Se Nnyịn Ikpepde Ito Jesus

Iban̄a Obio Ubọn̄ Abasi

Nso idi Obio Ubọn̄ Abasi?

Obio Ubọn̄ Abasi edi ukara oro edikarade ofụri isọn̄. Jesus ọkọdọhọ ete: “Mbufo ẹnyene ndibọn̄ akam ntem, ndien, ẹte: . . . ‘Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’”—Matthew 6:9, 10; Daniel 2:44.

Mmanie ẹdikara ke Obio Ubọn̄ Abasi?

Ẹkeman Jesus man edidi Andikara Obio Ubọn̄ Abasi. Angel ọkọdọhọ eka Jesus ete: ‘Jehovah Abasi ọyọnọ enye ebekpo ete esie David, ndien enye ayakara nte edidem.’ (Luke 1:30-33) Ke adianade do, Jesus ama emek ndusụk mbet esie ete ẹtiene imọ ẹkara. Enye ọkọdọhọ mme apostle esie ete: “Mbufo ẹdi mmọ emi ẹsọn̄ọde ẹda ye ami ke idomo mi; mmonyụn̄ nnam ediomi ye mbufo, kpa nte Ete mi akanamde ediomi ye ami, kaban̄a obio ubọn̄.” (Luke 22:28, 29; Daniel 7:27) Owo 144,000 ke otu mme anditiene Jesus ẹdikara ye enye.—Ediyarade 5:9, 10; 14:1.

Obio Ubọn̄ oro edidu ke m̀mọ̀n̄?

Obio Ubọn̄ Abasi edikara ke heaven. Jesus ọkọdọhọ mme mbet esie ete: “Edieke ami nnyọn̄de n̄ka n̄ketịm itie nnịm nnọ mbufo [ke heaven], nyafiak ndi nnyụn̄ ndida mbufo ẹdidu ye ami, man mbufo n̄ko ẹkpedu ke ebiet eke ami ndude. . . . koro ami nnyọn̄de ntiene Ete.”—John 14:2, 3, 12; Daniel 7:13, 14.

Nso ke Obio Ubọn̄ Abasi edinam ye idiọkido?

Jesus oyosobo mme idiọkowo. Jesus ọkọdọhọ ete: “Ke ini Eyen owo [Jesus] edidide ke ubọn̄ esie, kpukpru mme angel ẹnyụn̄ ẹsan̄a ye enye, ndien enye oyosụhọde etetie ke ebekpo ubọn̄ esie. Ndien  ẹyebon kpukpru mme idụt ke iso esie, enye oyonyụn̄ abahade mme owo kiet ye eken, . . . Ndien mmọ emi [ndiọi owo] ẹyedaha ẹkedụk ke nsinsi edisịbe mfep, edi ndinen owo ẹyedụk ke nsinsi uwem.”—Matthew 25:31-34, 46.

Mmanie ẹdidụn̄ ke isọn̄ ke idak Obio Ubọn̄ oro?

Jesus ọkọdọhọ ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matthew 5:5; Psalm 37:29; 72:8) Mbon oro ẹkpepde ndima kiet eken idahaemi ẹdidụn̄ ke isọn̄. Jesus ọkọdọhọ mme anditiene enye ete: “Ami mmọnọ mbufo obufa ibet, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:34, 35.

Nso ke Obio Ubọn̄ Abasi edinam ọnọ ubonowo ke isọn̄?

Jesus ọyọkọk ubonowo udọn̄ọ. Ke ini Jesus okodude ke isọn̄, enye ama ekpep mme owo aban̄a “obio ubọn̄ Abasi, onyụn̄ anam udọn̄ọ okụre mmọ emi ẹyomde usọbọ.” (Luke 9:11) Apostle John ama okụt Jesus oro ẹkenamde eset ke n̄kukụt, ekem ọdọhọ ete: “N̄kụt obufa enyọn̄ ye obufa isọn̄, . . . n̄kop ọkpọsọn̄ uyo nte otode ke ebekpo ọdọhọ ete: ‘Sese! Ebietidụn̄ Abasi omodu ye owo, . . . Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba.’”—Ediyarade 21:1-4.

Obio Ubọn̄ Abasi ayanam isọn̄ akabade edi Paradise. Anamidiọk emi ẹkewotde ye Jesus ọkọdọhọ ete: “Jesus, ti mi ke ini afo odụkde ke obio ubọn̄ fo.” Ndien Jesus ọbọrọ ete: “Ke akpanikọ ke ndọhọ fi mfịn emi, Afo oyodu ye ami ke Paradise.”—Luke 23:42, 43; Isaiah 11:4-9.

Ke oyomde ntọt efen efen, se ibuot 8 ke n̄wed Nso ke Bible Enen̄ede Ekpep? *

[Ikọ Idakisọn̄]