Nte N̄kpa Jesus Ekemede Ndinyan̄a Fi

KE N̄KPỌ nte isua 2,000 oro ẹkebede, ke ini usọrọ Passover mme Jew eke isua 33 E.N., eren kiet oro mîkanamke idiọkn̄kpọ ama akpa man mbon en̄wen ẹkpedu uwem. Anie ke enye ekedi? Enye ekedi Jesus eyen Nazareth. Ndien mmanie ẹkeme ndibọ ufọn nto eti n̄kpọ oro enye akanamde mi? Edi ofụri ubonowo. Itie N̄wed Abasi oro ẹtịmde ẹmehe etịn̄ ibio ibio aban̄a uwa oro ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:16, Edisana Ŋwed Abasi Ibom.

Okposụkedi ediwak owo ẹmehede ye itie N̄wed Abasi oro, iwakke mbon oro ẹnen̄erede ẹfiọk se enye ọwọrọde. Ndusụk owo ẹsikere ẹte: ‘Ntak emi nnyịn iyomde uwa Christ? Didie ke n̄kpa owo kiet ekeme ndinyan̄a ubonowo nsio ke nsinsi n̄kpa?’ Bible ọbọrọ mbụme emi ke in̄wan̄-in̄wan̄ usụn̄ oro ọnọde uyụhọ.

Nte N̄kpa Akasan̄ade Akara Ubonowo

Ndusụk owo ẹnịm ke ẹkebot owo ẹte edidụn̄ ke isọn̄ ke ibio ini, osobo mme idomo, okop inem uwem, ekem akpa ebe aka ebiet oro ọfọnde akan isọn̄. Ekikere emi owụt ke Abasi okoyom ubonowo ẹkpan̄a. Edi Bible owụt ke n̄kpọ en̄wen esinam owo akpa. Enye ọdọhọ ete: “Idiọkn̄kpọ [okoto] owo kiet odụk ke ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) Itien̄wed emi owụt ke idiọkn̄kpọ esinam mme owo ẹkpan̄a. Anie ndien edi “owo kiet” emi akanamde ndiọi utịp idiọkn̄kpọ ebe esịm ofụri ubonowo?

The World Book Encyclopedia ọdọhọ ke ata ediwak ntaifiọk ẹnịm ke kpukpru owo ẹto ebiet kiet, ndien Bible etịn̄ in̄wan̄-in̄wan̄ se idide ebiet kiet oro, oro edi, “owo kiet.” Genesis 1:27 ọdọhọ ete: “Abasi obot owo esịn ke mbiet esiemmọ, ke mbiet Abasi ke obot enye;  eren ye n̄wan ke obot mmọ.” Mmọdo, Bible ọdọhọ ke akpa owo iba oro ẹkedi utịbe utịbe edibotn̄kpọ Ata Ọkpọsọn̄ Abasi.

Ke Jehovah Abasi ama okobot akpa owo iba oro, n̄wed Genesis aka iso etịn̄ nte uwem eketiede. Odot ẹtịm ẹfiọk ke Abasi iketịn̄ke n̄kpọ iban̄a n̄kpa ke ofụri mbụk oro ke mîbọhọke ndidọhọ ke nsọn̄ibuot ediman n̄kpa. (Genesis 2:16, 17) Enye okoyom mme owo ẹdụn̄ ke ediye paradise ke isọn̄, ẹkop inemesịt, ẹnyụn̄ ẹkop nsọn̄idem ke nsinsi. Enye ikoyomke mmọ ẹsọn̄ ẹnyụn̄ ẹkpan̄a. Didie ndien ke n̄kpa akasan̄a edikara ofụri ubonowo?

Genesis ibuot 3 etịn̄ nte akpa owo iba oro ẹkekoide-koi ẹbiere ndisọn̄ ibuot ye Jehovah Abasi emi ọkọnọde mmọ uwem. Ntre, Abasi ama amia mmọ ufen oro enye ekebemde iso asian mmọ. Enye ọkọdọhọ Adam ete: “Koro afo edide ntan, oyonyụn̄ afiak ke ntan.” (Genesis 3:19) Mbon nsọn̄ibuot iba oro ẹma ẹkpan̄a nte Abasi ọkọdọhọde.

Nte ededi, mbon en̄wen ẹma ẹtiene ẹbọ ufen nsọn̄ibuot akpa owo iba emi. Nsọn̄ibuot mmọ ikayakke nditọ mmọ ẹdu mfọnmma uwem oro mmọ ẹkpekedude. Jehovah ama esịn nditọ mmọ oro mîkamanake kan̄a ke uduak esie ke ini enye ọkọdọhọde Adam ye Eve ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.” (Genesis 1:28) Nte ini akakade, ofụri ubonowo ẹkenyene ndiyọhọ isọn̄ nnyụn̄ nnen̄ede n̄kop inem uwem ke nsinsi. Edi ete ete mmọ, Adam—emi Bible okotde “owo kiet”—ama anyam mmọ esịn ke ufụn idiọkn̄kpọ, ndien utịp ekedi n̄kpa oro owo mîkemeke ndifehe mbọhọ. Apostle Paul emi edide eyen Adam ekewet ete: “Ami ndi obụkidem, emi ẹkenyamde ẹsịn ke idak idiọkn̄kpọ.”—Rome 7:14.

Kpa nte mbon ibak ẹbiatde ata ọsọn̄urua utomusọ ke mme isua ndondo emi, kpasụk ntre, idiọkn̄kpọ Adam ama enen̄ede abiat utịbe utịbe ubọkutom Abasi—oro edi ubonowo. Nditọ Adam ẹma ẹnyene nditọ ye nditọ nditọ. Mme emana emi kiet kiet ẹma ẹkponi, ẹnyene nditọ, ẹnyụn̄ ẹkpan̄a. Ntak emi kpukpru mmọ ẹkpan̄ade? Koro kpukpru mmọ ẹdide nditọ Adam. Bible ọdọhọ ete: “Idiọkn̄kpọ owo kiet [anam] ediwak owo ẹkpan̄a.” (Rome 5:15) Udọn̄ọ, usọn̄, udọn̄ unam idiọkn̄kpọ, ye n̄kpa, ẹdi ndiọi utịp idiọkn̄kpọ oro  Adam akanamde ubon esie. Kpukpru nnyịn isịne do.

Ke leta oro apostle Paul ekewetde ọnọ ẹsọk mme Christian ke Rome, enye ama etịn̄ aban̄a idiọk idaha oro imọ ye mme anana-mfọnmma ubonowo eken isobode, ye nte owo mîkemeke ndin̄wana n̄kan odudu idiọkn̄kpọ. Enye ama eseme ete: “Mbọm mi owo nditaha! Anie edinyan̄a mi osio ke ikpọkidem emi akade n̄kpa mi?” Nte emi idịghe eti mbụme? Anie edinyan̄a Paul ye kpukpru mbon oro ẹyomde edinyan̄a osio ke ufụn idiọkn̄kpọ ye n̄kpa? Paul ke idemesie ọbọrọ mbụme emi ete: “Ekọm enyene Abasi ebe ke Jesus Christ Ọbọn̄ nnyịn!” (Rome 7:14-25) Ke akpanikọ, Andibot nnyịn amanam ndutịm ndida Eyen esie, Jesus Christ, nnyan̄a nnyịn.

Nte Abasi Adade Jesus Anyan̄a Ubonowo

Jesus ama etịn̄ nte imọ idinyan̄ade ubonowo isio ke ufụn idiọkn̄kpọ. Enye ọkọdọhọ ete: “Eyen Owo [ekedi] man . . . ọnọ uwem Esie ndifak ediwak owo.” (Matthew 20:28, Edisana Ŋwed Abasi Ibom) Didie ke uwem Jesus etie nte ufak? Didie ke n̄kpa esie enyene ufọn ọnọ nnyịn?

Bible ọdọhọ ke Jesus ‘inyeneke idiọkn̄kpọ,’ onyụn̄ “adianade ọkpọn̄ mme anamidiọk.” Jesus ama enen̄ede enịm Ibet Abasi ke ofụri eyouwem esie. (Mme Hebrew 4:15; 7:26) Mmọdo, Jesus ikakpaha ke ntak idiọkn̄kpọ ye nsọn̄ibuot nte Adam. (Ezekiel 18:4) Utu ke oro, Jesus ekenyịme ndikpa n̄kpa oro mîkpakanaha enye akpa man anam uduak Ete esie emi edide ndinyan̄a ubonowo nsio ke idiọkn̄kpọ ye n̄kpa. Nte ima iketetịn̄, Jesus ama enyịme ndidi ‘ndinọ uwem esie nte ufak.’ Ima oro mînyeneke mbiet ama anam Jesus enyịme ‘nditabi n̄kpa ke ibuot kpukpru owo.’—Mme Hebrew 2:9.

Uwem oro Jesus akawade ekedi ata ukem ukem ye uwem oro Adam ọkọduọkde ke ini enye akanamde idiọkn̄kpọ. Nso ikedi utịp n̄kpa Jesus? Jehovah ama enyịme uwa oro nte “n̄kemn̄kem ufak ke ibuot kpukpru owo.” (1 Timothy 2:6) Ke nditịm ntịn̄, Abasi akada ekọmurua uwem Jesus edep m̀mê afak ubonowo osio ke ufụn idiọkn̄kpọ ye n̄kpa.

Bible etịn̄ ediwak ini aban̄a akwa ima oro Andibot akamade owo. Paul ama eti mme Christian ete ke ‘ẹkededep mmọ ke ekọmurua.’ (1 Corinth 6:20; 7:23) Peter ọkọdọhọ ke Abasi ikadaha gold m̀mê silver, edi akada iyịp Eyen esie afak mme Christian osio ke usụn̄ n̄kpa oro mmọ ẹkedude. (1 Peter 1:18, 19) Jehovah ama ada uwa ufak Christ anam ndutịm ndinyan̄a ubonowo nsio ke nsinsi n̄kpa.

Nte Afo Ọyọbọ Ufọn Oto Ufak Christ?

Apostle John ama etịn̄ aban̄a akwa ufọn oro ufak Christ enyenede ke ini enye ekewetde ete: “[Jesus Christ] edi uwa usio-isop mme idiọkn̄kpọ nnyịn, edi idịghe eke nnyịn ikpọn̄,  edi edi eke ofụri ererimbot n̄ko.” (1 John 2:2) Ke akpanikọ, Christ akakpa man afak kpukpru owo. Ndi oro ọwọrọ ke kpukpru owo ẹyebọ ufọn ẹto ọsọn̄urua enọ emi? Baba-o. Ti mbon oro ẹkenyan̄ade, oro iketịn̄de iban̄a ke akpa ibuotikọ. Mbon oro ẹkedide ndinyan̄a mmọ ẹma ẹsụhọde ukpatn̄kpọ ẹsịn ẹnọ mmọ, edi owo mmọ kiet kiet ekenyene ndibe ndụk ukpatn̄kpọ oro. Kpasụk ntre, mbon oro ẹyomde ndibọ ufọn nto uwa ufak Christ ikemeke ndiwan̄ ubọk ntie mbet edidiọn̄ Abasi. Ana mmọ ẹnam n̄kpọ.

Nso ke Abasi oyom ẹnam? John 3:36 asian nnyịn ete: “Owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem, edi iyatesịt Abasi odoro enye ke idem.” Abasi oyom ibuọt idem ke uwa Christ. Edi oyom inam n̄kpọ efen n̄ko. Bible ọdọhọ ete: “Oto ke emi nnyịn inyene ifiọk ite ke imedi idifiọk [Jesus], oro edi, edieke nnyịn ikade iso inịm ibet esie.” (1 John 2:3) An̄wan̄a do ndien nte ke mbemiso ẹnyan̄ade nnyịn ẹsio ke idiọkn̄kpọ ye n̄kpa, ana ibuọt idem ke ufak Christ inyụn̄ inam se Christ etemede.

Akpan usụn̄ kiet ndibuọt idem ke ufak Jesus edi ndiwụt esịtekọm mban̄a n̄kpa esie nnyụn̄ nti n̄kpa oro nte enye eketemede. Mbemiso Jesus akakpade, enye ama ọnọ mme anam-akpanikọ apostle esie ndamban̄a udia, onyụn̄ ọdọhọ mmọ ete: “Ẹka iso ẹnam emi nditi mi.” (Luke 22:19) Mme Ntiense Jehovah ẹnen̄ede ẹma ndidi ufan Eyen Abasi, ẹnyụn̄ ẹnịm ewụhọ esie oro. Isua emi, ẹdinịm Editi n̄kpa Jesus Christ ke Saturday, March 22, ke utịn ama okosụhọde. Nnyịn imọnọ fi ufiop ufiop ikot ite edidụk akpan mbono emi nte Jesus eketemede. Mme Ntiense Jehovah ke edem mbufo ẹyesian fi ini ye ebiet oro ẹdinịmde Editi emi. Afo eyekpep ekese ke Editi emi aban̄a se enyenede ndinam man ufak oro Christ ọkọnọde osio fi ke ufụn idiọkn̄kpọ Adam.

Ibat ibat owo mfịn ẹnen̄ede ẹfiọk ẹnyụn̄ ẹwụt esịtekọm ẹban̄a akwa uwa oro Andibot mmọ ye Eyen esie ẹnamde man ẹnyan̄a mmọ ẹsio ke nsobo. Mbon oro ẹbuọtde idem ke uwa emi ẹnen̄ede ẹkop idatesịt. Apostle Peter ekewet leta ọnọ ekemmọ mme Christian ete: “Mbufo ẹmebuọt idem ye [Jesus] ẹnyụn̄ ẹdara akamba akamba ye ubọn̄ ubọn̄ idatesịt oro inua mîkemeke nditịn̄, nte mbufo ẹbọde utịp mbuọtidem mbufo, kpa edinyan̄a ukpọn̄ mbufo.” (1 Peter 1:8, 9) Afo ndima Jesus Christ nnyụn̄ mbuọt idem ke uwa ufak esie ayanam fi enen̄ede okop idatesịt idahaemi onyụn̄ enyene idotenyịn ndidi se ẹnyan̄ade ẹsio ke idiọkn̄kpọ ye n̄kpa.

[Ndise ke page 6]

Jesus ama ọnọ uwem esie nte n̄kemn̄kem ufak oro abiatde utịp idiọkn̄kpọ Adam

[Ndise ke page 7]

Ẹditi n̄kpa Jesus Christ ke Saturday, March 22, 2008, ke utịn ama okosụhọde