1, 2. (a) Nso ke afo enen̄ede oyom ke Paradise? (Se akpa ndise ibuotikọ emi.) (b) Nso idinem nnyịn ikan ke obufa ererimbot?

ATA ediwak nnyịn inịm ke “ata uwem” edi nsinsi uwem emi ididude ke Paradise mi ke isọn̄. Apostle Paul ọkọdọhọ ke “nsinsi uwem” edi “ata uwem.” (Kot 1 Timothy 6:12, 19.) Utọ uwem emi ke nnyịn idori enyịn ndidu, ndien iyokop inemesịt ke nsinsi. Idem ọyọsọn̄ nnyịn kpukpru usenubọk oro idemerede ke idap, iyokop inemesịt, esịt idinyụn̄ itịmekede nnyịn. (Isa. 35:5, 6) Kere nte edinemde nnyịn ndidu ye mbonubon nnyịn ye mme ufan nnyịn, esịnede mbon oro ẹnamde ẹset! (John 5:28, 29; Utom 24:15) Nnyịn iyonyụn̄ inyene ifet ndinen̄ede mfiọk mme n̄kpọ emi Abasi okobotde, ndidiọn̄ọ ndibre ikwọ, ndidiọn̄ọ ndibọp nsio nsio n̄kpọ, ndinyụn̄ ndiọn̄ọ mme n̄kpọ en̄wen oro nnyịn mîdiọn̄ọke idahaemi.

² Kpa ye oro mme n̄kpọ emi ẹdinemde nnyịn, se idinemde nnyịn ikan edidi ndituak ibuot nnọ Jehovah. Eyenen̄ede enem nnyịn ndikụt ẹnamde enyịn̄ Jehovah asana, kpukpru owo ẹnyụn̄ ẹtuakde ibuot ẹnọ enye nte Andikara enyọn̄ ye isọn̄! (Matt. 6:9, 10) Eyenem nnyịn n̄ko ndikụt nte se  Abasi akaduakde aban̄a isọn̄ ye mme owo osude. Nyụn̄ kere nte edimemde nnyịn utom ndisan̄a n̄kpere Jehovah ke ini ẹdinamde nnyịn ifọn ima sụn̄sụn̄!—Ps. 73:28; Jas. 4:8.

3. Ikpeben̄e idem inọ nso?

³ Nnyịn imenịm ke kpukpru n̄kpọ emi ẹyetịbe, koro Jesus ọdọhọ ke “Abasi ekeme ndinam kpukpru n̄kpọ.” (Matt. 19:25, 26) Edi edieke idimade ndika iso ndu uwem ke tọsịn isua ukara Christ ama okokụre, ana inam n̄kpọ idahaemi ndiwụt ke imoyom ndidu uwem ke nsinsi. Ana nte idude uwem owụt ke imenịm ke utịt ererimbot emi ekpere, ana inyụn̄ inam n̄kpọ ndiwụt ke imeben̄e idem ndidu uwem ke obufa ererimbot. Didie ke ikeme ndinam emi ke adan̄aemi isụk idude uwem ke idiọk ererimbot emi?

4. Nọ uwụtn̄kpọ oro ekemede ndin̄wam nnyịn itọn̄ọ idahaemi itịm idem inọ obufa ererimbot.

⁴ Didie ke ikeme nditịm idem nnọ obufa ererimbot? Yak idọhọ ke iyom ndiwọrọ n̄kodụn̄ ke idụt en̄wen. Didie ke ikpetịm idem? Imekeme nditọn̄ọ ndikpep usem idụt oro, n̄kpep nte mme owo do ẹsidude uwem, nnyụn̄ ntọn̄ọ ndidia ndusụk udia mmọ. Imekeme n̄ko ndisịn ukeme ndu uwem nte mbon idụt oro ẹsidude, koro nte idisidude uwem edi oro ima isịm do. Kpasụk ntre, oyom itọn̄ọ idahaemi idu uwem nte ididude ke obufa ererimbot. Ẹyak ineme se idin̄wamde nnyịn inam oro.

5, 6. Didie ke ndikpep nditiene ndausụn̄ esop Abasi mfịn edin̄wam nnyịn ke obufa ererimbot?

⁵ Ke obufa ererimbot, kpukpru owo ẹyenyịme Jehovah akara mmimọ. Iditiehe nte ererimbot Satan oro mme owo ẹkarade idemmọ mi! Ndusụk owo ẹma ndida ke idem nnyụn̄ nnam se ededi oro mmọ ẹmade, edi emi inamke ererimbot ọfọn. Utu ke oro, mme owo ẹkụt ukụt, ẹbọ ufen, inyụn̄ ikopke inemesịt sia mmọ mîyakke Abasi ada mmọ usụn̄. (Jer. 10:23) Enen̄ede ọdọn̄ nnyịn ndidu uwem ke ini oro kpukpru owo ẹdinyịmede Jehovah akara mmimọ!

⁶ Eyenem nnyịn nditiene ndausụn̄ oro Jehovah edinọde nnyịn ke obufa ererimbot ke nte idinamde isọn̄ eye, ikpepde mbon oro ẹsetde n̄kpọ, inyụn̄ inamde se Jehovah okoyomde mme owo ẹnam. Nnyịn idinam n̄kpọ didie edieke ẹdọhọde nnyịn inam utom oro nnyịn mînen̄ekede ima? Ndi iyetiene ndausụn̄ oro ẹdinọde nnyịn inyụn̄ isịn ofụri ukeme nnyịn inam utom oro ẹnọde nnyịn ye inemesịt? Ediwak nnyịn imekeme ndidọhọ ke iyanam! Edi, ndi imesitiene ndausụn̄ oro esop Abasi ọnọde nnyịn mfịn? Edieke edide ntre, ọwọrọ nnyịn ke iben̄e idem ndidu uwem nsinsi ke obufa ererimbot oro Jehovah edikarade nnyịn.

7, 8. (a) Ntak emi nnyịn ikpeberede ye esop Abasi idahaemi? (b) Didie ke ẹkpụhọ utom ndusụk nditọete? (c) Uwem editie didie ke obufa ererimbot?

⁷ Nditiene ndausụn̄ esop Abasi mfịn owụt ke nnyịn ke itịm idem inọ obufa ererimbot, edi oyom nnyịn ikpep n̄ko ndiyụhọ ye se inyenede inyụn̄ ibere ye mbon oro ẹdade usụn̄ ke esop. Edieke iberede ye mbon oro ẹdade usụn̄ ke esop Abasi mfịn, inyụn̄ ikopde inemesịt ke ini ẹnọde nnyịn obufa utom inam, nte idinyụn̄ inamde n̄kpọ edi oro ke obufa ererimbot. (Kot Mme Hebrew 13:17.) Ke Isọn̄ Un̄wọn̄ọ, ẹkesisịn afia ẹdeme isọn̄ ẹnọ nditọ Israel. (Num. 26:52-56; Josh. 14:1, 2) Nnyịn ifiọkke ebiet oro ẹdidọhọde nnyịn idụn̄ ke obufa ererimbot. Edi edieke idiberede ye ndutịm oro ẹdinamde,  nnyịn iyoyụhọ ye se ẹdinọde nnyịn inyụn̄ ikop inemesịt ndinam n̄kpọ Jehovah ke ebiet ekededi oro ididụn̄de ini oro.

⁸ Edidi akwa ifet ndidu uwem ke ini Obio Ubọn̄ Abasi edikarade isọn̄. Ntre, oyom isịn ofụri ukeme itiene ndausụn̄ esop Jehovah idahaemi inyụn̄ inam utom ekededi oro ẹdọhọde nnyịn inam. Edi, ẹkeme ndikpụhọ utom oro ẹnọde nnyịn nte ini akade. Ke uwụtn̄kpọ, ẹma ẹdọhọ ndusụk nditọete ke Bethel United States ẹka ẹkekwọrọ ikọ nte mme akpan asiakusụn̄, ndien mmọ ẹnen̄ede ẹkop inemesịt ẹnyụn̄ ẹbọ edidiọn̄ ke obufa utom oro mmọ ẹnamde idahaemi. Ẹma ẹnam ndusụk mme esenyịn circuit ẹkabade ẹdi mme akpan asiakusụn̄ ke ntak emi mmọ ẹsọn̄de m̀mê ke ntak n̄kpọ en̄wen. Edieke ikopde inemesịt ke utom oro ẹnọde nnyịn, ibọn̄ akam iben̄e Abasi an̄wam nnyịn, inyụn̄ isịn ofụri ukeme nnyịn inam utom oro, iyokop inemesịt, Abasi oyonyụn̄ ọdiọn̄ nnyịn ke mme akpatre usen emi. (Kot Mme N̄ke 10:22.) Nso kaban̄a obufa ererimbot? Imekeme ndinyene itie emi ikpamade ndidụn̄ ke obufa ererimbot, edi ẹkeme ndidọhọ nnyịn ikodụn̄ ke ebiet en̄wen. Inamke n̄kpọ m̀mê ididụn̄ ke m̀mọ̀n̄, m̀mê nso ke ẹdidọhọ nnyịn inam, se idiọn̄ọde edi ke esịt edikam inenem nnyịn ke imọbọhọ idụk obufa ererimbot.—Neh. 8:10.

9, 10. (a) Ntak emi ẹdiyomde inyene ime ke obufa ererimbot? (b) Didie ke ikeme ndiwụt ke imenyene ime?

⁹ Ke obufa ererimbot, n̄kpọ ẹyetịbe oro ediyomde inyene ime. Ke uwụtn̄kpọ, imekeme ndikop nte mme owo ẹsiode n̄kpọ idara koro ẹnamde mbonubon mmọ ye mme ufan mmọ ẹset, edi owo inamke mbon nnyịn ẹset kan̄a. Edieke oro etịbede, ndi iyadara ye mbon oro mbon mmọ ẹsetde inyụn̄ ika iso inyene ime ibet tutu ẹnam mbon nnyịn ẹset? (Rome 12:15) Edieke ikpepde ndinyene ime idahaemi ntie mbet mme prọfesi Jehovah ẹsu, emi ayan̄wam nnyịn inyene ime ke obufa ererimbot.—Eccl. 7:8.

¹⁰ Nnyịn imekeme n̄ko nditịm idem nnọ obufa ererimbot ke ndinyene ime ke ini ẹnamde ukpụhọde ke ndusụk n̄kpọ oro isikpepde. Ndi nnyịn imesisịn idem ikpep mme n̄kpọ emi tutu mmọ ẹn̄wan̄a nnyịn? Edieke edide imesinam emi, idisọn̄ke nnyịn ndinyene ime ke obufa ererimbot ke ini Jehovah editịn̄de se enye oyomde nnyịn inam.—N̄ke 4:18; John 16:12.

11. Jehovah ọdọhọ nnyịn inam n̄kpọ didie ye kiet eken idahaemi, ndien didie ke emi edin̄wam nnyịn ke obufa ererimbot?

¹¹ N̄kpọ en̄wen oro ikemede ndinam man iwụt ke imeben̄e idem inọ obufa ererimbot edi ndifen nnọ mme owo ke ini mmọ ẹduede nnyịn. Ke ini Christ edikarade ke tọsịn isua, ayada ini mbemiso kpukpru owo ẹfọnde ẹma. (Utom 24:15) Ndi iyekeme nditie ke emem ye kpukpru owo ini oro? Edieke itọn̄ọde idahaemi ikpep ndifen nnọ owo ke ofụri esịt nnyụn̄ nnam emem, idisọn̄ke nnyịn ndinam ntre ini oro.—Kot Colossae 3:12-14.

12. Didie ke ikeme ndidu uwem idahaemi nte ididude ke obufa ererimbot?

¹² Ke obufa ererimbot, ekeme ndidi nnyịn idinyeneke kpukpru se iyomde ke ini oro iyomde. Utu ke oro, oyoyom idara inyụn̄ iyụhọ ye se ededi oro idinyenede inyụn̄ isụk ibuot inọ Jehovah nte andikara nnyịn. Ke ini oro, iyoyom mme edu oro Jehovah ekpepde nnyịn inyene idahaemi. Edieke inyenede mme edu  oro idahaemi, emi oyowụt ke imeben̄e idem ndidu uwem ke obufa ererimbot, ke imonyụn̄ inịm ke isọn̄ ayakabade edi Paradise. (Heb. 2:5; 11:1) Ndinam emi owụt ke imenen̄ede iyom obufa ererimbot oro Abasi ọn̄wọn̄ọde edi, ke imonyụn̄ iben̄e idem ndidu uwem ke nsinsi.

13. Nso ididi ebeiso n̄kpọ ke obufa ererimbot?

¹³ Kere ban̄a n̄kpọ en̄wen oro ikemede ndinam man iwụt ke imeben̄e idem inọ obufa ererimbot. Kpa ye oro Abasi edinamde udia ye mme n̄kpọ eken ẹdu barasuene ke obufa ererimbot, se idinemde nnyịn ikan edidi ndinen̄ede ndiọn̄ọ Abasi. (Matt. 5:3) Ndinam n̄kpọ Abasi edidi ebeiso n̄kpọ, ndien emi eyenen̄ede adat nnyịn esịt. (Ps. 37:4) Edieke inamde n̄kpọ Abasi edi ebeiso n̄kpọ ke uwem nnyịn idahaemi, emi owụt ke nnyịn imeben̄e idem ndidu ata uwem ke ini iso.—Kot Matthew 6:19-21.

14. Nso idin̄wam mme uyen ẹben̄e idem ndidu uwem nsinsi ke ini iso?

¹⁴ Nso ke ikpanam man inen̄ede ikop inemesịt ndinam n̄kpọ Abasi? N̄kpọ kiet edi ndibiere se idinamde inọ Abasi. Edieke edide uyen onyụn̄ ekerede se akpanamde ọnọ Abasi, mbọk kot se esop Abasi ewetde aban̄a nsio nsio utom uyọhọ ini nyụn̄ mek kiet oro edinamde. * Emekeme ndinyene nneme ye ndusụk nditọete emi ẹma ẹkenam utom uyọhọ ini ke ediwak isua. Edieke adade utom Abasi nte akpan ubọkutom fo, emi owụt ke afo emeben̄e idem ndika iso nnam n̄kpọ Abasi ke obufa ererimbot, ndien ayada ifiọk ikọ Abasi oro enyenede idahaemi an̄wam mme owo do.

15. Nso ye nso ke nnyịn mme ọkwọrọ Obio Ubọn̄ ikpebiere ndinam?

¹⁵ Nso ke nnyịn mme ọkwọrọ Obio Ubọn̄ ikpebiere ndinam man an̄wam nnyịn isịn idem inam n̄kpọ Abasi? Imekeme ndisịn idem nnam ikpehe utom ukwọrọikọ oro oyomde inam ọfọn. Mîdịghe, imekeme ndibiere ndinen̄ede mfiọk se ikpepde ke Bible inyụn̄ inam mmọ. Imonyụn̄ ikeme ndisịn idem n̄kpep ndikot n̄wed nnyụn̄ nnọ utịn̄ikọ ọfọn m̀mê ndinọ nti ibọrọ ke mbono esop. Afo emekeme ndinyụn̄ n̄kere mban̄a n̄kpọ en̄wen oro afo ekpebierede ndinam. Akpan n̄kpọ edi: Ndibiere se edinamde ọnọ Abasi ayan̄wam fi esịn idem  anam n̄kpọ esie, ndien emi ayan̄wam fi etịm idem ọnọ obufa ererimbot.

16. Ntak emi ndinam n̄kpọ Jehovah edide mfọnn̄kan n̄kpọ?

¹⁶ Ndi nnyịn ndidu uwem idahaemi nte ididude ke obufa ererimbot ọwọrọ ke nnyịn ikopke inem uwem oro idude idahaemi? Baba! Idụhe se isinamde uwem enem owo nte ndinam n̄kpọ Jehovah. Nnyịn inamke n̄kpọ Jehovah ke ntak oro ẹnyịkde-nyịk nnyịn m̀mê man ibọhọ akwa ukụt. Jehovah okobot nnyịn man inam n̄kpọ esie inyụn̄ ikop inemesịt. Edieke iyakde Jehovah ada nnyịn usụn̄ onyụn̄ ama nnyịn, idụhe uwem emi ọfọnde akan oro. (Kot Psalm 63:1-3.) Nnyịn inyeneke ndibet tutu idụk obufa ererimbot mbemiso Jehovah ọdiọn̄de nnyịn ke ntak oro inamde n̄kpọ esie ke ofụri esịt. Enye ọtọtọn̄ọ ndidiọn̄ nnyịn idahaemi! Ndusụk nnyịn imokụt edidiọn̄ Jehovah emi ke ediwak isua idahaemi, imonyụn̄ ikụt ke idụhe se ifọnde inyụn̄ inọde owo inemesịt nte ndinam n̄kpọ Jehovah.—Ps. 1:1-3; Isa. 58:13, 14.

17. Ke Paradise, ndi ọyọdiọk ndinam mme n̄kpọ oro ẹsinọde nnyịn inemesịt?

¹⁷ Ke obufa ererimbot, idisụk inyenyene ini ndinam mme n̄kpọ oro imade. Jehovah akakam obot nnyịn man ikop inem ndinam mme n̄kpọ oro imade. (Eccl. 2:24) Jehovah ndibot nnyịn ntem owụt ke enye atat ubọk ọnọ nnyịn kpukpru se iyomde. (Ps. 145:16) Idiọkke ndinam mme n̄kpọ oro ẹsinọde nnyịn inemesịt, edi idinen̄ede ikop inem n̄kpọ emi ke ini inịmde n̄kpọ Jehovah akpa ke uwem nnyịn. Nte edinyụn̄ itiede edi oro ke Paradise. Ke ntre, enen̄ede oyom ibem iso iyom Obio Ubọn̄ Abasi idahaemi inyụn̄ itiene ibọ mme edidiọn̄ oro Jehovah ọnọde ikọt esie.—Matt. 6:33.

18. Didie ke ikpowụt ke nnyịn ke itịm idem ndidu nsinsi uwem ke Paradise?

¹⁸ Ke Paradise, iyokop inemesịt ke usụn̄ oro akananam nnyịn mîkopke. Edieke isịnde idem idu uwem idahaemi nte ididude ke obufa ererimbot, oro oyowụt ke imenen̄ede iyom ata uwem. Ẹyak inyene nti edu idahaemi inyụn̄ ikop inemesịt ndisịn idem n̄kwọrọ etop Obio Ubọn̄ oro ẹdọn̄de nnyịn ikwọrọ. Nnyịn ikpakam ikop inemesịt ndinam n̄kpọ Jehovah edi akpa n̄kpọ ke uwem nnyịn. Imenịm ke Jehovah oyosu kpukpru se enye ọkọn̄wọn̄ọde, ntre ẹyak idu uwem idahaemi nte imododụk obufa ererimbot!