Kpep Nditọ Fo

Timothy—Ama Eben̄e Idem Onyụn̄ Enyịme Ndinam N̄kpọ Abasi

“NDI emeben̄e idem?” Ndi akanam owo obụp fi mbụme emi?— Ọfọn, owo oro okoyom ndifiọk m̀mê emeben̄e idem. Ekeme ndidi enye okoyom ndifiọk m̀mê amakama n̄wed ukpepn̄kpọ fo m̀mê omonyụn̄ ekpep ibuotikọ oro ẹdikpepde. Nte nnyịn idikụtde, Timothy ama eben̄e idem.

Timothy ama enyịme n̄ko. Nte afo ọmọfiọk se oro ọwọrọde?— Ke ini ẹkedọhọde Timothy edinam n̄kpọ Abasi, enye ama enyene ukem edu oro asan̄autom Abasi kiet ekenyenede, emi ọkọdọhọde ete: “Se mi, dọn̄ mi utom.” (Isaiah 6:8) Timothy ama enen̄ede okop inem uwem koro enye ama eben̄e idem onyụn̄ enyịme ndinam n̄kpọ Abasi. Ndi akpama ndikop mbụk emi?—

Timothy akamana ke Lystra, kpa obio emi ekenen̄erede oyom usụn̄ ọkpọn̄ Jerusalem. Lois eka eka esie ye Eunice eka esie ẹma ẹsisịn ifịk ẹkpep N̄wed Abasi. Mmọ ẹma ẹtọn̄ọ ndikpep Timothy Ikọ Abasi idem ke ini enye ekedide nsekeyen.—2 Timothy 1:5; 3:15.

Apostle Paul ama ada Barnabas aka akpa isan̄ ukwọrọikọ esie ke Lystra, ndien etie nte Timothy ekedi ekpri akparawa ini oro. Ekeme ndidi ini emi ke eka Timothy ye eka eka esie ẹkekabade ẹdi mme Christian. Nte akpama ndikop mfịna oro Paul ye Barnabas ẹkesobode?— Ọfọn, mbon oro mîkamaha mme Christian ẹma ẹtọn̄ọ Paul ke itiat tutu enye ọduọ, ẹnyụn̄ ẹdụri enye ẹsio ke obio. Mmọ ẹkekere ke enye akpa.

Mbon oro ẹkenịmde se Paul ekekpepde ẹma ẹkan enye ẹkụk, ndien enye ama adaha ada. Ke ndan̄nsiere, Paul ye Barnabas ẹma ẹkpọn̄ Lystra, edi mmọ ẹma ẹfiak ẹka do ke mîbịghike. Ke ini mmọ ẹkefiakde ẹka, Paul ama ọnọ utịn̄ikọ onyụn̄ asian mme mbet ete: “Nnyịn inyene ndibe ke ediwak ukụt ndụk ke obio ubọn̄ Abasi.” (Utom 14:8-22) Nte ọmọfiọk se ikọ Paul ọkọwọrọde?— Ikọ esie ọkọwọrọ ke mme owo ẹyenam mfịna ye mbon oro ẹnamde n̄kpọ Abasi.  Paul ekewet Timothy ke ukperedem ete: ‘Ẹyekọbọ kpukpru mbon oro ẹyomde ndinam n̄kpọ Abasi.’—2 Timothy 3:12; John 15:20.

Paul ye Barnabas ẹma ẹfiak ẹnyọn̄ọ ufọk ke mmọ ẹma ẹkekpọn̄ Lystra. Ke ọfiọn̄ ifan̄ ẹbede, Paul ama emek Silas ete asan̄a ye imọ, ndien mmọ ẹma ẹfiak ẹka Lystra man ẹkesịn udọn̄ ẹnọ mbufa mbet ke mme ebiet oro Paul ọkọkwọrọde ikọ. Ke ini mmọ ẹkesịmde Lystra, Timothy ama enem esịt ndifiak n̄kụt Paul. Timothy ama akam enen̄ede enem esịt ke ini ẹkedọhọde enye editiene Paul ye Silas. Enye ama eben̄e idem onyụn̄ enyịme ndika.—Utom 15:40–16:5.

Mmọ mbita ẹma ẹsan̄a ata ediwak kilomita ndien ekem ẹdụk ubom. Ke mmọ ẹma ẹkewọrọ ke ubom, mmọ ẹma ẹsan̄a ẹka Thessalonica emi odude ke Greece. Ediwak owo ẹma ẹkabade ẹdi mme Christian do. Edi mbon eken ẹma ẹyat esịt ẹnyụn̄ ẹtọn̄ọ ntịme. Ayak nsịn̄ ẹkpekewot Paul, Silas, ye Timothy, ntre mmọ ẹma ẹkpọn̄ do ẹka Beroea.—Utom 17:1-10.

Paul ama enen̄ede ekere aban̄a nte n̄kpọ eketiede ye mbufa mme andinịm ke akpanikọ ke Thessalonica, ntre enye ama ọdọhọ Timothy afiak aka do. Ndi ọmọfiọk ntak?— Paul ama etịn̄ ntak ọnọ mme Christian ke Thessalonica, ete: ‘Man anam mbufo ẹsọn̄ọ ẹda onyụn̄ ọdọn̄ mbufo esịt man owo ndomokiet okûkop mmemidem.’ Ndi ọmọfiọk ntak emi Paul ọkọdọn̄de Timothy utọ ọkpọsọn̄ utom oro, okposụkedi emi enye ekedide ekpri akparawa?— Ọfọn, mme andibiọn̄ọ ikenen̄ekede ifiọk Timothy, ndien enye ama enyịme ndika. Oro ama enen̄ede oyom uko! Isan̄ esie eketie didie? Ke ini Timothy akafiakde ebịne Paul, enye ama asian Paul nte mbon Thessalonica ẹkenamde akpanikọ. Ntre Paul ekewet mmọ ete: ‘Nnyịn imokop ndọn̄esịt iban̄a mbufo.’—1 Thessalonica 3:2-7.

Timothy ama anam utom ye Paul ke isua duop en̄wen. Ekem ẹma ẹsịn Paul ke ufọk-n̄kpọkọbi ke Rome, ndien Timothy emi ẹkesiode ke ufọk-n̄kpọkọbi ke ndondo oro ama aka okodu ye enye. Ke ini Paul okodude ke ufọk-n̄kpọkọbi, enye ama ewet leta ọnọ mbon Philippi, ndien etie nte Timothy akan̄wam enye ewet leta emi. Paul ọkọdọhọ ete: ‘Ami mmodori enyịn ndidọn̄ Timothy edi ebịne mbufo, koro nnyeneke owo en̄wen eke anamde akpanikọ ntem, emi edinyụn̄ enen̄ede ese aban̄a mbufo.’—Philippi 2:19-22; Mme Hebrew 13:23.

Mme ikọ emi ẹma ẹnam Timothy okop inemesịt. Paul ama enen̄ede ama Timothy sia enye ama eben̄e idem onyụn̄ enyịme ndinam n̄kpọ Abasi. Nnyịn imekere ke afo ayanam ukem oro.

Mme mbụme:

○ M̀mọ̀n̄ ke Timothy okokpon, ndien nso iketịbe ke akpa ini oro Paul akakade do?

○ Nso ke Timothy akanam ke ini ẹkedọhọde enye edisan̄a ye Paul ye Silas?

○ Didie ke Timothy ekenyene uko, ndien ntak emi Paul ekenen̄ede ama enye?

[Ndise ke page 24]

Nso itịbe?