Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Ini ewe ke Nisan 14 ke ẹkenyene ndiwot eyenerọn̄ Passover?

Ndusụk Bible ẹdọhọ ke ẹkenyene ndiwot eyenerọn̄ oro “ke ufọt mbubreyo iba,” oro edi ke mfụn̄mfụn̄ mbubreyo m̀mê ke ini eyo ọtọn̄ọde ndifụk owo idem. (Ex. 12:6)—12/15, page 18-19.

Mme edumbet Bible ewe ẹkeme ndin̄wam mme uyen ẹnam nti ubiere?

Edumbet ita emi ẹdin̄wam mmọ: (1) Ẹbem iso ẹyom Obio Ubọn̄ Abasi ye edinen ido esie. (Matt. 6:19-34) (2) Ẹnam n̄kpọ ẹnọ mbon en̄wen man ẹkop inemesịt. (Utom 20:35) (3) Ẹkop inem ndinam n̄kpọ Jehovah ke ini uyen. (Eccl. 12:1)—1/15, page 19-20.

Mme awat enan̄-mbakara inan̄ ewe ẹwat uwat tọn̄ọ 1914?

Jesus awat afia enan̄-mbakara. Enye ama ebịn Satan ye mme demon esie osion̄o ke heaven. Awat ididuot enan̄-mbakara ada aban̄a ofụri ekọn̄ emi mîyakke mme owo ẹbọ emem. Awat obubịt enan̄-mbakara ada aban̄a akan̄. Awat ntọn̄ntọn̄ enan̄-mbakara ada aban̄a idiọk udọn̄ọ emi owotde ediwak miliọn owo. (Edi. 6:2-8)—2/1, page 6-7.

Ini ewe ke Eyenerọn̄ edinam ndọ? (Edi. 19:7)

Edidi ke Jesus Christ emi edide Edidem ama okokụre edikan esie, oro edi, ke ẹma ẹkesobo Akwa Babylon ẹnyụn̄ ẹn̄wana ekọn̄ Armageddon.—2/15, page 10.

Nso ikanam mme Jew eyo Jesus ‘ẹtie ye idotenyịn ẹbet’ Messiah? (Luke 3:15)

Nnyịn itịmke ifiọk m̀mê ntịn̄nnịm ikọ Daniel oro aban̄ade Messiah ama enen̄ede an̄wan̄a mme owo ke eyo Jesus nte an̄wan̄ade nnyịn. (Dan. 9:24-27) Edi ekeme ndidi mmọ ẹma ẹkop ke angel ama etịn̄ ikọ ọnọ mme ekpemerọn̄, mîdịghe ẹkop se Anna, prọfet an̄wan, eketịn̄de ke ini okokụtde emende Jesus ke nsek ẹdi temple. N̄ko-n̄ko, mme asiak ntantaọfiọn̄ ẹma ẹdi Jerusalem ẹdiyom “enye emi amanade nte edidem mme Jew.” (Matt. 2:1, 2) Ekem, John Andinịm Owo Baptism ama etịn̄ ikọ emi owụtde ke Christ ọmọn̄ ọsọp edi.—2/15, page 26-27.

Nso ke ikpanam mbak Ih nnyịn ididi Ihih? (2 Cor. 1:18)

Imọfiọk ke n̄kpọ emi nnyịn mîkemeke ndinyan̄a ekeme ndikpan nnyịn ndusụk ini ndinam se iketịn̄de. Edi edieke idọhọde owo ke iyanam n̄kpọ, akpana idomo ofụri ukeme inam se ikọdọhọde oro.—3/15, page 32.

Nso ke ikpanam mbak nnyịn idise ndise idan̄?

Nam n̄kpọ ita emi: (1) Okpokụt idiọk ndise, sọsọp sio enyịn fep. (2) Kpeme se ekerede. Kere nti n̄kpọ nyụn̄ bọn̄ akam nọ Abasi. (3) Kpeme se anamde. Kûse fim kûnyụn̄ uka ikpehe Intanet emi ndise idan̄ odude.—4/1, page 10-12.

Nso mfịna ke eyenete emi ọkpọn̄de ubon esie aka un̄wana ke idụt en̄wen ekeme ndisobo, emi enye mîkekereke?

Ke ini mme ete ye eka mîdụn̄ke ye nditọ mmọ nte ubon, n̄kpọ emi ekeme ndifịna nditọ oro, mmọ ẹkeme n̄ko ndidu ndiọi uwem. Edieke ete m̀mê eka emi edide ufọk, ekeme ndidi nditọ oro idiyomke ndikụt enye. Ebe ye n̄wan emi mîdụn̄ke kiet ẹkeme ndisịn efịbe.—4/15, page 19-20.

Ntak emi ẹkebụn̄de ukot mme abiatibet emi ẹkọn̄de ke eto?

Mbon Rome ẹkesikọn̄ ndusụk mme abiatibet ke eto ẹwot. Mme Jew ẹma ẹben̄e ẹte ẹbụn̄ ukot mme abiatibet oro ẹkekọn̄ọde ke eto ẹkpere Jesus. Ndibụn̄ mmọ ukot idiyakke mmọ ẹkot ibifịk, oyonyụn̄ anam mmọ ẹsọp ẹkpa. Ntem, mmọ idikọn̄ọke ke eto ofụri okoneyo. (Deut. 21:22, 23)—5/1, page 11.

Mme mbụme ewe ke ikpesibụp idem nnyịn ke ini idude ke an̄wautom?

Mmanie ke nyom ndikwọrọ ikọ nnọ? M̀mọ̀n̄ ke ndikụt mmọ? Ini ewe isinen̄ede ifọn ndineme nneme ye mmọ? Didie ke n̄kpọtọn̄ọ nneme ye mmọ?—5/15, page 12-15.

Owo ifan̄ ke sika owot?

Ke isua 100 emi ẹbede, enye ama owot owo 100,000,000. Kpukpru isua, enye esiwot n̄kpọ nte owo 6,000,000.—6/1, page 3.