Leta Dominican Republic

“Akananam N̄kwe Orụk Ima Emi”

NIURKA ama ọnọ akpa utịn̄ikọ Bible esie ke esop nnyịn urua emi. Enye ama ewet se enye okoyomde nditịn̄ ke n̄wed mme nnan, ekem omụm ọdọn̄ ke ibuot. Mma ntie ye enye ke mbot utịn̄ikọ nnyụn̄ nnam nte ndi enyeneufọk. N̄kpọ ukopikọ oro enye ekesịnde ke utọn̄ ama anam enye okop se n̄kadade ukwak utịn̄ikọ ntịn̄. Ke ima ikokụre, otuowo ẹma ẹnen̄ede ẹkwak ubọk tutu enye okop. Enye ama atuak inua imam ndiwụt ke imenen̄ede ikop idatesịt. Esịt ama enem mi n̄ko. Nso n̄kpọ idatesịt ke edi ntem ndinam utom isụn̄utom!

Mmeti akpa ini oro n̄kosobode ye Niurka. Ekedi isua iba ko. Ke mma n̄kawat ke minit edịp-ye-duop ke usụn̄ obio-in̄wan̄ oro etiede ntọn̄ ntọn̄, mma nda n̄kụt enye. Enye eketie ke etehe ufọk ke obio-in̄wan̄, ke ufọk emi ẹdade eto ye kọrikọri ẹbọp, ẹnyụn̄ ẹdoride tian emi ama akata n̄karafan̄. Mma n̄kop uyom ye utebe ebot, oyot, ye ebua. Niurka ama etie esịn ibuot ke isọn̄, emi owụtde ke enye okofofụhọ onyụn̄ okop ndobo. Enye ama ọsọn̄ akan isua 34 emi enye ekedide.

Mma mfọi enye edem, ndien enye emenede iso ese nnyịn okposụkedi enye ekedide nnan ke isua 11 mbemiso nnyịn ikosobode enye. Mma ntịn̄ owo oro ami ye nsan̄a ukwọrọikọ mi idide ke ọkpọsọn̄ uyo nsịn enye ke utọn̄. Nte ini akakade, nnyịn ima idifiọk ke Niurka enyene udọn̄ọ emi otụhọrede enye etieti. Niurka ọdọn̄ọ ikịm an̄wan n̄kụhọ n̄ko, emi oyomde ẹnen̄ede ẹkpeme udomo suka emi odude enye ke iyịp.

Ke ini n̄kayakde Bible nsịn enye ke ubọk, enye ama ọfiọk ke edi Bible onyụn̄ ọdọhọ ke ima isima ndikot enye mbemiso idide nnan. Edi, ndisan̄a didie n̄kpep owo emi etiede mbọm mbọm mi akpanikọ Bible oro ọnọde owo ndọn̄esịt? Sia enye ama ọkọdiọn̄ọ ndikot mme abisi, mma nnọ enye mme leta emi ẹdade ọkpọ ẹnam. Ikebịghike, enye ama ekeme ndikot mme leta oro. Ekem, enye ama otụk mi ubọk ke ini nnamde idiọn̄ọ ke Usem Idiọn̄ọ Mbon America, emi ama anam enye ọfiọk mme abisi kiet kiet ke Usem Idiọn̄ọ Mbon America. Enye ama ekpep ndinam mme idiọn̄ọ en̄wen sụn̄sụn̄. Sia ami n̄konyụn̄ ntọn̄ọde-tọn̄ọ ndikpep usem idiọn̄ọ emi, ama oyom nda ediwak hour ntịm idem mbemiso n̄kpepde Niurka. Nte ededi, ama enen̄ede enem nnyịn mbiba ndikpep usem idiọn̄ọ emi, ntre nnyịn ima isọsọp inam n̄kọri.

Niurka ama enen̄ede anam n̄kọri ke ini n̄ka emi ẹsin̄wamde mbon n̄kpọnnam ẹkenọde enye n̄kpọ emi esinamde mbon oro mîtịmke  ikop n̄kpọ, ẹkop n̄kpọ. Mme n̄kpọ un̄wam ukopikọ emi ẹma ẹnen̄ede ẹn̄wam okposụkedi mmọ mîkedịghe utọ oro ẹkamade idahaemi. Sia enye ọkọdọn̄ọde nnan mînyụn̄ ikopke n̄kpọ ọfọn ke se ibede isua duop, enye ama adianade etie ikpọn̄. Edi spirit Jehovah ama edemede ekikere ye esịt esie, anam enye enen̄ede enyene ifiọk, idotenyịn, ye ima. Ikebịghike, Niurka ama ekeme ndida eto nsan̄a ke mbọhọ esie mbuana akpanikọ Bible ye mbon en̄wen.

Niurka enịm ukpepn̄kpọ Bible ye eyeneka eka esie an̄wan ye iman esie iba. Enye esinen̄ede etịm idem, onyụn̄ omụm ukpepn̄kpọ kiet kiet esịn ke ibuot. Nditọ ukpepn̄kpọ esie ẹsikot ikpehe, ndien Niurka ada n̄wed nnan okot mbụme. Nsan̄a ukwọrọikọ esie esimen ibọrọ oro eyen ukpepn̄kpọ Niurka ọnọde etịn̄ esịn enye ke utọn̄ mîdịghe omụm Niurka ubọk anam idiọn̄ọ.

Ofụri esop ẹn̄wam ẹnyụn̄ ẹsịn udọn̄ ẹnọ Niurka. Ediwak nditọete ẹsida enye ẹka mme mbono esop ye mme mbono. Mbon eken ẹsitiene enye ẹwọrọ an̄wautom. Niurka ọkọdọhọ mi ke ndondo emi ete: “Akananam n̄kwe orụk ima emi.” Enye odori enyịn ndina baptism ke mbono district nnyịn efen.

Ke ini ikọwọn̄ọrede idụk efak oro Niurka odụn̄de, nnyịn ima ikụt enye etiede ke etehe ke utịn onyụn̄ emenede ibuot ke enyọn̄ ye inua imam. Mma mbụp ntak emi enye atuakde inua imam. Enye ọkọdọhọ ete: “N̄kekere mban̄a ini iso emi isọn̄ edikabade edi Paradise. Ndien etie nte mmododu do.”

[Ndise ke page 25]

Niurka ye ndusụk mbon esop nnyịn ke iso Ufọkmbono Obio Ubọn̄

[Ndise ke page 25]

Niurka abuana se enye ekpepde ye mbon en̄wen