Nnyịn Ikoto M̀mọ̀n̄?

NTAK IKPOYOMDE IBỌRỌ MBỤME EMI-E? Ẹkpep ediwak owo nte ke uwem ọkọtọn̄ọ ke mbuari. Ẹdọhọ mmọ ke udịm udịm n̄kpọntịbe oro ẹketịbede ke mbuari ẹkenam unam oforo owo emi enyenede ntụk, ukeme ufiọkn̄kpọ, ye udọn̄ edifiọk se uwem ọwọrọde.

Edi kam kere ise: Edieke Andibot mîdụhe, nnyịn ikonyụn̄ idide unam mbemiso iforo owo, ofụri ubonowo ndien ẹkpedi nditọakpa. Ikpodụhe ebiet emi ikpakade ikoyom ọniọn̄ emi akande eke nnyịn—idụhe owo emi akpan̄wamde nnyịn ikọk mme mfịna nnyịn. Oro ọkpọwọrọ ndiberi edem ke ọniọn̄ owo man ifep mme afanikọn̄ oro ẹtịbede ke n̄kann̄kụk nnyịn, ikọk mfịna ukaraidem, inyụn̄ iyọ mme mfịna oro isobode.

Ndi ndiberi edem ke ọniọn̄ owo ayanam esịt ana fi sụn̄? Edieke mîdịghe ntre, kere ise ban̄a ediberi edem ke ọniọn̄ Abasi. Ọfọn onyụn̄ enen̄ede owụt ifiọk ndiberi edem ke ọniọn̄ Abasi.

Se Bible Etịn̄de

Bible ekpep nte ke Abasi ke idemesie okobot owo. Nnyịn ikotoho unam iforo owo. Utu ke oro, nnyịn idi nditọ edima Ete oro enyenede ọniọn̄. Kam kop mme in̄wan̄-in̄wan̄ ikọ Bible emi.

Genesis 1:27. “Abasi obot owo esịn ke mbiet esiemmọ, ke mbiet Abasi ke obot enye; eren ye n̄wan ke obot mmọ.”

Psalm 139:14. “Nyọkọm fi, koro nnyenede ndyọ ye ndịk; se afo anamde ẹdi utịbe; ukpọn̄ mi onyụn̄ ọfiọk enene.”

Matthew 19:4-6. “Nte mbufo ikokotke ite ke enye emi okobotde mmọ toto ke editọn̄ọ akanam mmọ eren ye n̄wan onyụn̄ ọdọhọ ete: ‘Ke ntak emi owo ọyọkpọn̄ ete ye eka esie onyụn̄ akadiana ye  n̄wan esie, ndien mmọ mbiba ẹyekabade ẹdi obụk kiet’? Ntre mmọ idịghe aba owo iba, edi ẹdi obụk kiet. Ke ntre, se Abasi ama akadian yak baba owo kiet okûdianade.”

Utom 17:24, 25. “Abasi emi akanamde ererimbot ye kpukpru n̄kpọ emi ẹdude ke esịt, sia Enye edide Ọbọn̄ enyọn̄ ye isọn̄, idụn̄ke ke mme temple eke ẹdade ubọk ẹnam, owo inyụn̄ idaha ubọk inam n̄kpọ inọ enye nte n̄kpọ eke enye ananade n̄kpọ, koro edi enye ke idemesie ọnọ kpukpru owo uwem ye ibifịk ye kpukpru n̄kpọ.”

Ediyarade 4:11. “Jehovah, kpa Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ, ndien oto uduak fo ke mmọ ẹkedu, ẹkenyụn̄ ẹbot mmọ.”

Nte Ibọrọ Bible Anamde Esịt Enen̄ede Ana Owo Sụn̄

Ndifiọk nte ke ‘kpukpru ubon ke isọn̄ ẹkere enyịn̄’ ẹdian Abasi otụk nte nnyịn isede mbon efen. (Ephesus 3:15) Utọ ifiọk oro otụk n̄ko nte isede idem nnyịn ye mme mfịna nnyịn. Ifiọk emi oyotụk nte ikerede n̄kpọ ke mme usụn̄ oro ẹtienede mi.

Ke ini iyomde ndinam n̄kpọsọn̄ ubiere, nnyịn idinen̄ekede itịmede esịt iban̄a nsio nsio ekikere oro mme owo ẹnyenede. Utu ke oro, nnyịn idiberi edem ke item Bible. Ntak-a? Sia “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.”—2 Timothy 3:16, 17.

Ke akpanikọ, oyom isịn ukeme inyụn̄ inọ idem ntụnọ man inam item Bible. Ndusụk ini emi esikam oyom inam n̄kpọ oro nnyịn mîkekereke, mîkonyụn̄ iyomke ndinam. (Genesis 8:21) Nte ededi, edieke nnyịn inyịmede nte ke Ete nnyịn eke heaven emi enyenede ima okobot nnyịn, owụt eti ibuot ndibiere nte ke enye ọfiọk usụn̄ oro editịmde ọfọn nnyịn ndisan̄a. (Isaiah 55:9) Ikọ esie ọnọ nnyịn nsọn̄ọ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:5, 6) Edieke inamde item emi, nnyịn idinen̄ekede itịmede esịt ke ini isobode afanikọn̄ ye ke ini inamde mme ubiere.

Ke ini ẹsaride nnyịn asari, iditiehe nnyịn ke idem nte ke nnyịn iwọrọke n̄kpọ, ke nnyịn ifọnke nte mbon oro ẹtode ekpụk m̀mê idụt en̄wen. Utu ke oro, nnyịn iyokpono idem nnyịn. Ntak-a? Koro Jehovah Abasi kpa Ete nnyịn “inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.

Ndifiọk emi idiyakke isari m̀mê ise mbon efen ke usụhọde. Nnyịn iyokụt nte ke nnyịn inyeneke ntak ndomokiet ndikere ke imọfọn ikan mbon oro ẹtode idụt en̄wen, sia Abasi “ama anam kpukpru idụt ubonowo ẹwọn̄ọ ẹto owo kiet, ẹdidụn̄ ke ofụri iso isọn̄.”—Utom 17:26.

Ke akpanikọ, ndifiọk nte ke ẹkebobot nnyịn ye nte ke Andibot ekere aban̄a nnyịn anam esịt enen̄ede ana nnyịn sụn̄. Edi odu n̄kpọ efen oro anade ifiọk edieke iyomde esịt aka iso ana nnyịn sụn̄.

[Se ẹwetde ke ikpọ abisi ke page 4]

Ndi mme unam ẹkeforo owo?

[Ndise ke page 5]

Ndifiọk nte ke Andibot nnyịn ekere aban̄a nnyịn ekeme ndinam esịt ana nnyịn sụn̄