Nte Mbuọtidem Mi Akan̄wamde Mi Nyọ Afanikọn̄

Nte Soledad Castillo obụkde

Ediwak n̄kpọ ẹma ẹtịbe ẹnọ mi oro ẹkpekenamde ndobo emen mi emen—edi ikekemeke. Edima ebe mi ama akpa ke ini n̄kedide isua 34. Ndien ke isua itiokiet ẹbede, ete mi ama akpa. Ke ọfiọn̄ itiaita ẹbede tọn̄ọ nte ete mi akakpa, ẹma ẹdọhọ mi ke ikpọn̄-ikpọn̄ eyen mi enyene udọn̄ọ oro usọbọ mîdụhe.

AMI n̄kere Soledad, emi ọwọrọde “Ndobo.” Enyịn̄ emi ekeme ndikpa fi idem, edi akanam nnen̄ekede n̄kop ndobo. Ke ini n̄kosobode mme afanikọn̄, mma mfiọk ke Jehovah Abasi mmọdo ye ami, ‘ke enye omụm mi ubọk onyụn̄ an̄wam mi man ami ndikop ndịk.’ (Isaiah 41:13) Yak ntịn̄ nte n̄kọyọde mme afanikọn̄ oro n̄kosobode ye nte mmọ ẹkenamde nnen̄ede nsan̄a n̄kpere Jehovah.

Uwem Ama Enem Mi, Nkonyụn̄ Nnyeneke Ekese Mfịna

N̄kamana ke Barcelona ke Spain ke May 3, 1961, ndien ami n̄kedi ikpọn̄-ikpọn̄ eyen nnọ ete ye eka mi, José ye Soledad. Eka mi ama ekpep akpanikọ emi odude ke Ikọ Abasi ke ini n̄kedide isua usụkkiet. Enye ama esibụp ekese mbụme aban̄a se ẹkekpepde enye ke ufọkabasi mmọ, edi mbon ufọkabasi mmọ ikekemeke ndinọ enye nnennen ibọrọ. Usen kiet, Mme Ntiense Jehovah iba ẹma ẹka ufọk esie ẹnyụn̄ ẹda N̄wed Abasi ẹbọrọ kpukpru mbụme oro enye okobụpde. Enye ama enyịme mmọ ẹsikpep imọ Bible.

Ikebịghike, eka mi ama ana baptism nte kiet ke otu Mme Ntiense Jehovah, ndien ke isua ifan̄ ẹbede, ete mi n̄ko ama akabade edi kiet ke otu Mme Ntiense Jehovah. Eliana emi ekekpepde eka mi Bible ama okụt ke mmenen̄ede mma Ikọ Abasi. Okposụkedi n̄kedide eyenọwọn̄, Eliana ama ọdọhọ ke iyesikpep mi Bible. Ke ntak un̄wam esie ye nsịnudọn̄ oro eka mi ọkọnọde mi, mma nna baptism ke ini n̄kedide isua 13.

Mma nsibọn̄ akam kpukpru ini nnọ Jehovah ke ini uyen mi—akpan akpan ke ini n̄koyomde ndinam ubiere. Ke akpanikọ, n̄kenyeneke ekese mfịna ke ini n̄kedide n̄kaiferi. Mma nnyene ediwak ufan ke esop, ndien mma nnen̄ede n̄kpere ete ye eka mi idem. Ke 1982, ami ye Felipe ima idọ ndọ, enye n̄ko okoyom ndika iso nnam n̄kpọ Jehovah ukem nte ami.

Ndikpep Eyen Nnyịn Ama Jehovah

Ke isua ition ẹma ẹkebe, mma mman ediye eyeneren emi ikosiode Saúl. Esịt ama enen̄ede enem nnyịn ndinyene eyen. Nnyịn ima idori enyịn ke eyen nnyịn ọyọkọri, okop nsọn̄idem, onyụn̄ ama Abasi. Ami ye ebe mi ima  isibiat ekese ini ye enye, ineme nneme ye enye iban̄a Jehovah, idia udia ọtọkiet, ida enye ika itie unọ idem inemesịt, inyụn̄ ibre mbre ye enye. Saúl ama esima ndisan̄a ye ete esie n̄ka ukwọrọikọ; ete esie ama esinyụn̄ ekpep enye ndimia n̄kanika enyịnusụn̄ nnyụn̄ nnọ mme owo tract toto ke ini enye ekedide ekpri eyenọwọn̄.

Eyen nnyịn ama enen̄ede okop inem ke ntak ima ye ukpep oro ikọnọde enye. Enye ama esisan̄a ye nnyịn ọkwọrọ ikọ kpukpru ini ke ini enye ekedide isua itiokiet. Enye ama esima ndikpan̄ utọn̄ n̄kop mme mbụk Bible, ndien enye ekesitetie ebet ukpepn̄kpọ Bible oro ikesinịmde ke ubon. Ke ini enye ọkọtọn̄ọde ufọkn̄wed, enye ama ọtọn̄ọ ndida ifiọk Bible oro enye ekenyenede nnam n̄kpri ubiere.

Edi, n̄kpọ ama enen̄ede okpụhọde ke ubon nnyịn ke ini eyen nnyịn ekedide isua itiaba. Ebe mi ama enyene udọn̄ọ ke obufre. Udọn̄ọ emi ama otụhọde enye ke ọfiọn̄ 11, enye ikekemeke ndinam utom, ekesinyụn̄ ana ke bed kpukpru ini. Enye ama akpa ke ini ekedide isua 36.

Nsisụk ntatua ke ini ntide isua oro. Mma n̄kụt nte udọn̄ọ oro akadiade ebe mi idem sụn̄sụn̄, edi n̄kekemeke ndinam n̄kpọ ndomokiet. Ke ofụri ini oro, mma ndomo ndika iso nsịn udọn̄ nnọ ebe mi, kpa ye oro n̄kọfiọkde ke n̄kpọ iditiehe aba nte n̄kekerede. Mma nsikot mme n̄wed Ikọ Abasi nnyịn nnọ enye, ndien emi ama esisọn̄ọ nnyịn idem ke ini nnyịn mîkekemeke ndidụk mme mbono esop Christian. Ibuot ama oyon̄ mi ke ini enye akakpade.

Edi Jehovah ama ọsọn̄ọ mi idem. Mma mben̄e enye kpukpru ini nte ọnọ mi spirit esie. Mma n̄kọm Jehovah mban̄a mme isua oro n̄kadarade uwem ye ebe mi nnyụn̄ n̄kọm enye mban̄a idotenyịn edifiak n̄kụt ebe mi ke ini mme akpan̄kpa ẹdisetde. Mma mben̄e Abasi nte an̄wam mi n̄kop inemesịt ke ini ntide kpukpru n̄kpọ oro ami ye ebe mi ikesinamde ọtọkiet, onyụn̄ ọnọ mi ifiọk nda mbọk eyen nnyịn man enye akabade edi ata Christian. Mma n̄kop ndọn̄esịt kpa ye akwa ubiak oro.

Ete ye eka mi ye mbon esop nnyịn ẹma ẹnen̄ede ẹn̄wam mi. Edi akana n̄kpep eyen mi Bible nnyụn̄ n̄kpep enye ndinam n̄kpọ Jehovah. Akani eteutom mi ama ọnọ mi eti utom ọfis, edi n̄kama ndinam utom nte andinam ufọk asana man nnyene ekese ini ndu ye eyen mi ke ini enye ọnyọn̄de n̄wed edi.

Itie N̄wed Abasi kiet ama anam mfiọk ke edi akpan n̄kpọ ndikpep eyen mi ama Abasi. Enye ọdọhọ ete: “Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.” (Mme N̄ke 22:6) Itie N̄wed Abasi emi ama ọnọ mi idotenyịn nte ke Jehovah ọyọdiọn̄ ukeme oro nsịnde ndikpep Saúl eyen mi ama Abasi. N̄kenen̄ekede nsịn idem n̄n̄wana okụk sia n̄koyom ndinyene ini ndu ye eyen mi, ndien emi ekenen̄ede edi akpan n̄kpọ ọnọ mi akan inyene ekededi.

 Ete mi ama akpa ke ini Saúl eyen mi ekedide isua 14. N̄kpa emi ama anam idem enen̄ede emem eyen mi, sia emi ama anam enye eti nte n̄kpa ete esie akabiakde enye. Ete mi n̄ko ama ama Jehovah. Ke ete mi ama akakpa, eyen mi ama ọfiọk ke imọ ikpọn̄ ididi n̄kukụre erenowo oro osụhọde ke ufọk, ntre ana imọ ise iban̄a eka ye ekaeka imọ.

Ndin̄wana ye Kansa Afia Nsen Iyịp

Ke ọfiọn̄ itiaita ẹma ẹkebe tọn̄ọ nte ete mi akakpa, abiausọbọ nnyịn ama ọdọhọ mmen Saúl n̄ka ufọkibọk sia idem ekenen̄erede emem enye. Ke ẹma ẹkese enye idem ẹma, mbiausọbọ ẹma ẹdọhọ mi ke enye ọdọn̄ọ kansa afia nsen iyịp.

Udọn̄ọ oro ama anam eyen mi esika ufọkibọk ke ubọk ke ubọk ke ofụri isua iba ye ubak. Usọbọ oro ẹkenọde enye ke akpa ọfiọn̄ itiokiet ama anam idem afiak ọsọn̄ enye ke n̄kpọ nte isua kiet ye ubak. Ekem udọn̄ọ oro ama afiak ọtọn̄ọ, ndien usọbọ oro ẹkenọde enye ama anam idem enen̄ede emem enye. Udọn̄ọ oro ama afiak ọnọ enye utan̄ifia ke esisịt ini, edi eyen mi ikekemeke aba ndibọ usọbọ oro ọyọhọ ikata. Enye ama ayak idem esie ọnọ Abasi onyụn̄ ọdọhọ ke imoyom ndina baptism nte kiet ke otu Mme Ntiense Jehovah, edi n̄kpa ama ada enye ke ndondo oro enye esịmde isua 17.

Mbiausọbọ ẹma ẹsidọhọ ẹsịn eyen mi iyịp man osụhọde ide usọbọ oro ẹkesinọde enye. Edi edikịm iyịp nsịn ke idem ikemeke ndikọk udọn̄ọ oro. Ke ini mbiausọbọ ẹkedọhọde ke eyen mi ọdọn̄ọ kansa afia nsen iyịp, ami ye enye ima itịn̄ in̄wan̄-in̄wan̄ ke nnyịn idinyịmeke ẹsịn enye iyịp sia nnyịn ikoyom ndinịm ibet Jehovah oro ọdọhọde “ẹbet iyịp.” (Utom 15:19, 20) Ediwak ini oro mmen̄kodụhe ye eyen mi ke ufọkibọk, enye ama esidọhọ mbiausọbọ ke imọ ibiere ke idem imọ nditre ndibọ iyịp. (Se ekebe oro odude ke page 31.)

Ke akpatre, mbiausọbọ oro ẹma ẹdọhọ ke eyen mi ọdiọn̄ọ idem etieti, ke enye onyụn̄ enen̄ede ọfiọk utọ udọn̄ọ oro enye ọdọn̄ọde. Mmọ ẹma ẹnyịme ndikpono ubiere nnyịn nnyụn̄ nsọbọ enye idem ye unana edisịn enye iyịp, kpa ye oro, mmọ ẹkesisụk ẹdọdọhọ nnyịn ke ini ke ini ẹte ikpụhọde ekikere. Ama esinen̄ede enem mi ndikop eyen mi ọdọhọde mbiausọbọ oro ke imọ inyịmeke ẹsịn imọ iyịp. Ana in̄wan̄-in̄wan̄ nte ke enye ama enen̄ede ama Jehovah.

Isua oro eyen mi ọkọduọde udọn̄ọ ke ẹkesio n̄wed San̄a Kpere Jehovah ke mbono district nnyịn ke Barcelona. Ediye n̄wed oro ama enen̄ede an̄wam nnyịn isọn̄ọ ida iyọ mfịna ye editịmede esịt oro akanade nnyịn ke iso. Nnyịn ima isikot n̄wed emi ọtọkiet ke ini ikodude ke ufọkibọk. Nnyịn ima isiti se ikokotde ke ediwak ini oro n̄kpọ ẹkenen̄erede ẹsọn̄. Ini oro ke mme ikọ oro ẹdude Isaiah 41:13, emi ẹsiakde ke mbemiso ikọ n̄wed oro ẹkenen̄ede ẹnyene se ẹwọrọde ẹnọ nnyịn. Enye ọdọhọ ete: “Koro ami Jehovah Abasi fo mmụmde fi ubọk nnasia, emi ndọhọde fi, nte, Kûfehe; ami n̄n̄wam fi.”

Mbuọtidem Eyen Mi Otụk Mme Owo

Ama enen̄ede enem mbiausọbọ ye mme nurse oro ẹnamde utom ke Ufọkibọk Vall d’Hebrón ndikụt nte eyen mi anamde n̄kpọ nte akwa owo onyụn̄ enyenede idotenyịn. Kpukpru mbon oro ẹkesede ẹban̄a enye ẹma ẹnen̄ede ẹma enye. Akwa abiausọbọ, emi esisọbọde udọn̄ọ kansa, esinen̄ede okpono nditọ Ntiense oro enye ọsọbọde kansa afia nsen iyịp. Enye eti nte eyen mi ọkọsọn̄ọde ada ke ubiere esie, nte enye ekenyenede uko kpa ye oro enye ọkọfiọkde ke imọn̄ ikpa, ye nte enye ekesikopde inemesịt. Mme nurse ẹma ẹdọhọ  eyen mi ke akananam mmimọ inyeneke owo udọn̄ọ oro ọfọnde nte enye. Mmọ ẹkedọhọ ke enye isisemeke idem, isinyụn̄ itreke ndinam mbubru—idem ke ini enye okoyomde ndikpa.

Mma kiet emi ekpepde n̄kpọ aban̄a ekikere owo ọkọdọhọ mi ke ediwak nditọwọn̄ oro ẹdọn̄ọde utọ udọn̄ọ n̄kpa oro ẹsisọn̄ ibuot ye mbiausọbọ ye mme ete ye eka mmọ ke ntak usụn̄ emi udọn̄ọ oro otụhọrede mmọ. Enye ama okụt ke eyen mi itiehe ntre. Idem ama akpa enye ndikụt eyen mi etiede ata emem emem onyụn̄ enyenede ido ntre. Emi ama ọnọ mi ye Saúl ifet ndikwọrọ ikọ nnọ enye.

Mmeti n̄ko nte eyen mi akan̄wamde Ntiense kiet ke esop nnyịn. Ntiense emi ama ofụhọ ke n̄kpọ nte isua itiokiet, ndien usọbọ oro enye ọkọbọde ikenyeneke ufọn. Ediwak ini, enye ama esitie ofụri okoneyo ese aban̄a eyen mi ke ufọkibọk. Enye ama ọdọhọ mi ke nte eyen mi akanamde n̄kpọ kpa ye oro enye ọkọdọn̄ọde idiọk udọn̄ọ ama enen̄ede otụk imọ. Enye ama okụt ke eyen mi ama esidomo ndisịn udọn̄ nnọ kpukpru mbon oro ẹkedide ndise enye, okposụkedi oro idem ekenen̄erede emem enye. Ntiense emi ọdọhọ ete: “Uwụtn̄kpọ Saúl ama ọnọ mi odudu ndiyọ mfụhọ mi.”

Isua ita ẹmebe idahaemi tọn̄ọ eyen mi akakpa. Nte ededi, n̄kpa esie osụk ababiak mi. Nnen̄ekede n̄kop idem, edi Abasi ọmọnọ mi “odudu eke ebede ukeme owo.” (2 Corinth 4:7) Se itịbede inọ mi ẹnam mi mfiọk ke owo ekeme ndikpep n̄kpọ nto mme afanikọn̄ ye mfịna oro enye osobode. Ndikpep ndiyọ n̄kpa ebe mi, eke ete mi, ye eke eyen mi ẹnam mi nsinen̄ede n̄kere mban̄a mbon oro ẹbọde ufen. Ke akande kpukpru, enye amanam mi nnen̄ede nsan̄a n̄kpere Jehovah. N̄kopke ndịk mban̄a ini iso koro Ete mi eke heaven ke osụk an̄wam mi. Enye ke osụk omụm mi ubọk.

[Ekebe/Ndise ke page 31]

NDI AKANAM EMEKERE?

Ekeme ndidi omokop ke Mme Ntiense Jehovah isikịmke iyịp isịn ke idem. Ndi akanam emekere ntak?

Ediwak owo isifiọkke ntak mmọ ẹsinamde item N̄wed Abasi emi. Ndusụk ini, mme owo ẹsikere ke Mme Ntiense Jehovah isibọhọ usọbọ ndomokiet m̀mê ke mmọ ikam idaha uwem ke n̄kpọ. Emi idịghe akpanikọ. Mme Ntiense Jehovah ẹsiyom ẹnọ mmimọ ye ubon mmimọ mfọnn̄kan usọbọ. Edi mmọ ẹsiyom ndibọ usọbọ oro owo mîbuakke iyịp. Ntak-a?

Ntak edi ke mmọ ẹnịm akpan ibet oro Abasi ọkọnọde ubonowo. Ke Ukwọ eyo Noah ama ekebe, Abasi ama enyịme Noah ye ubon esie ẹsita unam. Edi enye ama enịm ibet kiet emi: Ikanaha mmọ ẹdia iyịp. (Genesis 9:3, 4) Ofụri ekpụk ubonowo ẹmana ẹto Noah, ntre ibet emi ọbọp kpukpru owo. Akanam owo ikpụhọkede ibet emi. Ke se ikande isua ikie itiaita ẹma ẹkebe, Abasi ama afiak etịn̄ ibet emi ọnọ idụt Israel. Enye ọkọdọhọ ke iyịp edi edisana, n̄ko ke iyịp edi uwem. (Leviticus 17:14) Ke se ikande isua 1,500 ke ukperedem, mme apostle Christ ẹma ẹwụk kpukpru mme Christian ẹte “ẹbet . . . iyịp.”—Utom 15:29.

Ana in̄wan̄-in̄wan̄ nte ke Mme Ntiense Jehovah idibetke iyịp edieke mmọ ẹkịmde enye ẹsịn ke idem. Ntak edi oro mmọ ẹsiyomde usọbọ oro owo mîbuakke iyịp. Mmọ ndinam item N̄wed Abasi emi esinam mmọ ẹbọ usọbọ oro enen̄erede ọfọn. Eyịghe idụhe nte ke emi n̄ko esinam ediwak mbon oro mîdịghe Mme Ntiense Jehovah ẹyom usọbọ oro owo mîbuakke iyịp.

[Ndise ke page 29]

Ami ye Felipe ebe mi ye Saúl akpan nnyịn

[Ndise ke page 29]

Ete ye eka mi, José ye Soledad

[Ndise ke page 30]

Ọfiọn̄ kiet mbemiso Saúl eyen mi akakpade