Mbụme Oro Mme Andikot Ẹbụpde

Ndi Obio Ubọn̄ Abasi Odu Fi ke Esịt?

Ediwak owo mfịn ẹnịm ke Obio Ubọn̄ Abasi odu owo ke esịt. Ke uwụtn̄kpọ, The Catholic Encyclopedia ọdọhọ ete: “Obio ubọn̄ Abasi edi . . . ukara Abasi ke esịt nnyịn.” Mme ọkwọrọ ederi ẹsiwak ndikwọrọ emi. Ndi Bible enen̄ede ekpep ke Obio Ubọn̄ Abasi odu owo ke esịt?

Ndusụk owo ẹkere ke Jesus ke idemesie ọkọtọn̄ọ ukpepn̄kpọ emi. Jesus ama ọdọhọ ete: “Sese! Obio ubọn̄ Abasi odu ke ufọt mbufo.” (Luke 17:21) Ndusụk edikabade Bible ẹkot ẹte: “Obio Ubọn̄ Abasi esịne mbufo ke idem” m̀mê ke “esịt idem mbufo.” Nte se Jesus eketịn̄de edi oro? Ndi ikọ esie ẹkenen̄ede ẹwụt ke Obio Ubọn̄ Abasi odu owo ke esịt?

Bem iso kere ban̄a esịt owo. Ke ini Bible etịn̄de aban̄a ndamban̄a esịt, enye esiwọrọ se owo edide ke esịtidem, ebiet oro owo esikerede n̄kpọ, edu uwem ye ekikere owo. Ndikere ke akaka n̄kpọ nte Obio Ubọn̄ Abasi odu owo ke esịt—ke enye esinam owo akabade esịt onyụn̄ anam se ifọnde—ekeme nditie nte enen, edi nte enye enen?

Bible asian nnyịn ete: “Esịt abian̄a akan kpukpru n̄kpọ, onyụn̄ abiara fap.” (Jeremiah 17:9) Jesus ke idemesie ọkọdọhọ ete: “Mme idiọk ekikere ẹto ke esịtidem, ke esịt owo, ẹwọn̄ọ: use, inọ, uwotowo, efịbe, edisịn esịt ke n̄kpọ owo, mme edinam idiọk ido.” (Mark 7:20-22) Edi kere ise: Kpukpru afanikọn̄ oro ikụtde mfịn ke ererimbot ẹsito m̀mọ̀n̄ ke mîdịghe esịt mme anamidiọk ubonowo? Ntre, Obio Ubọn̄ Abasi oro mînyeneke ndo akpasasan̄a didie okodu ke utọ itie oro? Ke akpanikọ, kpa nte mbaraekpe mîkemeke ndin̄wụm fig, Obio Ubọn̄ Abasi ikemeke-keme ndidu ke esịt owo.—Matthew 7:16.

Ke adianade ye emi, kere ban̄a mbon oro Jesus eketịn̄de se idude ke Luke 17:21 ọnọ. Ufan̄ikọ 20 ọdọhọ ete: “Ke ini mme Pharisee ẹbụpde enye ini emi obio ubọn̄ Abasi edidide, enye ọbọrọ mmọ.” Mme Pharisee emi ẹkedi mme asua Jesus. Jesus ama ọdọhọ ete ke mbon mbubịk oro ididụkke Obio Ubọn̄ Abasi. (Matthew 23:13) Kere ise, edieke mme Pharisee mîdidụkke Obio Ubọn̄ Abasi, Obio Ubọn̄ oro akpasasan̄a didie edidu mmọ ke esịt? Utọ n̄kpọ oro ikpekemeke-keme nditịbe! Nso ndien ke ikọ Jesus ọkọwọrọ?

Ediwak ata nti edikabade Bible ẹwet ukem se Edikabade eke Obufa Ererimbot ewetde aban̄a mme ikọ Jesus emi. Ndusụk mmọ ẹdọhọ ke Obio Ubọn̄ oro “odu ke otu mbufo,” mîdịghe “odu ke ufọt mbufo.” Didie ke Obio Ubọn̄ Abasi okodu ke otu mme owo ini oro, esịnede mme Pharisee? Ọfọn, Jesus edi Edidem emi Jehovah Abasi ekemekde ndikara Obio Ubọn̄ oro. Jesus, kpa Edidem oro ẹmekde, okodu ke otu mmọ. Enye ama ekpep mme owo n̄kpọ aban̄a Obio Ubọn̄ Abasi onyụn̄ akam anam mme utịben̄kpọ ndiwụt mmọ se Obio Ubọn̄ oro edinamde. Emi owụt ke Obio Ubọn̄ oro ekenen̄ede odu ke otu mmọ.

Ntem, ana in̄wan̄-in̄wan̄ nte ke N̄wed Abasi idọhọke ke Obio Ubọn̄ Abasi odu ke esịt mme owo. Utu ke oro, Obio Ubọn̄ Abasi edi ata ata ukara emi edinen̄erede ikpụhọde ererimbot emi, kpa nte mme prọfet ẹkebemde iso ẹtịn̄.—Isaiah 9:6, 7; Daniel 2:44.