Leta Nicaragua

“Ama Esịm Akpa Coco, Dụk Nnasia”

“EDIYOM awat ata okopidem ubomisọn̄, akama ukwak udịbede ubomisọn̄, onyụn̄ akama aranuwat. Diọn̄ọ ke ọyọwọk okpụk oro ofụkde ọkpọ ubomisọn̄ fo. Ama esịm akpa Coco, dụk nnasia.”

Se ekemmọ isụn̄utom emi eketịn̄de ikọnọhọ mi nsịnudọn̄ ndomo esisịt. Kpa ye oro, mma ntọn̄ọ isan̄ Tuesday usenubọk kiet man n̄kodụk mbono Mme Ntiense Jehovah ke Wamblán, kpa ekpri obio kiet emi odude ke edere edere Nicaragua.

Mma ndụk akani okopidem ubomisọn̄ mbiomo mi ntọn̄ọ uwat ke n̄kpọusen, n̄wat nsan̄a ediye usụn̄ oro otode Alaska aka Chile. Ke mma n̄kesịm Jinotega, mma ndụk usụn̄ oro owo mîsịnke itai oro mbio obio oro ẹkotde feo, emi ọwọrọde ikọn̄wọ. Mbemiso n̄kawatde mbe obio oro, mma n̄kụt ufọkurua iba oro ẹkotde kiet Utịben̄kpọ Abasi, ẹkot enye eken Ediset ke N̄kpa.

Usụn̄ akafian̄ade nte urụkikọt, ọdọdọk, ososụhọde. N̄kawat nte ekwọn̄ mbe mfafaha usụn̄ oro etiede ebeden̄ ebeden̄. Mma n̄wat mbe ata akamba n̄kpọdiọhọ mmọn̄ ke ebeden̄ oro ntọn̄enyọn̄ okofụkde. Nte n̄kawatde mbe ntọn̄enyọn̄ oro, mma nda n̄kụt ndiye eto.

Akayak nsịn̄, bọs oro ekemende usụn̄ enyene ọkpọkọtọ mi owot ke ini n̄koyomde ndibe mfafaha inụk kiet. Bọs oro ama osion̄o nsụn̄ikan̄ ọyọhọ usụn̄, onyụn̄ atịgha itiat asuan ke usụn̄. Mbon oro ẹsiwatde ubomisọn̄ idat idat ẹyọyọhọ Nicaragua, mmọ ẹsiwet mme nditịk enyịn̄ emi ke ubomisọn̄ mmọ: Andikan, Ikpeyen, Asabọ, m̀mê Atautop.

Etisịm uwemeyo, mma n̄wat nsịm Pantasma. Mma n̄kụt ufọk obukpọk kiet, ẹnyụn̄ ẹkpọri ebiet oro ediye ediye. Eketie nte se nsikụtde ke n̄wed mbụkeset: Ọbọn̄ kiet etie ke akpakaha, ebua ana ke idak eto, nnyụn̄ n̄kụt enan̄-mbakara iba oro ẹnyenede ukpatn̄kpọ oro ẹdade eto ẹnam ikpat. Mma nnyụn̄ n̄kụt udịm nditọ ufọkn̄wed ẹnyọn̄ọde n̄wed ke ekpri obio kiet. Mmọ ẹkesịne blu blu ọfọn̄ ẹnyụn̄ ẹwọrọ ẹfiọrọ ke usụn̄ nte mbufụt mmọn̄ emi ọtọde emen esụk.

Utịn ama asiaha nte n̄kperede Wiwilí nnyụn̄ nda n̄kụt akpa Coco. Akpa emi okpon etieti onyụn̄ ọfiọrọ ke akamba ikpehe obio oro. Mma nti se ẹkedọhọde nnam mma nsịm akpa emi. Mma n̄n̄wọn̄ọde ndụk nnasia nnyụn̄ ntọn̄ọ ndiwat ke enyene-ndịk usụn̄ oro edide kilomita 37 mbemiso nsịmde Wamblán.

 Mma n̄wat ke ata idiọk usụn̄ emi mbe n̄kpọ nte idịm itiaita m̀mê usụkkiet. Nte ndomode ndifep ukpe ke usụn̄, mma nsio ntọn̄ mfụk usụn̄. Ke akpatre, mma ndisịm Wamblán emi okodude ke esịt akai, kpa ebiet emi n̄kakade.

Etie nte kpukpru owo ẹkedemede ke ebe inan̄ usenubọk. Ekikọ unen oro ẹkekpọkde ẹma ẹnam mbak ndemede, mma ndaha nda nnyụn̄ nsan̄a ndụk akpan efak obio oro. Ufuọn̄ inin̄e-inin̄e uyo oro ẹkesan̄de ama ọyọhọ ofụm.

Ndise Paradise oro mme ewet ndise ẹwetde ẹyọyọhọ mme ibibene. Ẹwet enyịn̄ nsio nsio inịn̄e-inịn̄e mmịn oro ẹnyamde ẹdian ke mme ufọkurua. Ẹdian mme n̄wed oro ẹtide owo se akpatre ukara ita oro ẹkekarade ẹken̄wọn̄ọde. Ẹda ndiye tian ye simen ẹbọp mme ekwe.

Mma n̄kọm mmọ Adiós ke usem Nicaragua, emi ọwọrọde, mmọkọm-o. Mme owo ẹma ẹtuak inua imam ẹnyụn̄ ẹtịn̄ ikọ ufan ufan ye ami. Uyom ubomisọn̄ ye eke enan̄-mbakara oro ẹkesan̄ade ẹbe ẹma ẹnam imenede uyo ineme nneme man mme owo ẹkop se itịn̄de.

Mme owo ẹma ẹtọn̄ọ ndibehe mbubịteyo Friday man ẹdụk mbono usen iba. Ndusụk mmọ ẹkesasan̄a, mmọ eken ẹwat ke enan̄-mbakara, ndusụk ẹwat ke ubomisọn̄ mbiomo. Ndusụk nditọwọn̄ ẹkesịne ikpaukot ọkpọ ẹsan̄a hour itiokiet. Mmọ ẹma ẹsan̄a ẹbe mme ebiet oro ẹkebụkde bọmb ye mmọn̄ oro etuet ẹyọhọde. Ndusụk mbon oro ẹketode anyan ebiet ẹdi ẹkekama esisịt udia—edesi oro ẹdade ikpọn̄ edi ẹtem. Ntak emi kpukpru mmọ ẹkedide mbono emi?

Mmọ ẹkedi ndisọn̄ọ mbuọtidem oro mmọ ẹnyenede nte ke ini iso ọyọfọn akan emi, n̄kop nte ẹkpepde Bible, nnyụn̄ nnem Abasi esịt.

Saturday ama edisịm. Otuowo oro ẹbede owo 300 ẹma ẹsụhọde ẹtetie ke nnyan n̄kpọitie ye ke n̄kpọitie ọkpọ ke ekpri efe. Mme ẹka ẹma ẹnọ nditọ mmọ eba. Mme edi ẹma ẹkụni, ekikọ unen ẹnyụn̄ ẹkpọk ke n̄kpere oro.

Eyo akpakasiak owo ibuot. Kpa ye oro, mme owo ẹma ẹnen̄ede ẹkpan̄ utọn̄ ẹkop utịn̄ikọ. Mmọ ẹma ẹtiene ẹkụbọde Bible ke ini etịn̄ikọ asiakde mme itie N̄wed Abasi, ẹkwọ ikwọ, ẹnyụn̄ ẹnen̄ede ẹkpan̄ utọn̄ ke ini ẹbọn̄de akam.

Ke mbono ama akasuana, mma ntiene nditọwọn̄ mbre n̄kanda. Ekem ima idụn̄ọde se mmọ ẹkewetde. Mma n̄wụt mmọ ndise ntantaọfiọn̄ ke kọmputa mi. Mmọ ẹma ẹtuak inua imam, mme ete ye eka mmọ ẹnyụn̄ ẹkop inemesịt.

Ẹtibọp enyịn itat, mbono ama asuana, ndien kpukpru owo ẹkenyene ndifiak nsịm ufọk. Mma mfiak edem usen oro. Esịt ama enen̄ede enem mi, nnyụn̄ mma mbufa ufan oro n̄kenyenede. Mmebiere ndikpebe mmọ, ndiyụhọ ye se nnyenede, nnyụn̄ n̄ka iso mbet Abasi.

[Mme ndise ke page 17]

Mme ubon ẹma ẹsan̄a ediwak kilomita ẹdidụk mbono ke Wamblán