1, 2. Ntak emi abian̄a awakde mfịn, ndien didie ke ẹsibian̄a mme owo? (Se akpa ndise ibuotikọ emi.)

ABIAN̄A, n̄kari, ye nsu ẹwak etieti ke ererimbot emi. Ikpanaha emi akpa nnyịn idem. Bible ọdọhọ ke Satan kpa Devil edi ata osu nsu ye andikara ererimbot emi. (1 Tim. 2:14; 1 John 5:19) Nte utịt idiọk ererimbot emi ekperede, esịt enen̄ede ayat Satan koro “ini [esie] edi ibio.” (Edi. 12:12) Ke ntre, imọfiọk ke mbon emi Devil akarade ẹyenen̄ede ẹdomo ndibian̄a mme owo, akpan akpan mbon emi ẹkponode Jehovah.

² Ke ini ẹtịn̄de n̄kpọ ẹban̄a Mme Ntiense Jehovah ke mme n̄kpọ usuanetop, ndusụk se ẹsitịn̄de isidịghe ofụri akpanikọ, ndusụk ẹsidi ata nsu. Ẹsida n̄wedmbụk n̄kpọntịbe, ekebe ndise, ye Intanet ẹsuan nsu. Ndusụk owo ẹsinịm se ẹtịn̄de emi ibụpke-bụp ntak, ndien emi esitịmede mmọ.

3. Nso mîdiyakke ẹbian̄a nnyịn?

³ Imọkọm Abasi sia imenyene Ikọ esie, emi “[ọfọnde] . . . ndida nnen̄ede mme n̄kpọ,” emi mîdinyụn̄ iyakke ẹbian̄a nnyịn. (2 Tim. 3:16) Se apostle Paul ekewetde owụt ke ẹma ẹbian̄a ndusụk Christian ke Thessalonica. Enye ama ọnọ mmọ item ete “ẹkûyak ekikere awara etịmede [mmọ].” (2 Thess. 2:1, 2) Nso ke ikeme ndikpep nto item emi Paul ọkọnọde mi, ndien didie ke ikeme ndinam se ikpepde emi?

4. Nso ke Paul eketi mme Christian ke Thessalonica aban̄a “usen Jehovah,” ndien nso ke ẹti nnyịn mfịn?

⁴ Ke akpa leta emi Paul ekewetde ọnọ ẹsọk esop ke Thessalonica, enye ama eti mmọ ete ke “usen Jehovah” ke edi. Enye ikoyomke nditọete esie ẹdu ke ekịm ẹnyụn̄ ẹtie ke ndueidem. Enye akakam ọdọhọ  mmọ ‘ẹtaba idap ẹnyụn̄ ẹnyene ikike’ sia mmọ ẹdide “nditọ un̄wana.” (Kot 1 Thessalonica 5:1-6.) Mfịn, nnyịn itie ibet ini emi ẹdisobode Akwa Babylon, oro edi, kpukpru nsunsu ido ukpono ke ererimbot. Emi edidi ntọn̄ọ akwa usen Jehovah. Imenen̄ede ikọm Jehovah ke ndinam nnyịn itetem ifiọk se enye aduakde. Ke adianade do, esop Abasi esiti nnyịn mme n̄kpọ emi ẹdinamde nnyịn inyene ikike. Edieke ikpan̄de utọn̄ ke se ẹsitide nnyịn kpukpru ini mi, iyebiere ndida “ukeme ukere n̄kpọ” nnyịn nnam “edisana utom” nnọ Abasi.—Rome 12:1.

5, 6. (a) Nso ke Paul ekeneme ke udiana leta emi enye ekewetde ọnọ ẹsọk mbon Thessalonica? (b) Nso ke Abasi edida Jesus inam ke mîbịghike, ndien nso mbụme ke ikpobụp idem nnyịn?

⁵ Paul ama ọnọ udiana leta ẹsọk mme Christian ke Thessalonica esisịt ini ke enye ama ọkọnọ akpa ẹsọk mmọ. Ke udiana leta emi, enye ama etịn̄ aban̄a ukụt oro edisịmde mme owo ke ini Ọbọn̄ Jesus edibierede ikpe inọ “mmọ eke mîfiọkke Abasi ye mmọ eke mîsụkke ibuot inọ eti mbụk.” (2 Thess. 1:6-8) Ọyọhọ ibuot iba ke leta emi owụt ke idem ama enen̄ede “aduai” ndusụk nditọete aban̄a usen Jehovah tutu mmọ ẹkere ke utịt akam esesịm ama. (Kot 2 Thessalonica 2:1, 2.) Mme Christian oro ikenen̄ekede ifiọk nte Jehovah edisude uduak esie. Se Paul ekewetde nte ini akakade aban̄a ntịn̄nnịm ikọ owụt ke emi ekedi akpanikọ. Enye ọkọdọhọ ete: “Nnyịn inyene ifiọk ubak ubak inyụn̄ itịn̄ prọfesi ubak ubak; edi ke ini se iyọhọde edidide edisịm, se idide ubak ubak eyebe efep.” (1 Cor. 13:9, 10) Edi mmọ ẹma ẹkeme ndika iso nnam akpanikọ ke ndinam item emi Paul, apostle Peter, ye mme anam-akpanikọ nditọete eken emi ẹyetde aran ẹkenọde.

⁶ Man enen̄ede ekikere mmọ, Paul ama ada odudu spirit Abasi ewet ete ke akwa mfiakedem ye “owo emi edide abiatibet” ẹnyene ndidi mbemiso usen Jehovah. * Ndien ke oro ebede, ke edikem ini Ọbọn̄ Jesus, enye ayanam kpukpru mbon emi ẹbian̄ade  ‘ẹkabade ẹdi ikpîkpu.’ Apostle emi ama etịn̄ nnennen nnennen ke se inamde ẹbiere utọ ikpe emi ẹnọ mmọ edi koro “mmọ mîkenyịmeke ndima akpanikọ.” (2 Thess. 2:3, 8-10) Ọkpọfọn ibụp idem nnyịn ite: ‘Ndi mmenen̄ede mma akpanikọ? Ndi mmesikot Enyọn̄-Ukpeme ye mme n̄wed eken emi ẹwetde ẹnọ ikọt Abasi ke ofụri ererimbot man n̄keme ndidiọn̄ọ se esop Abasi ekpepde idahaemi?’

7, 8. (a) Nso mfịna ke mme Christian eyo mme apostle ẹkesobo? (b) Nso ikeme ndinen̄ede nsịn ata mme Christian ke mfịna mfịn?

⁷ Idịghe nsunsu ukpepn̄kpọ mbon mfiakedem ekedi n̄kukụre mfịna emi mme Christian ẹkenyenede. Paul ọkọdọhọ Timothy ete ke “ima okụk edi orụn̄ kpukpru orụk idiọkn̄kpọ.” Apostle emi ama owụt ke “edinyanade mbịne ima emi” anam ndusụk owo “ẹyo ẹkpọn̄ mbuọtidem ẹnyụn̄ ẹda ediwak ubiak ẹnọmọ idemmọ.” (1 Tim. 6:10) “Mme utom obụkidem” ẹkedi mfịna n̄ko.—Gal. 5:19-21.

⁸ Paul ama enen̄ede odụri mbon Thessalonica utọn̄ aban̄a mbon emi enye okokotde “mme apostle nsu.” Ndusụk mmọ ẹma “ẹtịn̄ ukwan̄ ikọ man ẹdụri mme mbet ẹnọ idemmọ.” (2 Cor. 11:4, 13; Utom 20:30) Jesus ama otoro esop ke Ephesus koro mmọ ikekemeke ndiyọ “mme idiọkowo.” Mmọ ẹma ẹwụt ke mmọ emi ẹdi mme apostle nsu ye mme osu nsu. (Edi. 2:2) Paul ekewet ke udiana leta emi enye ọkọnọde ẹsọk mbon Thessalonica ete: “Nnyịn ke emi inọ mbufo uyo, nditọete, ke enyịn̄ Ọbọn̄ Jesus Christ, ite ẹdian̄ade ẹkpọn̄ eyenete ekededi oro asan̄ade etịme etịme.” Ekem enye ama etịn̄ aban̄a mme Christian emi “mîmaha ndinam utom.” (2 Thess. 3:6, 10) Ntre, edieke mîkpakanaha ẹdian idem ye owo emi edide ifu mînyụn̄ imaha ndinam utom, ọwọrọ akana ẹnen̄ede ẹsọn owo emi ọtọn̄ọde ndinam n̄kpọ nte owo mfiakedem. Omokụt do ke ikọfọnke ndidụk nsan̄a ye utọ mbon oro—ke akana ẹdian̄ade ẹkpọn̄ mmọ. Se onyụn̄ oyomde nnyịn inam edi oro mfịn.—N̄ke 13:20.

9. Ntak emi akpanade ikpeme idem ye owo edieke enye ọtọn̄ọde nditịn̄ ekikere idemesie mban̄a n̄kpọ emi Bible mîtịn̄ke m̀mê okụtde ndudue ọnọ mbon en̄wen?

⁹ Akwa ukụt ke asan̄a ekpere, idiọk editịm n̄kpọ emi ke onyụn̄ ekpere utịt. Item oro Jehovah ọkọnọde ke eyo mme apostle enen̄ede enyene ufọn ọnọ nnyịn mfịn. Nnyịn iyomke ndibọ “mfọnido Abasi oro owo mîdotke edi [itaba] uduak esie.” Edieke emi ekpetịbede, ikpataba nsinsi uwem. (2 Cor. 6:1) Akpana inen̄ede ikpeme edieke owo emi esidụkde mbono esop odomode nditịn̄ ekikere idemesie mban̄a n̄kpọ emi Bible mîtịn̄ke m̀mê okụtde ndudue ọnọ mbiowo ye mbon en̄wen oro ẹnamde n̄kpọ Abasi.—2 Thess. 3:13-15.

10. Mme ido ewe ke ẹkedọhọ mme Christian ke Thessalonica ẹsọn̄ọ ẹmụm?

¹⁰ Paul ama ọdọhọ nditọete esie ke Thessalonica “ẹsọn̄ọ ẹda” ẹmụm se mmọ ẹkekpepde ẹkama. (Kot 2 Thessalonica 2:15.) Nso ikedi “mme ido” oro ẹkekpepde mmọ? Ikedịghe mbon oro ẹkekpepde ke nsunsu ido ukpono ẹnyụn̄ ẹnamde etie nte ke edi akpanikọ oro esịnede ke N̄wed Abasi. Edi Paul eketịn̄ aban̄a mme ukpepn̄kpọ oro enye ye mbon en̄wen ẹkekpepde ẹto Jesus ye se Abasi ọkọdọhọde mme apostle ẹwet, emi ata ediwak ẹsịnede ke N̄wed Abasi emi ẹkedade edisana spirit  ẹwet. Paul ama otoro nditọete esie ke Corinth sia enye ekewet ete: “Mbufo ẹmeti mi ke kpukpru n̄kpọ, mbufo ke ẹnyụn̄ ẹsọn̄ọ ẹmụm mme ido oro ẹkama kpa nte n̄kayakde nnọ mbufo.” (1 Cor. 11:2) Utọ ukpepn̄kpọ emi okoto mbon emi ẹkemede ndiberi edem, ama onyụn̄ enen.

11. Nso ke abian̄a esinam ndusụk owo?

¹¹ Ke leta emi Paul ekewetde ọnọ ẹsọk mme Hebrew, enye ama asiak n̄kpọ iba emi ẹkemede ndinam mbuọtidem Christian emem, mîdinyụn̄ iyakke enye ọsọn̄ọ ada ye Jehovah. (Kot Mme Hebrew 2:1; 3:12.) Enye ama etịn̄ aban̄a ‘edifiọrọ n̄kpọn̄ usụn̄’ ye ‘ediwọn̄ọde n̄kpọn̄’ Abasi. Ekeme ndisọn̄ ndikụt ke ubom ke ọfiọrọ ọkpọn̄ mbenesụk. Enye ekeme ndisịk sụn̄sụn̄ tutu osop. Edi owo onyụn̄ ekeme ndida ubọk esie nnụk ubom nsịn ke akpa. Uwụtn̄kpọ iba emi ẹwụt se ikemede nditịbe edieke owo ayakde ẹbian̄a enye, mînyụn̄ inen̄ekede ima akpanikọ aba.

12. Nso ikeme ndinam nnyịn ikûsịn idem ke n̄kpọ Abasi?

¹² Anaedi ndusụk owo ke Thessalonica ẹma ẹyak ẹbian̄a mmọ. Ndi emi ekeme nditịbe nnọ nnyịn? Mme n̄kpọ emi ẹkemede ndidia ini nnyịn ẹyọyọhọ. Kere adan̄a ediwak hour emi ẹsidade ẹbre mbre, ẹneme nneme ke Intanet, ẹkot ẹnyụn̄ ẹnọ etop ke telefon m̀mê Intanet, m̀mê ẹkot n̄kpọ ẹban̄a mbre mbuba. Ekededi ke otu emi ekeme ndiwọn̄ọde ntịn̄enyịn Christian inyụn̄ iyakke enye enen̄ede esịn idem ke n̄kpọ Jehovah. Nso ke emi ekeme ndida ndi? Emi ekeme ndinam enye ibọn̄ke aba akam ke ofụri esịt, inyụn̄ idaha aba ini ikpep Ikọ Abasi, idụk mbono esop, inyụn̄ ikwọrọ eti mbụk nte ekesidade. Nso ke ikeme ndinam mbak ekikere ediwara etịmede nnyịn?

13. Mme owo ẹdu didie uwem kpa nte Peter eketịn̄de, ndien nso ke ikeme ndinam mbak mbuọtidem nnyịn edimem?

¹³ Ana isiti ke utịt ererimbot Satan enen̄ede ekpere, ndien ke idifọnke idụk ndụk ye mbon emi mînịmke ke nnyịn idu uwem ke “mme akpatre usen.” Apostle Peter ekewet ntem aban̄a ini emi idude uwem mi: “Mbon nsahi ẹyeda nsahi mmọ ẹdi, ẹsan̄a ke udọn̄ esịt mmọ ẹnyụn̄ ẹdọhọ ẹte: ‘Enye edidu esie emi ẹken̄wọn̄ọde? Koro tọn̄ọ nte mme ete ete nnyịn ẹkede ke n̄kpa, kpukpru n̄kpọ ẹtie kpa nte ẹketiede toto ke editọn̄ọ emi ẹkebotde mme n̄kpọ.’” (2 Pet. 3:3, 4) Ndikot Bible ke usen ke usen nnyụn̄ n̄kpep n̄kpọ kpukpru ini ayan̄wam nnyịn isiti ke idu uwem ke “mme akpatre usen.” Mfiakedem emi ẹketịn̄de ẹban̄a ama ọtọtọn̄ọ ata anyan ini ko ke edem, ndien ke osụk ododu tutu emi. “Owo emi edide abiatibet” osụk ododu onyụn̄ aka iso ọbiọn̄ọ ikọt Abasi. Ke ntem, akpana isiti ke usen Jehovah enen̄ede ekpere.—Zeph. 1:7.

14. Didie ke utom ukwọrọikọ an̄wam nnyịn?

¹⁴ N̄kpọ en̄wen emi mîdiyakke ekikere etịmede nnyịn edi ndikwọrọ eti mbụk kpukpru ini. Ntem, ke ini Christ Jesus, emi edide Ibuot esop, okowụkde mme anditiene enye ete ẹka ẹkenam mme owo ke kpukpru idut ẹdi mbet imọ, ẹnyụn̄ ẹkpep mmọ ndinam kpukpru se imọ ikekpepde mmọ, enye ọkọnọ mmọ item emi mîdiyakke ekikere etịmede mmọ. (Matt. 28:19, 20) Ana inen̄ede isịn idem ke utom ukwọrọikọ edieke iyomde ndinam ewụhọ Jesus emi. Ndi emekere ke nditọete ke Thessalonica ẹkenam utom ukwọrọikọ ke ntak emi ẹkenyụn̄ ẹdọhọde mmọ ẹnam? Ti ke Paul ọkọdọhọ mmọ ete: “Ẹkûnịme ikan̄ spirit. Ẹkûsịn ikọ  prọfesi ke ndek.” (1 Thess. 5:19, 20) Esinen̄ede enem nnyịn ndikpep n̄kpọ mban̄a mme ntịn̄nnịm ikọ nnyụn̄ nneme mme n̄kpọ emi ye mbon en̄wen.

15. Nso ke ikeme ndineme ke ini utuakibuot ubon nnyịn?

¹⁵ Nnyịn imoyom ndin̄wam mbonubon nnyịn ẹnen̄ede ẹfiọk ndikwọrọ ikọ. Ediwak nditọete ẹn̄wam ubon mmọ ke ndida ndusụk ini utuakibuot ubon mmọ nneme nte ẹkpekwọrọde ikọ. Ẹmekeme ndineme nte ẹkpenamde mfiakn̄ka. Nso ke ẹditịn̄ ẹma ẹfiak ẹka? Nso ke ẹkpeneme man enyeneufọk ama ndika iso n̄kpep Bible? Ini ewe enen̄ede ọfọn̄ ndifiak n̄ka? Ediwak owo ẹsida ndusụk ini utuakibuot ubon mmọ ẹtịm idem ẹnọ mbono esop man ẹkpefiọk se ẹdinemede. Ndi ẹmekeme ndinen̄ede nnam ndun̄ọde man ẹkpekeme nditiene nnọ ibọrọ? Ndinọ ibọrọ ke mbono esop ayanam mbuọtidem mbufo etetịm ọsọn̄, ndien emi idiyakke ekikere etịmede mbufo. (Ps. 35:18) Ndisinịm utuakibuot ubon idiyakke itịn̄ ekikere idem nnyịn ke n̄kpọ emi Bible mîtịn̄ke, idinyụn̄ iyakke iyịk se Bible ekpepde.

16. Nso eti ntak ke mme Christian oro ẹyetde aran ẹnyene nditre ndiyak n̄kpọ etịmede mmọ ekikere?

¹⁶ Ke ini itiede ikere nte Jehovah anamde mme ntịn̄nnịm ikọ Bible ẹnen̄ede ẹn̄wan̄a nnyịn ke ediwak isua idahaemi, iyenen̄ede ikụt ke nti n̄kpọ ke ẹbet nnyịn ke ini iso. Mme Christian oro ẹyetde aran ẹnyene idotenyịn ndidu ye Christ ke heaven. Nso eti ntak ke mmọ ẹnyene ntem nditre ndiyak n̄kpọ etịmede mmọ ekikere! Imekeme ndidọhọ ke se Paul ekewetde ọnọ mbon Thessalonica mi aban̄a mmọ n̄ko: “Obiomo nnyịn ndikọm Abasi kpukpru ini mban̄a mbufo, nditọete emi Jehovah amade, koro Abasi ekemekde mbufo . . . ke ndinam mbufo ẹsana ke spirit onyụn̄ oto ke mbufo ndibuọt idem ke akpanikọ.”—2 Thess. 2:13.

17. Didie ke 2 Thessalonica 3:1-5 ọsọn̄ọ fi idem?

¹⁷ Mbon emi ẹnyenede idotenyịn ndidu uwem ke nsinsi ke isọn̄ ẹkpenyene n̄ko nditre ndiyak n̄kpọ etịmede mmọ ekikere. Edieke enyenede idotenyịn ndidu uwem ke isọn̄, domo ndinam se Paul eketemede mbon oro ẹyetde aran ke Thessalonica. (Kot 2 Thessalonica 3:1-5.) Akpana nnyịn owo kiet kiet inen̄ede iwụt esịtekọm iban̄a ikọ Paul emi. Leta mbiba emi Paul ekewetde ọnọ ẹsọk mbon Thessalonica mi ẹdụri nnyịn utọn̄ ẹban̄a owo nditịn̄ ekikere idemesie ke n̄kpọ emi Bible mîtịn̄ke m̀mê ndinyene ntaha ntaha ekikere. Sia idude uwem ke ata utịt ini, imenen̄ede iwụt esịtekọm iban̄a item emi.