Mmọ Ẹma Ẹnọ Idemmọ Unyịme Unyịme—Ke Brazil

KE ISUA ifan̄ emi ẹkebede, Rúbia (1), eyenete an̄wan emi edide isua 30 idahaemi, ama aka ekese Sandra (2), asiakusụn̄ emi akanamde utom ye ekpri esop emi odude ke usụk usụk Brazil. Ke ini enye osụk odude do, n̄kpọ ama etịbe emi ekenen̄erede otụk enye tutu okpụhọde uwem esie ofụri ofụri. Nso ikedi oro? Yak Rúbia ke idem esiemmọ etịn̄ ọnọ nnyịn.

“SE N̄KOKOPDE AMA AKPA MI IDEM”

“Sandra ama ada mi aka ufọk mma kiet emi enye esikpepde Bible. Nte mmọ ẹsụk ẹkpepde n̄kpọ, mma oro ama etịn̄ mbre mbre ete: ‘Sandra, n̄kaiferi ita ke itieutom nnyịn ẹdọhọ ke imoyom ndikpep Bible, edi mma ndọhọ mmọ ẹbet tutu ekem ini mmọ. Mmọfiọk ke udunyeneke ifet isua emi sia emenyenyene ediwak nditọ ukpepn̄kpọ.’  Se n̄kokopde ama akpa mi idem. Mme owo emi ẹkeyomde ndikpep n̄kpọ man ẹfiọk Jehovah ẹkenyene ndibebet tutu ekem ini mmọ! Ikememke utom ndinyene ọkpọkọm ukpepn̄kpọ Bible kiet ke esop emi odude ke edem nnyịn. Ke ebe oro, ke ufọk eyen ukpepn̄kpọ Bible oro, ama enen̄ede ọdọn̄ mi ndin̄wam mme owo ke ekpri obio oro. Esisịt ini ke oro ebede, mma n̄kpọn̄ akwa obio oro n̄kodude n̄kodụn̄ ke obio emi Sandra akanamde utom usiakusụn̄.”

N̄kpọ eketie didie ye Rúbia? Enye ọdọhọ ete: “Ke ufan̄ ọfiọn̄ iba ke mma n̄kesịm do, n̄kenịm ukpepn̄kpọ Bible 15. Ntefi, ikebịghike, ukem nte Sandra, mma nnyene mbon emi n̄kọdọhọde ẹbet n̄ko!”

ANAM ENYE AFIAK ESE NTE ENYE ANAMDE UTOM UKWỌRỌIKỌ

Diego (3), eyenete eren emi mîyọhọke isua 25, ama aka ekese ndusụk mme asiakusụn̄ emi ẹnamde utom ke Prudentópolis, ekpri obio ke usụk usụk Brazil. Se enye okokụtde ama enen̄ede otụk enye; ke nditịm ntịn̄, oro ama anam enye afiak ese nte enye anamde utom ukwọrọikọ esie. Enye ọdọhọ ete: “N̄konyụn̄ nsịne ntre ke esop; nsikwọrọ ikọ hour ifan̄ kpọt ke ọfiọn̄. Edi ke mma n̄kaka n̄kese mme asiakusụn̄ oro nnyụn̄ n̄kop mme ifiọkutom mmọ, mma mmen idatesịt mmọ ndomo ye edu nnam-se-n̄kemede oro n̄kenyenede mban̄a utom ukwọrọikọ. Ke ini n̄kokụtde nte mmọ ẹmade utom ukwọrọikọ ẹnyụn̄ ẹkopde inemesịt, ama ọdọn̄ mi ndidu utọ uwem oro mmọ ẹdude.” Diego ama ọtọn̄ọ usiakusụn̄ ke enye ama ọkọnyọn̄.

Ukem nte Diego, ndi afo edi ekpri Ntiense emi esibuanade ke an̄wautom onyụn̄ odụkde mbono esop, edi etie fi nte ke utom ukwọrọikọ inemke, ke etie eto eto? Edieke edide ntre, ndi emekeme ndinam ukpụhọde ke uwem fo man okpokop idatesịt oro ẹsikopde ke ini owo anamde utom ke ebiet emi ẹnen̄erede ẹyom mme asuanetop Obio Ubọn̄? Eyịghe idụhe nte ke ekeme nditie nte ke udukemeke ndikpọn̄ inem inem uwem oro odude. Edi se ediwak mme uyen ẹnamde edi oro. Mmọ ẹnyene uko ẹkpụhọde mme utịtmbuba mmọ ye se mmọ ẹmade man ẹkpenam n̄kpọ Jehovah ọyọhọ ọyọhọ. Kere ban̄a uwụtn̄kpọ en̄wen—eke Bruno.

 EKPEP-IKWỌ M̀MÊ ỌKWỌRỌIKỌ?

Ke isua ifan̄ emi ẹkebede, Bruno (4), emi edide isua 28 idahaemi, akaka n̄wed ke ọwọrọetop ufọkn̄wed ukpep ikwọ, ndien utịtmbuba esie ekedi ndidi andikpep n̄ka mme ebre ikwọ. Enye ama anam ọfọn ke ufọkn̄wed tutu ẹsikot enye ndusụk ini ẹte edikpep n̄ka mme ebre ikwọ ikwọ. Enye ama enyene idotenyịn ndinyene ata eti utom. Bruno ọdọhọ ete: “Edi okosụk etie nte enyene se inanade ke uwem mi. Mma nyak uwem mi nnọ Jehovah, edi n̄kesịnke idem ofụri ofụri ke utom esie, ndien n̄kpọ emi ama afịna mi etieti. Mma ntịn̄ nte etiede mi ke idem nnọ Jehovah, nnyụn̄ nneme n̄ko ye nditọete emi ẹnyenede mbufiọk ke esop nnyịn. Ke mma n̄kenen̄ede n̄kere n̄kpọ emi, mma mbiere ndinịm utom ukwọrọikọ akpa ke uwem mi utu ke ikwọ, mma n̄kpọn̄ ufọkn̄wed ukpep ikwọ, nnyụn̄ n̄wọrọ n̄ka ebiet emi ẹnen̄erede ẹyom mme andikwọrọ Obio Ubọn̄.” Nso ikedi utịp ubiere esie?

Bruno ọkọwọrọ aka Guapiara (n̄kpọ nte owo 7,000 ẹdụn̄ do), ndien to do sịm São Paulo edi kilomita 260. Akwa ukpụhọde ke enye akanam oro. Enye ọdọhọ ete: “N̄kọwọrọ n̄kodụn̄ ke ekpri ufọk emi mînyeneke ekebe ntụhube, ekebe ndise, m̀mê Intanet. Edi ufọk oro ama anam nnyene mme n̄kpọ emi akanam mmenyeneke—ekpri in̄wan̄esa ye in̄wan̄ mfri!” Ke ini Bruno akanamde utom ye ekpri esop oro, ini kiet ke urua enye ama esidọn̄ udia, mmọn̄, ye n̄wed ke ekpat awat ke ọkpọkkpọk moto esie aka ọkọkwọrọ ikọ ke mme obio-in̄wan̄. Ediwak owo ke n̄kan̄ emi akanam ikopke eti mbụk. Enye ọdọhọ ete: “Mma nsinịm ukpepn̄kpọ Bible oro awakde esịm 18. Ndikụt nte nditọ ukpepn̄kpọ emi ẹnamde ukpụhọde ama esinen̄ede ọnọ mi idatesịt!” Enye adian do ete: “Do ndien ke n̄kedi ndikụt se ikananade ke uwem mi, oro edi, ndikop ata inemesịt emi otode ndinịm n̄kpọ Obio Ubọn̄ akpa ke uwem. N̄kpokokopke utọ inemesịt emi ekpedi n̄kesịn idem ke un̄wana okụk.” Edi nso ke Bruno akanam ada odu uwem ke Guapiara? Enye ama ọdọhọ inua imam imam ete: “Nsikpep mme owo ndibre kita.” Ẹkeme ndidọhọ ke enye okosụk ededi ekpep-ikwọ.

“N̄KENYENE NDIDU N̄N̄WAM MMỌ”

Se iketịbede inọ Bruno okonyụn̄ etịbe ọnọ Mariana (5), emi ekperede ndisịm isua 30. Enye  ekedi ekpeibet, edi enye ikenen̄ekede ikop inemesịt kpa ye emi edide enye ama enyene eti ubọkutom. Enye ọdọhọ ete: “Eketie nte n̄kpọ eke ‘mfehede mbịne ofụm.’” (Eccl. 1:17) Ediwak nditọete ẹma ẹsịn udọn̄ ẹnọ enye ẹte anam utom usiakusụn̄. Ke Mariana ama ekenen̄ede etie ekere n̄kpọ emi, enye ye mme ufan esie Bianca (6), Caroline (7), ye Juliana (8) ẹma ẹbiere ndika n̄kan̄wam esop emi odude ke Barra do Bugres, ekpri obio emi ekperede Bolivia, emi enen̄erede oyom usụn̄ ọkpọn̄ ufọk. Nso iketịbe ke oro ebede?

Mariana ọdọhọ ete: “N̄kaduak ndidu do ọfiọn̄ ita. Edi ke utịt ọfiọn̄ ita oro, n̄kesinịm ukpepn̄kpọ Bible 15! Edi, ama oyom ẹn̄wam nditọ ukpepn̄kpọ Bible oro man ẹnen̄ede ẹfiọk akpanikọ. Ntem, n̄kekemeke ndisọn̄ esịt ndọhọ mmọ ke mmọn̄ nnyọn̄. N̄kenyene ndidu n̄n̄wam mmọ.” Ndien se nditọete iban mbinan̄ oro ẹkenamde edi oro. Ntem, ndi obufa ubọkutom Mariana ama anam uwem esie enen̄ede enyene se ọwọrọde? Enye ọdọhọ ete: “Edi n̄kpọ idatesịt ndikụt nte Jehovah adade mi anam mme owo ẹkpụhọde ẹdu eti uwem. Esinen̄ede enem mi ndifiọk ke nda ini ye odudu mi nnam n̄kpọ emi enen̄erede enyene ufọn.” Caroline etịn̄ nte etiede mmọ mbinan̄ ke idem, ete: “Mma nsụhọde nnana okoneyo, esịt esinen̄ede adat mi sia n̄kesịnde ifịk nyom mme n̄kpọ Obio Ubọn̄. Kpukpru se nnamde aban̄a nte n̄kpan̄wamde nditọ ukpepn̄kpọ Bible mi. Esinen̄ede enem ndikụt nte mmọ ẹnamde n̄kọri. Mmokụt nte itie N̄wed Abasi emi edide akpanikọ: ‘Ẹtabi ẹnyụn̄ ẹse nte Jehovah ọfọnde.’”—Ps. 34:8.

Esịt enem Jehovah didie ntem ndikụt nte ata ediwak n̄kparawa iren ye iban ke ofụri ererimbot ‘ẹnọde idemmọ unyịme unyịme’ ndikwọrọ eti mbụk Obio Ubọn̄ esie ke mme nsannsan ebiet! (Ps. 110:3; N̄ke 27:11) Kpukpru mbon oro ẹnamde utom emi ẹsibọ edidiọn̄ Jehovah.—N̄ke 10:22.

[Ekebe/​Ndise ke page 5]

“Nnyịn Inanake N̄kpọ Ndomokiet”

Ke ini João Paulo ye Noemi an̄wan esie ẹkedọhọde ke iyom ndika n̄kanam utom ke ebiet emi udọn̄ okponde, ibat ibat owo iketịn̄de eti ikọ iban̄a se mmọ ẹkeduakde emi. Ndusụk owo ke esop mmọ ẹkedọhọ ẹte: “N̄kpọ ọyọsọn̄ ye mbufo edieke ẹwọrọde ẹka ekpri obio.” “Ufọn ndiwọrọ n̄ka ebiet en̄wen? Ekese osụk ododu ndinam ke esop nnyịn.” João Paulo ọdọhọ ete: “Ama ọsọn̄ nditre ndinam utọ item oro ẹnọde ke ofụri esịt mi, edi emi ekemede ndinam idem emem owo.” Nte ededi, mfịn, ke João Paulo ye Noemi ẹma ẹkenam utom ke ediwak isua ke ebiet emi ẹnen̄erede ẹyom mme asuanetop, esịt enem mmọ sia mmọ ẹkesọn̄ọde ẹda ẹnam se mmọ ẹkebierede ndinam man ẹtat utom mmọ. João Paulo ọdọhọ ete: “Ofụri ini emi ami ye n̄wan mi idude mi, nnyịn inanake n̄kpọ ndomokiet. Imenyene mme n̄kpọ oro nnyịn inen̄erede iyom idahaemi ikan nte ikesinyenede.” Noemi adian do ete: “Ọfọn nte ikedide mi.”

Ọsọn̄ ndinyene n̄kpọ udu-uwem ke ekpri obio. Mbon oro ẹkade ẹkenam utom ke mme ebiet emi ẹdude nsannsan ẹsisan̄a didie ẹnyene se mmọ ẹdade ẹdu uwem? Ke ndikere n̄kpọ nnam. Ndusụk mmọ ẹsikpep mme owo Ikọmbakara m̀mê usem en̄wen, ẹkpep nditọwọn̄ mme n̄kpọ ufọkn̄wed mmọ, ẹkịm ọfọn̄, ẹyet ndom mbakara ke ufọk, m̀mê ẹnam n̄kpọ en̄wen ekededi emi mmọ ẹkemede ndinam nte utom ibio ini. Nso ke kpukpru mbon oro ẹnamde utom ke ebiet emi udọn̄ okponde ẹnyịme? Mme edidiọn̄ emi mmọ ẹbọde ẹkan mme mfịna emi mmọ ẹsobode!

[Ekebe/​Ndise ke page 6]

Ufọk Ndidọn̄ Owo Itọn̄

Tiago: “Esisịt ini ke mma n̄kesịm obufa esop mi, idem ama ọtọn̄ọ ndimem mi. Mme asuanetop ikawakke ke obio oro ndien mmọ inyeneke ini inọ edinam ini nduọkodudu. Ufọk ama esidọn̄ mi itọn̄. Mma mfiọk ke ana nnam n̄kpọ man n̄kop inemesịt. Ntre mma nsịn ukeme man nnen̄ede mmehe ye nditọete ke esop, ndien oro ama anam n̄kop inem. Mma nnam mbufa ufan, ndien ikebịghike ama ọtọn̄ọ ndinem mi ndidu do, esịt onyụn̄ enem mi.”

[Ndise ke page 3]

Noemi ye João Paulo, ke Ascurra, ke Santa Catarina