ETO olive idịghe n̄kpọ ndomokiet ke ẹmende ẹdomo ye cedar Lebanon, sia cedar enen̄ede okpon, ọniọn̄ onyụn̄ atara akan eto olive. Edi eto olive ekeme ndidu uwem ke ebiet emi cedar mîkemeke. Ndusụk owo ẹdọhọ ke olive esidu uwem esịm isua tọsịn kiet. Orụn̄ esie esidụk isọn̄ etieti, ndien emi esinam enye ekeme ndifiak nsiaha ke ini ẹkpide enye ẹduọk. Amakam edi orụn̄ eto olive ikpaha, ebebịghi awawara enye ayafiak esehe.

Job ama enịm ke edieke imọ ikpade, ke iyafiak idu uwem. (Job 14:13-15) Enye ama etịn̄ aban̄a eto emi ekemede ndifiak nsehe ndiwụt ke imenịm ke Abasi ekeme ndinam imọ iset, ndien anaedi enye ekemen idem odomo ye eto olive. Job ọkọdọhọ ete: “Idotenyịn akam odu ọnọ eto. Edieke ẹsịbede enye ẹduọk, enye ekeme nditọn̄ọ ntak nsehe.” Ke isua emi ndaeyo ebịghide, akpa edịm isua esinam eto emi ama akasat ọtọn̄ọ ntak esehe enyene “n̄kọk nte obufa eto.”—Job 14:7-9.

Ọdọn̄ Jehovah ndinam ikọt esie emi ẹkpan̄ade ẹfiak ẹdidu uwem kpa nte esidọn̄de ọtọin̄wan̄ ndikụt nte eto olive emi ẹkesịbede ẹduọk afiakde esehe. (Matt. 22:31, 32; John 5:28, 29; Utom 24:15) Kere nte esịt edinemde kpukpru nnyịn ke ini idifehede ikafat mbon nnyịn oro ẹnamde ẹset, inyụn̄ ikụt nte mmọ ẹkopde inem uwem!