Eyak Ika Iso Idu Uwem Nte “Mme Odudụn̄”
Eyak Ika Iso Idu Uwem Nte “Mme Odudụn̄”
“Nteme mbufo nte isenowo ye mme odudụn̄ nte ẹka iso ẹtre ndinam mme udọn̄ obụkidem.”—1 PET. 2:11.
DIDIE KE AFO ỌKPỌBỌRỌ?
Ntak emi ẹkemede ndikot mbon emi ẹyetde aran mme odudụn̄?
Didie ke “mme erọn̄ en̄wen” ẹdi mme odudụn̄?
Nso idọn̄ fi ndinyene ke ini iso?
1, 2. Mmanie ke Peter okokot “mbon oro ẹmekde,” ndien ntak emi enye okokotde mmọ n̄ko “mme odudụn̄”?
N̄KPỌ nte isua 30 ke Jesus ama akafiak ọnyọn̄ heaven, apostle Peter ama ewet leta ọnọ ẹsọk “isenowo emi ẹsuanade ẹdụn̄ọ ke Pontus, Galatia, Cappadocia, Asia, ye Bithynia, kpa mbon oro ẹmekde.” (1 Pet. 1:1) Ikọ oro “mbon oro ẹmekde” owụt ke Peter ekewet leta esie ọnọ mbon oro ẹkedade edisana spirit ẹyet aran ukem nte enye, emi ẹkenyụn̄ ‘ẹbonde obufa ẹte ẹnyene odu-uwem idotenyịn’ ndikara ye Christ ke heaven. (Kot 1 Peter 1:3, 4.) Edi ntak emi enye okokotde mmọ “isenowo ye mme odudụn̄” nte ini akakade? (1 Pet. 2:11) Ndien nso ufọn ke emi enyene ọnọ nnyịn mfịn emi owo ifan̄ kpọt ke otu Mme Ntiense ẹdọhọde ke idi mbon oro ẹmekde, m̀mê ẹyetde aran?
2 Ama odot ndikot mbon oro ẹkeyetde aran ke eyo mme apostle “mme odudụn̄.” Ukem nte nsụhọ mbon oro ẹyetde aran mfịn, mmọ ikenyeneke idotenyịn ndidu uwem ke isọn̄ ke nsinsi. Apostle Paul, emi ke idemesie ekesịnede ke otu “ekpri otuerọn̄” oro ẹyetde aran, ekewet ete: “Amaedi nnyịn, itie eyenisọn̄ nnyịn odu ke heaven, nnyịn inyụn̄ itie ye ọkpọsọn̄ udọn̄ ibet andinyan̄a emi editode do edi, kpa Ọbọn̄ Jesus Christ.” (Luke 12:32; Phil. 3:20) Sia ‘itie eyenisọn̄ mmọ odude ke heaven,’ mbon emi ẹyetde aran ẹma ẹkpa, mmọ ẹsikpọn̄ isọn̄ ẹbịne n̄kpọ emi ọfọnde akan, oro edi, uwem unana n̄kpa ke heaven. (Kot Philippi 1:21-23.) Ntem, sia mmọ ẹdude uwem ke esisịt ini ke isọn̄ emi Satan akarade, ẹkeme ndidọhọ ke mmọ ẹdi “mme odudụn̄.”
3. Nso mbụme oro aban̄ade “mme erọn̄ en̄wen” ke ẹbụp?
3 Edi nso kaban̄a “mme erọn̄ en̄wen”? (John 10:16) Ndi N̄wed Abasi idọhọke ke mmọ ẹdidu ke isọn̄ ke nsinsi? Akpanikọ ke edi, mmọ ẹdidụn̄ ke isọn̄ ke nsinsi! Kpa ye oro, idahaemi ẹsụk ẹkeme ndikot mmọ n̄ko mme odudụn̄. Didie ke mmọ ẹdi mme odudụn̄?
“KPUKPRU N̄KPỌ ORO ẸBOTDE KE ẸMỤM MMỤM”
4. Nso ke mme andikara ererimbot mîdikemeke ndinam?
4 Adan̄a nte Abasi ayakde idiọk editịm n̄kpọ Satan aka iso, kpukpru owo, esịnede mme Christian, ẹyeka iso ẹbọ ufen ke ntak emi Satan ọkọsọn̄de ibuot ye Jehovah. Rome 8:22 ọdọhọ ete: “Nnyịn imọfiọk ite ke kpukpru n̄kpọ oro ẹbotde ke ẹmụm mmụm ọtọkiet ẹnyụn̄ ẹdu ke ubiak ọtọkiet tutu esịm emi.” Inamke n̄kpọ m̀mê mme andikara ererimbot, ntaifiọk, ye mbon utom imaesịt ẹsịn idem adan̄a didie, mmọ idikemeke ndinam ererimbot ọfọn.
5. Nso ke ata ediwak owo ẹmek toto ke 1914, ndien ntak-a?
5 Toto ke 1914, ata ediwak owo ẹmek ke idemmọ ndidu ke idak Edidem emi Abasi emekde ete akara, kpa Christ Jesus. Idọn̄ke mmọ ndidi ubak ererimbot Satan emi. Mmọ inọhọ ererimbot Satan ibetedem. Utu ke oro, mmọ ẹda uwem ye inyene mmọ ẹnọ Obio Ubọn̄ Abasi ibetedem, man utom Abasi aka iso.—Rome 14:7, 8.
6. Ntak emi ẹkemede ndikot Mme Ntiense Jehovah mme odudụn̄?
6 Mme Ntiense Jehovah ẹdi nti nditọisọn̄ emi ẹnịmde ibet ke se ibede idụt 200, ndien inamke n̄kpọ m̀mê mmọ ẹdụn̄ ke m̀mọ̀n̄, mmọ ẹnam n̄kpọ nte mme odudụn̄. Mmọ ẹda san̄asan̄a, isịnke idem ke eneni mbre ukara ye eke obio. Idem idahaemi, mmọ ẹbat idemmọ nte nditọisọn̄ obufa ererimbot Abasi. Esịt adat mmọ ndikụt nte ini emi mmọ ẹdụn̄de nte mme odudụn̄ ke idiọk editịm n̄kpọ emi asan̄ade usọp usọp ekpere utịt.
7. Didie ke mme asan̄autom Abasi ẹdidụn̄ ke nsinsi, ndien mmọ ẹdidụn̄ ke m̀mọ̀n̄?
7 Ke mîbịghike, Christ oyosobo idiọk editịm n̄kpọ Satan emi efep. Mfọnmma ukara Christ oyosio idiọkn̄kpọ ye n̄kpa efep ke isọn̄. Enye oyosobo kpukpru mbon oro ẹsọn̄de ibuot ẹdọhọ ke Jehovah inyeneke unen ndikara ofụri ekondo. Mme anam-akpanikọ asan̄autom Abasi ẹyekeme ndien ndidụn̄ ke nsinsi ke Paradise isọn̄. (Kot Ediyarade 21:1-5.) Do ndien ke kpukpru n̄kpọ oro ẹbotde ẹdibọhọ “ufụn itie mbiara [ofụri ofụri] ẹnyụn̄ ẹnyene ubọn̄ ubọn̄ ifụre nditọ Abasi.”—Rome 8:21.
NSO KE ẸYOM ẸTO ATA MME CHRISTIAN?
8, 9. Nso ke ikọ Peter oro “ẹtre ndinam mme udọn̄ obụkidem” ọwọrọ?
8 Peter ama etịn̄ se ẹyomde ẹto mme Christian ke ini enye ọkọdọhọde ete: “Ndima, ami nteme mbufo nte isenowo ye mme odudụn̄ nte ẹka iso ẹtre ndinam mme udọn̄ obụkidem, kpa mme n̄kpọ emi ẹn̄wanade ekọn̄ ye ukpọn̄.” (1 Pet. 2:11) Ẹkenọ mme Christian oro ẹyetde aran item emi, edi enye enyene ufọn n̄ko ọnọ mme erọn̄ en̄wen Jesus.
9 Enyene ndusụk udọn̄ emi mîdiọkke, ama akam edi ẹyụhọ mmọ ke usụn̄ emi Andibot enyịmede. Ke nditịm ntịn̄, mmọ ẹsinam uwem enen̄ede enem. Ke uwụtn̄kpọ, esidọn̄ nnyịn ndidia udia nnyụn̄ n̄n̄wọn̄ n̄kpọ, ndinam mme n̄kpọ emi ẹnemde nnyịn ke idem, ndinyụn̄ ndu ye mme ufan nnyịn. Inyụn̄ idiọkke ebe ye n̄wan ndinyene ebuana. (1 Cor. 7:3-5) Edi “mme udọn̄ obụkidem” oro Peter ọkọdọhọde ẹtre ẹdi mbon oro “ẹn̄wanade ekọn̄ ye ukpọn̄.” Edisana Ŋwed Abasi Ibom okot udọn̄ emi “idiọk udọn̄ obụkidem.” Ntem, ana itre udọn̄ obụkidem ekededi emi atuahade ye uduak Jehovah, emi onyụn̄ ekemede ndinam nnyịn itre ndidi ufan Abasi. Mîdịghe ntre, imekeme nditaba idotenyịn oro inyenede ndika iso ndu uwem.
10. Nso idi ndusụk usụn̄ emi Satan adade anam mme Christian ẹkabade ẹdi ubak ererimbot esie?
10 Uduak Satan edi ndinam ata mme Christian ẹtre ndida idemmọ nte “mme odudụn̄” ke editịm n̄kpọ emi. Enye oyom nnyịn ima inyene, inam oburobụt ido, iyom uwọrọiso, iyom ndidi akpa ke kpukpru n̄kpọ, inyụn̄ ima idụt nnyịn ikan idụt en̄wen. Edi ana ifiọk ke kpukpru emi ẹdi afia Satan. Edieke inen̄erede ibiere ndisọn mme idiọk udọn̄ emi, nnyịn iwụt in̄wan̄-in̄wan̄ ke nnyịn iyomke ndidi ubak idiọk ererimbot Satan emi inyụn̄ iwụt ke idụn̄ ke esisịt ini kpọt. Se inen̄erede idọn̄ nnyịn, emi inyụn̄ isịnde idem iyom edi ndidụn̄ ke nsinsi ke obufa edinen ererimbot Abasi.
ETI EDU UWEM
11, 12. Ẹsise isenowo didie ndusụk ini, ndien nso ke ẹkeme nditịn̄ mban̄a Mme Ntiense Jehovah?
11 Peter aka iso etịn̄ se ẹyomde ẹto mme Christian emi ẹdide “mme odudụn̄,” ke ini enye ọdọhọde ke ufan̄ikọ 12 ete: “Ẹka iso ẹnyene eti edu uwem ke otu mme idụt, man ke nde emi mmọ ẹtịn̄de n̄kpọ ẹbiat mbufo ẹte ẹdi mme anamidiọk, mmọ ẹkpeda nti utom mbufo emi mmọ ẹkụtde ẹnọ Abasi ubọn̄ ke usen eke enye edidide ndinam ndụn̄ọde.” Isenowo ye mme odudụn̄ ẹdi mbon emi mîdụn̄ke ke idụt mmọ, ndien ndusụk ini ẹsisua mmọ. Sia mmọ mîbietke mme mbọhọidụn̄ mmọ, ẹkeme ndikam nda mmọ nte mme anamidiọk. Nte mmọ ẹtịn̄de ikọ, ẹnamde n̄kpọ, ẹsịnede ọfọn̄, ye nte mmọ ẹtiede ẹkeme ndikpụhọde ye eke mbon eken. Edi ke ini mmọ ẹnamde nti utom, oro edi, ke ini edu uwem mmọ ọfọnde, emi esinam mbon en̄wen ẹfiọk ke mmọ idịghe mme anamidiọk.
12 Kpasụk ntre, ata mme Christian ibietke mme mbọhọidụn̄ mmọ ke ndusụk n̄kpọ, utọ nte ke nneme ye orụk edinam unọ idem inemesịt emi mmọ ẹmekde. Nte mmọ ẹsịnede ọfọn̄ ẹnyụn̄ ẹkamade idem esiwụt ke mmọ itiehe nte ediwak mbon eken ke obio. Ndusụk ini, emi esinam mbon oro mîtịmke ifiọk mmọ ẹtịn̄ n̄kpọ ẹbiat mmọ ẹte ke mmọ ẹdi mme anamidiọk. Edi mbon en̄wen ẹsitoro mmọ ke ntak eti edu uwem mmọ.
13, 14. Didie ke mme utom ọniọn̄ “ẹwụt ke ọniọn̄ enen”? Nọ uwụtn̄kpọ.
13 Ke akpanikọ, eti edu uwem ekeme ndiwụt ke se mme owo ẹtịn̄de ẹban̄a nnyịn idịghe akpanikọ. Ẹma ẹkam ẹdori Jesus ikọ, kpa ye oro enye ekedide n̄kukụre owo emi akanamde akpanikọ ọnọ Abasi ke mfọnmma usụn̄. Ndusụk owo ẹkekot enye “owo udia ye owo mmịn, ufan mme ọbọ a-tax ye mme anamidiọk.” Edi ọniọn̄ oro enye akadade anam n̄kpọ Abasi ama owụt ke enye ikedịghe anamidiọk. Jesus ọkọdọhọ ete: “Mme utom ọniọn̄ ẹwụt ke ọniọn̄ enen.” (Matt. 11:19) Ukem oro ke edi n̄ko mfịn. Ke uwụtn̄kpọ, mbon oro ẹdụn̄de ẹkpere Bethel ke Selters ke Germany ẹda ke uwem nditọete emi ẹnamde utom ke Bethel in̄wan̄ake owo. Edi ọbọn̄ obio oro ama etịn̄ ikọ ndiwụt ke idịghe ntre ke edi. Enye ọkọdọhọ ete: “Enyene nte Mme Ntiense oro ẹdụn̄de do ẹdude uwem mmọ, edi nte mmọ ẹdude uwem ifịnake mbon en̄wen ke obio.”
14 Kpasụk ntre ke ekedi ke ndondo emi ye Mme Ntiense Jehovah emi ẹdụn̄de ke Moscow ke Russia. Ẹma ẹdori mmọ ediwak n̄kpọ. Ndusụk owo ẹkedọhọ ke Mme Ntiense ẹsibiat ubon, ẹnam mme owo ẹwot idem, inyụn̄ imaha ndibọ usọbọ. Edi ke June 2010, Esopikpe Europe Oro Esede Aban̄a Unen Owo ke Strasbourg ke France, ama ebiere ete ke Moscow ẹdue ke nditịmede ifụre utuakibuot Mme Ntiense Jehovah ke obio mmọ, ye nte ke mmọ inyeneke unen ndikpan mmọ ndisop idem ọtọkiet. Esopikpe Europe Oro Esede Aban̄a Unen Owo mi ọkọdọhọ ke mme esopikpe ke Russia ikowụtke idiọkn̄kpọ ndomokiet emi Mme Ntiense ẹkenamde. Esopikpe emi ẹkedọhọ ke mme esop ke Russia ẹkeda n̄kpọsọn̄ ibet Moscow ẹkpe ukwan̄ikpe ẹnọ Mme Ntiense Jehovah.
NDISỤK IBUOT NTE ODOTDE
15. Edumbet Bible ewe ke ata mme Christian ke ofụri ererimbot ẹnịm?
15 Mme Ntiense Jehovah ke Moscow—ke nditịm ntịn̄, ke ofụri ererimbot—ẹnam n̄kpọ en̄wen emi Peter ọdọhọde ke ẹyom mme Christian ẹnam. Enye ekewet ete: “Ke ntak Ọbọn̄ ẹsụk ibuot ẹnọ kpukpru se owo osiode edi: edide edidem nte enye emi okponde akan m̀mê mme andikara.” (1 Pet. 2:13, 14) Okposụkedi emi ata mme Christian mîdịghe ubak ererimbot, mmọ ẹnyịme ndisụk ibuot nnọ ukara “ke ukeuke itie mmọ,” kpa nte Paul eketemede.—Kot Rome 13:1, 5-7.
16, 17. (a) Nso iwụt ke nnyịn isisọn̄ke ibuot ye ukara? (b) Nso ke ndusụk ikpọ owo ukara ẹtịn̄?
16 Mme Ntiense Jehovah ẹdu uwem nte “mme odudụn̄” ke editịm n̄kpọ emi, edi mmọ inamke emi sia ẹyomde ndibiọn̄ọ ukara m̀mê ndiwụt ke mbon en̄wen inenke. Mmọ ẹfiọk ke mbon en̄wen ẹnyene unen ndibiere m̀mê anie akpakara ye nte ẹkpesan̄ade ẹkọk mfịna ubonowo. Ndusụk ido ukpono ẹsisịn idem ke mbre ukara, edi Mme Ntiense Jehovah isisịnke. Mmọ idehedei idomo ndinam ukara ẹkpụhọde nte mmọ ẹkarade. Mme Ntiense Jehovah ikereke-kere iban̄a ndisọn̄ ibuot ye ukara m̀mê ndinam mbon en̄wen ẹyom ndisọn̄ ibuot.
17 Peter ọkọdọhọ “ẹkpono edidem.” Ntre mme Christian ẹsikop uyo mme andikara man ẹwụt ke imokpono mmọ. (1 Pet. 2:17) Ndusụk ini, ikpọ owo ukara ẹsidọhọ ke ufọn idụhe ndikop ndịk mban̄a Mme Ntiense Jehovah. Ke uwụtn̄kpọ, akwa owo ukara ke Germany, emi nte ini akakade, ekedide owo akwa ufọkmbet Germany, ọkọdọhọ ke Mme Ntiense Jehovah ẹma ẹnyene eti edu uwem ke ini mbon Nazi ẹkekọbọde mmọ. Mme Ntiense ikokpụhọkede se mmọ ẹnịmde ke akpanikọ idem ke ini ẹkekọbọde mmọ, mmọ ẹma ẹsinyụn̄ ẹfọn ido ye mbon n̄kpọkọbi eken. Enye ọkọdọhọ ke utọ edu emi enen̄ede ọfọn ye utọ idụt nte Germany, akpan akpan sia ndusụk owo ẹdiọn̄de-diọn̄ ẹsọn̄ ido ye mbon emi ẹtode idụt en̄wen m̀mê mbon oro se mmọ ẹnịmde ke akpanikọ ye se mmọ ẹkerede ẹban̄a ukara ẹkpụhọrede ye eke mmọ.
NDIMA IMA
18. (a) Ntak emi imade ofụri otu nditọete? (b) Nso ke ndusụk mbon emi mîdịghe Mme Ntiense ẹtịn̄ ẹban̄a nnyịn?
18 Apostle Peter ekewet ete: “Ẹnyene ima ẹnọ ofụri otu nditọete, ẹbak Abasi.” (1 Pet. 2:17) Mme Ntiense Jehovah ẹbak Abasi inyụn̄ iyomke ndiyat enye esịt, ndien emi anam mmọ ẹyom ndika iso nnam uduak esie. Esịt enem mmọ ndidiana ye nditọete mmọ ke ofụri ererimbot nnam n̄kpọ nnọ Jehovah. Ntem mmọ “ẹnyene ima ẹnọ ofụri otu nditọete.” Sia utọ ima emi ananade ke ererimbot mfịn, emi mme owo ẹkerede ẹban̄a idemmọ kpọt, idem esikpa mbon emi mîdịghe Mme Ntiense ke ini mmọ ẹkụtde nte inyenede utọ ima emi. Ke uwụtn̄kpọ, idem ama akpa owo emi esidade mme owo usụn̄ ke itieutom unam ndutịm ukaisan̄ emi mbon America ẹnyenede, ke ini enye okokụtde nte Mme Ntiense ke Germany ẹmade ẹnyụn̄ ẹn̄wamde Mme Ntiense emi ẹketode esenidụt ẹdi mbono ofụri ererimbot ke 2009 ke Germany. Enye ọkọdọhọ ke ofụri ediwak isua emi imọ inamde utom nte adausụn̄, ke akanam imọ ikwe orụk ima emi. Nte ini akakade, kiet ke otu Mme Ntiense Jehovah ama ọdọhọ ete: “Enye eketịn̄ kpukpru se eketịn̄de aban̄a nnyịn ke uyo emi owụtde n̄kpaidem ye inemesịt.” Ndi akanam omokop mme owo ẹtịn̄de utọ n̄kpọ emi ẹban̄a Mme Ntiense ke mbono emi afo okodụkde?
19. Nso ke nnyịn ikpebiere ndinam, ndien ntak-a?
19 Nte ikpepde ke ibuotikọ emi, Mme Ntiense Jehovah ẹwụt ke ediwak usụn̄ ke mmimọ idi “mme odudụn̄” ke editịm n̄kpọ Satan emi. Mmọ ẹkop idatesịt ẹbiere ndika iso ndi mme odudụn̄. Mmọ ẹnyene nti ntak ndinen̄ede ndori enyịn ndidụn̄ ke nsinsi ke edinen obufa ererimbot Abasi. Ndi idọn̄ke fi ndidu do?
[Mme Mbụme Ukpepn̄kpọ]
[Ndise ke page 20]
Nnyịn idomoke ndin̄wam ererimbot Satan
[Ndise ke page 20]
Nnyịn ida inọ obufa ererimbot Abasi
[Ndise ke page 22]
Akpanikọ Bible anam ubon emi ẹtode Russia mi ẹdiana kiet
