Se Ẹsiande Mme Andikot Enyọn̄-Ukpeme

NNYỊN imenem esịt ndisian mbufo nte ke ọtọn̄ọde ke nsiondi emi, ẹyekpụhọde ndusụk n̄kpọ ke Enyọn̄-Ukpeme. Mbemiso itịn̄de se ẹdikpụhọrede, yak itịn̄ kan̄a se owo mîdikpụhọkede.

Owo idikpụhọke enyịn̄ magazine Enyọn̄-Ukpeme Ọnọ Ntọt Obio Ubọn̄ Jehovah. Ke ntre, enye oyosụk aka iso ndinọ Jehovah ubọn̄ nte ata Abasi onyụn̄ ada eti mbụk Obio Ubọn̄ Abasi ọdọn̄ mme andikot esịt. Mme ibuotikọ oro ẹdude ke page 5 esịm 9 ẹneme se Obio Ubọn̄ Abasi edide ye ini emi enye edidide. Ke adianade do, Enyọn̄-Ukpeme ayaka iso anam mme owo ẹnyene mbuọtidem ke Jesus Christ, anam ẹfiọk akpanikọ Bible, onyụn̄ anam ẹfiọk nte mme n̄kpọntịbe ererimbot ẹsude ntịn̄nnịm ikọ Bible, kpa nte enye akanamde ke ediwak isua emi ẹbede.

Edi nso ndien ke ẹdikpụhọde? Ẹyak ineme ndusụk aduai-owo-idem mbufa n̄kpọ oro ẹdidude ke kpukpru akpa nsiondi Enyọn̄-Ukpeme. *

Ediwak ikpehe oro ẹnamde owo ekere n̄kpọ ẹyedu kpukpru ọfiọn̄. Ikpehe oro, “Ndi Ama Ọfiọk?” eyeneme ndinem n̄kpọ oro ẹdin̄wamde nnyịn itịm ifiọk ndusụk mbụk Bible. Ikpehe en̄wen oro ẹkotde “San̄a Kpere Abasi” oyowụt se mme akpan itie Bible ẹkemede ndikpep nnyịn mban̄a Jehovah. Ikpehe oro ẹkotde “Mbụme Oro Mme Andikot Ẹbụpde” ọyọbọrọ mme mbụme Bible oro mme owo ẹsibụpde. Ke uwụtn̄kpọ, ediwak owo ẹsibụp ẹte, “Ndi Obio Ubọn̄ Abasi odu fi ke esịt?” Afo oyokụt ibọrọ mbụme emi ke page 13.

Ẹyemịn̄ ndusụk ibuotikọ kpukpru ini man ẹn̄wam mme ubon. Ikpehe oro “Ukpọhọde Inemesịt Ubon,” emi ẹdimịn̄de ikanan̄ ke isua oyowụt mme ata ata mfịna emi mme owo ẹsisobode ke ubon mmọ onyụn̄ etịn̄ nte mme edumbet Bible ẹkemede ndin̄wam ẹkọk utọ mfịna oro. Ẹyemịn̄ ikpehe kiet oro ẹkotde “Kpep Nditọ Fo,” ẹnọ mme ete ye eka man ẹsikot ye nditọ mmọ, ndien enye edidu ke nsiondi itiokiet ke isua. Ikpehe efen emi ẹdinyụn̄ ẹmịn̄de ke nsiondi itiokiet ke isua edidi “Eke N̄kparawa Owo,” ndien enye eyeneme ndutịm ukpepn̄kpọ Bible oro ẹnamde ẹnọ mme uyen.

Ẹyemịn̄ ikpehe ifan̄ efen ikanan̄ ke isua. Akpa ke otu ikpehe oro edidi, “Kpebe Mbuọtidem Mmọ,” ndien enye eyesịn udọn̄ ọnọ nnyịn ndikpebe uwụtn̄kpọ owo kiet ke Bible. Ke uwụtn̄kpọ, ke page 18 esịm 21 ke nsiondi emi, afo oyokụt edemede-owo-udọn̄ mbụk oro aban̄ade prọfet Elijah onyụn̄ ekpep nte nnyịn ikemede ndikpebe mbuọtidem esie. Ọyọhọ iba edidi ikpehe oro ẹkotde “Leta . . . ,” emi edinemede ifiọkutom mme isụn̄utom m̀mê eke mbon en̄wen oro ẹtode nsio nsio ebiet ke ererimbot. Akpatre edidi “Se Ikpepde Ito Jesus,” ndien ikpehe enye emi oyowụt mme akpan ukpepn̄kpọ Bible ke usụn̄ oro ememde.

Nnyịn imodori enyịn ke mbon oro ẹkponode Bible ẹnyụn̄ ẹyomde ndifiọk se Bible enen̄erede ekpep, ẹyeka iso ẹma ndikot Enyọn̄-Ukpeme. Imonyụn̄ idori enyịn ke magazine emi ayan̄wam fi ọfiọk akpanikọ Bible.

MME ANDISIO

[Ikọ Idakisọn̄]