Edidem Syria okoyom ndimụm Elisha, prọfet Abasi. Ẹma ẹtịn̄ ẹnọ enye ke Elisha odu ke Dothan, obio emi enyenede ibibene, emi onyụn̄ odude ke enyọn̄ obot. Enye ama ọdọn̄ enan̄-mbakara ye chariot ekọn̄ ye akwa udịmekọn̄ ẹka Dothan ke okoneyo. Mmọ ẹma ẹkan obio oro ẹkụk mbemiso eyo esierede.—2 Ndi. 6:13, 14.

Ke ini asan̄autom Elisha ọkọwọrọde an̄wa okokụt mbonekọn̄ emi ẹkeyomde ndimụm mmọ, idem ama enyek enye tutu enye ọdọhọ ete: “O, ete mi! Nnyịn idinam didie?” Elisha ama ọbọrọ enye ete: “Kûfehe ndịk, koro mbon emi ẹdude ye nnyịn ẹwakde ẹkan mbon emi ẹdude ye mmọ.” Ekem prọfet oro ama ọbọn̄ akam ete: “O Jehovah, mbọk tat enye enyịn man enye okụt.” Bible ọdọhọ “ke ndondo oro Jehovah atat asan̄autom oro enyịn, enye onyụn̄ okụt; ndien sese! mme enan̄-mbakara ye chariot ekọn̄ emi ẹsakde ikan̄ ẹyọhọ obot obot ikpehe oro ẹkanade Elisha ẹkụk.” (2 Ndi. 6:15-17) Nso ke mbụk emi ye mme n̄kpọ en̄wen emi ẹketịbede ẹnọ Elisha ẹkpep nnyịn?

Idem ikenyekke Elisha ke ini udịmekọn̄ Syria ẹkekande enye ẹkụk, koro enye ama ọbuọt idem ye Jehovah onyụn̄ okụt ke Enye ke ekpeme imọ. Nnyịn isidorike enyịn ke Abasi ayanam utịben̄kpọ mfịn, edi imenen̄ede ikụt ke Jehovah ke ekpeme ikọt esie nte otu. Ẹkeme ndidọhọ ke mme enan̄-mbakara ye chariot ekọn̄ emi ẹsakde ikan̄ ẹkan nnyịn n̄ko ẹkụk. Edieke inịmde ke Jehovah ke ekpeme ikọt esie, isinyụn̄ ibuọtde idem ye enye kpukpru ini, ndịk idinamke nnyịn, ndien enye ọyọdiọn̄ nnyịn. (Ps. 4:8) Ẹyak ise se ikemede ndikpep nto mme n̄kpọ en̄wen emi ẹketịbede ẹnọ Elisha.

Usen kiet, ke ini Elisha osụk ofụn̄de isọn̄, Elijah ama asan̄a ekpere enye onyụn̄ otop ọfọn̄ prọfet esie ofụk enye. Elisha ama ọfiọk se oro ọwọrọde. Enye ama aka akanam usọrọ, ọkọm ete ye eka esie unyọn̄, onyụn̄ ọkpọn̄ mmọ ekedi asan̄autom Elijah. (1 Ndi. 19:16, 19-21) Ke ntak emi Elisha ekenyịmede ndinam se ededi emi Abasi oyomde enye  anam, Jehovah ama ada enye anam ata ediwak n̄kpọ, ndien nte ini akakade enye ama ada itie Elijah.

Elisha ama asan̄a utom ọnọ Elijah ke n̄kpọ nte isua itiokiet. Elisha “[ekesitọhọ] Elijah mmọn̄ ke ubọk” ke adan̄a ofụri isua oro. (2 Ndi. 3:11) Mme owo ẹkesida ubọk ẹdia udia ini oro, ikesidaha ikpan̄ ye fọk. Ndien owo ama adia n̄kpọ ama, asan̄autom esie ọyọtọhọ enye mmọn̄ ke ubọk man eyet ubọk. Ntem, utom emi eyenufọk akpanamde ke Elisha ekesinam ndusụk ini. Edi Elisha akada nte ke edi ata akwa ifet ndidi asan̄autom nnọ Elijah.

Ediwak mme Christian mfịn ẹnam nsio nsio utom uyọhọ ini. Mbuọtidem ye udọn̄ ndinam ofụri se mmọ ẹkekeme ke utom Jehovah anam mmọ ẹnam emi. Ke uwụtn̄kpọ, ndusụk owo ẹsikpọn̄ ufọk ẹkenam utom ke Bethel, m̀mê ẹketiene ẹbọp mme n̄kpọ. Mmọ ẹkeme ndinam utom emi etiede nte utom emi eyenufọk akpanamde. Ikpanaha Christian ndomokiet ese utom emi nditọete emi ẹnamde mi nte usụhọde utom, koro Jehovah enen̄ede ama se mmọ ẹnamde.—Heb. 6:10.

Mbemsio Abasi ‘ekemende Elijah ke ọkpọsọn̄ oyobio ọdọk heaven,’ enye ama ọdọhọ Elijah oto Gilgal aka Bethel. Elijah ama ọdọhọ Elisha okûtiene imọ, edi Elisha ama ọdọhọ enye ete: “Ndikpọn̄ke fi.” Nte mmọ ẹkesụk ẹsan̄ade ẹka ke usụn̄, Elijah ama afiak ọdọhọ Elisha ikaba ete okûtiene imọ, edi Elisha ikenyịmeke. (2 Ndi. 2:1-6) Elisha ikọkpọn̄ke Elijah kpa nte Ruth mîkọkpọn̄ke Naomi. (Ruth 1:8, 16, 17) Ntak-a? Etie nte ekedi ke ntak emi Elisha akamade utom emi Abasi ọkọnọde enye ndisan̄a utom nnọ Elijah.

Elisha ama enịm ata eti uwụtn̄kpọ ọnọ nnyịn. Iyenen̄ede idara utom ekededi emi ẹnọde nnyịn ke esop Abasi edieke itide ke inam inọ Jehovah. Idụhe se inọde owo uku nte ndinam n̄kpọ Jehovah.—Ps. 65:4; 84:10.

Nte mmọ mbiba ẹkesan̄ade ke usụn̄, Elijah ama ọdọhọ Elisha ete: “Ben̄e se oyomde nnam nnọ fi mbemiso ẹmende mi ẹkpọn̄ fi.” Kpa nte Solomon ekeben̄ede n̄kpọ emi edin̄wamde enye atuak ibuot ọnọ Abasi, ntre n̄ko ke Elisha ekeben̄e. Enye ọkọdọhọ ‘Elijah ọnọ imọ udeme spirit esie iba.’ (1 Ndi. 3:5, 9; 2 Ndi. 2:9) Akpan ke ẹkesinọ mbak inyene iba ke Israel. (Deut. 21:15-17) Ikọ Elisha ọkowọrọ yak ẹnam imọ ida itie Elijah nte prọfet Abasi. Ke adianade do, Elisha okoyom ndinyene uko nte Elijah, emi ‘ekenen̄erede efịbe ufụp ọnọ Jehovah.’—1 Ndi. 19:13, 14.

Nso ke Elijah ọkọbọrọ asan̄autom esie? Prọfet oro ọkọdọhọ ete: “Afo eben̄e ọkpọsọn̄ n̄kpọ. Edieke afo okụtde mi ke ini ẹdimende mi ẹkpọn̄ fi, eyedi ntre; edi edieke mûkwe mi, ididịghe ntre.” (2 Ndi. 2:10) Ikọ Elijah ọkọwọrọ n̄kpọ iba. Akpa, Abasi ikpọn̄ ekeme ndibiere m̀mê Elisha odot ndibọ se enye eben̄ede oro. Udiana, edieke anade ẹnọ Elisha se enye ekeben̄ede, ana enye aka iso asan̄a ye Elijah, inamke n̄kpọ m̀mê nso itịbe.

Abasi akada didie eben̄e emi Elisha ekeben̄ede ete ẹnọ imọ udeme spirit Elijah iba? Bible ọdọhọ ete: “Edikem nte mmọ ẹsụk ẹsan̄ade ẹka, ke ẹsan̄a ke ẹneme nneme, sese! ikan̄-ikan̄ chariot ekọn̄ ye mme ikan̄-ikan̄ enan̄-mbakara ẹdi ẹdibahade mmọ mbiba; ndien Elijah asan̄a ke ọkpọsọn̄ oyobio ọdọk enyọn̄. Ke ofụri ini emi Elisha ke okokụt.” * Nte Jehovah ọkọnọde se Elisha ekeben̄ede edi oro. Elisha ama okụt nte ẹmende Elijah ẹkpọn̄ enye, ọbọ udeme spirit Elijah, onyụn̄ ada itie Elijah.—2 Ndi. 2:11-14.

Elisha ama emen ọfọn̄ prọfet emi ọfọrọrede Elijah ọduọ esịne. Ọfọn̄ emi ama anam ẹdiọn̄ọ Elisha nte prọfet. N̄kpọ en̄wen emi akanamde ẹdiọn̄ọ enye nte prọfet edi utịben̄kpọ emi enye akanamde ke ndibahade Akpa Jordan.

Enye ikefreke se enye okokụtde ke ini ọkpọsọn̄ oyobio ekemende Elijah ọdọk enyọn̄. Idụhe owo nnyịn ndomokiet emi idem mîkpakpaha ndikụt ikan̄-ikan̄ chariot ekọn̄ ye mme ikan̄-ikan̄ enan̄-mbakara! Mme n̄kpọ emi ẹkewụt ke Jehovah ama ọnọ Elisha se enye ekeben̄ede. Nnyịn isikwe ikan̄-ikan̄ chariot ekọn̄ ye mme ikan̄-ikan̄ enan̄-mbakara ke ini Abasi eyerede akam nnyịn. Edi imekeme ndifiọk ke Abasi ada akwa odudu esie okụt ete ke ẹnam uduak imọ.  N̄ko, ke ini ikụtde nte Jehovah ọdiọn̄de ikpehe esop esie eke isọn̄, etie nte n̄kpọ eke ikụtde chariot eke enyọn̄ nte akade iso iso.—Ezek. 10:9-13.

Elisha ama okụt ediwak n̄kpọ emi akanamde enye ọfiọk ke Jehovah enen̄ede enyene odudu. Ke nditịm ntịn̄, edisana spirit ama anam Elisha anam utịben̄kpọ 16—emi awak utịm ikaba akan se Elijah akanamde. * Ọyọhọ ikaba emi Elisha okokụtde ikan̄-ikan̄ chariot ekọn̄ ye mme ikan̄-ikan̄ enan̄-mbakara ekedi ke ini mfịna oro ke Dothan, emi iketịn̄de iban̄a ke ntọn̄ọ ntọn̄ọ ibuotikọ emi.

Idem ikenyekke Elisha ke ini mme asua ẹkekande enye ẹkụk ke Dothan. Ntak-a? Koro enye ama enen̄ede ọbuọt idem ye Jehovah. Ana nnyịn n̄ko inyene orụk mbuọtidem emi. Ke ntem, ẹyak ibọn̄ akam iben̄e Abasi edisana spirit man ikpenyene mbuọtidem ye mme edu eken emi ẹnamde mbun̄wụm spirit.—Luke 11:13; Gal. 5:22, 23.

N̄kpọ emi eketịbede ke Dothan mi ama etiene anam Elisha ọbuọt idem ye Jehovah ye udịm mme angel esie. Prọfet oro ama okụt nte Abasi ọdọn̄de mme angel esie ẹkekan obio oro ye mme asua oro ẹkụk. Abasi ama anyan̄a Elisha ye asan̄autom esie ke utịbe utịbe usụn̄ ke ndinam mme asua mmọ ẹkabade nnan. (2 Ndi. 6:17-23) Ke idiọk ini ye ke mme ini en̄wen, Elisha ama ọbuọt idem ye Jehovah onyụn̄ enen̄ede eberi edem ke enye.

Ẹyak nnyịn ibuọt idem ye Jehovah Abasi kpa nte Elisha ọkọbuọtde. (N̄ke 3:5, 6) Edieke inamde ntre, enye “ayatua nnyịn mbọm onyụn̄ ọdiọn̄ nnyịn.” (Ps. 67:1) Edi akpanikọ ke mme ikan̄-ikan̄ chariot ekọn̄ ye mme ikan̄-ikan̄ enan̄-mbakara ikanke nnyịn ikụk. Edi Jehovah eyekpeme ikọt esie ke “akwa ukụt” emi edide mi. (Matt. 24:21; Edi. 7:9, 14) Ẹyak iti kpukpru ini ke “Abasi edi ebiet ubọhọ nnyịn.”—Ps. 62:8.