Andifiak Nnọ Uwem
San̄a Kpere Abasi
Andifiak Nnọ Uwem
NDI owo fo akpa? Edieke edide ntre, ọwọrọ ata enyene-ndịk n̄kpọ ọwọrọ fi oro. Andibot ọfiọk nte etiede fi ke idem. Ke adianade do, enye ekeme ndinam akpan̄kpa afiak edidu uwem. Abasi ama anam ẹwet mbụk ẹban̄ade mbon oro ẹkenamde ẹset ke Bible man owụt ke imọ idịghe Ọnọ-Uwem kpọt, edi ke idi Andifiak Nnọ Uwem n̄ko. Ẹyak ikere iban̄a kiet ke otu mbon oro Abasi ọkọnọde Eyen esie, Jesus Christ, odudu ndinam eset. Mbụk aban̄ade utịben̄kpọ emi odu ke Luke 7:11-15.
N̄kpọ emi eketịbe ke isua 31 E.N. Jesus akaka Nain emi odude ke Galilee. (Ufan̄ikọ 11) Etie nte ama ekpere ndisịm mbubịteyo ke ini enye akasan̄ade ekpere Nain. Bible ọdọhọ ete: “Nte enye asan̄ade ekpere inuaotop obio, sese! ke ẹbiom akpan̄kpa ẹwọrọ, emi edide ikpọn̄-ikpọn̄ eyen ọnọ eka esie. Akande oro, n̄wan emi ekedi ebeakpa. Akwa udịm owo ke obio ẹnyụn̄ ẹsan̄a ye enye.” (Ufan̄ikọ 12) Kam kere nte ebeakpa emi okofụhọde! Emi ekedi ọyọhọ utịm ikaba oro enye akatabade owo emi ekpekekpemede onyụn̄ an̄wamde enye.
Jesus ama owụk enyịn ese eka eyen oro okofụhọde mi, oro ekemede ndidi akasan̄a ekpere mbon oro ẹkebiomde okpo eyen esie. Mbụk oro ọdọhọ ete: “Ndien ke ini Ọbọn̄ okụtde n̄wan oro, atua enye mbọm, onyụn̄ ọdọhọ enye ete: ‘Kûtua.’” (Ufan̄ikọ 13) Mbọm ebeakpa oro ama enen̄ede anam Jesus. Ekeme ndidi Jesus ama eti eka esie, emi etiede nte okonyụn̄ edi ebeakpa n̄ko, emi edinyụn̄ ofụhọde n̄kpa imọ ke mîbịghike.
Jesus ama asan̄a ekpere—idịghe man etiene odụk udịm otuowo. Enye ama ada odudu oro Abasi ọkọnọde enye anyan ubọk “otụk ubiomokpo” oro, onyụn̄ anam otuowo ẹtuak ẹda. Ada uyo oro owụtde ke ẹnọ imọ odudu ndikan n̄kpa ọdọhọ ete: “‘Akparawa, ndọhọ fi nte, Daha ke enyọn̄!’ Ndien akpan̄kpa oro adaha etetie onyụn̄ ọtọn̄ọ nditịn̄ ikọ, ndien enye ayak enye ọnọ eka esie.” (Ufan̄ikọ 14, 15) N̄kpa ama anam ebeakpa oro ataba eyen esie. Mmọdo, ke ini Jesus akayakde “enye ọnọ eka esie,” mmọ mbiba ẹma ẹfiak ẹdiana kiet nte ubon. Mfụhọ oro ọkọyọhọde ebeakpa emi esịt ama akabade mmọn̄eyet akwa idatesịt.
Ndi enen̄ede ọdọn̄ fi nditiene n̄kop utọ idatesịt oro—ndifiak n̄kadiana ye owo fo emi akakpade? Fiọk ete ke Abasi ọfiọk nte etiede fi ke idem. Mbọm oro Jesus akatuade ebeakpa oro owụt nte Abasi esituade owo mbọm, koro Jesus ekenen̄ede ekpebe edu Ete esie. (John 14:9) Bible ekpep nnyịn ete ke enen̄ede ọdọn̄ Abasi ndinam mme akpan̄kpa oro ẹdude ke ibuot uti n̄kpọ esie ẹfiak ẹdidu uwem. (Job 14:14, 15) Ikọ esie, kpa Bible, ọnọ nnyịn utịbe utịbe idotenyịn edidu ke Paradise isọn̄ nnyụn̄ n̄kụt nte ẹdinamde mbonima nnyịn ẹset. (Luke 23:43; John 5:28, 29) Ntak mûkpepke ekese uban̄a Enye emi edide Andifiak Nnọ Uwem, nnyụn̄ n̄kpep se akpanamde man etiene enyene idotenyịn emi?
[Ndise ke page 23]
“Akpan̄kpa oro adaha etetie onyụn̄ ọtọn̄ọ nditịn̄ ikọ, ndien enye ayak enye ọnọ eka esie”