Mbụme Oro Mme Andikot Ẹbụpde

Ndi Ukwọ Eyo Noah Ama Ofụk Ofụri Isọn̄?

Se ikande isua 4,000 ẹmebe tọn̄ọ Ukwọ eyo Noah eketịbe. Ntre sia mîdụhe owo ndomokiet mfịn oro okokụtde Ukwọ oro, idụhe owo oro ekemede ndisian nnyịn nte enye eketiede. Nte ededi, Bible etịn̄ n̄kpọ aban̄a Ukwọ oro. Enye ọdọhọ ke Ukwọ oro ama ofụk obot oro okokon̄de akan ini oro.

Bible ọdọhọ ete: “Ndien ukwọ odu ke isọn̄ ke uwemeyo aba . . . Mmọn̄ onyụn̄ okpon eti-eti ke isọn̄ onyụn̄ ofụk kpukpru edikon̄ obot emi ẹdude ke idak ofụri enyọn̄. Mmọn̄ okon̄ akan isọn̄ ibio idomo okụk efụt [n̄kpọ nte mita itiokiet ye ubak]; onyụn̄ ofụk obot.”—Genesis 7:17-20.

Ndusụk owo ẹkeme ndikere ke se Bible etịn̄de aban̄a Ukwọ ofụri ererimbot edi n̄ke m̀mê n̄kponinua. Ekikere emi inenke! Ke akpanikọ, mmọn̄ osụk ofofụk akamba ikpehe isọn̄. Oro edi, edieke ẹbaharede ofụri isọn̄ ke itie duop, se ikande mbahade itiaba edi mmọn̄. Emi owụt ke mmọn̄ osụk ofofụk isọn̄. N̄ko edieke ikpọ eboho ice oro ẹdude ke isọn̄ ẹkpetarade, mmọn̄ oro odude ke inyan̄ ọkpọdọk ofụk ikpọ obio nte New York ye Tokyo.

Ntaifiọk emi ẹkpepde n̄kpọ ẹban̄a isọn̄ edere n̄kan̄ usoputịn United States ẹnịm ke enyene-ndịk ukwọ oro awakde esịm 100 ẹma ẹtịbe do ke anyan ini ko. Ẹdọhọ ke kiet ke otu ukwọ oro ama okon̄ ke mita 600 [m̀mê nte ufọk oro enyenede enyọn̄ 200], onyụn̄ ọsọp ke kilomita 105 ke hour kiet. Ntaifiọk eken ẹkụt mme n̄kpọ oro anamde mmọ ẹnịm ke ekeme ndidi Ukwọ eyo Noah ama etịbe.

Nte ededi, mbon oro ẹnịmde ke Bible edi Ikọ Abasi ẹnen̄ede ẹnịm ke Ukwọ eyo Noah ama ofụk ofụri isọn̄. Jesus ọkọdọhọ Ete esie ete: “Ikọ fo edi akpanikọ.” (John 17:17) Apostle Paul ọkọdọhọ ke Abasi oyom “kpukpru orụk owo [ẹnyene] edinyan̄a ẹnyụn̄ ẹsịm nnennen ifiọk akpanikọ.” (1 Timothy 2:3, 4) Edieke Ikọ Abasi ọkpọdọn̄ọde n̄ke, ndi Paul ekpekekeme ndikpep mme anditiene Jesus n̄kpọ mban̄a Abasi ye uduak Esie?

Jesus ama enịm ke Ukwọ oro ama etịbe ye nte ke enye ama ofụk ofụri isọn̄. Ke akwa ntịn̄nnịm ikọ esie, Jesus ọkọdọhọ ke kpa nte n̄kpọ eketiede ke eyo Noah, ke kpa ntre ke editie ke ini edidu imọ ye ke utịt editịm n̄kpọ emi. (Matthew 24:37-39) Apostle Peter ama ewet n̄ko aban̄a Ukwọ eyo Noah ete: “Ererimbot emi okodude adan̄aoro ama okụt nsobo kpa ke mme usụn̄ emi ke ini ẹkedade ukwọ ẹfụk enye.”—2 Peter 3:6.

Edieke Noah mîkpekedịghe ata owo, ukwọ oro okofụkde ofụri isọn̄ okonyụn̄ edide n̄ke, ntọt oro Peter ye Jesus ẹkenọde mbon oro ẹdude uwem ke mme akpatre usen emi ikpenyeneke ufọn. Ukwọ eyo Noah ekedi ntọt ọnọ ofụri ererimbot. Edi owo oro ekerede ke Ukwọ oro ekedi n̄ke idifiọkke se ntọt Bible emi ọwọrọde, emi onyụn̄ ekeme ndinam enye ibọhọke nsobo oro okponde akan Ukwọ eyo Noah.—2 Peter 3:1-7.

Abasi ama etịn̄ ikọ ndiwụt ke iyaka iso itua ikọt imọ mbọm. Enye ọkọdọhọ ete: “Kpa nte n̄kọn̄wọn̄ọde, nte ke mmọn̄ Noah idiyọhọke aba ifụk isọn̄; kpa ntre ke n̄kọn̄wọn̄ọ nte ke nditọhọke aba ye afo, ndinyụn̄ nduarike aba fi.” Ukem nte Ukwọ eyo Noah okokponde ofụk ofụri isọn̄, ntre n̄ko ke ima mfọn-ido Abasi edikpon ye mbon oro ẹbuọtde idem ke enye.—Isaiah 54:9.