Mme Mbụme Oro Mme Andikot Ẹbụpde

Ndi ikọ Jesus ke Matthew 19:10-12 owụt ke mbon emi mîdọhọ ndọ ẹbọ enọ editre ndidọ ndọ ke usụn̄ oro mîn̄wan̄ake owo?

▪ Kere ban̄a se ikanamde Jesus etịn̄ ikọ aban̄a owo nditre ndidọ ndọ. Ke ini mme Pharisee ẹkedide ẹdibụp Jesus ẹban̄a usiondọ, enye ama asian mmọ nte Jehovah oyomde ndọ etie. Okposụkedi emi Ibet Moses ekenyịmede ebe ewet n̄wed usiondọ ọnọ n̄wan esie edieke okụtde enye “mbubiam n̄kpọ” ke idem, idịghe nte Abasi okoyomde ndọ etie edi oro toto ke editọn̄ọ. (Deut. 24:1, 2) Ekem Jesus ama ọdọhọ ete: “Owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen, esịn efịbe.”—Matt. 19:3-9.

Ke ini mbet esie ẹkekopde emi, mmọ ẹma ẹdọhọ ẹte: “Edieke n̄kpọ etiede ntem ye owo ye n̄wan esie, ifọnke owo ndidọ ndọ.” Ndien Jesus ọbọrọ mmọ ete: “Idịghe kpukpru owo ẹkeme ndinam ikọ emi, edi sụk mmọ emi ẹnyenede enọ emi. Koro mme eunuch ẹdu emi ẹkemanade ntre toto ke idịbi eka mmọ, mme eunuch ẹnyụn̄ ẹdu emi mme owo ẹnamde mmọ ẹdi eunuch, ndien mme eunuch ẹdu emi ẹnamde idemmọ eunuch ke ntak obio ubọn̄ heaven. Yak owo eke ekemede ndinam anam.”—Matt. 19:10-12.

Ata eunuch ẹkedi mbon emi ẹkemanade nte eunuch ke ntak udọn̄ọ m̀mê mbon oro ẹdide eunuch ke ntak mbabuat n̄kpọntịbe m̀mê ke ntak emi ẹkesiode mmọ osio. Nte ededi, enyene mbon emi ẹkedude uwem nte eunuch kpa ye oro mmọ mîkedịghe ata eunuch. Okposụkedi emi mmọ ẹdotde ndidọ ndọ, mmọ ẹfara ke idem ẹnyụn̄ ẹtre ndidọ ndọ “ke ntak obio ubọn̄ heaven.” Ukem nte Jesus, mmọ ẹbiere nditre ndidọ ndọ man ẹkpekeme ndinen̄ede nsịn idem ke utom Obio Ubọn̄. Mmọ ikadaha-da enọ emi idimana, owo ikonyụn̄ inọhọ-nọ mmọ enọ emi. Mmọ ẹkenam ubiere emi ke idemmọ.

Nte ini akakade, apostle Paul ama etịn̄ n̄kpọ aban̄a ikọ Jesus emi. Enye ọkọdọhọ ke okposụkedi emi kpukpru mme Christian, edide ẹdọ ndọ m̀mê idọhọ, ẹkemede ndinam n̄kpọ nnọ Abasi edifọn edifọn, ke mbon emi ‘ẹbierede ke esịt mmọ’ nditre ndidọ ndọ ‘ẹnam ọfọn akan.’ Didie ke emi edi ntre? Mme ọdọ ndọ ẹnyene ndida ndusụk ini ye odudu mmọ nnem nsan̄a mmọ esịt nnyụn̄ nse mban̄a mmọ. Edi mme Christian emi mîdọhọ ndọ ẹkeme ndinen̄ede nsịn idem ke utom Ọbọn̄ sia mmọ mînyeneke ebe m̀mê n̄wan ndise mban̄a. Mmọ ẹda emi nte “enọ” emi Abasi ọnọde mmimọ.—1 Cor. 7:7, 32-38.

Ntem, N̄wed Abasi idọhọke ke Christian emi mîdọhọ ndọ ọbọ enọ emi ke usụn̄ emi mîn̄wan̄ake owo. Utu ke oro, enye enyene enọ emi ke nditre ndidọ ndọ man anam utom Obio Ubọn̄ aka iso, n̄kpọ okûnyụn̄ uwọn̄ọde enye ntịn̄enyịn. Ediwak owo mfịn ẹbiere ke esịt mmọ nditre ndidọ ndọ ke ntak emi, ndien ọkpọfọn mbon en̄wen ẹsisịn udọn̄ ẹnọ mmọ.