Nte Afo Emeti?
Nte Afo Emeti?
Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:
Didie ke nnyịn ikeme ndinịme ikan̄ editịn̄ ikọ nte ẹmama?
Ana idụn̄ọde esịt nnyịn. Utu ke ndisikụt ndudue nnọ eyenete nnyịn, ikpakam ikere se inamde nnyịn inyene utọ idiọk edu emi. Okûdi isinam emi man iwụt ke imọfọn ikan enye. Ke adianade do, ndikụt ndudue nnọ mbon en̄wen edikam itetịm inam mfịna enen̄ede okpon.—8/15, page 21.
Ibet Moses owụt ke Abasi ese iban didie?
Iban Israel ẹma ẹsinyene ifụre, ẹma ẹsinyụn̄ ẹtiene ẹkpep mmọ n̄kpọ. Akana ẹsikpono mmọ ẹnyụn̄ ẹnọ mmọ unen mmọ.—9/1, page 5-7.
Nso iditịbe esisịt ini mbemiso usen Jehovah edide?
Ẹyetan̄a “emem ye ifụre!” Mme idụt ẹyen̄wana ye Akwa Babylon ẹnyụn̄ ẹsobo enye. Ẹyen̄wana ye ikọt Abasi. Ekọn̄ Armageddon ayasiaha, ndien ke oro ebede, ẹyedọn̄ Satan ye mme demon esie ke editụn̄ọ ukpe.—9/15, page 4.
Nso ufọn ke inyene ke nditre ndifiọk ini oro utịt edidide?
Nditre ndifiọk nnennen usen m̀mê hour emi utịt edidide anam ẹfiọk se idude nnyịn ke esịt. Ọnọ nnyịn ifet ndinam esịt adat Jehovah. Anam nnyịn idu uwem n̄waidem inyụn̄ inen̄ede iberi edem ke Abasi ye Ikọ esie. Akan oro, emi anam nnyịn ikpep n̄kpọ ito mme idomo nnyịn inyụn̄ iyak mmọ ẹsọn̄ọ mbuọtidem nnyịn.—9/15, page 24-25.
Didie ke ikeme ndida Genesis 3:19 n̄n̄wam owo emi enịmde ikan̄ nsobo ke akpanikọ?
Itien̄wed oro ọdọhọ ke Adam edifiak ke ntan ke ini enye akpade, idọhọke ke edika ikan̄ nsobo.—10/1, page 13.
“Ntantaọfiọn̄ itiaba” emi Ediyarade 1:16, 20 ọdọhọde ke ẹdu ke ubọk nnasia Jesus ẹda ẹban̄a mmanie?
Mmọ ẹda ẹban̄a mme esenyịn oro ẹyetde aran, ndien ẹkeme n̄ko ndidọhọ ke mmọ ẹda ẹban̄a kpukpru mbiowo eken ke esop.—10/15, page 14.
Nso ke ebe ye n̄wan ẹkpenam edieke mmọ ẹkamade isọn?
Ebe ye n̄wan ẹkpenyene ndisụhọde ntetie nneme nte ẹdisan̄ade ẹkpe isọn mmọ. Ọkpọfọn mmọ ẹdiọn̄ọ okụk ifan̄ emi mmọ ẹnyenede ẹnyụn̄ ẹbiere nte ẹdibiatde okụk oro. Ekeme ndidi oyoyom mmọ ẹn̄wana okụk efen mîdịghe ẹsụhọde ibatokụk oro mmọ ẹsibiatde. Mmọ ẹkpenyene ndibiere m̀mê ewe isọn ke mmimọ idibem iso ikpe, ẹkam ẹkeme ndika mbịne mbon oro mmọ ẹkamade isọn ẹkediomi nte ẹdikpede isọn oro. Edi oyom ẹnam eti ndutịm man ẹkeme ndikpe isọn oro ẹkamade ẹkûnyụn̄ ẹda okụk nte ebeiso n̄kpọ. (1 Tim. 6:8)—11/1, page 19-21.
Didie ke Jesus okosụhọde idem nte ẹtịn̄de ke Isaiah 50:4, 5?
Itien̄wed oro ọdọhọ ke mbon emi ẹnyenede “edeme mmọ eke ẹbọde ukpep” ‘idiwọn̄ọkede ise edem.’ Jesus ama osụhọde idem onyụn̄ enen̄ede akpan̄ utọn̄ okop se Ete esie ekekpepde enye. Jesus ama enen̄ede oyom Jehovah ekpep imọ n̄kpọ, enen̄ede etịn̄ enyịn ekpebe nte Jehovah osụhọrede idem atua anamidiọk ubonowo mbọm.—11/15, page 11.
Didie ke stamp Estonia owụt ke Mme Ntiense Jehovah ẹdi mbon nsọn̄ọnda?
Ke 2007, Post Ọfis Estonia ama osio stamp ndida nti mbon oro ẹkenọmọde ke ntak emi ukara Stalin okoyomde ndisobo ofụri mbon Estonia. Ẹwet 382 ke stamp emi ndiwụt ibat Mme Ntiense Jehovah ye nditọ mmọ emi ẹketan̄de ke obio ẹka nsio nsio itienna ufen ke esịt esịt Russia ke 1951.—12/1, page 27-28.
