nnyene nneme, nnọ ukpep, nnyụn̄ nnọ idem inemesịt. Esop Abasi ẹda Intanet ẹnam n̄kpọ ẹnyụn̄ ẹnen̄ede ẹnam ekese ke ntak oro. Nte ededi, ediwak ikpehe Intanet ẹkeme ndibiat eti uwem ye idaha eke spirit nnyịn. Mme ikpehe Intanet oro ẹsịnde udọn̄ ẹnọ ndise idan̄ ẹkeme ndibiat idaha eke spirit nditọisọn̄ Obio Ubọn̄. Ke ediwak isua idahaemi, otu ofụn emi anamde akpanikọ omodụri nnyịn utọn̄ aban̄a mme utọ ikpehe oro. Nnyịn iwụt esịtekọm didie ntem iban̄a mme ntọt emi!
11 Ke mme isua ndondo emi, enyene mme ikpehe Intanet emi ẹnen̄erede ẹwọrọ etop—kpa enye emi ekemede ndinyene ufọn edieke ẹdade enye ẹnam n̄kpọ ye usọ. Edi mme ikpehe emi, emi ẹfiọkde nte ikpehe usobo ye mme owo ke Intanet, ẹkeme n̄ko ndibiat owo. Mmọ ẹkeme ndinam owo odụk idiọk nsan̄a. (1 Cor. 15:33) Imosụk ise esop Abasi ọnọde nnyịn ntọt oro owụtde eti ibuot aban̄a edida mme utọ ikpehe Intanet oro nnam n̄kpọ. Ndi afo omokot kpukpru n̄kpọ oro ofụn emi anamde akpanikọ ewetde ke ndondo emi aban̄a mme ikpehe usobo ye mme owo ke Intanet? Okpowụt unana ibuot didie ntem ndida mme ikpehe emi nnam n̄kpọ ke ini owo mîkotke se ẹwetde oro! a Emi ekpetie nte ndida okopodudu ibọk ke ini owo mîkotke se ẹwetde ke efọk esie.
12. Ntak emi edide nditen̄ ndifụmi mme ntọt?
12 Mbon oro ẹfụmide item emi ofụn emi anamde akpanikọ ọnọde ẹnam idemmọ ye mbon mmọ ibak. Ndusụk owo ẹnyene mbumehe edise ndise idan̄ mîdịghe ẹnam oburobụt ido ẹnyụn̄ ẹbian̄a idemmọ ẹkere ke Jehovah ikemeke ndikụt se mmimọ inamde. Nso nditen̄ ke edi ntem ndinịm ke imekeme ndidịp Jehovah n̄kem nnyịn! (N̄ke 15:3; kot Mme Hebrew 4:13.) Abasi oyom ndin̄wam mme utọ owo oro onyụn̄ esịn udọn̄ ọnọ mme andida ke ibuot esie ke isọn̄ ete ẹdomo ndin̄wam mmọ. (Gal. 6:1) Nte ededi, kpa nte ukara owo ekemede ndibọ owo emi anamde ndiọi n̄kpọ itie eyenisọn̄, Jehovah ọyọbọ mbon oro ẹkade iso ẹnam idiọkn̄kpọ edi ikabakede esịt, itie nte nditọisọn̄ Obio Ubọn̄. b (1 Cor. 5:11-13) Edi enye esitua owo mbọm. Mbon oro ẹkabarede esịt ẹnyụn̄ ẹkpụhọrede ẹkeme ndifiak nnyene unyịme Jehovah nnyụn̄ n̄ka iso ndi nditọisọn̄ Obio Ubọn̄. (2 Cor. 2:5-8) Nso akwa ukpono ke edi ntem ndinam n̄kpọ nnọ utọ edima Edidem oro!
NDITỌISỌN̄ OBIO UBỌN̄ ẸMA UBỌ UKPEP
13. Didie ke nditọisọn̄ Obio Ubọn̄ ẹwụt ke mmimọ imama ubọ ukpep?
13 Ediwak ukara owo ẹsisịn ifịk ẹnọ nditọisọn̄ mmọ ukpep. Mmọ ẹsisiak mme ufọkn̄wed emi ẹkpepde nte ẹkotde n̄wed ẹnyụn̄ ẹwetde n̄kpọ ẹnyụn̄ ẹkpepde owo ubọkutom. Nditọisọn̄ Obio Ubọn̄ ẹma mme ufọkn̄wed ukara owo emi, ẹnyụn̄ ẹsịn ifịk ẹkpep ndikot n̄wed, ndiwet n̄kpọ, nnyụn̄ n̄kpep ubọkutom ndida ndu uwem. Edi mmọ ẹkam ẹma ukpep oro mmọ ẹbọde nte nditọisọn̄ Obio Ubọn̄ Abasi ẹkan. Jehovah ada esop Christian ekpep mmọ ndikot n̄wed nnyụn̄ n̄wet n̄kpọ. Ẹsịn udọn̄ ẹnọ mme ete ye eka ẹsikot n̄wed ẹnọ n̄kpri nditọ mmọ. Ofụn emi anamde akpanikọ esisio Enyọn̄-Ukpeme iba ye Awake! kiet kpukpru ọfiọn̄, ndien ẹda Bible ẹwet mme magazine emi, mmọ ẹnyụn̄ ẹdi ediwak page. Edieke afo okotde page ifan̄ kpukpru usen ke ọfiọn̄, eyekeme ndikot kpukpru n̄kpọ emi ẹdade ẹnọ ukpep Obio Ubọn̄ mi.
14. (a) Nso ukpep ke nnyịn ibọ? (b) Mme ekikere ewe oro ẹnọde ẹban̄a mbubreyo Utuakibuot Ubon ke afo ama?
14 Kpukpru urua, nditọisọn̄ Obio Ubọn̄ ẹsibọ ukpep ke mme mbono esop. Ke uwụtn̄kpọ, Ufọkn̄wed Utom Ukara Abasi an̄wam nditọ ufọkn̄wed oro ke se ibede isua 60 ndidi nti mme andikpep Ikọ Abasi. Ndi afo emesịn enyịn̄ ke ufọkn̄wed emi? Ke mme isua ndondo emi, ofụn emi anamde akpanikọ emesịn udọn̄ ọnọ mme ubon ete ẹsinịm mbubreyo Utuakibuot Ubon kpukpru urua. Ndutịm emi anam ubon ẹnen̄ede ẹdiana kiet. Ndi afo emesinam mme ekikere oro ẹsinọde ke mme n̄wed nnyịn? c
15. Nso idi kiet ke otu akakan ifet oro inyenede?
15 Nditọisọn̄ ukara owo ẹsinam mme owo ẹdiọn̄ọ n̄ka ukaraidem emi mmọ ẹdade ẹnọ, mmọ ẹkam ẹkeme ndisan̄a ke enyịnusụn̄ ke enyịnusụn̄ nnam ntre. Nditọisọn̄ Obio Ubọn̄ ẹkam ẹnam ẹkan oro ke ndisịn ifịk nnọ Obio Ubọn̄ Abasi ibetedem ke efak ye ke enyịnusụn̄ ke enyịnusụn̄. Ke akpanikọ, nte iketịn̄de ke ibuotikọ ukpepn̄kpọ oro ekebede, Enyọn̄-Ukpeme, emi esitọtde Obio Ubọn̄ Jehovah, edi magazine emi ẹsuande ẹkan ke isọn̄! Kiet ke otu akakan ifet oro inyenede edi nditịn̄ nnọ mbon en̄wen mban̄a Obio Ubọn̄ Abasi. Ndi ke esịn ifịk anam utom ukwọrọikọ?—Matt. 28:19, 20.
16. Didie ke afo ekeme ndiwụt ke imọ idi eti eyenisọn̄ Obio Ubọn̄ Abasi?
16 Idibịghike, Obio Ubọn̄ Abasi kpọt edikara ofụri isọn̄. Enye edise iban̄a ofụri ikpehe uwem nnyịn, idịghe mme n̄kpọ eke spirit kpọt edi ye mme n̄kpọ eken n̄ko. Ndi afo eyedi eti eyenisọn̄ Obio Ubọn̄ Abasi ini oro? Idahaemi edi ini ndiwụt ke eyedi. Ke kpukpru ubiere oro anamde ke usen ke usen, nam kpukpru n̄kpọ nọ Jehovah ubọn̄ man owụt ke imọ ke idu uwem nte eyenisọn̄ Obio Ubọn̄ Abasi.—1 Cor. 10:31.
[Mme Ikọ Idakisọn̄]
a Ke uwụtn̄kpọ, se Awake! eke July 2011, page 24-27; August 2011, page 10-13; ye February 2012, page 3-9.
c Se Enyọn̄-Ukpeme eke August 15, 2011, page 6-7 ye Utom Obio Ubọn̄ Nnyịn eke January 2011, page 3-6.
[Mme Mbụme Ukpepn̄kpọ]
[Se ẹwetde ke ikpọ abisi ke page 14]
Ndi afo amanam ntọt Bible oro aban̄ade Intanet?
[Ndise ke page 12]
Ndi afo amadat esịt aban̄a edisana utuakibuot ye mbụk esie nte nditọ Korah ẹkedatde?
[Ndise ke page 15]
Mbubreyo Utuakibuot Ubon mbufo ekeme ndinen̄ede n̄n̄wam fi ye mbonubon fo ẹdi nti nditọisọn̄ Obio Ubọn̄
