“Ẹdi Mme Andikpebe Abasi”
San̄a Kpere Abasi
“Ẹdi Mme Andikpebe Abasi”
MFỌNIDO. Mbọm. Edifen nnọ. Ima. Edi n̄kpọ mfụhọ nditịn̄ ke ọsọsọn̄ ndikụt mme owo ẹnyenede utọ nti edu emi mfịn. Nso kaban̄a fi? Ndi akanam emekere ke imọ idikemeke ndinyene nti edu tutu amama? Esịt ekeme ndibian̄a fi anam ekere ke ndiọi edu oro ẹma ẹkedọn̄ n̄kam ke esịt fo m̀mê mme n̄kpọ oro ẹketịbede ke edem idiyakke enyene nti edu tutu amama. Edi Bible ekpep nnyịn akpanikọ emi—oro edi ke Andibot ọfiọk ke nnyịn imekeme ndinyene nti edu.
Ikọ Abasi eteme ata mme Christian ete: “Mmọdo, ẹdi mme andikpebe Abasi, nte ndima nditọ.” (Ephesus 5:1) Ikọ oro owụt ke Abasi enen̄ede enyene mbuọtidem ke idem mbon oro ẹtuakde ibuot ẹnọ imọ. Didie? Jehovah Abasi okobot owo ke mbiet Esiemmọ. (Genesis 1:26, 27) Ntre Abasi okobot mme owo ye mme edu oro ẹbietde esie. * Ntem, ke ini Bible ọdọhọde mme Christian “ẹdi mme andikpebe Abasi,” etie nte n̄kpọ eke Jehovah ke idemesie ọdọhọde mmọ ẹte: ‘Mmenyene mbuọtidem ke idem mbufo. Mmọfiọk ke okposụkedi mbufo ẹdide mme anana-mfọnmma owo, ke ẹmekeme nditie nte ami ke ndusụk udomo.’
Nso idi ndusụk edu Abasi oro ikemede ndikpebe? Mme ufan̄ikọ oro ẹdude ẹkpere ẹbọrọ. Paul ekebem iso ọdọhọ “mmọdo,’ ekem eteme nnyịn ete ikpebe Abasi. Ikọ emi enyene ebuana ye ufan̄ikọ oro ekebemde iso, emi akasiakde mfọnido, mbọm, ye edifen nnọ. (Ephesus 4:32; 5:1) Ekem ke ufan̄ikọ oro etienede enye oro ọdọhọde ikpebe Abasi, Paul ọdọhọ mme Christian ẹnam n̄kpọ oro owụtde ke mmọ ẹnen̄ede ẹma mme owo. (Ephesus 5:2) Ke akpanikọ, Jehovah Abasi edi akakan owo oro nnyịn ikpekpebede ke ndifọn ido, nditua owo mbọm, ndifen nnọ owo ke ofụri esịt, nnyụn̄ mma ima.
Ntak emi nnyịn ikpekpebede Abasi? Paul etịn̄ ntak ete: “Ẹdi mme andikpebe Abasi, nte ndima nditọ.” Ndi inemke fi ndidi eyen Abasi? Jehovah ada mbon oro ẹtuakde ibuot ẹnọ enye nte nditọ emi enye enen̄erede ama. Ukem nte ekpri eyen odomode nditie nte ete esie, ntre ke ata mme Christian ẹdomo nditie nte Ete mmọ eke heaven.
Jehovah inyịkke mme owo ite ẹkpebe imọ. Utu ke oro, enye ọnọ nnyịn ifụre ndimek se iyomde ndinam. Ntre, esịne fi ke ubọk ndibiere m̀mê eyekpebe Abasi m̀mê udûkpebeke. (Deuteronomy 30:19, 20) Edi kûdedei ufre ke emekeme ndinyene mme edu Abasi. Nte ededi, man ekpebe Abasi, ana ebem iso ọfiọk mme edu esie. Bible ekeme ndin̄wam fi ọfiọk mme edu emi, ndien mme anana-mbiet edu emi ẹnam ediwak miliọn owo ẹkpebe enye.
[Ikọ Idakisọn̄]
^ ikp. 5 Colossae 3:9, 10 owụt ke nnyịn ibiet Abasi ke edu. Bible esịn udọn̄ ọnọ mbon oro ẹyomde ndinem Abasi esịt ete “ẹmen obufa owo ẹsịne,” emi “ẹnamde edi obufa ebe ke nnennen ifiọk nte asan̄ade ekekem ye mbiet [Abasi] oro okobotde enye.”