Ndusụk nditọete nnyịn ẹsitịn̄ utọ ikọ emi. Edi mmọ ẹdiọn̄ọ ke Jehovah oyom kpukpru mme Christian ẹdọ ‘owo Ọbọn̄ ikpọn̄-ikpọn̄.’ (1 Cor. 7:39) Ntak ndien emi mmọ ẹsitịn̄de utọ ikọ emi?

Mbon emi ẹsitịn̄de utọ ikọ emi ẹsikere ke iban ẹwak ke esop ẹkan irenowo. Ndien se idude edi oro ke ediwak idụt. Yak ida idụt iba ke uwụtn̄kpọ. Akpa edi Korea. Edieke mme Ntiense emi mîdọhọ ndọ do ẹkpedide owo 100, owo 57 ke otu emi ẹdi iban, 43 ẹdi irenowo. Udiana edi Colombia. Edieke mme Ntiense emi mîdọhọ ndọ do ẹkpedide owo 100, owo 66 ke otu emi ẹdi iban, 34 ẹdi irenowo.

Ke ndusụk idụt, mme ete ye eka emi mîdịghe Mme Ntiense Jehovah ẹsibat n̄kpọ ndọ ẹkịbi tutu irenowo emi mînyeneke ubọk ikemeke ndidọ n̄wan. Nditọete iban emi ẹtode utọ itie emi ẹkeme ndikere ke ‘iyetie isọn̄’ edieke itiede ibet eyenete. Ntem, eyenete an̄wan ekeme ndibụp, “Ndi ke owowụt ifiọk ndibet tutu owo okụt eyenete ke esịt esop ọdọ?” *

Edieke utọ ekikere emi esidụkde fi esịt, iyom ndinam fi ọfiọk ke Jehovah okụt se iwọrọde fi onyụn̄ ọdiọn̄ọ nte etiede fi ke idem!—2 Chron. 6:29, 30.

Kpa ye oro, Jehovah osụk ọdọhọ fi ọdọ owo Ọbọn̄ ikpọn̄-ikpọn̄. Ntak emi enye ọdọhọde ntre? Sia enye ọfiọk se ifọnde ye ikọt esie. Enye ọfiọk se isiwọrọde mbon emi ẹdọde mbon ererimbot, ntre enye iyomke utọ n̄kpọ oro ọwọrọ nnyịn. Enye oyom nnyịn ikop inemesịt. Ediwak mme Jew ke eyo Nehemiah ẹkedọ isen iban emi mîkponoke Jehovah. Nehemiah ama eti mmọ se ikọwọrọde Solomon. Kpa ye emi ‘Abasi akamade’ Solomon, “isen iban [ẹma] ẹsịn enye anam idiọkn̄kpọ.” (Neh. 13:23-26) Ntem, akam edi ke ufọn nnyịn ke Abasi ọdọhọ nnyịn ikûdọ mbon ererimbot. (Ps. 19:7-10; Isa. 48:17, 18) Ata mbon emi ẹmade Abasi ẹma item esie emi, ẹsinyụn̄ ẹnam se enye ọdọhọde mmọ. Mmọ ẹnyịme enye akara mmimọ, sia mmọ ẹfiọk ke enye ikpọn̄ odot ndikara enyọn̄ ye isọn̄.—N̄ke 1:5.

Ikpọfọnke ‘adian idem’ akaha, m̀mê ọdọ owo emi ekemede ndinam fi ọkpọn̄ Abasi. (2 Cor. 6:14) Ediwak nditọete nnyịn ẹnam item Abasi emi ẹnyụn̄ ẹdikụt ke nnennen n̄kpọ ke ikanam oro. Edi, ndusụk nditọete nnyịn inamke item Abasi emi.

Maggy, * eyenete nnyịn kiet ke Australia, etịn̄ se iketịbede inọ enye ke ini enye okoyomde ndidọ owo ererimbot. Enye ọdọhọ ete: “Mma mfiak mbono esop ediwak ini man nnyene ini ndu ye enye. N̄kamaha aba n̄kpọ Abasi nte n̄kesimade.” Ratana ama ọtọn̄ọ ufan ye eyen ufọkn̄wed mmọ emi ọkọtọn̄ọde ndikpep Bible. Edi nte ini akade, ẹma ẹdidiọn̄ọ ke ufan oro ekekpep Bible man ekeme ndinyene Ratana. Ratana ama ọkpọn̄ esop Abasi nte ini akade, ọtọn̄ọ ufọkabasi man ọdọ akparawa oro.

Owo en̄wen emi n̄kpọ mmọn̄eyet emi ọwọrọde edi Ndenguè. Enye oto Cameroon, okonyụn̄ ọdọ ebe ke ini ekedide isua 19. Akparawa oro ọkọdọhọ enye mbemiso mmọ ẹnamde ndọ ke imọ idikpanke enye ndinam n̄kpọ Jehovah. Edi urua iba kpọt ke mmọ ẹma ẹkenam ndọ, enye ama ọdọhọ Ndenguè ke imọ iyomke ndikụt ikpat esie ke Ufọkmbono Obio Ubọn̄. Ndenguè ọdọhọ ete: “Ndobo okpokowot mi. N̄kesitua eyet kpukpru usen. Ini oro ke n̄kedidiọn̄ọ ke owo en̄wen enyene ndibiere se n̄kpanamde. Esịt ke afafịna mi tutu emi.”

Imọfiọk ke idịghe kpukpru ebe emi mîdụkke esop ẹsinam n̄kpọ ntem. Edi kere ise, ekpededi enye ifịnake fi, Jehovah edida fi didie? Editie fi didie ke idem ini ekededi emi etide ke ukûnamke item emi Abasi ọkọnọde fi? Ata akpan n̄kpọ akam edi, Jehovah edida se anamde emi didie?—N̄ke 1:33.

Nditọete nnyịn ke ofụri ererimbot ẹkụt ke ọfọn ‘ndidọ owo Ọbọn̄ ikpọn̄-ikpọn̄.’ Mbon emi ẹbierede ndidọ owo ke esop Abasi kpọt ẹsinam esịt enem Jehovah. Da Michiko emi otode Japan ke uwụtn̄kpọ. Mbon mmọ emi mîdụhe ke esop ẹma ẹdomo ndinam enye ọdọ owo an̄wa. Enye ikenyịmeke. Edi ke ini enye okokụtde nte mme ufan esie ye mbon eken ke esop ẹdọde ebe, ama esifịna enye. Enye ọdọhọ ete: “Mma nsidọhọ idemmi ke sia Jehovah edide ‘Abasi inemesịt,’ ke idịghe owo ọdọdọ ebe okop inemesịt. Mmenịm ke enye esinọ nnyịn se iyomde. Ntem, edieke owo akpamade ndidọ ebe edi ikwe ke esịt esop, yak enye ebet.” (1 Tim. 1:11) Michiko ama edikụt ata eti eyenete ọdọ. Enye esikọm Abasi etieti nte ikebetde.

Nditọete iren n̄ko ẹsibet tutu ẹkụt eti an̄wan ẹdọ. Bill emi otode Australia ama anam se itịn̄de emi. Enye ọdọhọ ke enyene ndusụk iban ererimbot emi imọ ikpakamade ndidọ. Edi enye ama enen̄ede ekpeme idemesie, iyomke ufan ye mmọ. Ntak-a? Sia enye ikoyomke nditọn̄ọ n̄kpọ emi edinamde enye ọkọdọ owo emi mînịmke ke akpanikọ. Enyene nditọete iban ifan̄ emi enye akamade, edi mmọ ikamaha enye. Bill  ama ebet ke isua 30 mbemiso enye okụt owo emi ọfọnde ye enye. Bill ọdọhọ ete: “Ntuaha n̄kpọfiọk ndikebet mbịghi ntre. Esịt esinem mi ndisan̄a ye n̄wan mi n̄kwọrọ ikọ, ntie kiet n̄kpep Bible, nnyụn̄ ndiana kiet ntuak ibuot nnọ Abasi. Mmama mme ufan an̄wan mi, sia kpukpru mmọ ẹdu ke esop Jehovah. Bible ke ida inam ndọ nnyịn ọfọn.”

Nso ke akpanam ke adan̄aemi osụk ebetde Jehovah eyere akam fo? N̄kpọ kiet emi ekemede ndinam edi ndikere ntak emi mûdọhọ ebe. Edieke edide ke ntak emi Bible ọdọhọde idọ ‘owo Ọbọn̄ ikpọn̄-ikpọn̄,’ ọwọrọ amanam etieti ndikop uyo Abasi. Esịt enen̄ede enem Jehovah ke ntak emi ebierede ndikop uyo esie. (1 Sam. 15:22; N̄ke 27:11) Ka iso ‘n̄wan̄a esịt fo nọ’ Abasi. (Ps. 62:8) N̄kpọ ntem ekeme ndinam ọbọn̄ akam emi otode fi esịt ọnọ Abasi. Nte ebede idomo emi mme owo ẹdomode fi man ọkpọn̄ Abasi, ntre ke edinen̄ede ikpere Abasi. Idụhe asan̄autom Abasi ndomokiet emi Abasi mîmaha. Enye ọdiọn̄ọ se inanade fi. Imọfiọk ke enye in̄wọn̄ọke ndinọ owo ndomokiet ebe m̀mê n̄wan. Kpa ye oro, edieke enen̄erede oyom ebe m̀mê n̄wan, Abasi ọdiọn̄ọ se enye ekemede ndinam nnọ fi.—Ps. 145:16; Matt. 6:32.

Ekeme nditie fi nte eketiede David ke ini enye ọkọdọhọde ete: “O Jehovah, wara yere mi. Spirit mi emesịm utịt. Kûdịp mi iso fo.” (Ps. 143:5-7, 10) Edieke etiede fi ntre, nọ Ete fo ke heaven ifet ndiwụt fi ke enye ekere aban̄a fi. N̄kpọ kiet emi edin̄wamde fi edi ndikot Ikọ Abasi nnyụn̄ ntie n̄kere se okotde. Emi ayanam enen̄ede ọfiọk ibet Abasi onyụn̄ okụt nte Abasi ekesin̄wamde ikọt esie. Edieke akpan̄de utọn̄ ọnọ enye, oyokụt ke emi enen̄ede ọfọn ye afo.

Nso en̄wen ikeme ndinam fi okop inemesịt kpa ye oro mûdọhọ ebe kan̄a? Emekeme ndida ini emi n̄kpep ndikere n̄kpọ nte Abasi ekerede, n̄kpep ndinọ owo n̄kpọ, mfọn ido, nnam ọkpọsọn̄ utom, nnam n̄kpọ Abasi, ye nsio nsio n̄kpọ emi ẹdinamde mme owo ẹtịn̄ nti ikọ ẹban̄a fi. Kpukpru emi ayan̄wam fi ke ini ọdọde ebe. (Gen. 24:16-21; Ruth 1:16, 17; 2:6, 7, 11; N̄ke 31:10-27) Bem iso yom Obio Ubọn̄ Abasi, sịn idem kwọrọ ikọ, nyụn̄ nam n̄kpọ Abasi. Mme n̄kpọ emi ẹyekpeme fi; udunyeneke ini unam se mîfọnke. Bill oro iketịn̄de iban̄a do ọdọhọ ke ikada ofụri ini emi ikebetde do isịn idem inam utom usiakusụn̄, ke iketiehe imọ nte ke imebet ebịghi akaha.

Ntem, ọfọn owo ndibet tutu okụt owo ke esịt esop ọdọ. Edieke abakde Jehovah onyụn̄ okopde item esie emi, oyokop inemesịt ke nsinsi. Bible ọdọhọ ete: “Owo emi abakde Jehovah, emi mme ewụhọ esie ẹnen̄erede ẹdat enye esịt, okop inemesịt. N̄kpọuto ye inyene ẹdu ke ufọk esie; edinen ido esie onyụn̄ odu ke nsinsi.” (Ps. 112:1, 3) Mbọk nen̄ede biere ndidọ ‘owo Ọbọn̄ ikpọn̄-ikpọn̄.’