Mme Owo Ẹyom Edinyan̄a!

KE UNANA idotenyịn, mmọn̄ ama ọtọ ofụk itie udọk ukan̄ emi ekperede Pittsburgh ke Pennsylvania ke U.S.A. Emi ama okụk mme ọdọk ukan̄ usụkkiet esịn ke idakisọn̄ emi okotụn̄ọde ke mita 73. Ẹma ẹnyan̄a mmọ ẹsion̄o do ke usen ita ẹma ẹkebe, n̄kpọ ikonyụn̄ inamke mmọ. Ẹkesan̄a didie ẹnyan̄a mmọ?

N̄wed ndise itie udọk ukan̄ oro ye ukwakutom oro esinamde ẹkụt ebiet emi n̄kpọ odude ama an̄wam mbon oro ẹkedide ndinyan̄a mmọ ẹfiọk ebiet emi mmọ ẹkedude ẹnyụn̄ ẹtịbi ndudu oro edide sentimita 65, ekem ẹsụhọde ukpatn̄kpọ ẹsịn ke ebiet oro mme ọdọk ukan̄ oro ẹkedude. Ẹma ẹdụri owo mmọ kiet kiet ẹsion̄o ke ebiet oro ekpekedide udi mmọ do. Kpukpru mmọ ẹma ẹkop inemesịt, ẹnyụn̄ ẹkọm mbon oro ẹkenyan̄ade mmọ.

Ata ediwak nnyịn ididụhe ke utọ idiọk idaha oro tutu amama. Kpa ye oro, kpukpru nnyịn imoyom edinyan̄a, koro nnyịn mîkemeke ndibọhọ mme afanikọn̄ oro ẹsisan̄ade ye udọn̄ọ, usọn̄, ye n̄kpa. Owo Abasi oro, Job ọkọdọhọ ete: “Owo eke n̄wan amande omụhọ usen, onyụn̄ oyụhọ ukụt: Owo asiaha nte ikọn̄, ndien ẹsịbe enye ẹfep, enye efehe ebe nte ukpọn̄, inyụn̄ ibịghike.” (Job 14:1, 2) Ikọ Job oro osụk ededi akpanikọ okposụkedi n̄kpọ nte isua 3,500 ẹbede idahaemi, koro anie ke otu nnyịn ekeme ndifehe mbọhọ n̄kpa? Inamke n̄kpọ m̀mê m̀mọ̀n̄ ke idụn̄ m̀mê adan̄a didie ke itịm idem nnyịn ikama, oyom ẹnyan̄a nnyịn ẹsio ke ndutụhọ, usọn̄, ye n̄kpa.

Ntaifiọk ye mbon en̄wen ke ẹsịn idem ẹdomo ndinam mme owo ẹnen̄ede ẹdu uwem ẹbịghi. Esop kiet ẹdọhọ ke utom mmimọ edi “nditre n̄kpa” nnyụn̄ “nnam mbon esop emi ẹn̄wam mme owo ẹdu uwem ke nsinsi.” Kan̄a ke emi, ifiọk ntaifiọk ye ọkpọsọn̄ ukeme oro mme owo ẹsịnde inamke owo odu uwem ebe isua 70 m̀mê 80 oro Moses eketịn̄de ke isua 3,500 emi ẹkebede.—Psalm 90:10.

Edide afo emenyịme ye se Job eketịn̄de aban̄a uwem ye n̄kpa m̀mê unyịmeke, nte afo ọkọride ọsọn̄, afo oyokụt ke n̄kpa iditreke ndinam fi n̄ko ‘efehe ebe nte ukpọn̄,’ ebe ọkpọn̄ mme ufan fo, ubon fo, ufọk fo, ye kpukpru se akanamde. Enyene-ọniọn̄ Edidem Solomon oro akakarade Israel eset ekewet ete: “Mme odu-uwem [ẹfiọk] ẹte ke mmimọ inyene ndikpa: edi ama edi mme akpa-n̄kpa, mmọ ifiọkke baba n̄kpọ kiet: mmọ inyụn̄ inyeneke aba n̄kpọ-eyen-utom: koro owo mîtịghi aba enyịn̄ mmọ.”—Ecclesiastes 9:5.

Nte Bible ọdọhọde, edi n̄kpọ mbọm nte ke ‘n̄kpa amakara’ ubonowo nte idiọk “edidem.” Ih, n̄kpa edi ata idiọk asua oro anamde ubonowo ẹyom edinyan̄a. (Rome 5:14; 1 Corinth 15:26) Mbon oro ẹnen̄erede ẹnọ ukpep man ẹnyan̄a mme owo ke mbabuat idaha, oro ẹnyụn̄ ẹnyenede ata nti n̄kpọutom, ikemeke ndinọ fi nsinsi edinyan̄a. Edi Jehovah Abasi, kpa Andibot, amanam ndutịm ndinọ fi utọ edinyan̄a oro.

[Ebiet Ẹdade Ndise Ẹto ke page 3]

Photo by Gene J. Puskar-Pool/Getty Images