Kpep Nditọ Fo

Ndi Akanam Emefịbe Ufụp? Nditọete Joseph Ẹma Ẹfịbe

YAK itịn̄ se ndifịbe ufụp ọwọrọde. Ndi akanam ọsọn̄ fi ndima owo sia mme owo ẹtorode enye, ẹdọhọde ke enye eye, m̀mê ọfiọk n̄kpọ? *— Ọfọn, emi ekeme nditịbe edieke efịbede owo.

Eyeneka ekeme ndifịbe eyeneka edieke ete ye eka ẹmade kiet ẹkan enye eken. Bible etịn̄ aban̄a ubon kiet oro ufụp akamande akamba mfịna. Yak ineme mfịna oro ye se ikemede ndikpep nto emi.

Joseph ekedi ọyọhọ eyen Jacob 11, ndien nditọete Joseph ẹma ẹfịbe enye ufụp. Ndi ọmọfiọk ntak?— Sia Jacob ete mmọ ama ama Joseph. Ke uwụtn̄kpọ, Jacob ama ekịm ediye ọfọn̄idem ọnọ Joseph. Jacob ama enen̄ede ama Joseph ‘koro enye ekedide eyen usọn̄ esie,’ ye akpa eyen emi Rachel edima n̄wan esie akamande.

Bible ọdọhọ ke ‘adan̄aemi nditọete Joseph ẹkụtde nte ete mmọ amade Joseph akan, mmọ ẹsua enye.’ Ekem Joseph ama ọdọhọ ubon mmọ usen kiet ete ke imọ ikadaba ndap ndien kpukpru mmọ, esịnede ete imọ, ẹtuak ibuot ẹnọ imọ. Bible ọdọhọ ke “nditọ-ete esie [ẹma] ẹfịbe enye ufịp,” ete esie onyụn̄ asua ọnọ enye ke nditịn̄ utọ ndap oro.—Genesis 37:1-11.

Nte ini akakade, ke ini Joseph ekedide isua 17, nditọete esie ẹma ẹka ndikpeme erọn̄ ye ebot mmọ ke anyan ebiet. Ntre Jacob ama ọdọhọ Joseph aka ekese nte n̄kpọ etiede ye mmọ. Ndi ọmọfiọk se ata ediwak mmọ ẹkeyomde  ndinam ke ini ẹdade ẹkụt enye?— Mmọ ẹkeyom ndiwot enye! Edi owo iba ke otu mmọ, Reuben ye Judah, ikoyomke ẹwot enye.

Ke ini ndusụk mme anyamurua ẹkebede ẹka Egypt, Judah ọkọdọhọ ete: ‘Ẹyak inyam enye.’ Ntre mmọ ẹma ẹnyam enye. Mmọ ẹma ẹwot ebot ẹnyụn̄ ẹmen ọfọn̄idem Joseph edebi ke iyịp ebot oro. Ekem mmọ ẹma ẹmen ọfọn̄idem oro ẹkewụt ete mmọ, ndien enye atua ete: ‘Idiọk unam amata Joseph!’—Genesis 37:12-36.

Nte ini akakade, Pharaoh emi akakarade Egypt ama edima Joseph. Ntak ekedi ke Abasi ama anam Joseph ekeme nditịn̄ se ndap iba oro Pharaoh akadabade ẹwọrọde. Akpa, Pharaoh ama okụt ndiye enan̄ itiaba ye ndiọi enan̄ itiaba ke ndap. Ọyọhọ iba, enye okụt ndiye ibokpot itiaba ye ndiọi ibokpot itiaba. Joseph ọkọdọhọ ke ndap mbiba emi ẹwọrọ ke udia eyenen̄ede odu ke isua itiaba ekem akan̄ odu ke isua itiaba. Pharaoh ama emek Joseph ndise mban̄a utom edikọ udia mbon ke isua itiaba oro udia ekenen̄erede odu man ẹtịm idem ẹnọ ini akan̄.

Ke ini akan̄ oro ọkọtọn̄ọde, ubon mme Joseph emi ẹkedụn̄de ẹyom usụn̄ ẹma ẹyom udia. Jacob ama ọdọhọ ikpọ nditọete Joseph duop eken ẹka Egypt ẹkedep udia. Mmọ ẹma ẹdikụt Joseph edi ikọfiọkke enye. Joseph ama odomo nditọete esie ese inyụn̄ iyakke mmọ ẹfiọk imọ, onyụn̄ okụt ke mmọ ẹnen̄ede ẹkabade esịt. Ekem enye ama asian mmọ ke imọ idi Joseph. Ntre, mmọ ẹma ẹfat enye ẹnyụn̄ ẹkop idatesịt!—Genesis, ibuot 40 esịm 45.

Nso ke mbụk Bible emi ekpep fi aban̄a ufụp?— Ufụp ekeme ndiman akamba mfịna, idem anamde owo oyom ndiwot eyeneka esie. Yak ikot Utom 5:17, 18 ye Utom 7:54-59 man ise se ufụp akanamde mme owo ẹnam mme mbet Jesus.— Ndi omokụt ntak emi mîkpanaha ifịbe ufụp?—

Joseph ama odu uwem esịm isua 110. Enye ama enyene nditọ, nditọ nditọ, ye nditọ nditọ-nditọ. Nnyịn imekeme ndinịm ke Joseph ama esikpep mmọ ndima kiet eken nnyụn̄ ntre ufụp.—Genesis 50:22, 23, 26.

[Ikọ Idakisọn̄]

Mme Mbụme:

○ Nso ke ndifịbe ufụp ọwọrọ?

○ Nso ke ufụp akanam nditọete Joseph ẹnam?

○ Ntak emi Joseph ekefende ọnọ nditọete esie?

○ Nso ke nnyịn ikeme ndikpep nto mbụk emi?