Ndibọhọ Nnanenyịn Ini Uyen

Nte Eusebio Morcillo obụkde

Ke September 1993, mma n̄ka ufọk-n̄kpọkọbi oro ukpeme ekenen̄erede ọsọn̄ ubọk. N̄kaka do man n̄kenịm Mariví ekpri adiahaeka mi baptism. Ndusụk mbon n̄kpọkọbi ye mme akama ufọk-n̄kpọkọbi oro ẹma ẹda ukpono ukpono ẹse nte nnịmde eyeneka mi baptism. Yak mbụk nte ikọtọn̄ọde uwem mbemiso mbụkde nte nnyịn ikasan̄ade ikesịm do.

N̄KAMANA ke Spain ke May 5, 1954. Ami ndi akpan ke otu nditọ itiaita oro eka mi akamande. Mariví ekedi ọyọhọ eyen ita. Eka eka nnyịn ama esida nnyịn aka Ufọkabasi Catholic, ndien esinem mi nditi nte n̄kesisịnde idem ke n̄kpọ Abasi ke ini n̄kedide eyenọwọn̄. Edi ete ye eka mi ikesidụhe uwem nte mme okpono Abasi. Ete mi ama esiwak ndimia nnyịn ye eka nnyịn. Nnyịn ikesidu uwem ndịk ndịk, ndien esịt ama esinen̄ede ayat mi ndikụt eka mi ọbọde ufen.

Mme n̄kpọ oro n̄kosobode ke ufọkn̄wed n̄ko ẹma ẹsinam esịt etetịm ọduọ mi. Edieke nnyịn mîkemeke ndibọrọ mbụme nnennen nnennen, andikpep oro ekedide oku ama esimụm nnyịn ibuot ọtọ ke ibibene. Oku en̄wen ama esisabade nditọwọn̄ ke ini esede utomufọk oro ẹkenọde mmọ ẹnam. N̄ko n̄ko, utọ ukpepn̄kpọ nte hell ikan̄ oro ẹsikpepde ke ido ukpono Catholic ama esitịmede mi onyụn̄ esịn mi ndịk ke idem. Ikebịghike, mma ntọn̄ọ ndinana udọn̄ ke n̄kpọ Abasi.

Mma Ntọn̄ọ Ndidu Ndisịme Uwem

Sia mmen̄kenyeneke owo oro etemede mi nte n̄kpodude uwem oro enemde Abasi esịt, mma ntọn̄ọ nditiene mbon afai oro ẹkedude oburobụt uwem n̄ka mme ufọk unek. Ẹma ẹsiwak ndikama ikwa, n̄kpọkọbi, akrasi, ye ifụm n̄n̄wana en̄wan do. Okposụkedi mmen̄kesitieneke n̄n̄wana en̄wan oro, ẹma ẹmia mi usen kiet tutu n̄kpere n̄kpa.

Nte ini akade, ufọk unek oro ikesinemke mi aba, ndien mma nyom ufọk unek efen oro owo mîkesisịnke ntịme. Edi ẹkesụk ẹdada n̄kpọsọn̄ ibọk ke ufọk unek enye emi. Ntre, utu ke ndikop inemesịt nnyụn̄ ndu ke ifụre, n̄kpọsọn̄ ibọk emi ẹma  ẹnam n̄kop editịmede esịt, ibuot esinyụn̄ oyon̄ mi.

Kpa ye oro mmen̄kamaha utọ uwem emi, mma ntap José Luis udọ eka mi ye Miguel ata ufan mi nsịn ke ukem usụn̄ uwem emi. Nnyịn ima idiana ye ediwak uyen eken ke Spain idu ata oburobụt uwem ini oro. Mma nsinam se n̄kekeme man nnyene okụk ndep n̄kpọsọn̄ ibọk. N̄kọwọrọke n̄kpọ ndomokiet.

Jehovah Anyan̄a Mi

Ini emi, mma nsiwak ndinyene nneme ye mme ufan mi mban̄a Abasi ye se uwem ọwọrọde. Mma ntọn̄ọ ndiyom Abasi, ndien oro akanam nyom owo emi n̄kemede nditịn̄ se isịnede mi ke esịt nnọ. Mma n̄kụt ke Francisco emi ekedide nsan̄autom mi iketiehe nte mmọ eken. Enye ama esikop inemesịt, anam akpanikọ, onyụn̄ ọfọn ido, ntre mma ntịn̄ se isịnede mi ke esịt nnọ enye. Francisco ekedi kiet ke otu Mme Ntiense Jehovah, enye ama onyụn̄ ọnọ mi Enyọn̄-Ukpeme oro etịn̄de n̄kpọ aban̄a n̄kpọsọn̄ ibọk.

Ke mma n̄kokot Enyọn̄-Ukpeme oro, mma mben̄e Abasi nte: “Ọbọn̄, mmọfiọk ke afo do, ndien mmoyom ndifiọk fi nnyụn̄ nnam uduak fo. Mbọk n̄wam mi!” Francisco ye Mme Ntiense eken ẹma ẹda Bible ẹsịn udọn̄ ẹnọ mi ẹnyụn̄ ẹnọ mi mme n̄wed ukpep Bible ndikot. Mma ndifiọk ke mmọ ẹkenọ mi un̄wam oro n̄keben̄ede Abasi. Ntre, mma ntọn̄ọ ndineme se n̄kekpepde ye mme ufan mi ye José Luis eyeneka mi.

Usen kiet, ke mma n̄kasan̄a ye mme ufan mi n̄wọrọ ke ufọk unek, mma ndianade nda nse nte mme ufan mi ẹsinamde n̄kpọ. Mbọribọ ama omụm mi aban̄a utọ oburobụt uwem oro n̄kpọsọn̄ ibọk akanamde nnyịn idu. Ke ebe oro, mma mbiere nditre orụk uwem oro, nnyụn̄ n̄kabade ndi kiet ke otu Mme Ntiense Jehovah.

Mma ndọhọ Francisco ọnọ mi Bible, ndien enye ama ọnọ mi onyụn̄ adian n̄wed Akpanikö oro Adade osim Nsinsi Uwem. * Ke ini n̄kokotde ke Abasi ọn̄wọn̄ọ ndikwọhọde kpukpru mmọn̄eyet ke enyịn mme owo nnyụn̄ nsio n̄kpa mfep, mma mfiọk ke mmokụt akpanikọ oro ekemede ndinam owo ọwọrọ ufụn. (John 8:32; Ediyarade 21:4) Ekem, mma ndụk mbono esop ke Ufọkmbono Obio Ubọn̄ Mme Ntiense Jehovah. Mma nnen̄ede mma nte mmọ ẹkenamde n̄kpọ ufan ufan ẹnyụn̄ ẹdarade owo.

Ama ọdọn̄ mi ndisian mbon en̄wen kpukpru se n̄kokụtde ke Ufọkmbono Obio Ubọn̄, ntre mma nsọsọp n̄kot José Luis ye mme ufan mi nnyụn̄ nsian mmọ kpukpru n̄kpọ. Ndien usen ifan̄ ke oro ebede kpukpru nnyịn ima ika mbono esop. N̄kaiferi kiet oro eketiede nnyịn ke iso ama ọwọn̄ọde enyịn ese nnyịn. Idem ama akpa enye ndikụt mbon oro ẹbietde ikpọkebọk ye nnyan idet ke Ufọkmbono Obio Ubọn̄, enye ikonyụn̄ ikemeke ndiwọn̄ọde enyịn aba nse nnyịn. Anaedi idem ama akpa enye ndikụt nnyịn isịnede kod ye tai ifiak idi Ufọkmbono Obio Ubọn̄ urua oro eketienede.

Ikebịghike, ami ye Miguel ima idụk mbono circuit eke Mme Ntiense Jehovah. Akanam nnyịn ikwe mme owo—n̄kpri ye ikpọ—ẹnen̄erede  ẹdiana kiet nte nditọeka ntre! Ndien se ikenen̄erede ikpa nnyịn idem ekedi nte ke ẹkenịm mbono emi ke ufọkmbre oro ikakade unek ke ndondo oro. Edi se nnyịn ikokụtde ye ikwọ oro ikokopde ẹma ẹnen̄ede ẹnem nnyịn.

Kpukpru nnyịn ima itọn̄ọ ndikpep Bible. Ke n̄kpọ nte ọfiọn̄ itiaita ẹma ẹkebe, oro edi ke July 26, 1974, ami ye Miguel ima ina baptism. Nnyịn mbiba ikedi isua 20. Owo inan̄ eken ẹkena baptism ke ọfiọn̄ ifan̄ ẹma ẹkebe. Se ẹkekpepde mi ke Bible ama anam ntọn̄ọ nditiene eka mi nnam n̄kpọ ke ufọk, nnyụn̄ mbuana se n̄kekpepde ye enye. Nnyịn ima inen̄ede ima kiet eken. Mma nnyụn̄ nnen̄ede nda ini n̄n̄wam n̄kpri nditọeka mi.

Nte ini akakade, eka mi ye kpukpru nditọeka mi, ke ẹsiode owo kiet ẹfep, ẹma ẹkpep akpanikọ ẹnyụn̄ ẹna baptism nte Mme Ntiense Jehovah. Mma ndọ Soledad ke 1977. Enye ekedi n̄kaiferi oro ekesede nnyịn ke n̄kpaidem akpa usen oro ikodụkde Ufọkmbono Obio Ubọn̄. Ke ufan̄ ọfiọn̄ ifan̄, nnyịn mbiba ima ikabade idi mme asiakusụn̄, nte Mme Ntiense Jehovah ẹsikotde mme ọkwọrọ eti mbụk ofụri ini.

Edima Eyeneka Mi Ọbọhọ

Ẹma ẹsabade Mariví eyeneka mi toto ke eyenọwọn̄, ndien enyene-ndịk n̄kpọntịbe emi ama enen̄ede afịna enye. Ke ini uyen, enye ama ọtọn̄ọ ndidu oburobụt uwem oro abuanade edida n̄kpọsọn̄ ibọk, uyịpinọ, ye usan̄a akpara. Ke ama ekesịm isua 23, ẹma ẹkọbi enye, ndien enye ama aka iso odu oburobụt uwem do ke ufọk-n̄kpọkọbi.

Ini oro, n̄kedi esenyịn circuit, kpa owo oro esisan̄ade ese Mme Ntiense Jehovah. Ke 1989, ẹma ẹnọ mi ye Soledad n̄wan mi ikanam utom ke ebiet oro ẹkekọbide Mariví. Ukara ẹma ẹbọ enye eyen esie; esịt ọduọ enye, ntre, uwem ikenemke enye aba. Mma n̄kese enye usen kiet nnyụn̄ ndọhọ yak ami ye enye isikpep Bible, ndien enye ama enyịme. Ke ima ikekpep n̄kpọ ke ọfiọn̄ kiet, enye ama etre ndida n̄kpọsọn̄ ibọk ye un̄wọn̄. Ama akpa mi idem ndikụt nte Jehovah ọnọde enye odudu ndinam mme ukpụhọde emi ke uwem esie.—Mme Hebrew 4:12.

Esisịt ini ke ima ikọtọn̄ọ ndikpep n̄kpọ, Mariví ama ọtọn̄ọ ndineme akpanikọ Bible ye mbon n̄kpọkọbi ye mme akama ufọk-n̄kpọkọbi. Kpa ye oro ẹkesisiode enye ke ufọk-n̄kpọkọbi kiet ẹka efen, enye ama esika iso ọkwọrọ ikọ. Ke ufọk-n̄kpọkọbi kiet, enye ama esisan̄a ke ubet n̄kpọkọbi kiet kiet ọkwọrọ ikọ. Mariví ama ọtọn̄ọ ukpepn̄kpọ Bible ye ediwak mbon n̄kpọkọbi ke nsio nsio ufọk-n̄kpọkọbi ke ediwak isua.

Usen kiet Mariví ama asian mi ete ke imoyom ndiyak idem imọ nnọ Jehovah nnyụn̄ nna baptism. Edi owo ikayakke enye ọwọrọ m̀mê ndiyak owo odụk edise enye ke ufọk-n̄kpọkọbi man enịm enye baptism. Enye ama osụk ọyọ idiọk idaha ufọk-n̄kpọkọbi oro ke isua inan̄ efen. Nso ikan̄wam enye aka iso enyene mbuọtidem? Enye ama esitie ke ufọk-n̄kpọkọbi odụn̄ọde se ẹnemede ke mbono esop ke ukem ini oro mbono esop osụk akade iso. Enye n̄ko ama esikpep Bible ke idemesie onyụn̄ ọbọn̄ akam kpukpru ini.

Nte ini akade, ẹma ẹsio Mariví ẹka ufọk-n̄kpọkọbi oro ukpeme ekenen̄erede ọsọn̄ ubọk, emi ekenyenede itie uwọk ewọk. Enye ama ekere ke imọ imekeme ndina baptism ke obufa itie emi. Ntre ke okonyụn̄ edi, ẹma ẹnyịme Mariví ana baptism do ndien. Ami n̄kọnọ utịn̄ikọ baptism esie, nte n̄ketịn̄de ke ntọn̄ọ. Mma ndu do ye enye ke ini akakan edinam emi ke uwem esie.

Mariví ama ọdọn̄ọ AIDS ke ntak akani usụn̄ uwem esie. Edi sia edu uwem esie okokpụhọrede, ẹma ẹsio enye ke ufọk-n̄kpọkọbi ke March 1994, mbemiso ini n̄kpọkọbi esie  okụre. Enye ama ọnyọn̄ okodụn̄ ke ufọk ye eka nnyịn onyụn̄ esịn ifịk ke utom Abasi tutu enye akpa ke 1996.

Ndikan Ndiọi Ekikere

Ami n̄ko mbọhọke kpukpru ndiọi utịp akani usụn̄ uwem mi. Nte ete mi ekesifiomode mi ye ndisịme uwem oro n̄kodude ke ini uyen ke ẹsụk ẹfefịna mi. Ke emi mma n̄kokpon mi, esịt esibiom mi ediwak ini, esinyụn̄ etie mi nte ke n̄wọrọke n̄kpọ. Mmesinen̄ede mfụhọ ndusụk ini. Edi Ikọ Abasi esinen̄ede an̄wam mi n̄kan mme ntaha ekikere emi. Nditie ekese ini n̄kere mme itie N̄wed Abasi nte Isaiah 1:18 ye Psalm 103:8-13 ẹmen̄wam mi ke ediwak isua idahaemi ndikan mme ntaha ekikere emi nsiwakde ndikere.

N̄kpọ en̄wen oro an̄wamde mi n̄kan ntaha ekikere emi edi akam. Mmesiwak ndibọn̄ akam nnọ Jehovah ye mmọn̄eyet. Edi, mme ikọ emi ke 1 John 3:19, 20 ẹsisọn̄ọ mi idem: “Nnyịn idida emi ifiọk ite nnyịn itọn̄ọ ito akpanikọ, iyonyụn̄ isọn̄ọ esịt nnyịn ke iso esie kaban̄a se ededi oro esịt nnyịn obiomde nnyịn ikpe, koro Abasi omokpon akan esịt nnyịn onyụn̄ ọfiọk kpukpru n̄kpọ.”

Sia nsidade “edibụn̄ọ ye edinuaha esịt” mbọn̄ akam nnọ Abasi ke ofụri esịt, mmedi ndifiọk ke ndiọkke nte n̄kesikerede. Bible anam kpukpru mbon oro ẹyomde Jehovah ẹtịm ẹfiọk ke Jehovah isisịnke mbon oro ẹnen̄erede ẹkabade esịt ke ndek, ẹnyụn̄ ẹnamde uduak esie.—Psalm 51:17.

Ini ekededi oro ntọn̄ọde ndikere ke n̄wọrọke n̄kpọ, mmesidomo ndinen̄ede n̄kere nti n̄kpọ, utọ nte mmọ oro ẹtịn̄de ẹban̄a ke Philippi 4:8. Mmomụm Psalm 23 ye Ukwọrọikọ Jesus ke Obot nsịn ke ibuot. Mmesitịn̄ mme itie N̄wed Abasi emi ke ibuot ini ekededi oro ntaha ekikere ẹdụkde mi esịt. Ndision̄o ntaha ekikere emi mfep ke esịt mi esinen̄ede an̄wam mi akpan akpan ke ini mmen̄kemeke ndide idap okoneyo.

Nsịnudọn̄ oro edima n̄wan mi ye nditọete Christian oro ẹtịmde ẹfiọk ikọ Abasi ẹsinọde mi esin̄wam n̄ko. Okposụkedi oro mmen̄kesisọpke nnyịme nsịnudọn̄ mmọ, Bible anam mi mfiọk ke ima “enenịm kpukpru n̄kpọ ke akpanikọ.” (1 Corinth 13:7) Ndien ami ke n̄kpep sụn̄sụn̄ ndisụhọde idem nnyịme ndinam se n̄kemede.

Edi ntaha ekikere oro ẹsifịnade mi mi ẹnam mi ndi esenyịn oro esituade owo mbọm. Ami ye n̄wan mi imanam utom uyọhọ ini nte mme ọkwọrọ eti mbụk ke n̄kpọ nte isua 30 idahaemi. Idatesịt oro edin̄wam mbon en̄wen ọnọde mi iyakke nnen̄ede nnyene aba mme ntaha ekikere oro.

Ke ini ntiede n̄kere kpukpru edidiọn̄ oro Jehovah ọnọde mi, emi esinam ntiene andiwet psalm ndọhọ nte: “Kọm Jehovah, . . . emi efende kpukpru mme ukwan̄-n̄kpọ fo, onyụn̄ ọkọkde kpukpru mme udọn̄ọ fo; emi afakde uwem fo osio ke udi; onyụn̄ adade ima ye mbọm ayara fi ke ibuot.”—Psalm 103:1-4.

[Ikọ Idakisọn̄]

[Se ẹwetde ke ikpọ abisi ke page 30]

Esịt esibiom mi ediwak ini, esinyụn̄ etie mi nte ke n̄wọrọke n̄kpọ. Mmesinen̄ede mfụhọ ndusụk ini; edi Ikọ Abasi esinen̄ede an̄wam mi n̄kan mme ntaha ekikere emi

[Ndise ke page 27]

José Luis eyeneka mi ye Miguel ufan mi ẹma ẹtiene ndiọi ye nti uwụtn̄kpọ mi

[Ndise ke page 28, 29]

Ubon nnyịn ke 1973

[Ndise ke page 29]

Mariví ke ufọk-n̄kpọkọbi

[Ndise ke page 30]

Ami ye Soledad n̄wan mi