Nyọhọ-Nsụhọ Mmọ Ama An̄wam Mbon Oro Mîkenyeneke

KE ISUA 49 E.N. Peter, James, ye John—“kpa mbon oro ẹketiede nte mme adaha”—ẹma ẹnọ apostle Paul ye Barnabas nsan̄autom esie utom. Ẹketeme mmọ ẹte ẹti mme ubuene ke ini mmọ ẹkwọrọde ikọ ẹnọ mme idụt. (Gal. 2:9, 10) Ẹketi mme ubuene didie?

Mme leta oro Paul ekewetde ẹwụt adan̄a nte enye eketịn̄de enyịn anam emi. Ke uwụtn̄kpọ, enye ekewet ntem ọnọ ẹsọk mme Christian ke Corinth: “Kaban̄a etịbe emi ẹdinọde ndisana owo, kpa nte n̄kọnọde uyo ke mme esop ke Galatia, mbufo ẹnam kpasụk ntre. Ke kpukpru akpa usen urua yak owo mbufo kiet kiet ke ufọk esie osio n̄kpọ enịm n̄kan̄ kiet adan̄a nte enye oforode, man mbufo ẹkûtịp etịbe ke ini ndide ndisịm. Edi ke ini nsịmde do, mme owo ekededi eke mbufo ẹdinyịmede ke leta, nyọdọn̄ mmọ emi nte ẹmen enọ mfọnido mbufo ẹka Jerusalem.”—1 Cor. 16:1-3.

Ke udiana leta eke odudu spirit oro Paul ekewetde ọnọ mbon Corinth, enye ama afiak etịn̄ uduak etịbe emi. Ekedi man “n̄kpọ edi ukem ukem, man nyọhọ-nsụhọ mbufo akpan̄wam ke unana mmọ.”—2 Cor. 8:12-15.

Ke ini Paul ekewetde leta ọnọ ẹsọk mme Christian ke Rome ke n̄kpọ nte isua 56 E.N., ẹma ẹkpere nditịp etịbe oro n̄kụre. Enye ọkọdọhọ ete: “Mmọn̄ ndika Jerusalem man n̄kasan̄a utom nnọ ndisana owo. Koro mbon oro ẹdude ke Macedonia ye Achaia ẹmenem esịt ndibuana se mmọ ẹnyenede ebe ke nditịp n̄kpọ nnọ mme ubuene emi ẹdude ke otu ndisana owo ke Jerusalem.” (Rome 15:25, 26) Esisịt ini ke oro ebede, Paul ama okụre se ẹkedọn̄de enye, koro ke ini enye akafiakde ọnyọn̄ Jerusalem ẹnyụn̄ ẹmụmde enye do, enye ama ọdọhọ Felix owo ukara Rome ete: “[N̄koto] ndi ndida mme enọ mbọm nsọk idụt mi, nnyụn̄ nda enọ nsọk Abasi.”—Utom 24:17.

Se Paul eketịn̄de aban̄a mbon Macedonia anam ifiọk edu emi mme Christian eyo mme apostle ẹkenyenede. Enye ọkọdọhọ ke mmọ ẹma “[ẹka] iso ẹben̄e nnyịn ye ọkpọsọn̄ n̄kpeubọk ẹyom ifet ndinọ n̄kpọ ke mfọnido.” Paul ama esịn udọn̄ ọnọ mbon Corinth ete ẹkpebe uwụtn̄kpọ mbon Macedonia. Enye ọkọdọhọ ete: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” Nso ikanam mme esop ẹtat ubọk ntre? N̄kukụre ntak ikedịghe “ndinọ ndisana owo se inanade mmọ uwak uwak, edi n̄ko ndinọ Abasi ediwak ekọm.” (2 Cor. 8:4; 9:7, 12) Ntatubọk nnyịn ekeme n̄ko ndin̄wam nditọete onyụn̄ anam ẹnọ Abasi ediwak ekọm. Ke akpanikọ, Jehovah Abasi ọyọdiọn̄ utọ edu ntatubọk oro ndien edidiọn̄ esie ofori owo.—N̄ke 10:22.

 [Ekebe ke page 9]

Usụn̄ Emi Ndusụk Owo Ẹmekde Ndinọ Enọ Mme Etịbe Kaban̄a Utom Ofụri Ererimbot

Ukem nte ekedide ke eyo Paul, ediwak owo ‘ẹsisio n̄kpọ ẹnịm’; oro edi, ẹnam ndutịm ẹban̄a okụk oro mmọ ẹdisịnde ke ekebe etịbe esop oro ẹdiande idiọn̄ọ emi: “Worldwide Work.” (1 Cor. 16:2) Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Emekeme n̄ko ndinọ okụk imaesịt nnennen ẹsọk n̄ka emi ibet enyịmede, emi adade ke ibuot Mme Ntiense Jehovah ke idụt mbufo. Edieke oyomde ndifiọk enyịn̄ akpan n̄ka emi ibet enyịmede, emi adade ke ibuot Mme Ntiense Jehovah ke idụt mbufo, mbọk wet m̀mê kot n̄kọk itieutom emi esede n̄kpọ aban̄a idụt mbufo. Emekeme ndikụt adres n̄kọk itieutom ke www.pr418.com. Emekeme ndinọ enọ imaesịt oro ẹtienede mi:

ENỌ

• Ẹkeme ndinọ okụk, mme n̄kpọuto, m̀mê mme ọkpọkpọ ọsọn̄urua n̄kpọ eken.

• Mme utọ etịbe oro ẹkpenyene ndisan̄a ye leta oro owụtde in̄wan̄-in̄wan̄ nte ke emi edi enọ.

SE ẸNỌDE NTE EBUỌT

• Owo ekeme ndinọ okụk ẹda ẹnam utom onyụn̄ ọdọhọ ẹnọ ẹsọk imọ ke ini iyomde.

• Sịn ibio ibio leta emi owụtde ke emekeme ndiyom ẹnọ ẹsọk imọ.

ENỌ EMI ẸDIOMIDE-DIOMI

Ke adianade ye edinọ okụk ye ọkpọkpọ ọsọn̄urua n̄kpọ nte enọ, mme usụn̄ efen ẹdu oro ẹkemede ndinọ enọ man ẹda ẹnam utom Obio Ubọn̄ ke ofụri ererimbot. Ẹwet mme usụn̄ emi ke idak emi. Usụn̄ ekededi emi emekde ndida nnọ enọ, mbọk bem iso sian n̄kọk itieutom emi esede aban̄a idụt mbufo man ọfiọk m̀mê ewe ke otu mme usụn̄ unọ enọ emi ẹdude mi ke idak ẹdu ke idụt mbufo. Sia mme ibet obio ye ibet tax mîdịghe ukem ke kpukpru ebiet, enen̄ede ọfọn osobo ye mbon emi ẹfiọkde n̄kpọ ẹban̄a tax ye ibet mbemiso emekde usụn̄ emi oyomde ndida nnọ enọ.

Insurance: Ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Ban̄k: Ẹkeme ndinam okụk oro ẹsịnde ke ban̄k, n̄wed oro ẹwetde okụk oro ẹsịnde ke ban̄k ẹyom udori, m̀mê okụk ukpọn̄ utom owo odu ke enyịn̄ n̄ka emi ibet enyịmede, emi adade ke ibuot Mme Ntiense Jehovah, mîdịghe ẹnam ẹkpe enye ẹnọ n̄ka emi ke ini andinyene akpade, nte ekemde ye ndutịm ban̄k edem mbufo.

Inyene ye Mbubehe: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah inyene ye mbubehe nte enọ, mîdịghe ẹnam ẹkpe enye ẹnọ n̄ka emi ke ini andinyene akpade.

Isọn̄ ye Ufọk: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ n̄ka emi ibet enyịmede, emi adade ke ibuot Mme Ntiense Jehovah ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Edieke oyomde ntọt efen efen, emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi, mîdịghe emekeme ndinyene nneme ye n̄kọk itieutom emi esede aban̄a idụt mbufo.

JEHOVAH’S WITNESSES

P.M.B. 1090,

Benin City 300001,

Edo State, Nigeria.

Telefon: 07080662020