N̄kedi isua duop kpọt ke 1985 ke ini nditọwọn̄ emi ẹtode Cambodia ẹketọn̄ọde n̄wed ke ufọkn̄wed nnyịn ke Columbus, Ohio, U.S.A. Kiet ke otu mmọ ama ọdiọn̄ọ ikọ ifan̄ ke Ikọmbakara. Enye ama ọ-drọ ndise ndiwụt mi nte ẹketụhọrede mme owo, ẹwotde mme owo, ye nte ndusụk owo ẹkefehede ẹbọhọ. Mma nsitua okoneyo ke ini ntide nditọ emi. Ama ọdọn̄ mi nditịn̄ idotenyịn ediset ke n̄kpa ye Paradise nnọ mmọ, edi mmọ ikokopke Ikọmbakara. Okposụkedi emi n̄kedide eyenọwọn̄, mma mbiere ndikpep usem Cambodian man n̄kpekeme ndineme mban̄a Jehovah ye nditọ ufọkn̄wed nnyịn. Edi n̄kọfiọkke ini oro ke se mmekde emi edibiere nte ndidude uwem mma n̄kpon.

Ikememke utom ndikpep usem Cambodian. Mma ndọhọ ikaba ke ndikpepke aba, edi Jehovah ama anam ete ye aka mi ẹsịn udọn̄ ẹnọ mi. Nte ini akakade, mme andikpep ye nditọ ufọkn̄wed nnyịn ẹma ẹsisịn udọn̄ ẹnọ mi ẹte nnen̄ede n̄ka n̄wed man n̄kpenyene eti utom. Edi n̄koyom ndidi asiakusụn̄, ntre ke ini n̄kodude ke ufọkn̄wed sekọndri, mma n̄kpep mme n̄kpọ oro ẹdin̄wamde mi nnam utom ibio ini man n̄kpekeme ndinam utom usiakusụn̄. N̄wed ama asuana, mma ndisisan̄a ye mme asiakusụn̄ n̄kwọrọ ikọ. Ke adianade do, mma nsikpep nditọ ufọkn̄wed emi ẹkeyomde ndikpep Ikọmbakara—ndien emi ama enen̄ede an̄wam mi nte ini akakade.

Ke ini n̄kedide isua 16, mma n̄kop ke otu emi ẹsemde usem Cambodian odu ke Long Beach ke California, U.S.A. Mma n̄ka n̄kese mmọ, nnyụn̄ n̄kpep ndikot usem Cambodian. Ke ndondo oro n̄kokụrede ufọkn̄wed sekọndri, mma ntọn̄ọ utom usiakusụn̄ nnyụn̄ n̄ka iso n̄kwọrọ ikọ nnọ mbon Cambodia ke mbọhọ nnyịn. Etisịm ini emi n̄kedide isua 18, mma n̄kere ndiwọrọ n̄ka Cambodia. Ẹkesụk ẹwowot mme owo do, edi mma mfiọk ke ibat ibat owo ke otu owo miliọn duop oro ẹdụn̄de ke Cambodia ẹkop eti mbụk Obio Ubọn̄. Ini oro, esop kiet kpọt emi asuanetop 13 ẹdude okodu ke ofụri idụt oro. N̄kedi isua 19 ke akpa ini emi n̄kakade Cambodia. Ke isua iba ẹma ẹkebe, mma n̄wọrọ n̄kodụn̄ do. Man nnyene se ndiade, mma nsida ndusụk ini n̄kabade usem Cambodia nsịn ke Ikọmbakara nnyụn̄ n̄kpep mme owo Ikọmbakara. Nte ini akakade, mma ndọ n̄wan emi eketienede ama se mmade ndinam ke utom Jehovah. Imadiana kiet in̄wam ediwak mbon Cambodia ẹyak idem ẹnọ Abasi.

Jehovah ọmọnọ mi ‘se esịt mi oyomde.’ (Ps. 37:4) Utom unam mbet enem akan ke otu kpukpru utom. Ke ini n̄kedide Cambodia isua 16 emi ẹkebede, esop kiet kpọt emi enyenede mme asan̄autom Jehovah 13 okodu, idahaemi esop 12 ye otu 4 oro ẹdude nsannsan ẹdidu.—Nte Jason Blackwell obụkde.