Anie Ekeme Ndifiọk Ini Iso?

‘Ami ndi Abasi. Emi nsiakde akpatre ke akpa, ndien ke eset nsiak se mînamke kan̄a.’—Isaiah 46:9, 10.

KE EYO emi mînyeneke iwụk mi, ntaifiọk ẹkpep se iketịbede ke eset ẹnyụn̄ ẹse nte n̄kpọ etiede idahaemi man ẹfiọk se iditịbede ke ini iso. Mbon eken ẹbụp ekpo ẹnyụn̄ ẹbre idiọn̄ man ẹfiọk se iditịbede inọ mmọ ke ini iso. Se isitịbede inọ mmọ isidịghe se mmọ ẹkekerede. Ndi emi ọwọrọ ke nnyịn ikemeke ndifiọk se iditịbede inọ ererimbot emi, se iditịbe inọ ubon nnyịn, ye owo nnyịn kiet kiet? Ndi owo ndomokiet ekeme ndinen̄ede mfiọk se iditịbede ke ini iso?

Nte ẹwụtde ke enyọn̄ emi, se Jehovah, kpa Ata Ọkpọsọn̄ Abasi, eketịn̄de ọnọ prọfet Isaiah owụt ke imọ imekeme nditịn̄ ini iso. Abasi ama ada Isaiah etịn̄ nte ke nditọ Israel ẹyewọrọ ke ntan̄mfep ke Babylon ẹnyụn̄ ẹfiak ẹkebọp Jerusalem ye temple. Ndi ntịn̄nnịm ikọ emi ama osu? Ke n̄kpọ nte isua 200 mbemiso ẹkekande Babylon, Isaiah ama etịn̄ nnennen nnennen ete ke owo emi edikande Babylon edikere Cyrus. N̄ko-n̄ko, enye ama etịn̄ nnennen nnennen nte Cyrus edisan̄ade anam emi—nte ke enye ọyọwọn̄ọde Akpa Euphrates emi mîkesiyakke mme owo ẹbe ẹdụk Babylon. Enye ama akam etịn̄ ke Cyrus oyokụt ẹbererede ikpọ itịm Babylon ẹnịm in̄wan̄, anamde Cyrus akan mmemmem mmemmem.—Isaiah 44:24–45:7.

Owo ikemeke nditịn̄ ini iso, Abasi kpọt ekeme. Enyene-ọniọn̄ Edidem Solomon ekewet ete: “Kûbụre mbụre uban̄a n̄kpọn̄: koro afo mûfiọkke se usen kiet edimande.” (Mme N̄ke 27:1) Ikọ emi edi akpanikọ. Idụhe owo emi ekemede nditịn̄ se iditịbede inọ enye ke ini iso. Edi ntak emi Abasi ekemede? Koro enye enen̄ede ọfiọk kpukpru n̄kpọ oro enye obotde, esịnede obot ye ekikere owo. Abasi ekeme ndibem iso n̄kụt ata nnennen nnennen se owo kiet kiet ye ofụri idụt ẹdinamde edieke enye oyomde. Ke adianade do, enye enen̄ede enyene odudu ndise mban̄a mme n̄kpọ oro ẹditịbede. Ke ini enye adade prọfet esie etịn̄ ke n̄kpọ eyetịbe, “enye [esisọn̄ọ] owụk ikọ owo esie, onyụn̄ anam item mme isụn̄utom esie ọwọrọ.” (Isaiah 44:26) Ke akpanikọ, Jehovah Abasi kpọt ekeme ndinam emi.

Se ikande isua 700 ẹma ẹbe tọn̄ọ Isaiah akakpa mbemiso Jesus, kpa Messiah, edimana. Edi, Isaiah ama etịn̄ ntịn̄nnịm ikọ aban̄a edidi Messiah. Nte ededi, ọtọn̄ọde ke ọyọhọ isua ikie 18 ka iso, mbon oro mînịmke Bible ke akpanikọ ẹdọhọ ke n̄wed Isaiah edi n̄wed abian̄a. Mmọ ẹdọhọ ke mme ntịn̄nnịm ikọ Isaiah idịghe ata ntịn̄nnịm ikọ, edi ke ẹkewet mmọ ke mme n̄kpọ emi ẹma ẹketịbe. Ndi emi edi akpanikọ? Ke 1947, ẹma ẹkụt n̄wed Isaiah, ọkọrọ ye n̄kani ikpan̄wed eset eken ke abaitiat emi odude ekpere Inyan̄ Inụn̄, oro ẹwụtde ke se mbon oro mînịmke Bible ke akpanikọ ẹtịn̄de inenke. Nditọ ukpepn̄kpọ Bible ẹdọhọ ke n̄wed Isaiah emi ama ododu ke se ibede isua ikie mbemiso ẹkemande Messiah m̀mê Christ oro ẹkebemde iso ẹtịn̄  ẹban̄a. Ke akpanikọ, Bible anam ifiọk se iditịbede ke ini iso!

Isaiah ye mbon eken oro ẹketienede ẹwet Bible ikpekekemeke ndida ifiọk idem mmọ ntịn̄ ini iso. Utu ke oro, mmọ “ẹketịn̄ ikọ ẹto Abasi nte edisana spirit akadade mmọ usụn̄.” (2 Peter 1:21) Ke mme ibuotikọ oro ẹditienede, nnyịn iyeneme ndusụk n̄kpọ ẹban̄ade uwem Jesus, oro ẹkedade Isaiah ẹtịn̄. Ekem nnyịn iyeneme mme n̄kpọ oro Jesus ye mme mbet esie ẹkedọhọde ke ẹyetịbe ke eyo nnyịn ye ke ini iso.