Abasi Oro Amade Ndifen Ndudue
San̄a Kpere Abasi
Abasi Oro Amade Ndifen Ndudue
“AFO, Ọbọn̄, ọmọfọn, omonyụn̄ ama ndidahado.” (Psalm 86:5) Mme ikọ ndọn̄esịt oro Bible etịn̄de mi ẹwụt ke Jehovah esima ndifen ndudue nnyịn. Se iketịbede inọ apostle Peter owụt ke Jehovah ‘esiwak ndidahado’ nnọ owo.—Isaiah 55:7.
Peter ekedi kiet ke otu ata ufan Jesus. Edi enye ama abak owo enyịn anam akwa idiọkn̄kpọ ke okoneyo oro ẹkeyomde ndiwot Jesus. Peter ama akan̄ Jesus an̄wan̄wa utịm ikata ke esịt okụre oro ekekperede ebiet oro ẹkebiomde Jesus ikpe ke ufịk. Ke Peter ama akakan̄ Jesus ọyọhọ utịm ikata, Jesus ama “ọwọn̄ọde ese Peter.” (Luke 22:55-61) Ndi emekeme ndikere nte eketiede Peter ke idem ke ini Jesus ọkọwọn̄ọrede ese enye? Ke ini Peter ọkọfiọkde ke imanam akwa idiọkn̄kpọ, enye ama “ofụhọ onyụn̄ atua eyet.” (Mark 14:72) Apostle emi ama akabade esịt, ndien anaedi enye ama ekere m̀mê Abasi ekeme ndisụk mfen nnọ imọ ke emi ima ikakan̄ Jesus ofụri utịm ikata mi.
Ke Jesus ama ekeset ke n̄kpa, enye ama enyene nneme ye Peter ndien nneme emi ama anam Peter enen̄ede enịm ke ẹfen ndudue imọ. Jesus iketịn̄ke uyat uyat ikọ ndomokiet, ikonyụn̄ ibiomke Peter ikpe. Utu ke oro, enye okobụp Peter ete: “Nte afo amama mi?” Peter ama ọbọrọ ete: “Ih, Ọbọn̄, afo ọmọfiọk ete mmama fi.” Jesus ọdọhọ enye ete: “Bọk nditọerọn̄ mi.” Jesus ama ọtọn̄ọ ntak obụp ukem mbụme oro, Peter ama afiak ọbọrọ nte enye ọkọbọrọde ke akpa, onyụn̄ etie nte enye ama enen̄ede ọsọn̄ uyo isan̄ enye emi. Jesus ọdọhọ enye ete: “Bọk n̄kpri erọn̄ mi.” Ekem Jesus afiak obụp ukem mbụme oro ọyọhọ utịm ikata, ete: “Nte afo amama mi?” Isan̄ enye emi, “Peter ofụhọ” onyụn̄ ọdọhọ ete: “Ọbọn̄, afo ọmọfiọk kpukpru n̄kpọ; afo ọmọfiọk ete mmama fi.” Jesus ọdọhọ enye ete: “Bọk n̄kpri erọn̄ mi.”—John 21:15-17.
Ntak emi Jesus okobụpde mbụme oro enye ama ọkọfọfiọk ibọrọ? Jesus ọfiọk se isịnede owo ke esịt, ntre enye ama ọfiọk ke Peter ama imọ. (Mark 2:8) Jesus ndikobụp mbụme oro ama ọnọ Peter ifet ndidọhọ Jesus ofụri utịm ikata ke imọ imama enye. Jesus ndikọdọhọ: “Bọk nditọerọn̄ mi. . . . Bọk n̄kpri erọn̄ mi. . . . Bọk n̄kpri erọn̄ mi,” ama anam Peter ọfiọk ke Jesus okosụk enyenyene mbuọtidem ke idem imọ. Kamse, Jesus ọkọdọhọ Peter an̄wam imọ ekpeme ata ọsọn̄urua inyene imọ—ndima mbet imọ. (John 10:14, 15) Ke akpanikọ, anaedi esịt ama ofụre Peter ke ini enye ọkọfiọkde ke Jesus okosụk enyenyene mbuọtidem ke idem imọ!
Ana ata in̄wan̄-in̄wan̄ ke Jesus ama efen ọnọ apostle Peter sia enye ama akakabade esịt. Sia Jesus enen̄erede ebiet Ete esie ke edu ye ke edinam, nnyịn imenịm ke Jehovah n̄ko ama efen ọnọ Peter. (John 5:19) Jehovah isimen̄eke ndifen nnọ owo, enye edi Abasi mbọm, esinyụn̄ “ama ndidahado” nnọ anamidiọk oro akabarede esịt. Nso n̄kpọ ndọn̄esịt ke emi edi ntem!