“Eyenan̄wan Israel” Eyomfịn

URUA iba mbemiso ẹnịmde Editi n̄kpa Jesus, kpukpru owo ke ubon mme Abigayl oro ẹkedụn̄de ke Praia Grande ke Brazil, ẹma ẹwet enyịn̄ mbon oro mmọ ẹkeyomde ndikot Editi. Ẹma ẹnọ Abigayl emi ekedide isua itiokiet n̄wedikot kiet ẹnyụn̄ ẹbụp m̀mê anie ke enye edikot.

Enye ama ọbọrọ ete, “Owo oro esimade ndituak inua imam ke ini enye okụtde mi.”

Ete ye eka esie ẹma ẹbụp m̀mê anie edi oro.

Enye ama ọdọhọ ke edi owo oro esitiede ke n̄kpọitie mbon n̄kpọnnam.

Ke usen inan̄ ẹma ẹkebe, Abigayl ama owụt ete ye eka esie owo emi. Enye ekere Walter, ndien enye ama odụn̄ ekpere Ufọkmbono Obio Ubọn̄. Ke ini Walter ekedide isua 28, enye ama enyene mbabuat unọmọ ubomisọn̄ emi anamde enye edi mbụn̄ọ ke se ibede isua 15 idahaemi. Enye ama enyene mbon ukpeme iba sia enye ekedide imọ owo. Ke ete ye eka Abigayl ẹma ẹkebọ unyịme ẹto mbon ukpeme oro, mmọ ẹma ẹdọhọ Walter ke ekpri eyenan̄wan mmimọ oyom ndinọ enye n̄wedikot.

Ke Abigayl ama ọkọnọ Walter n̄wedikot, enye ama asian Walter ete: “Ẹnọ kpukpru owo ke Ufọkmbono Obio Ubọn̄ nnyịn ediwak n̄wedikot, edi ẹnọ mi kiet emi kpọt. Ntre, afo ikpọn̄ ke ami n̄kot. Edieke mûdịghe, ọwọrọ ndinyeneke owo ndomokiet. Edi edieke edidide, esịt eyenen̄ede enem mi, Jehovah edinyụn̄ enem esịt akan.”

Ke usen Editi oro, Mme Ntiense eken ọkọrọ ye Abigayl ke ẹkesụk ẹnam Ufọkmbono Obio Ubọn̄ asana ẹben̄e Editi ke mbubịteyo. Uwemeyo oro, ẹma ẹmen Walter ke ubomisọn̄ esie ẹbe do, ndien enye ada okụt Abigayl onyụn̄ ọdọhọ awat-ubomisọn̄ esie atuak ada. Enye ama eberede window onyụn̄ obụp Abigayl se enye anamde do. Abigayl ama ọdọhọ ke inam ufọkmbono oro eye ọnọ enye.

Esịt ikanaha Abigayl sụn̄ ke mbubịteyo oro. Utịn̄ikọ ama ọtọn̄ọ, edi enye okosụk ese usụn̄ m̀mê Walter edisịm. Etise Walter ye mbon ukpeme esie ẹdụk inikiet inikiet. Esịt ama enen̄ede enem Abigayl, enye onyụn̄ atuak inua imam. Ke utịn̄ikọ ama okokụre, Walter ama ọdọhọ ke imọ ima idadaha isan̄ ndika obio efen, edi imọ ikpụhọ ekikere ifiak ididụk Editi ke ntak Abigayl. Ekem enye adian do ete: “Utịn̄ikọ oro ama enen̄ede otụk mi.” Enye ama ọdọhọ ẹnọ imọ Bible onyụn̄ ọtọn̄ọ ndikpep n̄kpọ nnyụn̄ ndụk mme mbono esop.

Eyeneka Walter an̄wan ama ọdọhọ ke imọ imenen̄ede iyom ndikụt Abigayl emi eyeneka imọ esitịn̄de aban̄a ndien ndien. Ke ini enye okokụtde Abigayl, ama enen̄ede enem enye ndifiọk utọ eyenan̄wan emi Abigayl edide, onyụn̄ ọdọhọ ete: “An̄wan̄a mi ndien ntak esịt enen̄erede enem eyeneka mi ntre.”

Walter ke ekpep n̄kpọ, ke onyụn̄ odụk mme mbono esop. Enye esikam ọbọrọ mbụme onyụn̄ abuana se enye ekpepde ye mbon en̄wen. Ke akpanikọ, ekpri Abigayl anam nnyịn iti eyenan̄wan Israel oro akan̄wamde Naaman edi edifiọk ata Abasi, Jehovah.—2 Ndidem 5:2-14.