N̄KAMANA ke 1955, ke Queensland ke Australia. Ikebịghike eka mi, Estelle, ama ọtọn̄ọ ndikpep Bible ye Mme Ntiense Jehovah. Enye ama ana baptism ke 1956, ete mi Ron ama onyụn̄ ana baptism ke 1969. Ami n̄kana okịm ke 1968, ke Queensland.

Mma nsima usem nnyụn̄ mma ndikot n̄wed toto ke ini n̄kedide ekpri. Ke ini n̄kesisan̄ade ye ete ye eka mi n̄ka isan̄, anaedi idem ama esikpa mmọ ndikụt ntiede ke edem moto n̄kot n̄wed utu ke ndise ndiye n̄kpọ ke usụn̄. Mma ndiọn̄ọ n̄kpọ etieti ke ufọkn̄wed sia n̄kesimade ndikot n̄wed. Ke ntak oro n̄kenen̄erede ndiọn̄ọ n̄wed, mma mbọ ediwak enọ ke ini n̄kodude ke ufọkn̄wed sekọndri ke Glenorchy ke obio Tasmania ke Australia.

Edi, ini ama edikem ndinam ata akpan ubiere. Akana mbiere m̀mê nyenyịme ndika ufọkn̄wed ntaifiọk ke mfọn. Kpa ye oro n̄kamade n̄wed, esịt enem mi ke eka mi ama ekpep mi ndinen̄ede mma Jehovah. (1 Cor. 3:18, 19) Ntre mmọ ẹma ẹnyịme ntọn̄ọ utom usiakusụn̄ ke ini n̄kokụrede ufọkn̄wed sekọndri. Mma ntọn̄ọ utom usiakusụn̄ ke January 1971, ke ini n̄kedide isua 15.

Mma nsiak usụn̄ ke isua itiaita ke Tasmania. Ini oro ke n̄kọdọ Jenny Alcock, ediye n̄kaiferi kiet  emi otode Tasmania. Nnyịn ima ikwọrọ ikọ nte mme akpan asiakusụn̄ ke isua inan̄ ke obio Smithton ye Queenstown.

Ke 1978, nnyịn ima ika Port Moresby ke Papua New Guinea ikodụk akamba mbono ofụri ererimbot. Ke nteti utịn̄ikọ oro isụn̄utom kiet ọkọnọde ke usem Hiri Motu. Kpa ye oro mmen̄kọfiọkke n̄kpọ ndomokiet oro enye eketịn̄de, utịn̄ikọ esie ama anam ọdọn̄ mi ndikabade ndi isụn̄utom, ndikpep mme usem en̄wen, nnyụn̄ nnọ utịn̄ikọ ke mme usem oro. Ke akpatre, mma ndikụt ke ami ndima ndikpep mme usem en̄wen ayan̄wam mi n̄n̄wam ediwak owo ẹdinam n̄kpọ Jehovah.

Ke ima ikọnyọn̄ akamba mbono oro idi Australia, idem ama akpa nnyịn ke ini ẹkedọhọde nnyịn ikedi isụn̄utom ke isuo Funafuti ke Tuvalu, emi ẹkesikotde Ellice Islands. Nnyịn ima ikesịm isuo Funafuti ke January 1979. Asuanetop ita kpọt ẹkedu ke ofụri Tuvalu.

Ikememke utom ndikpep usem Tuvalu. “Obufa Testament” kpọt okodu ke usem oro. N̄wed ukabadeikọ m̀mê n̄wed ukpepikọ ndomokiet ikodụhe. Ntre ima ibiere ndisikpep ikọ 10 esịm 20 kpukpru usen. Edi ikebịghike, ima idikụt ke nnyịn ikọfiọkke se ediwak ikọ oro ikekpepde ẹkenen̄erede ẹwọrọ. Ke ini ikoyomde ndidọhọ mme owo ke ifọnke ndibre idiọn̄, ikakam idọhọ mmọ ke n̄kpọ udomon̄kpọ ye esan̄ ifọnke! Edi akana ikpep usem emi ọfọn man ikeme ndikpep n̄kpọ ye ediwak owo oro ẹkemade Bible. Ntre ima isịn idem ikpep. Ke ediwak isua ama ekebe, kiet ke otu mbon oro ikekpepde Bible ke nsonso oro ama ọdọhọ ete: “Esịt enem nnyịn etieti ke mbufo ẹmefiọk usem nnyịn ndien. Ke nsonso oro, se mbufo ẹkesitịn̄de ikesin̄wan̄ake nnyịn.”

Edi enyene n̄kpọ emi akan̄wamde nnyịn ikeme ndisọp n̄kpep usem emi. Nnyịn ikodụn̄ ye ubon Ntiense kiet ke obio-in̄wan̄ sia ufọk mîkodụhe ke akwa obio se ibọde idụn̄. Emi ama an̄wam nnyịn isọp ikpep usem emi inyụn̄ ifiọk nte mme owo mi ẹsinamde n̄kpọ. Sia nnyịn mîketịn̄ke Ikọmbakara ke ediwak isua, usem Tuvalu ama akabade edi akpan usem nnyịn.

Ikebịghike, ediwak owo ẹma ẹtọn̄ọ ndima akpanikọ Bible. Edi, idida n̄wed ke m̀mọ̀n̄ ikpep mmọ n̄kpọ? Nnyịn inyeneke n̄wed ke usem mmọ. Mmọ ẹdida n̄wed ke m̀mọ̀n̄ ikpep Ikọ Abasi? Ke ini mmọ ẹditọn̄ọde ndidụk mbono esop, ewe ikwọ ke mmọ ẹdikwọ, ewe n̄wed ke ẹdikpep, mmọ ẹdinyụn̄ ẹnam didie ẹtịm idem ẹnọ mbono esop?  Mmọ ẹdinam didie ẹna baptism? Ama oyom mmọ ẹnyene n̄wed Ikọ Abasi ke usem mmọ! (1 Cor. 14:9) Nnyịn ima isikere, ‘Ndi ini oyodu emi idinyenede n̄wed ke usem Tuvalu emi mbon oro ẹsemde mîyọhọke owo 15,000?’ Jehovah ama ọbọrọ mme mbụme emi, anamde nnyịn ifiọk n̄kpọ iba: (1) Enye oyom ẹkwọrọ ikọ esie “ke otu mme isuo emi ẹdude ke anyan ebiet,” ye (2) enye oyom mbon oro ererimbot ẹsede ke usụhọde ẹnam enyịn̄ Jehovah edi ebiet ubọhọ mmọ.—Jer. 31:10; Zeph. 3:12.

Ke 1980, n̄kọk itieutom ẹma ẹdọhọ nnyịn ikabade n̄wed nnyịn isịn ke usem Tuvalu; ndien nnyịn ikekere ke nnyịn idikemeke ndinam utom emi. (1 Cor. 1:28, 29) Nnyịn ima ibọ ukara ekpri masịn umịn̄n̄wed idep ida imịn̄ mme n̄wed oro ikesidade inịm mme mbono esop. Nnyịn ima ikam ikabade n̄wed oro, Akpanikö oro Adade osim Nsinsi Uwem isịn ke usem Tuvalu inyụn̄ ida masịn emi imịn̄ enye. Ke nteti nte mmọn̄n̄wed oro ikesidade imịn̄ n̄wed ekesisọn̄de ufịk ye nte itie umịn̄n̄wed oro ekesinen̄erede ofiop ke ini ikesimịn̄de n̄wed. Ikan̄ ilektrik ikodụhe ini oro.

Ikememke utom ndikabade n̄wed nsịn ke usem Tuvalu, sia nnyịn ikenyeneke mme n̄wed ukabadeikọ. Edi ndusụk ini nnyịn ima isinyene un̄wam oro nnyịn mîkodorike enyịn. Usenubọk kiet, mma ndue n̄waha ufọk akanieren kiet emi ekedide titia. Enye ikamaha ukwọrọikọ nnyịn, ntre enye ama ọsọsọp ọdọhọ nnyịn ikûsudi ufọk imọ. Ekem enye ama ọdọhọ ete: “Enyene se nyomde nditịn̄ nnọ fi. Mbufo ikabakede n̄wed mbufo nte isitịn̄de ikọ ke usem Tuvalu.” Mma mbụp mbon en̄wen nte mmọ ẹsede se isikabarede, mmọ ẹnyụn̄ ẹtịn̄ ukem se ete oro eketịn̄de. Ntre nnyịn ima inam ukpụhọde ke nte ikakabarede n̄wed nnyịn. Idem ama akpa mi ndikụt nte Jehovah akadade owo oro mîmaha ukwọrọikọ nnyịn, edi emi esikotde n̄wed nnyịn, an̄wam nnyịn!

N̄wedikot Editi ekedi akpa n̄wed emi ikemịn̄de ke usem Tuvalu ideme inọ mme owo. Ekem ima  imịn̄ Mbụk Obio Ubọn̄ Ọyọhọ 30, ke ukem ini oro ẹkemịn̄de eke Ikọmbakara. Ama enem nnyịn etieti ndimịn̄ n̄wed ikọ Abasi nnọ mbon Tuvalu ke usem emana mmọ. Nte ini akakade, ima itọn̄ọ ndimịn̄ ndusụk n̄wed ye ndiye n̄kpri n̄wed ke usem Tuvalu. Ke 1983, n̄kọk itieutom Australia ẹma ẹtọn̄ọ ndimịn̄ Enyọn̄-Ukpeme emi enyenede page 24 ini kiet ke ọfiọn̄ ita nnọ nnyịn ke usem Tuvalu. Ntre ikesikpep n̄kpọ nte ikpehe itiaba kpukpru urua. Mbon Tuvalu ẹkenam n̄kpọ didie ẹban̄a emi? Sia mbon Tuvalu ẹsimade ndikot n̄wed, ediwak owo ẹma ẹma n̄wed nnyịn. Radio ukara ama esitọt ini emi idinyenede obufa n̄wed nnyịn ke ini mbụk n̄kpọntịbe, ndusụk usen ntọt oro ekesidi akpan mbụk. *

Ke ini ikọtọn̄ọde ndikabade n̄wed nsịn ke usem Tuvalu, ikesiwewet se ikabarede. Ekem itaip se ikakabarede inọ ẹsọk n̄kọk itieutom Australia. Nditọete iban iba ke Australia ẹma ẹsitaip se ikọnọde ẹsọk mmọ ẹdọn̄ ke kọmputa, kpa ye oro mmọ mîkọdiọn̄ọke usem Tuvalu. Nditọete iban emi ndiketie nsio nsio ntaip ukem n̄kpọ ndien ekem ẹmen se mmọ ẹketaipde ẹdomo, ama esinam ndudue okûnen̄ede awak. Ẹma ẹsinọ se mmọ ẹketaipde ẹsọk nnyịn ke ubomofụm man ise m̀mê ndudue odu, ndien edieke ndudue mîdụhe, ima isifiak inọ ẹsọk mmọ man ẹkemịn̄.

Nte ẹkabarede n̄wed idahaemi okpụhọde. Mme akabade n̄wed ẹdida kọmputa ẹkabade n̄wed idahaemi. Mmọ ẹnam kpukpru n̄kpọ idahaemi ke idemmọ mbemiso ẹnọde ke Intanet ẹsọk mme n̄kọk itieutom oro ẹdimịn̄de se mmọ ẹkabarede. Nnyịn imenke aba se ikabarede ifehe ika post ọfis ikọnọ man ẹda ẹsọk mbon oro ẹditaipde.

Ẹma ẹnọ ami ye Jenny nsio nsio utom inam ke mme idụt oro ẹdude ke Isuo Pacific. Ke 1985, ẹma ẹdọhọ nnyịn ikpọn̄ Tuvalu ika n̄kọk itieutom Samoa. Ima ikpep nditọete do nte ẹkpekabarede n̄wed ẹsịn ke usem Samoa, Tonga, ye Tokelau. * Kpa ye oro, ikosụk ikakabade n̄wed isịn ke usem Tuvalu. Ekem ke 1996, ẹma ẹdọhọ nnyịn ika n̄kọk itieutom Fiji ikekpep nditọete nte ẹkpekabarede n̄wed ẹsịn ke usem Fiji, Kiribati, Nauru, Rotuma; edi ikosụk ikakabade n̄wed isịn ke usem Tuvalu.

Idem esikpa mi ndikụt ifịk oro nditọete oro ẹkabarede n̄wed nnyịn ẹsinyenede kpa ye oro utom emi ọsọn̄de onyụn̄ ekemede ndinam owo akpa mba. Edi mme akabade n̄wed nnyịn ẹyom ẹkwọrọ eti mbụk ẹnọ “kpukpru mme idụt ye esien ye usem ye obio” kpa nte Jehovah oyomde. (Edi. 14:6) Ke uwụtn̄kpọ, ke ini ẹkeyomde ndikabade Enyọn̄-Ukpeme nsịn ke usem Tonga, mma nsobo ye kpukpru mbiowo ke Tonga nnyụn̄ mbụp mmọ m̀mê odu owo emi ẹkemede ndikpep ndikabade n̄wed. Ebiowo kiet emi ekesidiọn̄de ubomisọn̄, ẹkenyụn̄ ẹkpede enye ediwak okụk, ama enyịme ndisịn n̄wed n̄kpọn̄ utom edem usen nnyụn̄ ntọn̄ọ utom ukabade n̄wed inikiet inikiet. Se enye akanamde  emi ama enen̄ede otụk mi, koro enye ekesise aban̄a ubon esie ikonyụn̄ ifiọkke nte enye edisan̄ade inyene okụk ise iban̄a ubon esie. Edi Jehovah ama ese aban̄a enye ye ubon esie, enye ama onyụn̄ aka iso akabade n̄wed ke ediwak isua.

Utọ mme akabade n̄wed emi ẹkere n̄kpọ nte Otu Emi Ẹsede Ẹban̄a Utom Mme Ntiense Jehovah, emi ẹyomde ẹkabade n̄wed ikọ Abasi ẹsịn ke mme usem oro mme andisem mîwakke. Ke uwụtn̄kpọ, ama enyene ini emi ẹkebụpde Otu Emi Ẹsede Ẹban̄a Utom Mme Ntiense Jehovah m̀mê ufọn odu ndika iso n̄kabade mme n̄wed nnyịn nsịn ke usem Tuvalu. Esịt ama enen̄ede enem mi ke ini n̄kokotde se mmọ ẹkebọrọde, ẹte: “Nnyịn ikwe ntak ndomokiet emi akpanamde mbufo ẹtre ndikabade n̄wed nsịn ke usem Tuvalu. Okposụkedi emi mbon oro ẹkotde n̄wed nnyịn ke usem Tuvalu mîwakke nte mbon emi ẹkotde n̄wed nnyịn ke mme usem en̄wen, oyom ẹka iso ẹnam mmọ ẹkot eti mbụk ke usem emana mmọ.”

Ke 2003, ẹma ẹdọhọ ami ye Jenny ikpọn̄ n̄kọk itieutom Fiji ika Itieutom Emi Esede Aban̄a Ukabade N̄wed ke Patterson ke New York. N̄kakam ntetie mbet utọ utom emi! Itieutom nnyịn emi ẹkesin̄wam ẹtọn̄ọ ndikabade n̄wed nnyịn ẹsịn ke mbufa usem, ẹnyụn̄ ẹn̄wam mme usem oro ẹma ẹketọtọn̄ọ ndikabade n̄wed ẹkabade ediwak en̄wen. Ima ida se ikande isua iba ika nsio nsio idụt ikọnọ mme akabade n̄wed ukpep.

Idahaemi yak mfiak ntịn̄ mban̄a nneme oro ikakade ndinyene ye mbon Kọmiti Uwetn̄wed. Ke 2000, Otu Emi Ẹsede Ẹban̄a Utom Mme Ntiense Jehovah ẹma ẹkụt ke oyom ẹfiak ẹnọ mme akabade n̄wed ke ofụri ererimbot ukpep. Owo ikekpepke ediwak mme akabade n̄wed nte ẹkpekabarede n̄wed. Ke ima ikenyene nneme ye mbon Kọmiti Uwetn̄wed ikụre, Otu Emi Ẹsede Ẹban̄a Utom Mme Ntiense Jehovah ẹma ẹnyịme ẹnọ kpukpru mme akabade n̄wed ke ofụri ererimbot ukpep. Emi ama esịne ndikpep mmọ Ikọmbakara, nte ẹkpekabarede n̄wed, ye nte ẹkpenamde utom ke otu.

Ndi kpukpru ukpep oro ẹnọde mme akabade n̄wed mi enyene ufọn? Ih. N̄wed oro nnyịn ikabarede idahaemi enen̄ede an̄wan̄a owo onyụn̄ enem. Imemịn̄ n̄wed nnyịn idahaemi ke ediwak usem. Ke ini ikọtọn̄ọde utom isụn̄utom ke 1979, ikemịn̄ Enyọn̄-Ukpeme ke usem 82 kpọt. Owo ikesimịn̄ke ediwak usem ukem ini ye Ikọmbakara. Ediwak ọfiọn̄ ama esibe mbemiso ẹmịn̄de. Edi idahaemi, ẹmịn̄ Enyọn̄-Ukpeme ke se ibede usem 240, ndien ẹsimịn̄ ediwak usem ukem ini ye Ikọmbakara. Idahaemi nnyịn imenyene mme n̄wed ye mme vidio ke se iwakde ibe usem 700. Ediwak isua ko, nnyịn ikpekekereke ke utọ n̄kpọ emi eyetịbe.

Ke 2004, Otu Emi Ẹsede Ẹban̄a Utom Mme Ntiense Jehovah ẹma ẹnam akamba ubiere en̄wen—oro edi, ndinam ediwak usem ẹkabade Bible. Ke ọfiọn̄ ifan̄ ama ekebe, ẹma ẹnam ndutịm man  ẹtọn̄ọ ndikabade Bible, ndien emi anam ẹnyene Edikabade Eke Obufa Ererimbot ke ediwak usem. Ke 2014, ẹma ẹmịn̄ Edikabade Eke Obufa Ererimbot ofụri ofụri m̀mê ubak ubak ke usem 128—esịnede ediwak usem emi ẹsemde ke usụk usụk Isuo Pacific.

Kiet ke otu n̄kpọ oro enemde mi akan edi akamba mbono oro n̄kodụkde ke Tuvalu ke 2011. Edịm ikedepke ke idụt oro ke ediwak ọfiọn̄, ndien eketie nte ke owo idikemeke ndinịm mbono oro. Edi ata akamba edịm ama edep mbubreyo oro ikedide idisịm, ima inyụn̄ inịm mbono oro! Mma nnen̄ede n̄kop inemesịt ndisio N̄wed Abasi Christian Usem Greek—Edikabade eke Obufa Ererimbot ke usem Tuvalu. Mbon oro ẹsemde usem Tuvalu ẹkpri ẹkan ke otu mme usem oro ẹnyenede Bible emi. Akamba edịm ama afiak edep ke mbono oro ama akasuana. Kpukpru owo ẹma ẹbọ edidiọn̄ Jehovah, oro edi, obufa Bible ye edịm oro ekedepde.

Jenny, edima an̄wan mi oro n̄kọdọde ke isua 35 iketieneke idụk edinem mbono emi. Enye ama akpa ke 2009, ke ama ọkọdọn̄ọ kansa ke isua 10. Enye ama eset edi, eyenen̄ede enem enye ndikop ke ẹma ẹsio Bible ke usem Tuvalu.

Jehovah ọnọ mi ediye an̄wan efen, Loraini Sikivou. Loraini ye Jenny ẹkesinam utom kiet ke Bethel Fiji. Loraini ekesikabade n̄wed esịn ke usem Fiji. Mmafiak nnyene edima an̄wan emi adianade ye ami anam n̄kpọ Jehovah onyụn̄ amade usem.

Ke ediwak isua oro ẹbede, mmokụt nte edima Ete nnyịn eke heaven, Jehovah, akade iso ndinam ẹkabade n̄wed ikọ Abasi ẹsịn ke ediwak usem, edide usem emi ediwak owo ẹsemde m̀mê mbon oro esisịt ibat owo ẹsemde. Mmesikụt nte esịt esinemde mme owo akpa ini emi mmọ ẹbọde n̄wed ikọ Abasi ke usem mmọ m̀mê ẹkwọde ikwọ ẹtoro Jehovah ke usem mmọ. Emi owụt ke Jehovah enen̄ede ama nnyịn. (Utom 2:8, 11) Ke nteti se Saulo Teasi, eyenete nnyịn kiet ke Tuvalu emi ekededi akanieren, ọkọdọhọde. Enye ọkọdọhọ ntem akpa ini emi enye ọkọkwọde ikwọ Obio Ubọn̄ ke usem emana esie, ete: “Ẹdọhọ Otu Emi Ẹsede Ẹban̄a Utom Mme Ntiense Jehovah ẹte ke ikwọ emi enem ke usem Tuvalu akan ke Ikọmbakara.”

Ke September 2005, idem ama akpa mi ke ini ẹkemekde mi ndi kiet ke otu mbon emi Ẹsede Ẹban̄a Utom Mme Ntiense Jehovah. Okposụkedi emi mmen̄kabakede n̄wed aba, mmọkọm Jehovah nte enye ayakde mi n̄ka iso nnam utom ke itie emi n̄n̄wamde mme akabade n̄wed ke ofụri ererimbot. Esinem mi ndifiọk ke Jehovah ekere aban̄a kpukpru ikọt esie, esịnede ikọt esie emi ẹdụn̄de ke mme isuo oro ẹdude ke Inyan̄ibom Pacific! Emi ekem ye se andiwet Psalm ọkọdọhọde ete, “Jehovah amakabade edi edidem! Yak isọn̄ adara. Yak ediwak isuo ẹdat esịt.”—Ps. 97:1.