Mma Ndifiọk nte Uwem Ọsọn̄de Urua

SE NYOMDE NDIBỤK EMI EKETỊBE KE USENUBỌK APRIL 16, 2007. Mma n̄n̄wịne nna ke inụk ọfis kiet emi okodude ke ọyọhọ enyọn̄ ita ke ufọkn̄wed ntaifiọk oro ẹkotde Virginia Polytechnic Institute and State University, m̀mê Virginia Tech. Se iketịbede usenubọk emi ama afiak eti mi nte uwem ọsọn̄de urua ye nte ke akpana inen̄ede ikọm Abasi ke usen kiet kiet oro idude uwem.

N̄koyom ndikpọn̄ ọfis mi n̄ka ọyọhọ enyọn̄ iba n̄kosio leta mi. Prọfesọ kiet ama ọdọhọ ndọk ndi ọfis imọ ndin̄wam imọ ndiọn̄ kọmputa imọ. Nte ikodụkde ọfis esie, ima ikop ẹtopde ikan̄ ntịme ntịme ke ọyọhọ enyọn̄ iba. Nnyịn ikọfiọkke se iketịbede, ntre ima isọsọp ibe idụk ọfis esie, ikọbi usụn̄, inyụn̄ itie ke nyekidem ibet se iditịbede inọ nnyịn. Mma n̄n̄wịne nna ke inụk kiet nnyụn̄ mbọn̄ akam nnọ Jehovah Abasi, mben̄e enye nte eteme mi se ndinamde.

Nte ikosụk idịbede do, mma nti se iketịbede ke isua 15 oro ẹkebede. N̄kesidiọn̄ ubomisọn̄ ini oro. Ekpri aranuwat oro owoutom nnyịn akakamade ama obụbede ikan̄. Nnyekidem ama anam enye edue otop ikan̄ oro ofụk mi ke iso! Ikan̄ ama ata mi tutu n̄kpere n̄kpa. Ẹma ẹmen mi ke ekpri ubomofụm ẹka ufọkibọk oro ẹsisọbọde ikan̄ ndien n̄kodu do ke ofụri ọfiọn̄ ita ye ubak. Ke ẹma ẹkesọbọ mi idem ke ofụri ọfiọn̄ ition, mma nnyọn̄ ufọk, nnyụn̄ n̄kọm Abasi sia mmen̄kakpaha. Se iketịbede emi ama ekpep mi ndida usen kiet kiet oro ndude uwem ke ọsọn̄urua. Enye n̄ko anam nnen̄ede mbiere ndida uwem mi nnam n̄kpọ nnọ enye emi ọnọde mi uwem, Jehovah Abasi—nte kiet ke otu Mme Ntiense esie.—Psalm 90:12; Isaiah 43:10.

Unọmọ emi ama obiomo mi ndo tutu n̄kemeke aba ndidiọn̄ ubomisọn̄, ntre mma n̄kpep ndidiọn̄ kọmputa, ndien ufọkn̄wed Virginia Tech ẹma ẹda mi ke utom. Se ikadade mi ika ufọkn̄wed oro usenubọk oro edi oro.

Nte ẹkesụk ẹtopde ikan̄, nnyịn ikọfiọkke ke ẹtop mme owo ke idak ufọkenyọn̄ oro nnyịn ikodude ke usụn̄ oro akanam mîtịbeke ke United States. Kpukpru emi ẹketre ke ini owotowo emi okotopde idemesie owot, ke ama okowot owo 32. Ke n̄kpọ nte minit 20 ẹma ẹkebe tọn̄ọ emi eketịbe, ima ikop uyom mme bodisi ke usụn̄otop. Ima ikot mmọ, mmọ ẹma ẹnyụn̄ ẹdinyan̄a nnyịn.

Enyene-ndịk n̄kpọ emi ekpep mi ke uwem owo ekeme ndibe mfep ini ekededi. (James 4:14) Edi akpan n̄kpọ didie ntem ndibuọt idem ke Jehovah Abasi, nnyụn̄ nda usen kiet kiet oro idude uwem nte ọsọn̄urua enọ oro enye ọnọde nnyịn!—Psalm 23:4; 91:2.

[Ebiet Ẹdade Ndise Ẹto ke page 30]

AP Photo/The Roanoke Times, Alan Kim