Nso Idi Obio Ubọn̄ Abasi?

NSO ikedi ibuotikọ ukwọrọikọ Jesus? Nte Jesus ke idemesie eketịn̄de, ekedi Obio Ubọn̄ Abasi. (Luke 4:43) Ke ini mme owo ẹkekpan̄de utọn̄ ẹnọ ukwọrọikọ Jesus, mmọ ẹma ẹsikop enye asiakde Obio Ubọn̄ emi ndien ndien. Ndi mmọ ẹma ẹkere m̀mê nso ke enye etetịn̄? Ndi mmọ ẹma ẹbụp enye se Obio Ubọn̄ emi edide? Ih ih. Utọ mbụme oro idụhe ke Gospel ndomokiet. Ntre, ndi mme owo emi ẹma ẹfiọk se Obio Ubọn̄ Abasi edide?

Ke akpanikọ, N̄wed Abasi oro mme Jew ẹkedade nte edisana ama enen̄ede etịn̄ se Obio Ubọn̄ oro edide ye se enye edinamde. Mfịn imekeme ndida Bible n̄kpep ata ediwak n̄kpọ mban̄a Obio Ubọn̄ emi ukem nte mme Jew ẹkekpepde. Ẹyak nnyịn ineme akpan n̄kpọ itiaba oro Bible ekpepde nnyịn aban̄a Obio Ubọn̄ Abasi. Mme Jew oro ẹkedude uwem mbemiso Jesus edi ye mbon oro ẹkedude ke eyo Jesus ẹma ẹfọfiọk akpa n̄kpọ ita ke otu n̄kpọ itiaba oro iyomde ndisiak mi. Christ m̀mê mme apostle esie ẹkesiak ita eken ke akpa isua ikie. Ndien ẹyarade akpatre n̄kpọ oro idinemede mi ke eyo nnyịn.

1. Obio Ubọn̄ Abasi edi ata ata ukara, emi edibịghide ke nsinsi. Akpa ntịn̄nnịm ikọ ke Bible ama anam ẹfiọk ke Abasi ọyọdọn̄ owo edifak ubonowo oro ẹnamde akpanikọ. Ẹkekot Andifak ubonowo emi “mfri,” ndien enye ọyọkọk kpukpru mfịna oro nsọn̄ibuot  Adam, Eve, ye Satan adade edi. (Genesis 3:15, NW) Ke ukperedem, ẹma ẹnọ Edidem David inem inem etop ẹban̄a “mfri,” m̀mê Messiah oro. Ẹkedọhọ ke mfri emi edidi Edidem Obio Ubọn̄. Ukara esie oyokpụhọde ye kpukpru ukara eken. Enye edidu ke nsinsi.—2 Samuel 7:12-14.

2. Obio Ubọn̄ Abasi ayabiat kpukpru ukara owo efep. Ẹma ẹwụt prọfet Daniel n̄kukụt aban̄ade nte mme ukara ererimbot ẹdikarade toto ke eset tutu ẹdisịm eyo nnyịn. Kam kop nte ẹkedade n̄kukụt oro ẹkeberi: “Ke eyo [akpatre] ndidem oro, Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.” Ntre ẹyebiat kpukpru obio ubọn̄ m̀mê ukara ererimbot emi—ẹnyụn̄ ẹtre ekọn̄, ufịk, ye udia n̄wo—ke nsinsi. Nte ntịn̄nnịm ikọ Daniel owụtde, Obio Ubọn̄ Abasi ayakara ofụri isọn̄ ke mîbịghike. (Daniel 2:44, 45) Obio Ubọn̄ emi edi ata ukara, kpa n̄kukụre ukara emi edikarade isọn̄. *

3. Obio Ubọn̄ Abasi eyetre ekọn̄, udọn̄ọ, akan̄, ye n̄kpa. Mme adua-owo-idem ntịn̄nnịm ikọ Bible ẹyarade se Obio Ubọn̄ Abasi edinamde mi ke isọn̄. Ukara oro ayanam se akananam ukara owo ndomokiet mînamke, mîdinyụn̄ inamke tutu amama. Kam se, ẹyesobo kpukpru n̄kpọekọn̄ ke nsinsi! “Enye anam ekọn̄ etre tutu esịm ke utịt ekondo.” (Psalm 46:9) Mbiausọbọ, ufọkibọk, udọn̄ọ ndomokiet ididụhe aba. “Andidụn̄ ididọhọke ite, Ndọdọn̄ọ.” (Isaiah 33:24) Akan̄ m̀mê unana udia edidi n̄kpọ eset. “Uwak ibokpot ẹyedu ke isọn̄.” (Psalm 72:16) Ubụkowo, ukpeme okpo, mme udi, ufọk ubon okpo, m̀mê afanikọn̄ oro mme n̄kpọ emi ẹsikamade ididụhe aba. Ke akpatre, ẹyesobo n̄kpa, kpa anana-mbọm asua nnyịn, ẹfep. Abasi “eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep.”—Isaiah 25:8.

4. Abasi emek Edidem oro edikarade Obio Ubọn̄ Esie. Idịghe Messiah emek idemesie, inyụn̄ idịghe mme anana-mfọnmma owo ẹmek enye. Edi Jehovah Abasi ke idemesie emek Messiah. Mme udorienyịn̄ oro, Messiah ye Christ ẹwụt ke Abasi emek enye. Ikọ mbiba emi ẹwọrọ “Enye Oro Ẹyetde Aran.” Ntre Jehovah eyet Edidem emi aran, m̀mê emek enye enịm ọnọ san̄asan̄a utom. Abasi eketịn̄ ntem aban̄a enye: “Se owo mi, nyomụm enye n̄kama: se edimek owo mi emi adatde mi esịt; mmodori enye spirit mi ke idem: enye ayanam [edinen] ikpe ọwọrọ ọnọ mme idụt.” (Isaiah 42:1; Matthew 12:17, 18) Andibot nnyịn kpọt ọfiọk orụk Andikara oro nnyịn iyomde!

5. Andikara Obio Ubọn̄ Abasi ama owụt ofụri ubonowo ke imọ imodot. Jesus eyen Nazareth ekedi Messiah oro ẹken̄wọn̄ọde. Enye akamana ke ubon oro Abasi ama ekebebem iso emek. (Genesis 22:18; 1 Chronicles 17:11; Matthew 1:1) Ke ini Jesus okodude ke isọn̄, enye ama osu ediwak ntịn̄nnịm ikọ oro ẹban̄ade Messiah, oro ẹkewetde ediwak isua ikie ke edem. Ẹma ẹnyụn̄ ẹtie ke heaven ẹnam ẹfiọk ke enye edi Messiah. Didie? Abasi ama etie ke heaven etịn̄ ete ke enye edi edima Eyen imọ. Mme angel ẹma ẹnyụn̄ ẹwụt ke Jesus ekedi Messiah oro ẹken̄wọn̄ọde. Jesus ama ada odudu Abasi anam ediwak utịben̄kpọ, ata ediwak owo ẹma ẹnyụn̄ ẹkụt enye anamde mme utịben̄kpọ emi. * Jesus ama esiwụt utọ Andikara oro imọ ididide. Enye ama enyene odudu ndin̄wam mme owo, ama onyụn̄ ọdọn̄ enye ndinam ntre. (Matthew 8:1-3) Enye ama esitua owo mbọm, osụhọde idem, enyene uko, ikonyụn̄ idịghe ibụk. Ẹma ẹwet se Jesus akanamde ke isọn̄ ẹdọn̄ ke Bible ẹnọ kpukpru owo ndikot.

6. Owo 144,000 ẹdikara ye Christ ke Obio Ubọn̄ Abasi. Jesus ama ọdọhọ ke mbon  en̄wen, ọkọrọ ye mme apostle imọ, ẹyetiene imọ ẹkara ke heaven. Enye okokot mmọ “ekpri otuerọn̄.” (Luke 12:32) Ke ukperedem, ẹma ẹsian apostle John nte ke ibat ekpri otuerọn̄ emi edidi 144,000. Mmọ ẹyenam utom oro aduaide owo idem ke heaven, oro edi ndikara ye Christ nte ndidem nnyụn̄ nnam utom nte mme oku.—Ediyarade 5:9, 10; 14:1, 3.

7. Obio Ubọn̄ Abasi ke akara ke heaven idahaemi, ndien enye ọmọn̄ akara ofụri isọn̄ ke mîbịghike. Akpatre n̄kpọ oro ikpepde mi aduai owo idem akan. Bible enen̄ede ọsọn̄ọ nte ke ẹnọ Jesus odudu nte Edidem ke heaven. Enye ke akara do idahaemi, ndien ke mîbịghike enye ayatat ukara esie esịm ofụri isọn̄ onyụn̄ osu mme utịbe utịbe ntịn̄nnịm ikọ oro ikebemde iso itịn̄ iban̄a. Edi nnyịn isan̄a didie ifiọk ke Obio Ubọn̄ Abasi ke akara idahaemi? Ndien ini ewe ke enye editọn̄ọ ndikara isọn̄?

[Mme Ikọ Idakisọn̄]