Mme Ntịn̄nnịm Ikọ Oro Ẹdisude ke Mîbịghike

APOSTLE Peter ama etịn̄ aban̄a se iditịbede inọ owo ye isọn̄ ke ini iso ete: “Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ [Abasi], ndien edi mi ke edinen ido edidụn̄.” (2 Peter 3:13) Ẹkewet akpa ntịn̄nnịm ikọ aban̄ade  “mbufa enyọn̄ ye obufa isọn̄” ke n̄wed Isaiah. (Isaiah 65:17; 66:22) Peter ndikot nto ntịn̄nnịm ikọ emi okowụt ke enye ikosụhu kan̄a ofụri ofụri ke eyo esie.

Ediyarade oro ẹkenọde apostle John ke isua 32 ẹma ẹkebe ama owụt ke “obufa isọn̄” edidi kiet ke otu mme edidiọn̄ Obio Ubọn̄ Abasi. (Ediyarade 21:1-4) Se Jesus ye apostle Paul ẹkedọhọde ke eyetịbe ke ererimbot esisịt ini mbemiso Obio Ubọn̄ Abasi edide ke ẹsu idahaemi. Mmọdo, nnyịn imekeme ndidori enyịn ke Obio Ubọn̄ oro ayanam isọn̄ akabade edi obufa ke mîbịghike. Obufa ererimbot oro editie didie? N̄wed Isaiah asian nnyịn.

Mme Edidiọn̄ Obufa Ererimbot

Mme Owo Ẹyedu ke Emem ke Ofụri Ererimbot Ẹnyụn̄ Ẹdiana Kiet Ẹtuak Ibuot. “Mmọ ẹyeda ofụt mmọ ẹdom n̄kpọ ufụn̄ isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.”—Isaiah 2:2-4.

Mme Owo ye Unam Ẹyedu ke Emem. “Wolf oyodụn̄ ye eyen erọn̄, nawụri-ekpe oyonyụn̄ osụhọde ana ye eyen-ebot: eyen-enan̄, ye abak lion, ye enan̄ ubom, ẹyenyụn̄ ẹna ọtọ kiet: ekpri eyen-ọwọn̄ oyonyụn̄ akama mmọ. Ndien uman enan̄ ye bear ẹyeta mbiet; nditọ mmọ ẹyesụhọde ẹna ọtọ kiet: lion oyonyụn̄ ata nnyanyan̄a nte enan̄. . . . Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.”—Isaiah 11:6-9.

Udia Oyodu Barasuene. “Ke obot emi ke Jehovah mme udịm edinam akamba udia ọnọ kpukpru mme idụt, n̄kpọ eke enyenede isek, ndia ke wine eke anade ke ntak, ke n̄kpọ eke ẹnyenede isek, ẹnyụn̄ ẹwakde ndia, wine ke ntak eke ẹtịmde ẹdụk.”—Isaiah 25:6.

N̄kpa Ididụhe Aba. “Enye [Abasi] eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep; oyonyụn̄ osio esuene ikọt esiemmọ ke ofụri ererimbot efep: koro edi Jehovah ọdọhọ.”—Isaiah 25:8.

Mme Akpan̄kpa Ẹyeset. “Mme akpa-n̄kpa fo ẹyedu uwem, mme okpo mi ẹyebụhọde. Mbufo emi ẹdụn̄de ke ntan ẹdemede, ẹkwọ: . . . isọn̄ ayaman mme [okpo].”—Isaiah 26:19.

Messiah Edinen Ebiereikpe. “Enye idikpehe ikpe nte esede ke enyịn, idinyụn̄ ibiereke ikọ nte okopde ke utọn̄: edi eyekpe ikpe mme ubuene esịn ke edinen, onyụn̄ ebiere ikọ nte enende ọnọ sụn̄-sụn̄ mbio isọn̄.”—Isaiah 11:3, 4.

 Nnan Oyokụt Usụn̄, Inan Okop N̄kpọ. “Enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan.”—Isaiah 35:5.

N̄kpọ Eyesehe ke Nsatisọn̄. “Wilderness ye nsat-isọn̄ ẹyedara; desert oyonyụn̄ ebre, onyụn̄ asiaha ikọn̄ nte rose. Ọyọdiọn̄ asiaha ikọn̄, onyụn̄ ebre mbre, onyụn̄ ọkwọ.”—Isaiah 35:1, 2.

Obufa Isọn̄. “Mmọn̄ mbot mbufa enyọn̄ [obufa ukara eke heaven] ye obufa isọn̄ [obufa ndinen ubonowo], ndien owo iditịghi aba akpa oro, idinyụn̄ idụkke owo ke esịt. Edi mbufo ẹdat esịt, ẹnyụn̄ ẹbre nsinsi ke se ami mbotde: . . . Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ [mme andidụn̄ ke obufa ererimbot oro Abasi ọn̄wọn̄ọde] idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ebietde usen eto, ndien edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọ ndịk: koro mmọ ye ubon mmọ n̄ko ẹdide nditọ mmọ eke Jehovah ọdiọn̄de. Ndien ama ekem, ke mmọ mîka-ikotke kan̄a, ami nyeyere: ke mmọ ẹsụk ẹdọhọde ikọ, ami nyokop.” “Kpa nte mbufa enyọn̄ ye obufa isọn̄, emi ndinamde, ẹdade ke iso mi kpa ntre ke nditọ mbufo ye enyịn̄ mbufo ẹdida: emi edi uyo Jehovah.”—Isaiah 65:17-25; 66:22.

Ntịn̄nnịm Ikọ Oro Aban̄ade Utịbe Utịbe Ini Iso

Isaiah idịghe n̄kukụre n̄wed Bible oro etịn̄de mme edidiọn̄ oro ẹnade ẹbet nnyịn ke ini iso. Mme ntịn̄nnịm ikọ oro ẹban̄ade utịbe utịbe n̄kpọ oro Abasi edidade Christ anam ke Obio Ubọn̄ esie ẹyọyọhọ Bible. * Ndi akpama ndidu uwem ke utọ eti idaha emi? Afo emekeme! Dụn̄ọde se Bible enen̄erede ekpep aban̄a nti n̄kpọ oro Abasi aduakde ndinam ke ini iso, nyụn̄ kpep se akpanamde man odu do. Mme Ntiense Jehovah ẹyenem esịt ndin̄wam fi.

[Ikọ Idakisọn̄]

[Ndise ke page 8]

Mme owo ẹyedu ke emem ye kiet eken ẹnyụn̄ edu ke emem ye mme unam

[Ndise ke page 9]

Mme akpan̄kpa ẹyeset

[Ndise ke page 10]

Ofụri isọn̄ ayakabade edi paradise