Ndikabade Ndi Kiet ke Otu Nditọ Abasi

KE N̄KPỌ nte isua 30 ẹma ẹkebe tọn̄ọ nte ekọn̄ akan̄wana ke Korea, Itieutom Usuanetop ke Korea ẹma ẹtọn̄ọ ndutịm oro edin̄wamde mme owo ẹfiak ẹkụt mbonubon mmọ oro ẹkesopde ke ini ekọn̄ oro. Nso ikedi utịp? Se iwakde ibe owo 11,000 ẹma ẹfiak ẹdisobo ye mbonubon mmọ—ẹtua ẹwan̄a kiet eken ke idem ye akwa idatesịt. N̄wedmbụk n̄kpọntịbe oro ẹkotde Korea Times ọdọhọ ete: “Akananam mbon Korea ituaha utọ eyet idatesịt oro okponde ntem.”

Ke Brazil, ẹma ẹmen Cézar emi ekedide nsekeyen ẹnọ owo ke isọn. Ke n̄kpọ nte isua duop ẹma ẹkebe, esịt ama enem enye ndikụt ata eka esie, tutu enye ọkpọn̄ imọ owo oro ekemende enye ke isọn edidụn̄ ye ata eka esie.

Nso n̄kpọ inemesịt ke esidi ntem ke ini mbonubon ẹfiakde ẹdikụt kiet eken oro ẹma ẹkekpọn̄ ufọk ẹnyụn̄ ẹsop! Bible obụk n̄kpọ mmọn̄eyet oro eketịbede ọnọ ubonowo, oro edi, ndiwọrọ ke ubon Abasi. Enye obụk n̄ko nte mmọ ẹfiakde ẹdiana kiet idahaemi ke idatesịt. Emi akasan̄a didie etịbe? Ndien nso ke akpanam man etiene okop utọ inemesịt emi?

Nte Ubon Abasi Akabaharede

Andiwet psalm ọkọdọhọ ke “obube mmọn̄ uwem” odu ye Jehovah Abasi, kpa Andibot. (Psalm 36:9) Jehovah edi Ete akwa ubon mme anam-akpanikọ ikọt esie ke ofụri ekondo. Ubon oro esịne mme angel, kpa nditọ esie eke spirit, emi ẹnamde ikpehe ubon emi ke heaven, onyụn̄ esịne mme owo emi edidide nditọ esie ke isọn̄, emi ẹnamde ikpehe ubon emi ke isọn̄.

Nte ikenemede ke ibuotikọ oro ekebede, ke ini Adam emi ekedide akpan Abasi ke isọn̄ ọkọsọn̄de ibuot, ubonowo ikodụhe aba ke ubon edima Ete ye Andibot mmọ. (Luke 3:38) Emi eketịbe koro nsọn̄ibuot Adam ikayakke Adam ye nditọ esie oro mîkamanake kan̄a ẹkeme ndika iso ndi nditọ Abasi. Abasi ama ada asan̄autom esie, Moses etịn̄ se iketịbede ete: “Mmọ ẹmedụk afan̄ nsobo; Mmọ idịghe nditọ [mi], ndo edi eke mmọ.” “Ndo” m̀mê idiọkn̄kpọ, akadianade ubonowo  ọkpọn̄ Abasi, emi edide edisana onyụn̄ ọfọnde ama ke kpukpru usụn̄ esie. (Deuteronomy 32:4, 5, NW; Isaiah 6:3) Nte ubonowo akasan̄ade osop, onyụn̄ ananade ete edi oro.—Ephesus 2:12.

Man owụt nte ubonowo enen̄erede adianade ọkpọn̄ Abasi, Bible okot mbon oro mîdụhe ke ubon Abasi “mme asua.” (Rome 5:8, 10) Ndiọi utịp idiọkn̄kpọ ye unana mfọnmma oro ikadade imana, ọkọrọ ye idiọk ukara Satan ẹmenọmọ ubonowo oro adianarede ọkpọn̄ Abasi. (Rome 5:12; 1 John 5:19) Nte mme anamidọk ubonowo ẹkeme ndidi ubak ubon Abasi? Nte mmọ ẹkeme ndinen̄ede ndi nditọ Abasi, nte Adam ye Eve ẹkedide mbemiso ẹnamde idiọkn̄kpọ?

Nditan̄ Nditọ Oro Ẹma Ẹkesop Mbok

Ima ama anam Jehovah anam ndutịm oro edinyenede ufọn ọnọ mme anana-mfọnmma owo oro ẹmade enye. (1 Corinth 2:9) Apostle Paul ọkọdọhọ ete: “Abasi ebe ke Christ anam ererimbot afiak etie ke emem ye enye, ibatke idiọkn̄kpọ mmọ inọ mmọ.” (2 Corinth 5:19) Nte iketịn̄de ke ibuotikọ oro ekebemde iso, Jehovah Abasi ama ọnọ Jesus Christ nte ufak idiọkn̄kpọ nnyịn. (Matthew 20:28; John 3:16) Esịt ama enen̄ede adat apostle John aban̄a emi tutu enye ewet ete: “Ẹse orụk ima emi Ete ọnọde nnyịn, man ẹkpekot nnyịn nditọ Abasi.” (1 John 3:1) Ntre, ẹma ẹberede usụn̄ ẹnọ okopitem ubonowo ndifiak ndidi ubak ubon Jehovah.

Okposụkedi kpukpru mbon oro ẹtan̄de ẹbok nte ubon Abasi ẹdidarade utịbe utịbe edidianakiet ke idak ukpeme Ete mmọ eke heaven, se nte Bible etịn̄de nte ẹtan̄de mmọ ẹbok ke otu iba. Enye ọdọhọ ete: “[Emi] asan̄a ekekem ye se itịmde inem [Abasi], emi enye akaduakde ke idemesie ndinam ndutịm ke adan̄aemi edimek ini ekemde ọyọhọ ọyọhọ, oro edi, ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.” (Ephesus 1:9, 10) Ntak emi Abasi anamde ndutịm ke utọ usụn̄ emi?

Jehovah nditịm nditọ esie nsịn ke ikpehe iba enen̄ede anam ubon esie adiana kiet. Isọn̄ke ndifiọk ntak emi idọhọde ntre. Ubon Abasi enen̄ede okpon tutu ẹkeme ndida enye ndomo ye idụt. Ke idụt ekededi, ẹsimek ibat ibat owo ndidi mme andikara man mbon eken ẹkpedu ke emem ye ifụre. Edi akpanikọ ke idụhe ukara owo ekededi oro anamde owo enyene ata emem, edi Abasi ọnọ ubon esie ukara oro ọfọnde ama. Akpa ubon esie, oro edi, “mme n̄kpọ eke ẹdude ke heaven,” ẹsịne nditọ Abasi oro Jehovah emekde ndidi mme andikara ke heaven. Mmọ ẹditie do ‘ẹkara isọn̄ nte ndidem.’—Ediyarade 5:10.

Nditọ Abasi ke Isọn̄

Jehovah ke atan̄ n̄ko “mme n̄kpọ eke ẹdude ke isọn̄” obok, oro edi, ediwak miliọn owo ke ofụri isọn̄, man mmọ ẹkpekabarede ẹdi nditọ esie ke isọn̄ ke ini iso. Nte edima Ete, enye ekpep mmọ ima esie, emi anamde mmọ ẹdiana kiet okposụkedi mmọ ẹtode nsio nsio idụt. Ẹdọhọ mbon oro ẹtiede afai afai, ibụk ibụk, ẹdude oburobụt uwem, ẹnyụn̄ ẹsọn̄de ibuot ye Abasi ẹte “ẹfiak ẹtie ke emem ye Abasi.”—2 Corinth 5:20.

Nso kaban̄a mbon oro mînyịmeke nditie ke emem ye Abasi nte enye ọdọhọde nnyụn̄ n̄kabade ndi nditọ esie? Man emem ye ifụre odu ke ubon esie, Jehovah ididopke-dop uyo ise utọ mbon oro. “Usen ubiereikpe ye nsobo mbon unana uten̄e Abasi” ke edi. (2 Peter 3:7) Abasi ọyọsọhi utọ mbon nsọn̄ibuot oro efep ke isọn̄. Nso n̄kpọ idatesịt ke emi edidi ntem ọnọ mbon n̄kopitem!—Psalm 37:10, 11.

Ekem, ukara tọsịn isua ọyọtọn̄ọ, kpa ini emi ẹdinamde kpukpru mbon oro ẹmade Abasi sụn̄sụn̄ ẹnyene mfọnmma uwem oro Adam ọkọduọkde. Idem mme akpan̄kpa ẹyeset. (John 5:28, 29; Ediyarade 20:6; 21:3, 4) Adan̄aoro ke Abasi edisu un̄wọn̄ọ esie emi: “Ẹyenam [ubonowo] ke idemesie ọbọhọ  ufụn itie mbiara onyụn̄ enyene ubọn̄ ubọn̄ ifụre eke nditọ Abasi.”—Rome 8:21.

Ndidiana ye Ete Fo

Cézar ye ediwak tọsịn mbon Korea oro ikadade itọn̄ọ nneme emi ẹma ẹnam n̄kpọ man ẹfiak ẹkediana ye mbonubon mmọ. Mbon Korea oro ẹkenyene nditiene mbuana ke ndutịm oro ukara akanamde aban̄a emi, ndien Cézar ama ọkpọn̄ owo oro ẹkemende enye ẹnọ ke isọn ọnyọn̄ ebịne ata eka esie. Kpasụk ntre, ekeme ndiyom enen̄ede anam n̄kpọ man afiak etie ke emem ye Ete fo eke heaven, Jehovah Abasi, onyụn̄ edi ubak ubon esie. Nso ke akpanam?

Se idin̄wamde fi asan̄a ekpere Abasi nte Ete fo edi ndikpep Ikọ esie, kpa Bible, man ekeme ndinen̄ede nnyene mbuọtidem ke enye ye ke mme un̄wọn̄ọ esie. Afo eyedifiọk ke se Abasi ọdọhọde fi anam edi ke ufọn fo. Afo n̄ko enyene ndinyịme item ye ntụnọ oro Abasi ọnọde, koro Bible ọdọhọ mme Christian ete: “Abasi anam n̄kpọ ye mbufo nte nditọ. Koro ewe eyen ke ete mîtụnọke?”—Mme Hebrew 12:7.

Ndinam kpukpru emi oyokpụhọde ofụri uwem fo. Bible ọdọhọ ete: “Mbufo ẹkabade ẹdi obufa ke odudu oro onụkde ekikere mbufo, ẹkpenyụn̄ ẹmen obufa owo ẹsịne emi ẹkebotde nte ekemde ye uduak Abasi ke ata edinen ido ye akpanikọ.” (Ephesus 4:23, 24) Ekem, nam item apostle Peter emi: “Nte nditọ nsụkibuot, ẹtre ndinam n̄kpọ ekekem ye mme udọn̄ oro mbufo ẹkenyenede ke unana ifiọk ke eyo oko.”—1 Peter 1:14.

Fiọk Ata Mbonubon Mbufo

Ke ini Cézar okokụtde ata eka esie, esịt ama enen̄ede enem enye ndifiọk ke imọ imenyene eyeneka eren ye an̄wan. Kpasụk ntre, ke ini asan̄ade ekpere Ete fo eke heaven, afo eyedi edifiọk ke emenyene ediwak nditọeka iren ye iban ke esop Christian. Nte afo asan̄ade ye mmọ, eyedi afo oyokụt ke mmọ ẹnen̄ede ẹkpere fi idem ẹkan ata iman fo.—Utom 28:14, 15; Mme Hebrew 10:24, 25.

Ifet eberede ọnọ fi ndidiana kiet ye ata Ete fo ye ata nditọeka fo iren ye iban. Edieke anamde emi, inemesịt fo oyokpon nte eke Cézar ye ediwak tọsịn mbon Korea eken oro ẹkefiakde ẹkediana kiet ye mbonubon mmọ.

[Ndise ke page 8]

Cézar ye eka esie ke ini enye ekedide eyen isua 19

[Ndise ke page 10]

Nam n̄kpọ ndisan̄a n̄kpere Abasi