Emem Ke Tọsịn Isua—Ye ke Oro Ebede!
Emem Ke Tọsịn Isua—Ye ke Oro Ebede!
“Man Abasi ekpedi kpukpru n̄kpọ ọnọ kpukpru owo.”—1 COR. 15:28.
NTE AFO EMEKEME NDINAM AN̄WAN̄A?
Nso ke mme itie N̄wed Abasi emi ndisu ediwọrọ inọ fi?
1. Nso ina ibet “akwa otuowo”?
KERE ban̄a kpukpru ufọn oro mme owo ẹkemede ndinyene ke idak okopodudu ukara emi eti edidem emi esituade owo mbọm akarade ke tọsịn isua kiet! Mme utịbe utịbe n̄kpọ ke ẹna ẹbet “akwa otuowo” emi owo ndomokiet mîkemeke ndibat. Mmọ ẹyebọhọ “akwa ukụt,” emi editrede idiọk editịm n̄kpọ emi.—Edi. 7:9, 14.
2. Nso itịbe inọ ubonowo ke isua 6,000 emi ẹbede?
2 Ke ofụri isua 6,000 emi mme owo ẹdomode ndikara idemmọ mi, mmọ ẹmeda ekese ubiak ye ndutụhọ ẹsọk ofụri ubonowo. Bible ama etịn̄ anyan ini ko ete: “Owo [akara] owo tutu ọnọ enye unan.” (Eccl. 8:9) Nso ke nnyịn ikụt mfịn? Ke ẹsiode ekọn̄ ye nsọn̄ibuot ye ukara ẹfep, ubuene, udọn̄ọ, edibiat isọn̄, idaha eyo ndikpụhọde, ye mme n̄kpọ eken ẹkama nsobo. Mbon ukara ẹdụri owo utọn̄ ẹte ke edieke owo mînamke ukpụhọde ke nte ẹkade iso ndibiat isọn̄, ke n̄kpọ ọyọdiọk etieti.
3. Nso ke Tọsịn Isua Ukara edinam?
3 Ke idak ukara Jesus Christ emi edide Edidem Messiah ye owo 144,000 emi ẹditienede enye ikara, Obio Ubọn̄ Abasi ọyọdiọn̄ kpukpru idiọk oro ẹkenamde ubonowo ye isọn̄ emi mmọ ẹdụn̄de. Tọsịn Isua Ukara oyosu inem inem un̄wọn̄ọ emi Jehovah Abasi ọkọn̄wọn̄ọde ete: “Mmọn̄ mbot mbufa enyọn̄ ye obufa isọn̄; ndien owo iditịghi aba mme akpa n̄kpọ, mmọ idinyụn̄ idụkke owo esịt.” (Isa. 65:17) Nso utịbe utịbe n̄kpọ oro nnyịn mîkwe kan̄a ẹbet nnyịn ke ini iso? Mme ntịn̄nnịm Ikọ Abasi ẹkeme ndin̄wam nnyịn ifiọk se mme utịbe utịbe n̄kpọ emi ẹdide, kpa ye oro “owo mîkwe ke enyịn” kan̄a.—2 Cor. 4:18.
‘MMỌ ẸYEBỌP UFỌK ẸNYỤN̄ ẸTỌ IN̄WAN̄ VINE’
4. Didie ke ufọkidụn̄ edi mfịna mfịn?
4 Anie mîkpamaha ndinyene ọkpọkpọ ufọk esiemmọ, emi enye ye ubon esie ẹkemede ndinyene emem ye ifụre? Edi ke ererimbot mfịn emi, idịghe kpukpru owo ẹnyene ufọk. Mme owo ẹka ẹkeyọhọ ikpọ obio. Ediwak owo ẹdụn̄ ke ntan̄wan̄ ufọk ye ke ndedehe ebiet. Mmọ ẹkere ke tutu amama mmimọ idinyeneke ufọk idem mmimọ.
5, 6. (a) Isaiah 65:21 ye Micah 4:4 ẹdisu didie? (b) Didie ke ikeme ndibọ edidiọn̄ oro?
5 Ke idak ukara Obio Ubọn̄, kpukpru owo ẹyenyene ufọk idemmọ, koro Isaiah ama etịn̄ ntịn̄nnịm ikọ ete: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.” (Isa. 65:21) Edi idịghe ndinyene ufọk idemmọ edi n̄kukụre idotenyịn oro mmọ ẹnyenede. Idem n̄kpọ, n̄kọ ndusụk owo mfịn ẹdụn̄ ke ufọk idemmọ, ibat ibat ẹkam ẹdụn̄ọ ke ata ikpọ ndiye ufọk. Edi mmọ ẹsiwak ndikop editịmede esịt ke mfịna okụk ekeme ndinam mmimọ itaba ufọk mmimọ, mîdịghe ke mbon n̄wo m̀mê mbon oro ẹdiọkde ẹkan oro ẹkeme ndibụn̄ ndụk. Edi utọ n̄kpọ oro iditịbeke ke idak ukara Obio Ubọn̄! Prọfet Micah ekewet ete: “Mmọ ẹyetie ke idak vine mmọ ye ke idak eto fig mmọ, ndien ididụhe owo eke edinamde mmọ ẹdịghe.”—Mic. 4:4.
6 Ke ikerede iban̄a utọ utịbe utịbe idotenyịn oro, nso ke ikpanam? Edi akpanikọ ke kpukpru nnyịn imoyom eti ufọk. Kpa ye oro, utu ke ndisịn ibuot nsịn itọn̄ nyom ndinyene utọ ufọk oro idahaemi—eyedi idụkde akamba isọn man inyene—ndi ikpakam ifọnke iwụk ekikere ke un̄wọn̄ọ Jehovah? Ti se Jesus eketịn̄de aban̄a idemesie ete: “Mme ebuaikọt ẹnyene ndudu, mme inuen enyọn̄ ẹnyụn̄ ẹnyene efọk, edi Eyen owo inyeneke ebiet eke enịmde ibuot esie.” (Luke 9:58) Jesus ama enyene ukeme ye odudu ndibọp m̀mê ndidep mfọnn̄kan ufọk oro owo ekededi ekpekemede ndinyene. Ntak emi enye mîkenyeneke? Ana in̄wan̄-in̄wan̄ ke Jesus ikoyomke n̄kpọ ekededi oro mîdiyakke enye enịm Obio Ubọn̄ akpa ke uwem esie. Ndi imekeme ndikpebe uwụtn̄kpọ esie nnyụn̄ nnam enyịn nnyịn enen̄ede ese—oro edi, nditre ndisịn idem nyom inyene obụkidem emi esisan̄ade ye editịmede esịt?—Matt. 6:33, 34.
“WOLF YE EYENERỌN̄ ẸYEDIA N̄KPỌ ỌTỌKIET”
7. Didie ke Jehovah okoyom owo anam n̄kpọ ye unam?
7 Ke ini Jehovah ọkọtọn̄ọde ndibot n̄kpọ, enye okobot owo akpatre, ndien owo edi akakan ke otu n̄kpọ oro enye okobotde ke isọn̄. Akpan esie, Ata Anamutom esie, ke Jehovah eketịn̄ akpan uduak esie emi ọnọ: “Yak nnyịn inam owo isịn ke mbiet nnyịn, etie nte nnyịn, yak mmọ ẹnyụn̄ ẹkara iyak ke inyan̄ ye mme edibotn̄kpọ emi ẹfede ke enyọn̄ ye ufene ye ofụri isọn̄ ye kpukpru unam eke ẹnyọnide ke isọn̄.” (Gen. 1:26) Ntem, Adam ye Eve, ekem nte ini akakade kpukpru owo, ẹkenyene ndikara unam.
8. Nso edu ke ẹkụt nte mme unam ẹnyenede mfịn?
8 Ndi owo ekeme ndinen̄ede n̄kara unam nnyụn̄ ntie ke emem ye mmọ? Ediwak owo ẹnen̄ede ẹkpere ufene mmọ idem, utọ nte ebua ye an̄wa. Edi nso kaban̄a mme unam ikọt? N̄wed kiet ọdọhọ ete: “Ntaifiọk emi ẹdụn̄de ẹkpere unam ikọt ẹnyụn̄ ẹkpepde n̄kpọ ẹban̄a mmọ ẹkụt ke n̄kpọ esitụk kpukpru unam emi ẹsibọkde nditọ ke mmọn̄eba.” Edi akpanikọ ke imesikụt nte unam ẹdịghede m̀mê ẹdahade ide ke ini ẹdịghede mmọ uwem, edi ndi mmọ ẹkeme ndiwụt ima? N̄wed oro aka iso ete: “Ini emi mme unam emi ẹsibọkde nditọ ke mmọn̄eba ẹkamade nditọ ke mmọ ẹsinen̄ede ẹwụt akakan edu mmọ—akwa ukeme ediwụt ima.”
9. Didie ke mme unam ẹdikpụhọde ke ini iso?
9 Ntre ikpanaha akpa nnyịn idem ke ini ikotde ke Bible ke emem oyodu ke ufọt owo ye unam. (Kot Isaiah 11:6-9; 65:25.) Ntak-a? N̄kọ emeti ini emi Noah ye ubon esie ẹkewọrọde ke ubom ke Ukwọ ama okokụre, Jehovah ọkọdọhọ mmọ ete: “Ndịk ye uten̄e mbufo ẹyenam kpukpru odu-uwem edibotn̄kpọ ke isọn̄.” Idahaemi unam ẹfefehe owo mbak ẹdiwot mmọ. (Gen. 9:2, 3) Ndi Jehovah ikemeke nditre ndusụk ndịk ye uten̄e oro man owo ye unam ẹkpetie nte enye okoyomde? (Hos. 2:18) Nso edinem ini ina ntem ibet mbon oro ẹdibọhọde idụn̄ ke isọn̄ ini oro!
“ENYE ỌYỌKWỌHỌDE KPUKPRU MMỌN̄EYET . . . EFEP”
10. Ntak emi mmọn̄eyet esiwakde ndisiaha mme owo?
10 Ke ini Solomon okokụtde “kpukpru ufịk oro ẹnamde ke idak utịn,” enye ama eseme ete: “Sese! mmọn̄eyet mmọ emi ẹfịkde, inyụn̄ idụhe owo eke ọdọn̄de mmọ esịt.” (Eccl. 4:1) N̄kpọ ẹtie ntre mfịn, ke mîkam idiọkke-diọk ikan oro. Anie ke otu nnyịn ke akanam mmọn̄eyet mîsiahake ke ntak kiet m̀mê eken? Edi akpanikọ ke ndusụk ini esidi mmọn̄eyet idatesịt. Edi ediwak ini esidi ke ntak ubiak.
11. Ewe mbụk Bible enen̄ede otụk fi?
11 N̄kọ emeti ediwak n̄kpọ mfụhọ oro ikotde iban̄a ke Bible. Ke ini Sarah akakpade ke ini ekedide isua 127, “Abraham [ama] ofụhọ aban̄a Sarah onyụn̄ atua enye.” (Gen. 23:1, 2) Ke ini Naomi ọkọkọmde iban nditọ esie iba emi ebe mmọ ẹkekpade, unyọn̄, “mmọ [ẹma] ẹmenede uyo ẹtua eyet,” ekem mmọ “ẹfiak ẹmenede uyo ẹtua eyet.” (Ruth 1:9, 14) Ke ini Edidem Hezekiah ọkọdọn̄ọde onyụn̄ ọfiọkde ke imọ imọn̄ ikpa, enye ama ọbọn̄ akam ọnọ Abasi onyụn̄ “atua eyet etieti,” ndien emi ama otụk Jehovah. (2 Ndi. 20:1-5) Anie ke mbụk oro aban̄ade nte apostle Peter akakan̄de Jesus mîtụkke? Ke Peter ama okokop nte ekikọ ọkpọkde, “enye [ama] ọwọrọ an̄wa akatua etieti.”—Matt. 26:75.
12. Didie ke ukara Obio Ubọn̄ edinọ ubonowo ata ubọhọ?
12 Ke ntak mme n̄kpọ mmọn̄eyet—n̄kpri ye ikpọ—oro ẹsiwọrọde nnyịn, ubonowo ẹnen̄ede ẹyom ndọn̄esịt ye ubọhọ. Oro edi se Tọsịn Isua Ukara edinamde inọ mbon oro ẹdude ke idak esie. Bible ọdọhọ ete: “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.” (Edi. 21:4) Okposụkedi emi edide ata utịbe utịbe n̄kpọ nte ke mfụhọ, ntuan̄a, ye ubiak ididụhe aba, un̄wọn̄ọ Abasi akam esịne editre akakan asua ubonowo—n̄kpa. Ẹdisan̄a didie inam oro?
‘KPUKPRU MME ANDIDU KE UDI EDITI ẸYEKOP ENYE UYO ẸWỌN̄Ọ ẸDI’
13. Nso ke n̄kpa anam ubonowo tọn̄ọ Adam akanam idiọkn̄kpọ?
13 N̄kpa amakara ubonowo nte edidem tọn̄ọ Adam akanam idiọkn̄kpọ. Enye edi asua emi owo mîkemeke ndikan, n̄kpọ emi mme anana-mfọnmma owo mîkemeke ndibọhọ, kpa n̄kpọ emi esinamde mme owo ẹfụhọ ẹnyụn̄ ẹtuan̄a idiọk idiọk. (Rome 5:12, 14) Ke akpanikọ, “ndịk n̄kpa,” amanam ata ediwak owo “ẹdu ke itie ufụn ke ofụri eyouwem mmọ.”—Heb. 2:15.
14. Nso iditịbe ke ini ẹsobode n̄kpa ẹfep?
14 Bible etịn̄ aban̄a ini emi ‘ẹdisobode n̄kpa ifep nte akpatre asua.’ (1 Cor. 15:26) Enyene otu iba emi ẹdibọde ufọn ito emi. “Akwa otuowo” emi ẹdude uwem idahaemi ẹyekeme ndibọhọ ye uwem ndụk obufa ererimbot oro ẹn̄wọn̄ọde ye idotenyịn ndidu uwem ke nsinsi. Amaedi ediwak biliọn owo oro ẹma ẹkekpakpan̄a, Abasi ekeme ndinam mmọ ẹset. Ndi emekeme ndikere idatesịt ye nduaidem oro edidude ke ini akwa otuowo ẹdidarade mbon oro ẹnamde ẹset? Ima inen̄ede idụn̄ọde mbụk Bible oro ẹban̄ade ndusụk owo oro ẹkenamde ẹset, emi ekeme ndinam nnyịn ifiọk nte idatesịt edikponode.—Kot Mark 5:38-42; Luke 7:11-17.
15. Afo akpanam n̄kpọ didie edieke ẹkpenamde owo fo eset ke n̄kpa?
15 Kere ban̄a ikọ emi, “mmọ ẹdu ke akwa idatesịt” ye “mmọ ẹnyụn̄ ẹnọ Abasi ubọn̄.” Edieke afo okpokodude do, etie nte okpokonyụn̄ etie fi ke idem nte eketiede mmọ. Ke akpanikọ, ndikụt nte mme owo nnyịn oro ẹkekpade ẹsetde eyenen̄ede enem nnyịn esịt onyụn̄ aduai nnyịn idem. Jesus ọkọdọhọ ete: “Ini ke edi eke kpukpru mme andidu ke udi editi ẹdikopde enye uyo ẹwọn̄ọ ẹdi.” (John 5:28, 29) Idụhe owo nnyịn emi akanam okụtde utọ n̄kpọ oro; edi, ke akpanikọ, enye edidi kiet ke otu “mme n̄kpọ oro owo mîkwe ke enyịn.”
ABASI EDIDI “KPUKPRU N̄KPỌ ỌNỌ KPUKPRU OWO”
16. (a) Ntak emi ikpesitịn̄de inem inem iban̄a mme edidiọn̄ oro enyịn mîkwe kan̄a? (b) Nso ke Paul eketịn̄ ndida nsịn udọn̄ nnọ mme Christian ke Corinth?
16 Ke akpanikọ, ubọn̄ ubọn̄ ini iso ke ebet mbon oro ẹnamde akpanikọ ẹnọ Jehovah ke ndiọkeyo emi! Okposụkedi emi owo mîkwe kan̄a ikpọ edidiọn̄ emi, ndisikere mban̄a mmọ ayan̄wam nnyịn iwụk ekikere ke se inen̄erede idi akpan n̄kpọ inyụn̄ ifep mme n̄kpọ editịm n̄kpọ emi oro ẹkemede ndiwọn̄ọde nnyịn ntịn̄enyịn. (Luke 21:34; 1 Tim. 6:17-19) Ke ini ukpepn̄kpọ ye utuakibuot ubon, ke ini inemede nneme ye nditọete nnyịn, ye ke ini inyenede nneme ye nditọ ukpepn̄kpọ Bible nnyịn ye mbon oro ẹnyenede udọn̄, ẹyak isitịn̄ inem inem iban̄a mme utịbe utịbe idotenyịn nnyịn. Emi ayanam enye ọsọn̄ọ odu nnyịn ke esịt ye ekikere. Se apostle Paul akanamde edi oro ke ini enye ekesịnde udọn̄ ọnọ ekemmọ mme Christian. Eketie nte n̄kpọ eke enye akadade mmọ ekesịm utịt Tọsịn Isua Ukara Christ. Domo ndikere se ikọ Paul ke 1 Corinth 15:24, 25, 28 (kot) enen̄erede ọwọrọ.
17, 18. (a) Didie ke Jehovah ekedi “kpukpru n̄kpọ ọnọ kpukpru owo” ke ini ẹkebotde owo? (b) Nso ke Jesus edinam man emem ye edidianakiet ẹfiak ẹdu?
17 Idụhe usụn̄ en̄wen oro ọfọnde ndida ntịn̄ mban̄a utịbe utịbe utịt oro nte ikọ emi, “man Abasi ekpedi kpukpru n̄kpọ ọnọ kpukpru owo.” Nso ke ikọ oro ọwọrọ? Fiak da ekikere ka In̄wan̄ Eden ke ini Adam ye Eve, emi ẹkedide mfọnmma, ẹkebuanade ke ubon Jehovah eke ofụri ekondo, emi enyenede emem onyụn̄ adianade kiet. Jehovah, Akakan Andikara Ekondo, akakara ofụri edibotn̄kpọ esie—mme angel ye mme owo. Enye ekedi “kpukpru n̄kpọ ọnọ kpukpru owo.”
18 Ke ini Satan akanamde mme owo ẹsịn ukara Jehovah, ẹma ẹtịmede edidianakiet oro. Edi ọtọn̄ọde ke 1914, Obio Ubọn̄ Messiah ọmọtọn̄ọ ndinam ẹfiak ẹnyene edidianakiet oro. (Eph. 1:9, 10) Ke Tọsịn Isua Ukara, mme utịbe utịbe n̄kpọ oro “owo mîkwe ke enyịn” kan̄a ẹyetịbe. Ekem, “utịt” eyedi, oro edi, utịt Tọsịn Isua Ukara Christ. Nso iditịbe ini oro? Okposụkedi emi ẹnọde Jesus “ofụri odudu ke heaven ye ke isọn̄,” enye iyomke ikpọ itie. Idọn̄ke enye ndibọ Jehovah itie. Enye oyosụhọde idem “[ayak] obio ubọn̄ ọnọ Abasi ye Ete esie.” Enye ayada san̄asan̄a itie ye odudu esie ọnọ ‘Abasi ubọn̄.’—Matt. 28:18; Phil. 2:9-11.
19, 20. (a) Didie ke kpukpru mme andidu ke idak Obio Ubọn̄ ẹdiwụt ke mmimọ imenyịme ukara Jehovah? (b) Nso ubọn̄ ubọn̄ idotenyịn ke nnyịn inyene?
19 Etisịm ini oro, ẹma ẹnanam mme andidu ke idak ukara Obio Ubọn̄ ke isọn̄ ẹdi mfọnmma. Mmọ ẹyekpebe uwụtn̄kpọ Jesus ẹnyụn̄ ẹsụhọde idem ẹnyịme ukara Jehovah. Mmọ ẹyenyene ifet ndiwụt ke iyanam ntre ke ndibe akpatre udomo. (Edi. 20:7-10) Ke oro ebede, ẹyesobo kpukpru mbon nsọn̄ibuot—mme owo ye mme angel—ẹfep ke nsinsi nsinsi. Nso ini idara ye idatesịt ke oro edidi ntem! Ofụri ekondo ẹyekop inemesịt ẹnyụn̄ ẹtoro Jehovah, emi edidide “kpukpru n̄kpọ ọnọ kpukpru owo.”—Kot Psalm 99:1-3.
20 Ndi mme ubọn̄ ubọn̄ n̄kpọ oro ẹditịbede ke Obio Ubọn̄ ke mîbịghike ẹyesịn udọn̄ ẹnọ fi owụk ntịn̄enyịn onyụn̄ esịn ukeme ke ndinam uduak Abasi? Ndi oyokụt ete ke nsunsu idotenyịn ye inemesịt oro ererimbot Satan ọnọde inamke fi etre ndinam n̄kpọ Abasi? Ndi afo eyenen̄ede ebiere ndida nnọ ukara Jehovah? Mme edinam fo ẹkpekam ẹwụt ke ọdọn̄ fi ndinam ntre ke nsinsi! Do, afo eyenyene ifet ndinyene emem ye uforo ke tọsịn isua—ye ke oro ebede!
[Mme Mbụme Ukpepn̄kpọ]
[Mme ndise ke page 11]
Ke Jesus ama okokụre utom esie nte Edidem, enye oyosụhọde idem ayak Obio Ubọn̄ ọnọ Ete esie
