Ndi Ama Ọfiọk?

Ntak emi Jesus ọkọkọkde nnan kiet sụn̄sụn̄?

Mark 8:22-26 etịn̄ nte Jesus akanamde nnan kiet okụt usụn̄ ke Bethsaida. Mbụk oro ọdọhọ ke Jesus akafiari atap esịn enye ke enyịn, ekem obụp se enye okụtde. Enye ọkọbọrọ ete: “Mmokụt mme owo, koro n̄kụt se itiede nte mme eto, edi mmọ ẹsasan̄a.” Ibọrọ esie okowụt ke enye ikekwe n̄kpọ ọfọn. Ekem Jesus ọtọn̄ọ ntak odori enye ubọk ke enyịn, ndien “owo oro okụt n̄kpọ in̄wan̄-in̄wan̄, enyịn esie ẹnyụn̄ ẹkabade ẹfọn, enye onyụn̄ enen̄ede okụt kpukpru n̄kpọ.” Emi owụt ke Jesus ọkọkọk nnan emi sụn̄sụn̄. Ntak-a?

Bible inọhọ ọyọhọ ibọrọ, edi isọn̄ke ndifiọk ntak emi Jesus akanamde ntre. Ikememke utom nnan emi nditọn̄ọ n̄kụt n̄kpọ ke enye ama ekedi nnan ke ediwak isua—mîdịghe toto ke emana. Ke uwụtn̄kpọ: Ini kiet ko, ẹma ẹdọn̄ n̄kpri enan̄ mbakara ke obube man mmọ ẹsinam utom do. Mmọ ẹma ẹnen̄ede ẹmehe ye n̄kịmn̄kịm obube oro, ndien ke ini ẹkesion̄ode mmọ, ama ada ofụri usen kiet mbemiso mmọ ẹkekemede ndikụt n̄kpọ edifọn edifọn. Utọ n̄kpọ emi eyenen̄ede ọsọn̄ ye nnan. Mfịn, iwakke mbon oro ẹnyenede mfịna enyịn, emi mbiausọbọ ẹsikemede ndinam ẹkụt usụn̄. Nte ededi, n̄kpọ esiwak akaha ke mfre owo emi enyenede mfịna enyịn tutu etịmede enye, iyakke enye okụt n̄kpọ edifọn edifọn m̀mê ọfiọk se enye okụtde. Nte ini akade, mfre esitọn̄ọ ndinam enye ọfiọk se enye okụtde.

Jesus ndikọkọk nnan oro sụn̄sụn̄ okowụt ke enye enen̄ede ekere aban̄a nnan oro. Ke akpatre, owo oro ama “enen̄ede okụt kpukpru n̄kpọ,” onyụn̄ ekeme ndifiọk kpukpru se enye okokụtde.

Ntak emi ekesisọn̄de ndikot ikpan̄wed ke eyo Jesus?

Ikọn̄n̄wed oro ẹkesiwakde ndida nnam ikpan̄wed ama esiniọn̄ ke sentimita 23 esịm 28, ubom esie okonyụn̄ esidi sentimita 15 esịm 23. Ẹma ẹsida udiann̄kpọ ẹdian ediwak ikọn̄n̄wed emi ọtọkiet mîdịghe ẹda urụk ọfọn̄ oro ẹdade linen ẹnam ẹkịm mmọ ẹdian ọtọkiet. Ndusụk ini ẹkesida ikọn̄n̄wed oro enen̄erede ọniọn̄ ẹnam ikpan̄wed. Ẹkeda nnyan n̄wed ikpa 17 ẹnam Ikpan̄wed Inyan̄ Inụn̄ Isaiah, ndien ubak oro osụk odude idahaemi edi n̄kpọ nte mita 7. Etie nte ikpan̄wed Isaiah oro Jesus okokotde ke synagogue ke Nazareth ọkọniọn̄ ntre n̄ko.—Luke 4:16, 17.

Kaban̄a mbụk emi, Alan Millard ọdọhọ ke n̄wed esie oro Discoveries From the Time of Jesus ete: “Andikot n̄wed ekesida ubọk ufien awan̄ade “ikpan̄wed,” ada nnasia omụm n̄kan̄ eken awan̄ nte enye osụk okotde. Anaedi Jesus ama enen̄ede awan̄ade ikpan̄wed Isaiah onyụn̄ afiak awan̄ mbemiso ekesịmde ibuot 61 oro enye okokotde ke synagogue.”

Ini oro, n̄wed Isaiah ikenyeneke ibuot ye mme ufan̄ikọ nte enyenede idahaemi. Ke ini ẹkenọde Jesus ikpan̄wed Isaiah ke synagogue ke Nazareth, enye ekenyene ndiyom itien̄wed oro edide Isaiah 61:1, 2 idahaemi ke Bible nnyịn. Ikadaha Jesus ini ‘ndikụt ebiet emi;’ emi owụt ke enye ama enen̄ede emehe ye Ikọ Abasi.