Nte Afo Emeti?
Nte Afo Emeti?
Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Se m̀mê emekeme ndibọrọ mme mbụme oro ẹtienede mi:
Ndi idet akanam Samson okop odudu?
Idịghe idet ke idemesie akanam Samson okop odudu. Idet esie akada aban̄a san̄asan̄a itie ebuana emi enye ekenyenede ye Abasi nte Nazarite. Itie ebuana emi ama abiara ke ini Delilah akanamde ẹfat enye idet.—4/15, page 9.
Ewe n̄kpọ ita emi ẹsifọnde ye ata esịt nnyịn ẹnyụn̄ ẹfọn n̄ko ye ndamban̄a esịt nnyịn?
(1) Udia. Oyom isidia nti udia man ọfọn ye ata esịt nnyịn, ntre n̄ko ke oyom isidia udia eke spirit kpukpru ini. (2) Nsịn̄edeidem. Ndinen̄ede nsịn idem ke utom ukwọrọikọ ọfọn ye ndamban̄a esịt nnyịn. (3) Ebiet. Imekeme ndisụhọde mfịna edieke idụkde nsan̄a ye nditọete nnyịn, emi ẹnen̄erede ẹma nnyịn.—4/15, page 16.
Didie ke ebe ye n̄wan ẹkeme ndifiak nnyene mbuọtidem ke idem kiet eken edieke owo kiet ke otu mmọ esịnde efịbe?
Mmọ ẹkpenyene (1) nditịn̄ akpanikọ nnọ kiet eken; (2) ndidiana kiet; (3) ndikpụhọde edu mmọ; ye (4) ndidiọn̄ọ ini emi mmọ ẹkpetrede iyatesịt ẹnyụn̄ ẹfiak ẹdu ke emem.—5/1, page 12-15.
Ntak emi mîkpanaha owo emi ọnọde utịn̄ikọ ubụkowo ọdọhọ ke Psalm 116:15 aban̄a eyenete oro akpade do?
Itien̄wed oro ọdọhọ ete: “N̄kpa mbon emi ẹsọn̄ọde ẹda ye Jehovah Edi ọsọn̄urua n̄kpọ ke enyịn esie.” Emi ọwọrọ ke Abasi idiyakke ẹsobo ofụri otu mbon emi ẹsọn̄ọde ẹda ye enye ẹfep, koro mmọ ẹnen̄ede ẹdi n̄kpọuto ke enyịn esie. Enye idiyakke ẹsobo mme asan̄autom esie nte otu ẹfep ofụri ofụri ke isọn̄.—5/15, page 22.
Mmanie ẹkedi mme colporteur?
Mbemiso 1931, ẹkesikot mme asiakusụn̄ “colporteur.”—5/15, page 31.
Mme n̄kpọ ewe ẹwụt ke Bible itiehe nte n̄wed eken emi mme owo ẹwetde?
Bible ọdọn̄ọ ediwak ntịn̄nnịm ikọ emi ẹkesude. Enye obụk ata mbụk, idịghe n̄ke. Ekem ye nnennen ifiọk ntaifiọk, kpukpru n̄wed esie ẹnyụn̄ ẹdu ke n̄kemuyo. Enyene ufọn mfịn.—6/1, page 4-8.
Mmanie ẹdi “kpukpru mme obio ubọn̄ emi,” oro ẹtịn̄de ẹban̄a ke Daniel 2:44?
Ntịn̄nnịm ikọ oro aban̄a mme obio ubọn̄, m̀mê mme ukara, oro Daniel ọkọdọhọde ke nsio nsio ikpehe akwa mbiet Nebuchadnezzar ẹda ẹban̄a mmọ.—6/15, page 17.
Ini ewe ke ukara ererimbot eke Britain ye America akakabade edi ọyọhọ ukara ererimbot itiaba oro Bible eketịn̄de enịm?
Adiana-iba ukara emi ọkọtọn̄ọ ke ini Britain ye United States ẹkedianade kiet ẹnam n̄kpọ ke n̄wọrọnda usụn̄ ke ini akpa ekọn̄ ererimbot.—6/15, page 19.
Didie ke Abasi esifen onyụn̄ efre idiọkn̄kpọ mbon oro ẹkabarede esịt?
Jehovah ọkọdọhọ ikọt esie ete: “[Nditịghi] aba mme idiọkn̄kpọ mmọ.” (Jeremiah 31:34) Enye ekeme ndida ufak mfen idiọkn̄kpọ. Ke ini Abasi efende ọnọ owo, ẹdọhọ ke enye efre idiọkn̄kpọ oro sia enye mîditịghi aba idiọkn̄kpọ oro man ada amia owo ufen.—7/1, page 18.
Ntak emi ikpenịmde ke mme utịben̄kpọ oro ẹwetde ke Bible ẹma ẹtịbe?
Ẹkenam ediwak utịben̄kpọ emi ke eferife, idịghe ke ndịbe. Mme utịben̄kpọ emi ikesiwakke n̄kukọhọ, inyụn̄ iyom mme akpan n̄kpọ emi ẹkamade ẹnam. Ẹkenam mme utịben̄kpọ emi man ẹnọ Abasi ubọn̄, idịghe owo. Ẹma ẹnam ediwak nsio nsio utịben̄kpọ ndien mme andibiọn̄ọ eyo oro ikafan̄ake ke mme n̄kpọ emi iketịbeke. Mme ntak emi ẹnam inịm ke mme utịben̄kpọ emi ẹwetde ke Bible ẹma ẹtịbe.—8/1, page 7-8.
