Mbụk Noah ye Ukwọ Idịghe N̄ke

NDI ọdọn̄ fi ndikụt ererimbot oro ọfọnde akan emi—ererimbot oro mme owo ẹdụn̄de ke emem ye kiet eken? ererimbot oro ekọn̄, ubiatibet, ye ufịk mîdụhe? Ke edide ntre, mbụk oro ekemede ndidi emetịm ọfiọk mi ọyọnọ fi nsịnudọn̄. Oro edi mbụk Noah, kpa ata eti owo oro ọkọkọn̄de ubom emi akanyan̄ade enye ye ubon esie ke ini ukwọ okofụkde ofụri isọn̄ onyụn̄ osobo mme idiọkowo.

Iwakke mbụk oro ẹtịmde ẹfiọk nte mbụk Noah. Mbụk emi odu ke n̄wed Genesis ibuot 6 esịm 9, onyụn̄ odu ke Koran, ndien ata ediwak owo ke ofụri ererimbot ẹsida mbụk emi ẹtop n̄ke. Ndi Ukwọ emi ama etịbe ke akpanikọ, m̀mê onyụn̄ edi n̄ke oro ẹkede man ẹsịn udọn̄ ẹnọ mme owo ẹnam se ifọnde? Ke ediwak isua ikie idahaemi, ntaifiọk ye mme ekpepn̄kpọ mban̄a ido ukpono ke ẹyoyom ibọrọ mbụme emi. Edi Bible, kpa Ikọ Abasi, anam mbụk emi enen̄ede an̄wan̄a—mbụk emi edi akpanikọ, idịghe n̄ke. Kere ban̄a emi ise:

Genesis asian nnyịn nnennen isua, ọfiọn̄, ye usen oro Ukwọ emi ọkọtọn̄ọde, asian nnyịn ini ye ebiet oro ubom emi akabakde, onyụn̄ asian nnyịn ini oro mmọn̄ akasatde ke isọn̄. Ẹsian nnyịn n̄ko nte ubom oro eketiede—nte ẹkekọn̄de enye, nte enye okokponde eketre, ye mme n̄kpọ oro ẹkedade ẹkọn̄ enye. Enye itiehe nte n̄ke emi owo mîsinamke n̄kpọ an̄wan̄a.

Itie Bible iba oro ẹbatde udịm ubon owo ẹsọn̄ọ ke Noah ama odu. (1 Chronicles 1:4; Luke 3:36) Ezra ye Luke, emi ẹkewetde udịm ubon emi, ẹma ẹsitịn̄ enyịn ẹnam ndụn̄ọde. Luke ama odụn̄ọde okụt ke Jesus Christ okoto ubon Noah.

Prọfet Isaiah ye Ezekiel ye apostle Paul ye Peter ẹma ẹtịn̄ n̄kpọ ẹban̄a Noah m̀mê Ukwọ.—Isaiah 54:9; Ezekiel 14:14, 20; Mme Hebrew 11:7; 1 Peter 3:19, 20; 2 Peter 2:5.

Jesus Christ ama etịn̄ aban̄a Ukwọ oro ete: “Kpa nte ekedide ke usen Noah, kpasụk ntre ke edidi n̄ko ke usen Eyen owo: mmọ ẹkedia n̄kpọ, ẹnyụn̄ ẹn̄wọn̄ n̄kpọ, irenowo ẹdọ ndọ, ẹda iban ẹnọ ke ndọ, tutu esịm usen emi Noah odụkde ke ubom, ndien ukwọ edi edisobo mmọ kpukpru.” (Luke 17:26, 27) Edieke Ukwọ oro mîketịbeke, ọwọrọ ikọ Jesus aban̄ade “usen Eyen owo” ikpenyeneke ufọn.

Apostle Peter ama ebem iso etịn̄ ke “mbon nsahi” ẹyedu, emi ẹdisakde se Bible etịn̄de. Enye ọkọdọhọ ke ‘mmọ ẹkoi ẹfre ẹte ke ererimbot eyo Noah ama okụt nsobo ke ini ẹkedade ukwọ ẹfụk enye.’ Ndi nnyịn ikpenyene ndikokoi mfre emi n̄ko? Baba-o! Peter ama aka iso ete: “Ẹmụm enyọn̄ ye isọn̄ emi ẹdude ke emi ẹnịm ẹnọ ikan̄ ẹnyụn̄ ẹnịm ẹnọ usen ubiereikpe ye nsobo mbon unana uten̄e Abasi.”—2 Peter 3:3-7.

Abasi ayafiak osobo mme idiọkowo, ndien mme owo ẹyefiak ẹbọhọ. Edieke ikpebede uwụtn̄kpọ Noah, nnyịn imekeme ndisịne ke otu ndinen owo oro ẹdibọhọde ẹdụk ererimbot oro ọfọnde akan emi.