Ẹma ẹkot asiakusụn̄ iba ẹdikwọrọ ikọ ke ufọk kiet ke Kenya. Ke ini mmọ ẹkedụkde ufọk oro, idem ama akpa mmọ ndikụt ekpri ete kiet emi ekerede Onesmus nte anade ke bed. Enye ama enen̄ede omụhọ onyụn̄ enyene mbio ubọk. Ke ini mmọ ẹkewụtde enye ke Abasi ọn̄wọn̄ọ ke “mbụn̄ọ ọyọfrọ nte ayara edop,” esịt ama enem enye tutu enye atuak inua imam.—Isa. 35:6.

Ẹma ẹtịn̄ ẹnọ mme asiakusụn̄ oro ke Onesmus emi ekperede ndisịm isua 40 idahaemi akamana ye udọn̄ọ ọkpọ emi ẹkotde osteogenesis imperfecta. Udọn̄ọ emi anam ọkpọ esie emem etieti—onyụn̄ ekeme ndibụn̄ọ edieke ẹfịkde enye idem ata esisịt. Onesmus ekekere ke imọ iditak ke n̄kpọitie mbon n̄kpọnnam inyụn̄ ikop ubiak ke ofụri eyouwem imọ sia owo ikemeke ndikọk udọn̄ọ emi, ndien ata eti usọbọ inyụn̄ idụhe.

Onesmus ama enyịme ẹkpep imọ Bible. Edi eka esie ikenyịmeke enye esidụk mbono esop Christian koro enye ekekere ke Onesmus ekeme ndikobụn̄ idem, ndien ke emi ayanam enye etetịm okop ubiak. Ntem, nditọete ẹma ẹsimụm se ẹnamde ke mme mbono esop ẹdibre ẹnọ Onesmus ke ufọk. Ke Onesmus ama ekekpep n̄kpọ ke ọfiọn̄ ition, enye ama ebiere ndisidụk mme mbono esop, inamke n̄kpọ m̀mê nso iditịbe.

Ndi ndidụk mme mbono esop ama anam idem etetịm abiak Onesmus? Baba, akakam ososụhọde ubiak esie. Onesmus ọdọhọ ete: “Ubiak emi n̄kesikopde ama esisụhọde ke ini ndụkde mbono esop.” Enye ekekere ke Ikọ Abasi emi imọ ikpepde idahaemi anam idem amana enem imọ. Eka Onesmus ama okụt ke eyen imọ ifụhọke aba nte ekesifụhọde, ndien esịt ama enem enye tutu enye n̄ko enyịme ndikpep Bible. Enye esidọhọ ete, “Ndinam n̄kpọ Abasi edi ibọk eyen mi.”

Ikebịghike, Onesmus ama edi asuanetop oro mînaha baptism. Enye ama ana baptism nte ini akakade onyụn̄ edi asan̄autom unamutom idahaemi. Kpa ye emi Onesmus mîkemeke ndisan̄a, ubọk esie kiet mînyụn̄ ifọnke, enye ama ndinam n̄kpọ Jehovah adan̄a nte enye ekekeme. Enye okoyom ndinam usiakusụn̄ unọ un̄wam, edi okop ndịk ndisịn ubọk ke n̄wed. Ntak-a? Koro enye ama ọfiọk ke oro ọwọrọ ke ana owo esin̄wam onụk imọ ke n̄kpọitie mbon n̄kpọnnam. Ke ini enye eketịn̄de n̄kpọ emi ọnọ nditọete, mmọ ẹma ẹnyịme ke iyesin̄wam enye. Mmọ ẹma ẹnyụn̄ ẹn̄wam Onesmus anam usiakusụn̄ unọ un̄wam.

Onesmus ama oyom ndidi asiakusụn̄ ofụri ini, edi kpa n̄kpọ kiet emi ekedi mfịna. Edi usen kiet, se ẹkenemede ke itie N̄wed Abasi eke usen ke usen ama enen̄ede esịn udọn̄ ọnọ enye. Itien̄wed usen oro ekedi Psalm 34:8 emi ọdọhọde ete: “Ẹtabi ẹnyụn̄ ẹse nte Jehovah ọfọnde.” Ke Onesmus ama eketie ekere itie N̄wed Abasi oro, enye ama ebiere ndidi asiakusụn̄ ofụri ini. Enye esikwọrọ ikọ usen inan̄ ke urua onyụn̄ enyene ediwak nditọ ukpepn̄kpọ Bible emi ẹnen̄erede ẹsịn idem ke n̄kpọ Abasi. Enye ama odụk Ufọkn̄wed Utom Usiakusụn̄ ke 2010. Esịt ama enen̄ede enem enye ndikụt kiet ke otu nditọete emi ẹkekwọrọde ikọ ẹnọ enye etienede ekpep enye n̄kpọ ke ufọkn̄wed emi.

Ete ye eka Onesmus ẹkpan̄a, edi nditọete ke ẹse ẹban̄a enye. Enye enen̄ede okop inemesịt ke nte Abasi ọdiọn̄de imọ, onyụn̄ etie ebet usen emi “baba andidụn̄ kiet [mîdidọhọke] ite: ‘Ndọdọn̄ọ.’”—Isa. 33:24.