Ndi Ama Ọfiọk?

Ntak emi mme Jew ẹkesitọn̄ọde Sabbath mmọ ke mbubịteyo?

Ke ini Jehovah ọkọnọde ikọt esie ibet oro aban̄ade Usen Usio-Isop, enye ọkọdọhọ ete: ‘Mbufo ẹkûnam baba ubọk-utom kiet ke idem usen emi: mbufo ẹnịm enye ke akakan sabbath, ọtọn̄ọde ke mbubịteyo tutu esịm ke mbubịteyo, ke mbufo ẹdinịm sabbath mbufo.’ (Leviticus 23:28, 32) Ewụhọ emi owụt ke ẹkesitọn̄ọ ke mbubịteyo ẹbat usen kiet kiet, oro edi, ke utịn ama okosop tutu esịm edem usen ke utịn ama okosop n̄ko. Mme Jew ẹkesida mbubịteyo sịm mbubịteyo nte usen kiet.

Ntre ke Abasi ke idemesie akabat usen. Mbụk aban̄ade ndamban̄a akpa usen oro ẹkebotde n̄kpọ ọdọhọ ete: “Mbubịteyo ye usenubọk ẹdi akpa usen.” Ntre ke Abasi akabat mme “usen” eken, ọtọn̄ọde ke “mbubịteyo.”—Genesis 1:5, 8, 13, 19, 23, 31.

Idịghe mme Jew kpọt ẹkesitọn̄ọ ke mbubịteyo ẹbat usen. Mbon Athens, mbon Numidia, ye mbon Phoenicia ẹkesibat ntre n̄ko. Edi mbon Babylon ẹkesitọn̄ọ ke usenubọk ẹbat obufa usen, ke adan̄aemi mbon Egypt ye mbon Rome ẹkesitọn̄ọde ke ufọt okoneyo ẹbat usen mmọ, nte nnyịn isikam inamde mfịn. Nte ededi, mme Jew mfịn ẹsụk ẹnenịm Sabbath mmọ ke utịn ama okosop.

Nso ikedi “isan̄ usen sabbath kiet”?

Ke ini mme mbet ẹkekụtde Jesus otode Obot Olive ọdọk heaven, mmọ ẹma ẹfiak ẹnyọn̄ọ Jerusalem emi ekedide “isan̄ usen sabbath kiet.” (Utom 1:12) Owo ekeme ndisan̄a n̄kpọ nte kilomita 30 m̀mê akande oro ke usen kiet. Nte ededi, Obot Olive iyomke usụn̄ ikpọn̄ Jerusalem. Ntre, nso ke “isan̄ usen sabbath kiet” ọwọrọ?

Sabbath ekedi usen nduọkodudu ọnọ nditọ Israel. Ikanaha mmọ ẹbara ikan̄ ke ufọk mmọ usen oro. (Exodus 20:10; 35:2, 3) Jehovah okowụk ete: “Kpukpru mbufo ẹtie ke itie mbufo; owo baba kiet okûwọrọ ọkpọn̄ ọtọ esie ke ọyọhọ usen itiaba.” (Exodus 16:29) Ibet emi ama ayak nditọ Israel ẹduọk odudu ẹnyụn̄ ẹnen̄ede ẹtịn̄ enyịn ke n̄kpọ Abasi.

Mme rabbi emi ẹkedide mme ama-ibet ikoyụhọke ye mme edumbet oro Ibet Jehovah eketemede, ntre mmọ ẹma ẹsiak ibat kilomita oro owo akpasan̄ade ke usen Sabbath, ke uwụtn̄kpọ, man aka akatuak ibuot ọnọ Abasi. Cyclopedia of Biblical, Theological, and Ecclesiastical Literature etịn̄ aban̄a emi ete: “Ke ntak n̄kpọsọn̄ ibet oro ẹkenịmde ke usen Sabbath . . . ẹma ẹsiak ibat kilomita oro mîkpanaha eyen Israel asan̄a ebe, ndien emi ke ẹkekot isan̄ usen Sabbath kiet.” Oro ekedi n̄kpọ nte kilomita kiet.

[Ndise ke page 11]

Nte Jerusalem etiede ke ini ẹdade ke Obot Olive ẹse