Mme Ufọk Oro Ẹbọpde Man Ẹda Ẹtoro Jehovah

“Eketie nte ndadaba. Akananam n̄kereke ke iyenyene utọ ediye ufọk emi ndisop idem man itoro Jehovah. Inemesịt mi inyeneke ekọmurua!”—MARIA, MEXICO.

MME NTIENSE JEHOVAH ẹsima ndisop idem ọtọkiet n̄kpep Ikọ Abasi, kpa Bible. (Psalm 27:4; Mme Hebrew 10:23-25) Ndien esinen̄ede enem mmọ edieke mmọ ẹkemede ndisop idem ọtọkiet ke mme itie utuakibuot oro ẹyede. Ke mme isua ndondo emi, mmọ ẹmebọp ediwak tọsịn mbufa itie utuakibuot—emi ẹkotde Ufọkmbono Obio Ubọn̄—ke ediwak idụt ke ererimbot.

Nso inam ẹbọp mme ufọk emi? Mmanie ẹbọp? Ndien nso utịp ke utom emi enyene ke idem mme andibọp? Man ẹbọrọ mme mbụme emi, kere ban̄a se ikade iso ke Mexico ye Belize.

Ẹyom Ediwak Tọsịn Mbufa Ufọkmbono Obio Ubọn̄!

Ke ini edem, Mme Ntiense Jehovah ke Mexico ẹma ẹsisop idem ke itie ekededi oro mmọ ẹkekụtde ufan̄—ke esa, ke ufọk Mme Ntiense, ke ufọk ubonn̄kpọ, itie unịm moto, ye mme itie oro ẹbọde ke ukpeokụk—man ẹtuak ibuot ẹnọ Abasi. Ini oro, mme anam-akpanikọ Ntiense emi ẹma ẹsikere ke ọkpọfọn ibọp mme Ufọkmbono Obio Ubọn̄ mmimọ.

Etisịm 1994, Mme Ntiense ke Mexico ẹma ẹwak ẹsịm owo 388,000. Ndụn̄ọde emi ẹkenamde isua oro ama owụt ke edieke anade kpukpru Ntiense ẹnyene itie utuakibuot mmọ, oro ọwọrọ ke ana ẹbọp mbufa Ufọkmbono Obio Ubọn̄ 3,300. Nso akaka utom ke emi ekpedi ntem!

Ke ebiet ẹkemede, mme esop n̄kann̄kụk ẹma ẹbọbọp mme Ufọkmbono Obio Ubọn̄ mmọ. Edi ke isua ition oro ẹketienede, ima idifiọk ke man inyene ibat Ufọkmbono Obio Ubọn̄ oro ẹyomde, akana isọsọp ibọp ediwak efen efen. Didie ke ẹkekeme ndinam emi?

Mme Otu Asan̄autom Unyịmesịt Oro Ẹnyenede Usọ

Ẹma ẹtọn̄ọ obufa ndutịm ubọp ufọk ke 1999. Ẹma ẹsiak Mme Otu Ubọp Ufọkmbono Obio Ubọn̄ ke ofụri Mexico. Ediwak Mme Ntiense Jehovah emi ẹkenyenede ifiọk ẹban̄a ubọpufọk ke ofụri idụt oro ẹma ẹnọ idem mmọ unyịme unyịme ndibuana ke aduai-owo-idem ndutịm emi. Kan̄a ke emi, otu 35 ẹdu ke Mexico, ndien ẹsiak otu kiet ke Belize.

Mme Otu Ubọp Ufọkmbono Obio Ubọn̄ emi ẹsiwak ndidi n̄kpọ nte mme anamutom unyịmesịt itiaita, esịnede irenowo ye iban emi ẹnamde utom ofụri ini emi ke mfọn. Mme otu emi ẹkopde inemesịt mi ẹsito obio kiet ẹka efen ke idụt oro man ẹkeda iso ke utom ubọpufọk emi. Anamutom unyịmesịt kiet kiet esinam utom hour itiaita ke usen ke usen, tọn̄ọ ke  Monday sịm Friday, onyụn̄ anam utom Saturday iba ke ọfiọn̄. Mmọ ẹsitọn̄ọ ye edineme itie Bible ke n̄kanika itiaba usenubọk, ndien ke oro ebede ẹdia udia usenubọk mmọ. Kpukpru owo ẹsiben̄e idem ndinam se ededi oro ẹdọn̄de mmọ. Ke uwụtn̄kpọ, iban ẹsitiene irenowo ẹnam utọ utom nte ediyọn̄ọ simen ke ibibene, edisịn tile, ye ediyet ndom mbakara ke ufọk.

Esop n̄kann̄kụk esin̄wam ke ndinọ itieidụn̄, ndiyet ọfọn̄, nnyụn̄ ntem udia nnọ mme anamutom unyịmesịt emi. Ke adianade ye edinam utom ọtọkiet, mme anamutom unyịmesịt emi ye Mme Ntiense n̄kann̄kụk ẹsikop inemesịt ndidu ọtọkiet ke mme mbono esop Christian ye ke ini ẹkwọrọde ikọ ke enyịnusụn̄ ke enyịnusụn̄.

Mme Ufọn Edinam Utom Unyịmesịt

Mme anamutom unyịmesịt emi ẹda didie utom mmọ? Daniel emi anamde utom emi ke se ibede isua ita ọdọhọ ete: “Edi akpanikọ nte ke nnyịn imesinam utom ke ndaeyo ye ukwọ, imesidia udia oro mîmeheke nnyịn, imesisọp ikpọn̄ obio kiet ika efen, idu oyom usụn̄ ọkpọn̄ ubon nnyịn, inyụn̄ inyeneke mme n̄kpọ emi ẹnamde uwem enem kpukpru ini. Edi mme n̄kpọ-ata oro isobode imenke-men udomo ye mme edidiọn̄ oro ibọde.”

Nso idi ndusụk edidiọn̄ emi? Ediwak mme anamutom unyịmesịt emi ẹkpep mbufa usọ. Edi anamutom unyịmesịt kiet emi ekerede Carlos, oro esede aban̄a akamba otu kiet, etịn̄ se enye adade nte ata akpan ufọn. Enye ọdọhọ ete: “Nnyịn owo 20 imakabade idi ubon kiet. Nnyịn imesidia udia, inam utom, ikpep n̄kpọ, inyụn̄ ibọn̄ akam ọtọkiet. Imenen̄ede idiana kiet nte ata ufan.”

Mme ọbọpn̄kpọ emi n̄ko ẹsidiana kiet ye mme esop n̄kann̄kụk oro mmọ ẹn̄wamde. José oro etienede ọbọp se ibede ufọkmbono 100 ọdọhọ ete: “Esinen̄ede enem nnyịn ndikụt nte mmọn̄eyet idatesịt asiahade Mme Ntiense n̄kann̄kụk emi ke ini mmọ ẹkụtde nte ẹbọpde obufa Ufọkmbono Obio Ubọn̄ oro mmọ ẹkeyomde.” Enye adian do ete: “Esinem nnyịn ndifiọk nte ke ekpri ukeme oro isịnde ndibọp itie utuakibuot akpanikọ n̄kụre esisọn̄ọ mbuọtidem mbon efen.”

Akpa-Owo-Idem N̄kpọ Oro Ẹnamde!

Mme itie utuakibuot emi idịghe uwouwo. Utu ke oro, mme ndudiọn̄ Ufọkmbono Obio Ubọn̄ emi iwakke n̄kukọhọ, ndien emi anam ẹkeme ndisọp mbọp mmọ n̄kụre ye unana edibiat uwak okụk. Ke ebiet ẹkemede, ẹsida mme n̄kpọ ubọpufọk oro ẹdude ke n̄kann̄kụk oro ẹbọp ẹnyụn̄ ẹbọp ẹtiene idaha n̄kann̄kụk. Emi anam ẹkeme ndibọp Ufọkmbono Obio Ubọn̄ kiet n̄kụre ke urua itiokiet kpọt!

Ke 2007, kpukpru esop ke Belize ẹma ẹnyene obufa Ufọkmbono Obio Ubọn̄—ndien Ufọkmbono Obio Ubọn̄ 17 ẹdu ke obio oro. Ọtọn̄ọde ke 1999, ẹmebọp se iwakde ibe ufọkmbono 1,400 ke Mexico!

 Okposụkedi ẹnamde utọ akwa utom emi, ekese osụk ododu ndinam. (Matthew 9:37) Mme Ntiense ẹwak ẹbe 600,000 idahaemi ke Mexico—ndien kpukpru mmọ ẹsisop idem ikata ke urua kiet kiet ndikpep Ikọ Abasi. Ke ntem, ke ẹsụk ẹyoyom se ikperede mbufa Ufọkmbono Obio Ubọn̄ 2,000. Edieke ẹkpedade ukeme owo ẹnam utom ubọpufọk emi, owo ikpekemeke ndinam ofụri emi. Edi nte mme Ufọkmbono Obio Ubọn̄ oro ẹbọpde ẹkụre ẹwụtde, Jehovah Abasi “emekeme ndinam kpukpru n̄kpọ.”—Matthew 19:26.

[Ekebe/Ndise ke page 22]

“Mmọ Ẹsinam Se Mmọ Ẹtịn̄de”

Usụn̄ oro ẹdade ẹbọp mme Ufọkmbono Obio Ubọn̄ isitụkke esop Mme Ntiense Jehovah oro odude ke n̄kann̄kụk oro kpọt. Ke uwụtn̄kpọ, ke ini ẹkebọpde Ufọkmbono Obio Ubọn̄ ke Belize, ete kiet emi n̄wan esie esikade ufọkabasi Pentecostal ama ọdọhọ n̄wan esie ete ke Mme Ntiense Jehovah ẹma ẹbọp itie utuakibuot mmọ ẹma, imọ iyesitiene mmọ ika do. Nso ikanam ete emi ọdọhọ ke imọ iyesitiene Mme Ntiense Jehovah ika itie utuakibuot mmọ? Enye ọkọdọhọ ete: “Mmokụt ke Abasi odu ye mmọ. Mmọ in̄wanake en̄wan ke ini ẹnamde utom ọtọkiet. Ndien mmọ ẹsinam se mmọ ẹtịn̄de.”

[Ndise]

Ufọkmbono Obio Ubọn̄ ke Orange Walk, Belize

[Ekebe/Mme ndise ke page 23]

Utom Emi Ẹnamde ke Ofụri Ererimbot

Mme Otu Ubọp Ufọkmbono Obio Ubọn̄ ẹdu ke idụt 120. Ndusụk idụt oro mme anamutom unyịmesịt emi ẹdude ẹdi emi:

Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela, Zambia.

[Mme Ndise]

Ufọkmbono Obio Ubọn̄ ke Acapulco, Mexico

Mme andibuana ke Otu Ubọp Ufọkmbono Obio Ubọn̄ ke Mexico

[Ndise ke page 23]

Ufọkmbono Obio Ubọn̄ ke Tlaxcala, Mexico