Ima Ekaeyen Owụt nte Abasi Amade Nnyịn

“Nte n̄wan ekeme ndifre eyen-nsek esiemmọ, nnyụn̄ ntre nditua eyen emi enye amande mbọm? Idem mmọ ẹkeme ndifre, edi ami ndifreke fi.”—ISAIAH 49:15.

KERE nte ekaeyen obokde obufa nsekeyen esie adian ke idem. Emi owụt ke enye enen̄ede ama onyụn̄ ekere aban̄a nsekeyen esie. Eyenan̄wan emi ekerede Pam ọdọhọ ete: “Esịt mi ọkọyọhọ ye idatesịt akpa usen emi n̄kemende nsekeyen mi n̄kama ke ubọk, mma nnyụn̄ mfiọk ke ana nnọ enye ọyọhọ ntịn̄enyịn.”

Ediwak owo ẹnyịme ke ima ekaeyen esinen̄ede anam eyen ọsọp ọkọri, ndien ndụn̄ọde oro ẹnamde owụt ke emi edi akpanikọ. N̄wed oro Esop Kaban̄a Nsọn̄idem Ererimbot ẹsiode ọdọhọ ete: “Mme ndụn̄ọde oro ẹnamde ẹwụt ke nseknditọ oro mme eka ẹsifehede ẹkpọn̄ isikopke inemesịt, ẹsinyụn̄ ẹnen̄ede ẹfụhọ, ndien ndusụk ini ndịk esinam mmọ.” N̄wed oro ama etịn̄ n̄ko aban̄a ndụn̄ọde oro owụtde ke nditọwọn̄ oro mme ẹka ẹmade ẹnyụn̄ ẹnọde ntịn̄enyịn toto ke nsek ẹsinen̄ede ẹfiọk n̄kpọ ẹkan nditọwọn̄ oro owo mînọhọ ntịn̄enyịn.

Alan Schore, kpa prọfesọ oro ekpepde n̄kpọ aban̄a udọn̄ọ ibuot ke UCLA School of Medicine ke United States etịn̄ nte ima ekaeyen edide akpan n̄kpọ ete: “Itie ebuana oro eyen enyenede ye eka esie ayanam eyen oro ekeme ndinyene eti itie ebuana ye mbon en̄wen ke ini enye ọkọride ọwọrọ owo.”

 Edi n̄kpọ mfụhọ nditịn̄ nte ke mfịghe, udọn̄ọ, m̀mê mme afanikọn̄ eken ẹkeme ndinam ekaeyen itịmke inọ eyen esie ntịn̄enyịn, mîdịghe ‘efre eyen-nsek esiemmọ.’ (Isaiah 49:15) Edi utọ n̄kpọ emi isiwakke nditịbe. Akam edi ndammana n̄kpọ eka ndima eyen esie. Mme anam-ndụn̄ọde ẹdọhọ ke ini n̄wan oyomde ndiman eyen, mmọn̄ibọk oro ẹkotde oxytocin, oro odude ke idem esie esinen̄ede awak, onyụn̄ anam enye ekeme ndiman eyen, mmọn̄ibọk emi n̄ko esinam mmọn̄eba ọtọn̄ọ ndiwọrọ. Mmọn̄ibọk emi odu iren ye iban ke idem, ndien ẹdọhọ ke enye n̄ko esinam eka enen̄ede ama eyen esie.

Anie Edi Ntọn̄ọ Ima?

Mbon oro ẹkpepde ke unam okoforo owo ẹdọhọ ke ima oro mîsan̄ake ye ibụk, utọ nte ima ekaeyen ọkọtọn̄ọ ke mbuari, ndien ke mme unam ẹma ẹkeforo owo, mmọ ẹma ẹdima edu emi sia enye ekenyenede ufọn ọnọ mmọ. Ke uwụtn̄kpọ, Mothering Magazine emi odude ke Intanet ọdọhọ ete: “Akpa n̄kpọ oro ọkọkọride ke mfre nnyịn, ke adianade ye enye oro ikadade-da imana ito unam, edi n̄kpọ oro esinamde ifiọk se idem nnyịn oyomde ye se ikpanamde. N̄kpọ emi esinam eka ye eyen ẹnen̄ede ẹdiana kiet.”

Imọfiọk ke ndụn̄ọde oro ẹnamde owụt ke ikpehe mfre emi esinam nnyịn ifiọk se idem nnyịn oyomde ye se ikpanamde. Edi, ndi owụt ifiọk ndikere ke ima ekaeyen ọkọtọn̄ọ ke mbuari oto mfre unam?

Se nte ẹnamde emi an̄wan̄a ke usụn̄ efen. Bible ọdọhọ ke ẹkebot owo ke mbiet Abasi, oro ọwọrọ ke mme owo ẹnyene mme edu Abasi. (Genesis 1:27) Ima edi n̄wọrọnda edu Abasi. Apostle John ekewet ete: “Owo eke mîmaha ima ifiọkke Abasi.” Ntak-a? “Koro Abasi edi ima.” (1 John 4:8) Mbọk tịm fiọk ete ke ufan̄ikọ Bible emi idọhọke ke Abasi enyenyene ima. Utu ke oro, enye ọdọhọ ke Abasi edi ima. Abasi edi Ntọn̄ọ ima.

Bible ọdọhọ ke “Ima enyenyene anyanime onyụn̄ ọfọn ido. Ima ifịbeke ufụp, inamke inua, ikohokede idem, inamke se mîdotke, iyomke ufọn esiemmọ, iyatke esịt. Inịmke ibat idiọk. Idarake ukwan̄ido, edi adara se idide akpanikọ. Enye ememe kpukpru n̄kpọ, enenịm kpukpru n̄kpọ ke akpanikọ, ododori enyịn ke kpukpru n̄kpọ, ọyọyọ kpukpru n̄kpọ. Ima idibehe ifep ke nsinsi.” (1 Corinth 13:4-8) Ndi owụt ifiọk ndikere ke utọ n̄wọrọnda edu emi ekedidu ke mbuari?

Didie ke Emi Otụk Fi?

Nte okosụk okotde se Bible etịn̄de aban̄a ima ke enyọn̄ emi, ndi enen̄ede ọdọn̄ fi ndinyene owo emi amade fi ntre? Edi ndammana n̄kpọ ndinyene utọ udọn̄ oro. Ntak-a? Koro ‘nnyịn idi nditọ Abasi.’ (Utom 17:29) Ẹkebot nnyịn ke usụn̄ oro ikemede ndinyene utọ ima emi nnọ ekemmọ owo. Nnyịn imekeme nditịm nnịm ke Abasi enen̄ede ama nnyịn. (John 3:16; 1 Peter 5:6, 7) Itie N̄wed Abasi oro ẹdade ẹtọn̄ọ ibuotikọ emi owụt ke ima oro Abasi amade nnyịn enen̄ede okpon akan ima ekaeyen!

Nte ededi, afo emekeme ndikere: ‘Edieke Abasi amade nnyịn ntem, onyụn̄ enyenede ọniọn̄ ye odudu, ntak emi enye mînamke ndutụhọ etre-e? Ntak emi enye esiyakde nditọwọn̄ ẹkpan̄a, ayakde mme owo ẹka iso ẹfịk mbon en̄wen, onyụn̄ ayakde mbon idiọkitọn̄ ẹbiat isọn̄ emi?’ Mme mbụme emi ẹdi akpan mbụme oro anade ẹnọ ata nnennen ibọrọ.

Inamke n̄kpọ m̀mê nso ke mme owo ẹtịn̄, isọn̄ke ndifiọk ibọrọ mbụme emi. Ediwak miliọn owo ke ediwak idụt ẹfiọk ibọrọ mbụme emi ke ndikpep Bible ye Mme Ntiense Jehovah. Mbon oro ẹwetde magazine emi ẹsịn udọn̄ ẹnọ fi ndinam ntre n̄ko. Nte afo akade iso ọkọ ifiọk Abasi ke ndikpep Ikọ esie nnyụn̄ nse mme n̄kpọ-obot esie, afo eyedi edifiọk ke nnyịn imekeme ndisan̄a n̄kpere Abasi inyụn̄ itịm ifiọk enye. Ikọ esie ọdọhọ ke Enye ‘iyomke usụn̄ ikpọn̄ owo nnyịn kiet kiet.’—Utom 17:27.

[Se ẹwetde ke ikpọ abisi ke page 8]

Ima oro Abasi amade nnyịn enen̄ede okpon akan ima ekaeyen