Ufọn idụhe ndifịna idem n̄kaha mban̄a ebiet emi owo emi ẹsiode ẹfep ke esop ekpetiede ke Ufọkmbono Obio Ubọn̄. Magazine emi enen̄ede esịn udọn̄ ọnọ mme ete ye eka emi ẹdide mme Christian ete ẹnọ nditọ mmọ emi ẹsiode ẹfep ke esop, emi ẹsụk ẹdụn̄de ye mmọ, un̄wam ke n̄kan̄ eke spirit, edieke odotde ẹnam ntre. Nte ẹwụtde ke page 19 ye 20 ke nsiondi Enyọn̄-Ukpeme eke November 15, 1988, mme ete ye eka ẹkam ẹkeme ndikpep Bible ye ekpri eyen mmọ emi ẹsiode ẹfep ke esop, emi osụk odụn̄de ye mmọ. Ẹnịm ke ukpep emi ayan̄wam eyen oro okpụhọde.

Edi amaedi nte ẹkpetiede ke Ufọkmbono Obio Ubọn̄, etie nte ọkpọfon eyen emi ẹsiode ẹfep ke esop mi etie sụn̄ ye ete ye eka esie. Sia owo mîdọhọke ke akpana owo emi ẹsiode ẹfep ke esop etie ke n̄kpọitie edem ke Ufọkmbono Obio Ubọn̄, idiọkke eyen emi ẹsiode ẹfep ke esop nditie ye ete ye eka esie ke ebiet ekededi emi mmọ ẹtiede. Sia ete ye eka emi ẹdomode ndin̄wam eyen mmọ ke n̄kan̄ eke spirit, akpana mmọ ẹkụt ẹte ke enye ke akpan̄ utọn̄ ke mbono esop. Eyen emi nditie ye mmọ utu ke nditie ikpọn̄ ke ebiet en̄wen ekeme ndin̄wam enye enen̄ede akpan̄ utọn̄.

Edi nso ke ẹkpenam edieke eyen emi ẹsiode ẹfep mîdụn̄ke aba ye ete ye eka esie? Ndi emi ọwọrọ ke enye ikemeke nditie ye mmọ? Ke ini edem, Enyọn̄-Ukpeme ama owụt nnennen usụn̄ emi Christian akpanamde n̄kpọ ye iman esie emi ẹsiode ẹfep ke esop, emi mîdụn̄ke aba ye enye. * Edi owo emi ẹsiode ẹfep ke esop nditie sụn̄ ye mme iman esie ke mbono esop idịghe ukem ye mme iman esie ndiyoyom ifet man ẹdian idem ye enye nte mîdotke. Edieke mbon oro ẹkade iso ẹnam n̄kpọ Abasi ke ubon ẹsinamde n̄kpọ ye owo emi ẹsiode ẹfep ke esop nte odotde, edieke mmọ ẹnyụn̄ ẹsịnde ukeme ẹnam item N̄wed Abasi emi aban̄ade nte ẹkpenamde n̄kpọ ye utọ owo emi, ufọn idụhe ndifịna idem edieke enye etiede ye iman esie.—1 Cor. 5:11, 13; 2 John 11.

Edide owo emi ẹsiode ẹfep ke esop etie ye iman esie m̀mê etie ye owo en̄wen ke esop, ikpanaha emi afịna mbon en̄wen edieke enye anamde n̄kpọ nte odotde. Ndibiere ebiet emi owo ekpetiede ekeme ndida ekese mfịna ndi, etiene nte n̄kpọ etiede. Edieke kpukpru owo, esịnede iman oro ẹsọn̄ọde ẹda, ẹsịnde ukeme ndinam edumbet Bible emi aban̄ade mbon emi ẹsiode ẹfep ke esop, onyụn̄ edieke owo emi ẹsiode ẹfep ke esop nditie ye iman esie mînamke nditọete ẹtuak ukot ẹduọ, ufọn idụhe ndifịna idem mban̄a ebiet emi mme owo ẹkpetiede ke Ufọkmbono Obio Ubọn̄. *