“Ami Ndodu ye Mbufo”

“Ediwak owo ẹyeyọrọ ẹdi ẹnyụn̄ ẹyọrọ ẹka, ndien ata ifiọk oyokpon.”​—DAN. 12:4.

DIDIE KE AFO ỌKPỌBỌRỌ?

Didie ke ẹdiọn̄ọ “ata ifiọk” mfịn?

Ntak emi ẹkemede ndidọhọ ke “ediwak owo” ẹbọ akpanikọ?

Didie ke ẹnam nnennen ifiọk ‘okpon’?

1, 2. (a) Nnyịn isan̄a didie ifiọk ke Jesus odu ye mme mbet esie mfịn ye nte ke enye oyodu ye mmọ ke ini iso? (b) Nte Daniel 12:4 etịn̄de, nso ke editịn̄ enyịn n̄kpep N̄wed Abasi edida idi?

 DA NTE odu ke Paradise. Idem enenem fi kpukpru usenubọk emi edemerede, onyụn̄ enen̄ede ọdọn̄ fi ndinam utom. Ukopke ubiak ndomokiet. Kpukpru udọn̄ọ fo ẹkụre. Emekeme ndikụt usụn̄, n̄kop n̄kpọ, n̄kop utebe, nnyụn̄ n̄kop inem n̄kpọ ke mfọnmma usụn̄. Emenen̄ede okop odudu, okop inem utom fo, enyene ediwak ufan, unyụn̄ unyeneke mfịna. Afo emekeme ndinyene mme edidiọn̄ emi ke Obio Ubọn̄ Abasi. Christ Jesus, Edidem emi ẹmekde, ọyọdiọn̄ mbon emi enye edikarade onyụn̄ ekpep mmọ ifiọk Jehovah.

² Abasi ye Eyen esie ẹyen̄wam mme asan̄autom Esie oro ẹsọn̄ọde ẹda, ẹkpep mbon en̄wen ifiọk Jehovah ini oro. Ke akpanikọ, Jehovah ye Eyen esie ẹsisụk ẹdodu ye mbon nsọn̄ọnda toto ke eset. Mbemiso Jesus akafiakde ọnyọn̄ heaven, enye ama ọn̄wọn̄ọ ọnọ mme mbet esie oro ẹkesọn̄ọde ẹda ete ke imọ iyodu ye mmọ. (Kot Matthew 28:19, 20.) Man inen̄ede inyene mbuọtidem ke un̄wọn̄ọ emi, ẹyak ineme udịmikọ kiet kpọt ke ntịn̄nnịm ikọ Abasi emi ẹkewetde ke se ibede isua 2,500 ke Babylon eset. Prọfet Daniel ekewet ntem aban̄a “utịt ini” emi nnyịn idude mi: “Ediwak owo ẹyeyọrọ ẹdi ẹnyụn̄ ẹyọrọ ẹka, ndien ata ifiọk oyokpon.” (Dan. 12:4) Imọfiọk idahaemi ke ikọ Hebrew oro ẹkabarede ‘ẹyọrọ ẹdi ẹnyụn̄ ẹyọrọ ẹka’ ọwọrọ nditịn̄ enyịn n̄kpep n̄kpọ. Ediyọrọ emi ayada ata utịbe utịbe edidiọn̄ edi. Mbon oro ẹtịn̄de enyịn ẹkpep N̄wed Abasi ẹyenyene ata, m̀mê nnennen, ifiọk Ikọ Abasi. Ntịn̄nnịm ikọ oro ọdọhọ n̄ko ke ediwak owo ẹyebọ “ata ifiọk.” Akan oro, ifiọk oro oyokpon. Mme owo ke kpukpru ebiet ẹyekeme  ndinyene ifiọk emi. Nte nnyịn inemede ntịn̄nnịm ikọ emi, iyokụt ke Jesus odu ye mme mbet esie mfịn ye nte ke Jehovah enen̄ede ekeme ndinam kpukpru se enye ọn̄wọn̄ọde.

ẸDIỌN̄Ọ “ATA IFIỌK”

3. Nso iketịbe inọ “ata ifiọk” ke mme apostle ẹma ẹkekpan̄a?

³ Ke mme apostle ẹma ẹkekpan̄a, mbon oro ẹkefiakde edem ẹkpọn̄ ata Ido Ukpono Christ ẹma ẹwọrọ ẹdi ẹnyụn̄ ẹsuana ẹyọhọ kpukpru ebiet. (Utom 20:28-30; 2 Thess. 2:1-3) Ke ediwak isua ikie oro ẹketienede, “ata ifiọk” ikokponke ke otu mbon oro mîkọfiọkke n̄kpọ ndomokiet iban̄a Bible ye mbon oro ẹkedọhọde ke idi Christian. Okposụkedi emi Christendom ẹkedọhọde ke imenịm N̄wed Abasi ke akpanikọ, mme adaiso mmọ ẹkekpep nsu—kpa “ukpepn̄kpọ mme demon” emi ẹsuenede Abasi. (1 Tim. 4:1) Oro ikayakke mme owo ẹfiọk akpanikọ oro aban̄ade Abasi. Ẹkekam ẹkpep mmọ mme nsunsu ukpepn̄kpọ utọ nte ke Abasi edi Ita-ke-Kiet, ke ukpọn̄ isikpaha, ye nte ke ẹsitụhọde ndusụk ukpọn̄ ke nsinsi ke ikan̄ hell.

4. Didie ke ekpri otu mme Christian emi ẹkedude ke iduọk isua 1870 ẹketọn̄ọ ndiyom “ata ifiọk”?

⁴ Edi ke iduọk isua 1870—n̄kpọ nte isua 40 mbemiso “mme akpatre usen” ẹketọn̄ọde—ekpri otu mme Christian oro ẹnyenede esịt akpanikọ ke Pennsylvania, U.S.A., ẹma ẹsisop idem ọtọkiet ẹtịn̄ enyịn ẹkpep Bible ẹnyụn̄ ẹyom “ata ifiọk.” (2 Tim. 3:1) Mmọ ẹkekot idemmọ Nditọ Ukpepn̄kpọ Bible. Mmọ ikedịghe “mbon ọniọn̄ ye mbon ikike” emi Jesus ọkọdọhọde ke ẹyedịp mmọ ifiọk. (Matt. 11:25) Mmọ ẹkedi mbon nsụhọdeidem emi ẹkenen̄erede ẹyom ndinam uduak Abasi. Mmọ ẹma ẹtịn̄ enyịn ẹkot, ẹneme, ẹtie ẹkere se mmọ ẹkpepde ke N̄wed Abasi, ẹnyụn̄ ẹbọn̄ akam ẹyom ndausụn̄ Abasi. Mmọ ẹma ẹmen mme itie n̄wed Bible ẹdomo ye kiet eken ẹnyụn̄ ẹkot mme n̄wed oro mbon en̄wen emi ẹketịn̄de enyịn ẹkpep Bible ẹkewetde. Sụn̄sụn̄, Nditọ Ukpepn̄kpọ Bible emi ẹma ẹdifiọk akpanikọ emi ẹkedịpde ke ata ediwak isua.

5. Ntak emi ẹkesiode tract oro ẹkekotde The Old Theology?

⁵ Okposụkedi emi Nditọ Ukpepn̄kpọ Bible oro ẹkenemde esịt ẹban̄a mme n̄kpọ oro mmọ ẹkekpepde, mmọ ikayakke mbufa n̄kpọ emi mmọ ẹfiọkde mi ẹnam mmọ ẹkohode idem, ikonyụn̄ idọhọke ke mmimọ itan̄a obufa etop. (1 Cor. 8:1) Utu ke oro, mmọ ẹma ẹsio mbufa tract emi ẹkekotde The Old Theology (Akani Ukpepn̄kpọ). Uduak mmọ ekedi ndinam mme andikot ẹfiọk akpanikọ oro ama okododu ke Bible. Ke akpa tract oro, ẹma ẹwet “n̄kpọ efen efen oro ẹkpedade ẹkpep Bible man ẹtre kpukpru nsunsu ukpepn̄kpọ ẹnyụn̄ ẹfiak ẹkekpep akani ukpepn̄kpọ Ọbọn̄ nnyịn ye eke mme apostle.”—The Old Theology, Nọ. 1, April 1889, p. 32.

6, 7. (a) Mme akpanikọ ewe ke ẹnam ẹn̄wan̄a nnyịn toto ke iduọk isua 1870? (b) Nso ye nso ke afo ekpep ke Bible, emi enen̄erede ama?

⁶ Imedifiọk ediwak n̄kpọ en̄wen ke Bible tọn̄ọ ẹkefiak ẹtọn̄ọ ndikpep akpanikọ ke se ibede isua 100. a Mme n̄kpọ oro ikpepde mi idịghe eto eto ifiọk ibuot emi mme ekpep ukpepn̄kpọ ido ukpono ẹsitiede ẹfan̄a. Mmọ ẹdi akpanikọ emi ẹnamde owo ọwọrọ ufụn, ẹnamde uwem nnyịn enyene se ọwọrọde, ẹnyụn̄ ẹnamde ikop idatesịt inyụn̄ inyene idotenyịn. Mmọ ẹnam nnyịn idifiọk Jehovah—ifiọk nti edu ye uduak esie. Mmọ ẹnam nnyịn  ifiọk owo emi Jesus edide, ntak emi enye ekedide isọn̄ onyụn̄ akpade, ẹnyụn̄ ẹnam nnyịn ifiọk se enye anamde idahaemi. Se nnyịn ikpepde ke Bible anam nnyịn ifiọk ntak emi Abasi ayakde idiọkido aka iso, ntak emi owo esikpade, nte nnyịn ikpọbọn̄de akam, ye nte ikemede ndinen̄ede n̄kop inemesịt.

⁷ Idahaemi nnyịn imekeme ndifiọk se mme ntịn̄nnịm ikọ oro ‘ẹkedịpde’ ke ediwak emana ẹwọrọde, sia imokụt nte mmọ ẹsude ke utịt ini emi. (Dan. 12:9) Mmọ ẹsịne mbon oro ẹdude ke ofụri N̄wed Abasi, akpan akpan ke mme Gospel ye ke n̄wed Ediyarade. Jehovah amakam anam nnyịn ifiọk mme n̄kpọ emi nnyịn mîkemeke ndikụt—Jesus ndidi edidem ke heaven, ekọn̄ oro ẹken̄wanade ke heaven, ye edisio Satan nduọk ke isọn̄. (Edi. 12:7-12) Abasi anam mme n̄kpọ oro nnyịn ikemede ndikụt ẹn̄wan̄a nnyịn n̄ko—ekọn̄, unyekisọn̄, akan̄, idiọk udọn̄ọ, ye nte mme idiọkowo ẹtienede ẹnam “ndiọkeyo emi [ọsọn̄] ndiyọ.”—2 Tim. 3:1-5; Luke 21:10, 11.

8. Anie ke nnyịn ikpọkọm ke mme n̄kpọ emi nnyịn ikụtde inyụn̄ ikopde?

⁸ Se Jesus eketịn̄de ọnọ mbet esie enen̄ede an̄wan̄a nnyịn. Enye ọkọdọhọ ete: “Mbon emi enyịn mmọ okụtde mme n̄kpọ eke mbufo ẹkụtde ẹkop inemesịt. Koro ndọhọ mbufo nte, Ama ọdọn̄ ediwak mme prọfet ye ndidem ndikụt mme n̄kpọ emi mbufo ẹkụtde mi edi mmọ ikekwe, ndinyụn̄ n̄kop mme n̄kpọ emi mbufo ẹkopde mi edi mmọ ikokopke.” (Luke 10:23, 24) Imọkọm Jehovah Abasi ke ndinam nnyịn ikụt inyụn̄ ikop mme n̄kpọ emi. Imenen̄ede ikop inemesịt sia ẹnọ “andin̄wam,” edisana spirit Abasi, ẹte ada mme anditiene Jesus usụn̄ “odụk ke ofụri akpanikọ.” (Kot John 16:7, 13.) Nnyịn ikpakam inen̄ede ima “ata ifiọk” inyụn̄ ikpep mbon en̄wen ke ofụri esịt!

“EDIWAK OWO” ẸBỌ “ATA IFIỌK”

9. Ewe ikot ke ẹkenọ ke nsiondi Enyọn̄-Ukpeme (Ikọmbakara) eke April 1881?

⁹ Ke April 1881, emi mîkọyọhọke isua iba tọn̄ọ ẹkemịn̄ akpa nsiondi Enyọn̄-Ukpeme (Ikọmbakara), magazine emi ama ọdọhọ ke ẹyom mme ọkwọrọikọ 1,000. Ibuotikọ oro ọkọdọhọ ete: “Imenyene ekikere ndinọ mbon emi idaha mmọ ediyakde mmọ ẹda mbahade iba m̀mê se ikande oro ke ini mmọ ẹnam utom Ọbọn̄ . . . , ekikere oro edi: Ẹwọrọ ẹka n̄kpri m̀mê ikpọ obio, nte ukeme mbufo edide, ẹkenam utom nte mme Colporteur m̀mê Mme Ọkwọrọikọ; ke kpukpru ebiet, ẹyom mbon emi ẹdide Christian ke ofụri esịt, emi ẹdikụtde ke ediwak mmọ ẹnyene ifịk ẹban̄a Abasi edi isan̄ake ye ifiọk; ẹkpep mmọ n̄kpọ ẹban̄a uwak mfọn Ete Nnyịn ye ndinem ikọ Esie.”

10. Mme owo ẹkenam didie n̄kpọ ẹban̄a ikot oro ẹkenọde ẹyom mbon oro ẹdinamde utom ukwọrọikọ uyọhọ ini?

¹⁰ Ikot oro ẹkenọde do ama owụt ke Nditọ Ukpepn̄kpọ Bible ẹma ẹfiọk ke akpan utom ata mme Christian edi ndikwọrọ eti mbụk. Ndiyom mme ọkwọrọikọ uyọhọ ini 1,000 owụt ke mmọ ẹma ẹnyene idotenyịn, sia owo ikie ifan̄ kpọt ẹkesidụk mbono esop Nditọ Ukpepn̄kpọ Bible ini oro. Nte ededi, ediwak owo oro ẹkekotde tract m̀mê magazine ẹma ẹkụt ke se mmimọ ikotde edi akpanikọ ẹnyụn̄ ẹsọsọp ẹyere ikot oro ẹkenọde. Ke uwụtn̄kpọ, ke ete kiet ke London ke England ama okokot nsiondi Enyọn̄-Ukpeme kiet ye ekpri n̄wed oro Nditọ Ukpepn̄kpọ Bible ẹkesiode, ke 1882, enye ama ewet ete: “Mbọk ẹsian mi nte n̄kpọkwọrọde ikọ ye se n̄kpọkwọrọde man n̄keme ndinam eti utom emi Abasi oyomde ẹnam.”

11, 12. (a) Didie ke uduak nnyịn edi ukem ye eke mme colporteur? (b) Didie ke mme colporteur ẹketọn̄ọ mme esop emi mmọ ẹkesikotde otu?

¹¹ Etisịm 1885, n̄kpọ nte Nditọ  Ukpepn̄kpọ Bible 300 ẹkenam utom nte colporteur. Uduak mme asan̄autom uyọhọ ini oro ekedi ukem ye uduak nnyịn mfịn—ndinam mbet nnọ Jesus Christ. Edi nte mmọ ẹkenamde okpụhọde ye nte nnyịn isinamde mfịn. Mfịn, nnyịn isikpep owo kiet kiet Bible, ndien emi esinam inen̄ede inọ owo oro ikpepde n̄kpọ ntịn̄enyịn. Ekem nnyịn ikot eyen ukpepn̄kpọ oro edidụk mbono esop. Edi ke ini oro, mme colporteur ẹkesinịm n̄wed ẹnyụn̄ ẹsop mbon oro ẹnyenede udọn̄ ọtọkiet ẹkpep mmọ N̄wed Abasi nte otu. Utu ke ndikpep n̄kpọ ye owo kiet kiet, mmọ ẹkesitọn̄ọ mme esop emi mmọ ẹkesikotde otu.

¹² Ke uwụtn̄kpọ, ke 1907, otu mme colporteur ẹma ẹsan̄a ke obio kiet ẹyom mbon oro ẹnyenede Millennial Dawn (emi ẹkotde n̄ko Studies in the Scriptures). Enyọn̄-Ukpeme ini oro ọkọdọhọ ete: “Ẹma ẹnam mbon emi [ẹkenyenede udọn̄ mi] ẹsop idem ke ufọk owo kiet ke otu mmọ. Colporteur kiet ama ada ofụri Sunday kiet eneme ye mmọ aban̄a Uduak Abasi eke Ofụri Emana, ndien ke Sunday oro eketienede, enye ama esịn udọn̄ ọnọ mmọ ete ẹsinịm mbono esop kpukpru ini.” Ke 1911, nditọete ẹma ẹkpụhọde nte mmọ ẹsinamde n̄kpọ. Mme akpan asan̄autom 58 oro ẹsan̄ade-san̄a ẹma ẹsinọ utịn̄ikọ an̄wa ke ofụri United States ye Canada. Nditọete emi ẹma ẹsibọ enyịn̄ mbon emi ẹnyenede udọn̄, emi ẹkedụkde utịn̄ikọ emi ye ebiet emi mmọ ẹdụn̄de ẹnyụn̄ ẹnam ndutịm man mmọ ẹsisop idem nte otu ke ufọk owo. Etisịm 1914, esop Nditọ Ukpepn̄kpọ Bible 1,200 ẹkedu ke ofụri ererimbot.

13. Nso inen̄ede ikpa fi idem ke ini ekerede aban̄a adan̄a nte ẹkpepde “ata ifiọk” mfịn?

¹³ Mfịn, n̄kpọ nte esop 109,400 ẹdu ke ofụri ererimbot, ndien n̄kpọ nte nditọete 895,800 ẹnam utom nte mme asiakusụn̄. Se ikperede ndisịm owo miliọn itiaita ẹbọ “ata ifiọk” idahaemi ẹnyụn̄ ẹda enye ẹdu uwem. (Kot Isaiah 60:22.) b N̄kọri emi akpa owo idem koro Jesus ọkọdọhọ ke mbet imọ ẹdidi “mbon emi kpukpru owo ẹsuade” ke ntak enyịn̄ imọ. Enye ama adian do ete ke ẹyekọbọ mme anditiene imọ, ẹsịn mmọ ke ufọk-n̄kpọkọbi, ẹnyụn̄ ẹwot ndusụk mmọ. (Luke 21:12-17) Kpa ye ubiọn̄ọ Satan, eke mme demon esie, ye eke mme andibiọn̄ọ mi ke isọn̄, ikọt Jehovah ẹnen̄ede ẹkụt unen ke utom edinam mbet emi ẹkenọde mmọ. Mfịn, mmọ ke ẹnam utom ke “ofụri isọn̄,” ọtọn̄ọde ke ebiet emi ofiopde akan tutu esịm ebiet emi ebịtde akan, ke ikpọ obot, ke desat, ke ikpọ obio, ye ke mme nsannsan obio-in̄wan̄. (Matt. 24:14) Owo ikpekemeke ndinam ofụri emi ke mîkpedịghe un̄wam Abasi.

‘ATA IFIỌK OKPON’

14. Didie ke ẹda n̄wed ẹnam mme owo ke nsio nsio ebiet ẹdiọn̄ọ “ata ifiọk”?

¹⁴ Ediwak mbon oro ẹkwọrọde eti  mbụk ẹnam ‘ata ifiọk okpon.’ Mme n̄wed oro ẹmịn̄de n̄ko ẹnam enye ‘okpon.’ Ke July 1879, Nditọ Ukpepn̄kpọ Bible ẹma ẹsio akpa nsiondi magazine emi, emi ekekerede Zion’s Watch Tower and Herald of Christ’s Presence. Ẹkekpekpe okụk ẹmịn̄ enye, ndien ẹkemịn̄ idem 6,000 ke Ikọmbakara kpọt. Ẹma ẹmek Charles Taze Russell emi ekedide isua 27 ini oro ẹte esiwet magazine emi, ndien Nditọ Ukpepn̄kpọ Bible ition en̄wen emi ẹkekọride ẹsịm ọyọhọ idaha ẹma ẹsitiene enye ẹwet n̄ko. Ẹmịn̄ Enyọn̄-Ukpeme idahaemi ke usem 195. Enye edi magazine oro ẹsuande ẹkan ke ofụri isọn̄, ndien ẹsimịn̄ idem 42,182,000 ke nsiondi kiet kiet. Udiana esie edi Awake! emi nnyịn n̄ko isiode, ndien ẹsimịn̄ idem 41,042,000 ke usem 84. Ke adianade do, ẹsimịn̄ n̄kpọ nte n̄wed ye Bible miliọn 100 kpukpru isua.

15. Ẹsida m̀mọ̀n̄ okụk ẹse ẹban̄a mme itie umịn̄n̄wed nnyịn?

¹⁵ Enọ imaesịt ke ẹda ẹnam akwa utom emi. (Kot Matthew 10:8.) Oro esikpa mbon oro ẹnyenede itie umịn̄n̄wed idem, sia mmọ ẹfiọk ke ukwak umịn̄n̄wed, babru, mmọn̄n̄wed, ye mme n̄kpọ eken emi ẹsidade ẹmịn̄ n̄wed ẹsọn̄ urua etieti. Eyenete kiet emi esidepde n̄kpọ ọnọ mme itie umịn̄n̄wed nnyịn ke ofụri ererimbot ọdọhọ ete: “Idem esikpa mbon oro ẹnamde mbubehe emi ẹsidide ẹdise mme itie umịn̄n̄wed nnyịn ndifiọk ke ẹda enọ imaesịt ẹdep ẹnyụn̄ ẹse ẹban̄a utọ ikpọ mbufa ukwak umịn̄n̄wed emi ẹsimịn̄de ata ediwak n̄wed. Idem esikpa mmọ n̄ko ndikụt ke ata ediwak owo emi ẹnamde utom ke Bethel ẹdi n̄kparawa, ndien ke mmọ ẹnen̄ede ẹkop inemesịt.”

IFIỌK ABASI ỌYỌYỌHỌ ISỌN̄

16. Ntak emi Abasi anamde ẹdiọn̄ọ “ata ifiọk”?

¹⁶ Enyene ntak emi “ata ifiọk” okponde ntem. Uduak Abasi edi yak “kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:3, 4) Jehovah oyom mme owo ẹfiọk akpanikọ man mmọ ẹkpetuak ibuot ẹnọ enye ke nnennen usụn̄ ẹnyụn̄ ẹbọ edidiọn̄ esie. Jehovah ada ukwọrọikọ atan̄ nsụhọ mme anam-akpanikọ Christian oro ẹyetde aran obok. Enye n̄ko ke atan̄ “akwa otuowo” emi ẹtọde “kpukpru idụt ye esien ye obio ye usem,” emi ẹdoride enyịn ndidu uwem ke isọn̄ ke nsinsi obok.—Edi. 7:9.

17. Nso ke n̄kọri emi odude ke utuakibuot akpanikọ owụt?

¹⁷ Nte utuakibuot akpanikọ ọkọride ke isua 130 emi ẹbede enen̄ede owụt ke Abasi ye Edidem emi enye emekde, kpa Jesus Christ, ẹdu ye mme asan̄autom Jehovah ke isọn̄—ẹnọ ndausụn̄, ẹkpeme, ẹtịm, ẹnyụn̄ ẹnọ mmọ ukpep. N̄kọri emi owụt n̄ko ke Jehovah iditreke ndisu se enye ọn̄wọn̄ọde aban̄a ini iso. “Ifiọk Jehovah ọyọyọhọ isọn̄ kpa nte mmọn̄ ofụkde inyan̄.” (Isa. 11:9) Nso edidiọn̄ ke ubonowo ẹdibọ ntem ini oro!

[Mme Ikọ Idakisọn̄]

[Mme Mbụme Ukpepn̄kpọ]

[Ndise ke page 6]

Nditọ Ukpepn̄kpọ Bible ẹkedi mbon nsụhọdeidem oro ẹkenen̄erede ẹyom ndinam uduak Abasi

[Ndise ke page 7]

Jehovah ama ukeme oro esịnde ndikpep mme owo “ata ifiọk” Abasi