Afo Emekeme Ndikop Idatesịt kpa ye Oro Okụtde Edikpu
Afo Emekeme Ndikop Idatesịt kpa ye Oro Okụtde Edikpu
NDI odu owo oro akanam mîsoboke edikpu? Kamse, idem Ete nnyịn eke heaven, Jehovah Abasi, okụt edikpu. Ke uwụtn̄kpọ, enye ama osio nditọ Israel ke ufụn Egypt onyụn̄ enen̄ede ọdiọn̄ mmọ. Edi Bible ọdọhọ ete: “[Mmọ ẹma] ẹnyụn̄ ẹtọn̄ọ ntak ẹdomo Abasi, ẹnyụn̄ ẹsuene Edisana Abasi Israel.” (Psalm 78:41) Kpa ye oro, Jehovah osụk edi “Abasi inemesịt.”—1 Timothy 1:11.
Ke akpanikọ, ediwak n̄kpọ ẹdu oro ẹsinamde owo okụt edikpu. Edi nso ke ikpanam mbak mme n̄kpọ emi ẹdinam nnyịn itre ndikop inemesịt? Nso ke ikeme ndikpep nto Jehovah Abasi ke nte enye ekesede aban̄a edikpu oro enye okokụtde?
Mme N̄kpọ Oro Ẹkamade Edikpu
Ikọ Abasi ọdọhọ ke “ini ye unọmọ” ẹtetịbe ẹnọ kpukpru nnyịn. (Ecclesiastes 9:11) Ubiatibet, mbabuat n̄kpọntịbe, m̀mê udọn̄ọ ẹkeme nditịbe ke unana idotenyịn, anamde owo enen̄ede ofụhọ onyụn̄ okụt edikpu. Bible ọdọhọ n̄ko ete: “Idotenyịn eke anamde ubịghi esịn esịt ọdọn̄ọ.” (Mme N̄ke 13:12) Ndinen̄ede ndori enyịn mban̄a eti n̄kpọ esinam nnyịn ikop akwa idatesịt, edi edieke n̄kpọ oro mîsọpke itịbe, esịt ekeme ndiduọ nnyịn. Ke uwụtn̄kpọ, Duncan, * emi ama akanam utom isụn̄utom ke ediwak isua ye n̄wan esie, emi okonyụn̄ oyomde ndika iso nnam utom emi, ama edifiọk ke akana mmimọ inyọn̄ ufọk. Enye ọkọdọhọ ete: “Emi ekedi akpa ini oro eketiede nte ke uwem mi inyeneke uduak. N̄kenyeneke utịtmbuba ndomokiet. Idụhe n̄kpọ ndomokiet oro ekedide akpan n̄kpọ ọnọ mi.” Edikpu ekeme ndinen̄ede mbiak owo mbịghi nte ekedide ye Claire. Enye ọdọhọ ete: “Idịbi oro n̄kasan̄ade ke ọfiọn̄ itiaba ama obụn̄ọ. Oro eketịbe ediwak isua ko, edi idem idahaemi, ke ini n̄kụtde ekpri eyenọwọn̄ ọnọde utịn̄ikọ ke mbot utịn̄ikọ, mmesidọhọ idemmi nte, ‘Eyen mi okponyụn̄ okpon ntem.’”
Esịt onyụn̄ ekeme ndiyat fi edieke owo okpude fi, utọ nte ke ini owo oro okoyomde ndidọ
abian̄ade fi, ndọ ndibiara, eyenọwọn̄ ndisọn̄ ibuot, ufan ndida fi nnọ, m̀mê edieke ufan mîwụtke esịtekọm ke se anamde. Nnyịn iditreke ndikụt edikpu sia idụn̄de ye mme anana-mfọnmma owo inyụn̄ idude uwem ke ndiọkeyo.Nnyịn imekeme ndikam n̄kpu idem nnyịn n̄ko. Ke uwụtn̄kpọ, edieke nnyịn mîbehe udomo, mîkemeke ndinyene utom, m̀mê edieke owo oro imade mîmaha nnyịn nde, ekeme nditie nte ke nnyịn iwọrọke n̄kpọ. Esịt onyụn̄ ekeme ndiduọ nnyịn edieke owo oro imade mînen̄ekede isịn idem aba ke n̄kpọ Abasi. Mary ọdọhọ ete: “Eketie nte eyen mi ama enen̄ede esịn idem ke n̄kpọ Abasi. Emi ama anam n̄kere ke mma nnịm eti uwụtn̄kpọ nnọ enye. Edi ke ini enye eketrede ndinam n̄kpọ Jehovah Abasi onyụn̄ etrede ndikpono mbet ubon, eketie mi nte ke kpukpru se n̄kanamde ọkọwọrọ ikpîkpu. Kpukpru uforo oro n̄kenyenede ke mme ikpehe eken ke uwem ikekemeke ndidọn̄ mi esịt. Esịt ama enen̄ede ọduọ mi!”
Nso ke ikpanam man ikeme ndiyọ utọ edikpu oro? Man ibọrọ mbụme emi, ẹyak ise se Jehovah akanamde ke ini enye okokụtde edikpu.
Kere Ban̄a Se Akpanamde
Kpa ye oro Jehovah Abasi ọkọnọde akpa owo iba oro kpukpru se mmọ ẹkeyomde, mmọ ẹma ẹnana esịtekọm ẹnyụn̄ ẹsọn̄ ibuot. (Genesis, ibuot 2 ye 3) Ekem, Cain akpan mmọ ama ọtọn̄ọ ndidu idiọk uwem. Cain ama ofụmi item Jehovah onyụn̄ owot udọeka esie. (Genesis 4:1-8) Ndi emekeme ndikere nte n̄kpọ emi akabiakde Jehovah eketre?
Ntak emi edikpu oro mîkanamke Abasi etre ndikop inemesịt? Koro uduak esie ekedi ndikụt nte ke mfọnmma owo ẹyọhọ isọn̄, ndien enye ama aka iso anam n̄kpọ ndisu uduak oro. (John 5:17) Oro akanam enye ọnọ Eyen esie nte uwa ndifak ubonowo onyụn̄ anam ndutịm aban̄a Obio Ubọn̄. (Matthew 6:9, 10; Rome 5:18, 19) Utu ke ndinen̄ede n̄kere mban̄a mfịna oro, Jehovah Abasi akakam enen̄ede ekere aban̄a se enye akpanamde.
Ikọ Abasi esịn udọn̄ ọnọ nnyịn ete ikere iban̄a nti n̄kpọ oro ikpanamde utu ke ndikere mban̄a se ẹkpekenamde m̀mê se akpakanade inam. Enye ọdọhọ ete: “N̄kpọ ekededi eke ẹdide akpanikọ, n̄kpọ ekededi eke ẹdotde ẹtịm ẹkere, n̄kpọ ekededi eke ẹnende, n̄kpọ ekededi eke ẹsanade, n̄kpọ ekededi eke ẹmade, n̄kpọ ekededi eke ẹwọrọde eti etop, n̄kpọ ekededi eke eti ido odude ye n̄kpọ ekededi eke itoro odude, ẹka iso ẹkere mme n̄kpọ emi.”—Philippi 4:8.
Nte Ẹkpesede Edikpu
N̄kpọ ekeme nditịbe oro ekemede ndikpụhọde uwem nnyịn ofụri ofụri. Ke uwụtn̄kpọ, nnyịn imekeme nditaba utom nnyịn ke mbuari, itaba nsan̄a ndọ m̀mê ifetutom oro ikenyenede ke esop Abasi. Imekeme ndidọn̄ọ, itaba ufọk nnyịn, m̀mê mme ufan nnyịn. Didie ke nnyịn ikeme ndiyọ mme utọ ukpụhọde oro?
Se in̄wamde ndusụk owo edi ndimek mme n̄kpọ oro ẹdide akpan n̄kpọ ẹkan. Duncan, emi ikebemde iso itịn̄ iban̄a ọdọhọ ete: “Ke ini ami ye n̄wan mi ikọfiọkde ke nnyịn idikemeke ndinam aba utom isụn̄utom, esịt ama enen̄ede ọduọ nnyịn. Nte ini akakade, nnyịn ima isio akpan n̄kpọ iba oro idinamde inịm: ndise mban̄a Mama ndien edieke ikemede, ika iso ke utom ukwọrọikọ uyọhọ ini. Ke ini ikoyomde ndinam ubiere, nnyịn ima isikere nte ubiere emi editụkde akpan n̄kpọ iba emi. Emi ama esinam edi mmemmem ndinam nti ubiere.”
Ke ini ikụtde edikpu, ediwak nnyịn imesiwak ndinam etie nte ke mfịna nnyịn okpon akaha. Ke uwụtn̄kpọ, ekeme ndidi eyen nnyịn isụkke ibuot, nnyịn ikemeke ndinyene utom, m̀mê ndikwọrọ ikọ ke efakutom oro ẹsemde esen usem. Nnyịn imekeme ndikere ke nnyịn iwọrọke n̄kpọ. Edi kpa nte edikpu oro Abasi okokụtde ke ini owo ọkọsọn̄de ibuot mîkowụtke Deuteronomy 32:4, 5.
ke Abasi iwọrọke n̄kpọ, nnyịn ikpenyeneke ndikere ke nnyịn iwọrọke n̄kpọ n̄kukụre koro se inamde mîwọrọke usụn̄ ke ebe oro.—Edi mmemmem n̄kpọ ndibụmede nyat esịt ke ini owo anamde nnyịn se nnyịn mîmaha. Jehovah isinamke n̄kpọ ntre. Edidem David ama okpu Jehovah ke ndikesịn efịbe nnyụn̄ n̄wot ebe eyenan̄wan oro. Kpa ye oro, Jehovah ama okụt ke David enen̄ede akabade esịt onyụn̄ aka iso ada enye nte asan̄autom esie. N̄ko-n̄ko, Edidem Jehoshaphat emi ekedide owo Abasi ama edue ke ndikanam ufan ye mme asua Abasi. Prọfet Jehovah ama asian enye ete: “Emi esịn Jehovah ọtọhọ utọk ye afo. Edi ẹmekụt nti n̄kpọ ke idem fo.” (2 Chronicles 19:2, 3) Jehovah ama ọfiọk ke ndudue kiet oro Jehoshaphat akanamde ikọwọrọke ke enye ọkpọn̄ imọ ofụri ofụri. Kpasụk ntre n̄ko, nnyịn iditabake mme ufan nnyịn edieke nnyịn mîyatke esịt ikaha ke ini mmọ ẹduede nnyịn. Mme ufan oro ẹduede nnyịn ẹkeme ndisụk nnyene nti edu efen.—Colossae 3:13.
Imekeme ndida edikpu nte n̄kpọ oro owo mîkemeke ndifehe mbọhọ edieke anade enye okụt unen. Esịt ekeme ndiduọ nnyịn ke ini inamde idiọkn̄kpọ. Edi nnyịn imekeme ndifiak nsọn̄ idem ke n̄kan̄ eke spirit edieke inamde se Psalm 32:3-5) Edieke ifiọkde ke nnyịn inamke se Abasi ọdọhọde inam, akpana iben̄e enye efen ọnọ nnyịn, ikabade esịt, inyụn̄ ibiere ndika iso nnam se enye etemede.—1 John 2:1, 2.
inende inyụn̄ inen̄erede ibiere ndinam n̄kọri. Ke ini esịt ekenen̄erede ọduọ Edidem David aban̄a idiọkn̄kpọ esie, enye ekewet ete: “Mme ọkpọ mi ẹyemede ke ntuan̄a mi ofụri usen. . . . Nyasian fi [Jehovah] ndudue mi . . . , ndien afo efen ukwan̄-n̄kpọ ye ndudue mi.” (Se Akpanamde Edieke Osobode Edikpu
Eyịghe idụhe nte ke kpukpru nnyịn iyosobo edikpu ke ini iso. Nso ke ikpanam man iben̄e idem inọ oro? Eyenem fi ndikop se Bruno eketịn̄de. Ebịghi enye ekedi Christian, ndien enye ama osobo edikpu oro okokpụhọrede uwem esie. Enye ọkọdọhọ ete: “Se ikenen̄erede in̄wam mi ndiyọ edikpu oro n̄kosobode ekedi ndika iso nnam se n̄kesinamde man nsọn̄ọ mbuọtidem mi ke Abasi. Mma mfiọk ntak emi Abasi ayakde idiọk ererimbot emi aka iso odu. Mma nnen̄ede nsan̄a n̄kpere Jehovah ke ata ediwak isua. Mma nnen̄ede n̄kop inemesịt ke ndikanam oro. Ndifiọk ke Abasi ama odu ye ami ama ọdọn̄ mi esịt onyụn̄ an̄wam mi nyọ edikpu oro n̄kosobode.”
Nte uwem emi osụk akade iso, nnyịn inyene nditịm mfiọk n̄kpọ kiet emi: Nte ke okposụkedi nnyịn ikpude idem nnyịn mîdịghe mbon en̄wen ẹkpu nnyịn, Abasi idikpụhu nnyịn tutu amama. Ke akpanikọ, Abasi ọdọhọ ke enyịn̄ imọ, Jehovah, ọwọrọ “Ami nyakabade ndi se ededi oro ndikabarede ndi.” (Exodus 3:14, NW) Oro ọnọ nnyịn nsọn̄ọ nte ke enye ayakabade edi se ededi man osu mme un̄wọn̄ọ esie. Enye ọn̄wọn̄ọ ete ke Obio Ubọn̄ imọ ayanam uduak imọ ada itie ke ‘isọn̄ nte edide ke heaven.’ Ntak edi oro apostle Paul ekewetde ete: “Mmenịm ke akpanikọ nte n̄kpa m̀mê uwem m̀mê mme angel m̀mê mme ukara . . . m̀mê edibotn̄kpọ efen ekededi idikemeke ndidianade nnyịn ke ima Abasi oro odude ke Christ Jesus Ọbọn̄ nnyịn.”—Matthew 6:10; Rome 8:38, 39.
Nnyịn imekeme ndinen̄ede nnyene mbuọtidem ke se Abasi akadade prọfet Isaiah ọn̄wọn̄ọ oyosu. Enye ọkọn̄wọn̄ọ ete: “Sese, mmọn̄ mbot mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt.” (Isaiah 65:17) Nso utịbe utịbe idotenyịn ke inyene ntem nte ke ini ke edi oro nnyịn mîditịghi aba kpukpru edikpu oro isobode idahaemi!
[Mme Ikọ Idakisọn̄]
^ ikp. 5 Ẹkpụhọ ndusụk enyịn̄.
[Se ẹwetde ke ikpọ abisi ke page 13]
Nnyịn ikpenyeneke ndikere ke nnyịn iwọrọke n̄kpọ n̄kukụre sia se inamde mîwọrọke usụn̄ ke ebe oro
[Se ẹwetde ke ikpọ abisi ke page 14]
Ikọ Abasi esịn udọn̄ ọnọ nnyịn ete ikere iban̄a nti n̄kpọ oro ikpanamde utu ke ndikere mban̄a se ẹkpekenamde m̀mê se akpakanade inam
[Ndise ke page 15]
Kpa ye oro mme owo ẹkpude Abasi, enye osụk okokop inemesịt sia uduak esie mîditreke ndisu
[Ndise ke page 16]
Se idin̄wamde nnyịn iyọ edikpu edi ndision̄o mme akpan n̄kpọ eke spirit oro ikpanamde inịm